Mitshangano nya Dzifakazi dza Jehovha yi nga gu phasa kharini?

U di nga tshuka u hongola mitshanganoni nya Dzifakazi dza Jehovha? Abari ahihi, si nga gira nu thava gu hongola avba u gomogo. Si nga gira nu dzi wudzisa, khuwe: ‘Yo girwa kharini mitshangano yakona? Khu ginani yi gu ya lisima? Khu ginani nyi yedego gu hongola?’ Omu nya gihevbulo gegi, u na wona edzi mitshangano yi nga tiyisago khidzo wupari wago ni Nungungulu ni gu gu phasa ga womi wago wa tshigu ni tshigu.

1. Khu gevbini gighelo nya gikhongolo nya gu hi hongola mitshanganoni?

Mulovi nyo khaguri nya Bhibhiliya tshamusede gighelo nya gikhongolo nya mitshangano yathu tepo a nga khuye: “Eni nyi ngu gu rungudza PFHUMU Nungungulu vbakari nya tshangano mwendro libandla.” (Ndzimo 26:12) Khu kharato, Dzifakazi dza Jehovha mafuni gwatshavbo dzi ngu tshangana semana ni semana gasi dzi dhumisa Nungungulu, gu embeleya ni gu gombeya. Mwaga ni mwaga, hi ngu tshangana gambe omu nya mitshangano nya yikhongolo gasi hi khozeya gumogo.

2. Ginani u na hevbulago mitshanganoni yathu?

Mitshanganoni yathu, ho hevbula Lito la Nungungulu hi bwe hi “ninga tshamuselo nya iso si hevbudwego gasi [hi] si pima mwendro gu si pwisisa gwadi.” (Leri Nehemiya 8:8.) Wo hongola mitshanganoni yathu, u na ya hevbula khu Jehovha ni makhalelo yaye nyo tsakise. Tepo u na yago u hevbula khedzi Jehovha a gu haladzago khidzo, wupari wago naye wu na tiya ngudzu. U na hevbula gambe dzindziya nyo vbanye womi nyo tsakise. — Isaya 48:17, 18.

3. Vathu u na va manago mitshanganoni yathu va nga gu phasa kharini?

Jehovha o hi kutsa gu “tiyiselana khu gyathu, hi phasana gu gira mithumo nya wuhindzi ni mithumo yatshavbo nya yadi.” (Vahebheru 10:24, 25) Mitshanganoni yathu, u na ya mana vathu va golanago khu lisine, vathu va golago gu hevbula khu Nungungulu nga uwe. U na yapwa vathu na va ganeya silo nyo tshambe va si manago omu nya Bhibhiliya. (Leri Varoma 1:11, 12.) U na ya mana lithomo gambe nya guti vathu — va tshadhidego ni ava va si gu tshadhigo — va tsakidego ambari olu va tshanganago ni sigaradzo. Esi khiso sighelo si girago Jehovha a vbweta gu khuye hi hongola mitshanganoni semana ni semana!

GIRA WUGEVISISI NYO ETE

4. Mitshangano nya Dzifakazi dza Jehovha

Matshiguni ya vapostoli, Makristo ma di gu oloveya gu tshangana ma khozeya Jehovha. (Varoma 16:3-5) Lerini Vakolosi 3:16, khu hwane mu bhula khu giwudziso gegi:

• Makristo nyo pheye ma di gu khozeya kharini Jehovha?

VHIDHYU: Ginani gi giregago Salawuni nya Mufumo? (2:12)

• Gufana muni u gu wonidego avba nya esi si giregago Salawuni nya Mufumo ni esi hi leridego omu ga Vakolosi 3:16?

• Gyomo u gi wonidego omu nya vhidhyu mwendro avba nya foto gi yelanago ni mitshangano yathu gi gu tsakisidego?

Lerini 2 Vakorinto 9:7, mu bwