Khedza Makhalelo Nya Yadi Ga Vambe

Gasi gigaradzo gyo khugeya hayi?

Gu mba khathala khu vambe si ngu gira muthu a manega ni gihatheya. Muthu nya mba khathala khu vambe na ni lizundza nya likhongolo. A gu dzi wona nari wa tshukwana ngudzu guvbindra vambe. Ni wevbini muthu si ngu kodzega gu a manega ni mapimo yoyo. Libhuku nyo khaguri lari khilo: “Vathu nya mitumbunugo nya yingi vo pimisa gu khavo mavbanyelo yawe, guhodza gwawe, maambalelo ni esi va si khodwago, khiso sakona nya sadi guvbindra sa vambe vathu.” Hi nga gira kharini gasi hi si manegi ni mapimo yoyo nyo dhadhavale?

Litshina nya nayo nya Bhibhiliya

“Khu gu dzi sodzisa, mu dzi gira va nyalidede ga vathu vatshavbo.” — VAFILIPI 2:3.

Litshina leli nya nayo lo hi hevbudza ginani? Gasi hi si khali vathu nyo dzi khusedze, gu vbwetega hi hevbula gu dzi nogisa. Ha gu dzi nogisa hi na si kodza gu wona gu khethu somo esi vambe va si kodzago gu gira hi gu mba si kodza ethu. Mwalo muthu nya thwi ga satshavbo.

Wona giyeyedzo gya Stefan. Dandrede omu nya litigo nyo ghanye ngudzu, ganiolu a si kodzide gu diga gu tshepeta vathu va omu nya mayigo nya mba ghanya. Wari khuye: “Nyi ngu khodwa gu kheni gu wona vambe na vari va tshukwana gwangu si na ni lisima ngudzu nigu si ngu tutumisa gihatheya. Khandri satshavbo nyi si tigo. Nyo vbweta gu hevbula gilogyo khu ga ni wevbi muthu.”

Esi u yedego gu gira

Dzumeya gu khuwe u na ni sihoso sago nuwe. Dzumeya gu khuwe somo silo vambe va si girago gwadi gu gu pala. U nga pimisi gu khuwe vathu vatshavbo va ngu gira sihoso nyo fane.

Vbavbandze nyo tutumeye gu pimisa silo nyo vivbe khu tsawa nyo khaguri nya vathu, dzi wudzise gu khuwe:

Dzumeya gu khuwe somo silo va girago vambe u si palago uwe

‘Makhalelo ma nyi girago nyi nyenya muthu nyo khaguri ma di vivba mwendro ma di hambana ni aya yangu basi?’
‘Muthu a ngu wona gihoso avbo gwangu?’
‘Khu sevbini siyemo esi muthu yoyo a wonegago nari ni wugengeyi gu nyi pala?’

Wa gu hlamula siwudziso sesi na si gu khugeya monyoni gwago, khu na nga songa gihatheya basi monyoni gwago, ganiolu u na tugula silo si na gu girago u mu hlamala muthu yoyo.

Giyeyedzo nya lisine: Nelson (Estados Unidos)

“Nyi na ni myaga nya yingi wuphyani wangu na nyi gu vbanya omu nya litigo eli gu nga ba gu tade khu vathu nya tshonge mweyo. Ganiolu, tepo nyi nga ba nyiri ni 19 myaga nyi di rura nyi hongola omu nya lidhoropa nya likhongolo nyi ya thuma omu nya fabrika nyo khaguri. Nyi di ya vbanya nyi bwe nyi thuma ni vathu nya dzitshonge ni midhawuko nya yingi.”

“Tepo nyi nga pheya gu tivana gwadi ni dzikolegha dzangu dza thumotunu nyi bwe nyi gira wupari nadzo, nyi di dzegeya gu si wona kamo gu kheni kha nyi na nga hevbula gilo ga edzi va thumago khidzo khu sighingi, ni edzi va tumbegago khidzo mwendro edzi va nga ba dzipwa khidzo nyo khedza tshonge yawe, lidimi lawe nya mavelego ni litigo lawe.”

“Khu hwane, nyi di tshadha ni nyamayi nya tshonge ni litigo nyo hambane nilo langu, nigu nyi tsakide ngudzu tepo nyi nga pheya guti guhodza nyo hambane-hambane ni dzimuzika nya dziphya gwangu. Guvbanya gu nyi hevbudzide gu khugo hatshavbo hi na ni makhalelo nya yadi naya nyo vivbe. Gasi gu ganeya lisine, nyi khade muthu nya tshukwana ngudzu khu gu pimedzeya makhalelo nya vathu nyo hambane ni eni khu tshonge ni simbe silo.”