U nga gira kharini gasi ndranga yago yi tsaka? — Gipandre 2

Sanana giningwa gi tago khu ga Jehovha. Uye o vireya gu khuye vavelegi va gi sayisa gwadi giningwa gegi. Jehovha a ngu ninga wusingalagadzi nya wadi wu nga phasago vavelegi gu gira isoso. Wusingalagadzi wowu wa Nungungulu wu ngu phasa sanana niso gu gira gipandre gyaso gasi ndranga yi tsaka.

1. Wusingaladzi muni owu Jehovha a ningago vavelegi?

Jehovha o vireya gu khuye vavelegi va haladza sanana sawe ni gu vbedza tepo nyo laphe naso khavba si kodzegago khavbo. Uye gambe o vbweta gu khuye vavelegi va vhikeya sanana sawe ga dzimhango ni gu si dandrisa khu matshina nya milayo nya Bhibhiliya. (Mavingu 1:8) O embeya vavelegi khuye: “Si dandriseni [sanana sanu] . . . kha nga guruma ga [Jehovha].” (Leri Vaefeso 6:4.) Jehovha a ngu tsaka tepo vavelegi va engisago gileletelo gegi gudandrisani nya sanana sawe ni gu bwe va si ningi mumbe muthu thumo nyo dandrise sanana sawe.

2. Wusingalagadzi muni owu Jehovha a ningago sanana?

Jehovha o embeya sanana khuye: “Yingelani vavelegi.” (Leri Vakolosi 3:20.) Tepo sanana si ningago githawo ni gu engisa vavelegi vaso, Jehovha ni vavelegi vaso vangu tsaka. (Mavingu 23:22-25) Jesu ningide giyeyedzo nya gyadi tepo a nga ba ari gyanana. Ambari olu a nga ba ari muthu nyo vbeleye, a di gu engisa ni gu ninga githawo vavelegi vaye. — Luka 2:51, 52.

3. Ndranga yi nga gira kharini gasi yi manega ni wupari nyo tiye ni Nungungulu?

Wo ba uri muvelegi, kha hi kanakani gu khethu wo vbweta gu khuwe sanana sago si haladza ngudzu Jehovha nga edzi u mu haladzago khidzo. U nga si gira kharini isoso? Khu gu gira esi Bhibhiliya yi ganeyago: “U na yi hevbudza [milayo ya Jehovha] ga sanana sago, u na ganela khiyo nu khade ndrangani gwago, na wu gu gimbila ndzilani, gikhati u lalago, ni gikhati u wugago.” (Dhewuteronome 6:7) Kha hi kanakani gu khethu u ngu dziti gu khuwe dzitepo nya dzingi gu vbwetega u phindraphindra silo ga sanana sago gasi si kodza gu si dundruga. Khu kharato, lowo wowu wo vbweta ganeya khuwo gu vbwetega u londrola ni yevbini tepo u gu nayo gasi u hevbudza sanana sago khu Jehovha. Gwadi gu mu dzi vegeya tepo semana ni semana gasi mu khozeya Jehovha kha nga ndranga. Ambari mo ba muri mwalo sanana, gwadi ngudzu gu mu dzi vegeya tepo semana ni semana nyo hevbule Bhibhiliya.

GIRA WUGEVISISI NYO ETE

4. Hevbudza sanana sago khu ndziya nya lihaladzo

Gu hevbudza sanana kha si vbevbugi. Bhibhiliya yi nga phasa kharini? Lerini Jakobe 1:19, 20, mu vbedza mu bhula khu siwudziso sesi:

• Vavelegi va nga yeyedza kharini lihaladzo tepo va bhulago ni sanana sawe?

• Khu ginani muvelegi a gu mba yela gu kawuka gyanana gyaye na zangaride?a

5. Vhikeya sanana sago

Gasi gu vhikeya sanana sago, khya lisima ngudzu gu bhula khu malawu naso khu gimwegyo ni gimwegyo, ambari wo ba u si tshulegi. Sistirini VHIDHYU, mu vbedza mu bhula khu siwudziso sesi.

VHIDHYU: Vhikeya sanana sago ga esi nya guvivbe (2:58)

• Khu ginani si garadzeyago vavelegi nyo khaguri gu bhula ni sanana sawe khu malawu?

• Khu dzevbini dzindziya edzi vavelegi nyo khaguri va dzi thumisago gasi gu bhula khu mahungu nya malawu ni sanana sawe?

Kha nga si profetidwego omu nya Bhibhiliya, litigo la Sathane lo engedzeya gu vivba. Lerini 2 Thimoti 3:1, 13, mu vbedza mu bhula khu giwudziso gegi:

• Livhesi 13 lo ganeya khu vathu nyo vivbe, nigu hi ngu dziti gu khethu vambe vakona khava nyo pfinye sanana. Khu kharato, khu ginani si gu sa lisima gu vavelegi va hevbudza sanana sawe maningano khu malawu ni gu dzi vhikeya sabune ga vapfinyi vovo?

U di gu dziti?

Dzifakazi dza Jehovha dzi na ni mabhuku nya mangi ni dzivhidhyu dzi phasago vavelegi gu bhula ni sanana sawe khu malawu ni gu dzi vhikeya gu pfinywa. Khu giyeyedzo, wona:

• Vhikeya sanana sago (vhidhyu)

• Hevbula ga Muhevbudzi nya Khongolo, sipimo 10 ni 32

• “U nga bhula kharini ni sanana sago khu malawu?” (Khendzugani! nya N.° 5 nya 2016)

6. Yeyedza githawo vavelegi

VHIDHYU: Nyi nga bhula kharini ni vavelegi vangu? (2:19)

• Khu ginani si gu sa lisima gu vaphya va dzi garadzeya gu bhula ni vavelegi vawe khu ndziya nya githawo?

• Vaphya va nga gira kharini gasi va kodza gu bhula ni vavelegi vawe khu ndziya nya githawo?

Lerini Mavingu 1:8, mu vbedza mu bhula khu giwudziso gegi:

• Ginani egi muphya a yedego gu gira o ningwa wusingaladzi khu vavelegi vaye?

7. Khozeyani Jehovha khu ndranga

Dzindranga nya Dzifakazi dza Jehovha dzi ngu vegisa tepo gasi gu hevbula Bhibhiliya khu ndranga semana ni semana. Isoso so ranwa pwani Wukhozeyi nya Ndranga. Wu nga girwa kharini wukhozeyi wowu nya ndranga? Sistirini VHIDHYU, mu vbedza mu bhula khu siwudziso sesi.

VHIDHYU: Wukhozeyi nya Ndranga — Sigaradzo ni makategwa (8:04)

• Ndranga yi nga si kodza kharini gu gira Wukhozeyi nya Ndranga semana ni semana?

• Vavelegi va nga gira kharini gasi Wukhozeyi nya Ndranga wu tsakisa ni gu phasa ga sanana? — Wona foto gupheyani nya gihevbulo gegi.

• Sigaradzo muni si nga hadzi tandregisa Wukhozeyi wanu nya ndranga?

Ga Israyeli wa gale, Jehovha a di gu vbweta gu khuye dzindranga dzi khala khu gu bhula khu Milowo. Lerini Dhewuteronome 6:6, 7, mu vbedza mu bhula khu giwudziso gegi:

• U nga li thumisa kharini litshina leli nya nayo?

Mawonelo nyo gire Wukhozeyi nya Ndranga:

• Gu dongiseya mitshangano nya libandla.

• Gu leri matimu nya Bhibhiliya mu vbedza mu bhula khayo.

• Wo ba uri ni sanana, tshisa u bwe u imprimir sihevbudzo nya sanana si gomogo omu nya jw.org.

• Wo ba uri ni sanana si gu vaphya, bhula naso khu gu thumisa dzindrima nya vaphya dzi gomogo omu nya jw.org.

• Gira sidramana khu matimu nya Bhibhiliya ni sanana sago.

• Sistirini vhidhyu ya omu nya jw.org mu vbedza mu bhula khiyo.

REZUMO

Jehovha o vbweta gu khuye 1) vavelegi va haladza, va hevbudza ni gu vhikeya sanana sawe, 2) sanana si engisa ni gu ninga githawo vavelegi vaso ni gu 3) ndranga yi mu khozeya khu gumogo.

Siwudziso nyo wusedze

• Vavelegi va nga hevbudza ni gu vhikeya kharini sanana sawe?

• Sanana si nga yeyedza kharini githawo khu vavelegi?

• Khu ginani si gu sa lisima gu gira Wukhozeyi nya Ndranga semana ni semana?

HEVBULA SIMBE

Khu sevbini sihevbudzo si nga phasago gyanana gyago gu dzi dongiseya gu khala muthu nya khongolo?

“6 sihevbudzo esi sanana sago si yedego gu si hevbula” (Khendzugani! nya N.° 2 nya 2019)

Wona wusingaladzi owu Bhibhiliya yi ningago ava va khathaleyago vavelegi va dandridego khu tanga.

“Ginani egi Bhibhiliya yi ganeyago khu gu sayisa vavelegi va dandridego khu tanga?” (Ndrima nya jw.org, khu Giputukezi)

Wona edzi mwama nyo khaguri a nga ba a si kodzi gu dandrisa sanana a khadego khidzo papayi nya wadi.

Jehovha hi hevbudzide gu dandrisa sanana sathu (5:58)

Wona edzi vapapayi va nga manegago khidzo ni wupari nyo tiye ni sanana sawe.

“Vapapayi va nga manega kharini ni wupari nyo tiye ni sanana sawe?” (Mukhedziseyi nya 1 nya Novembro nya 2011, khu Giputukezi)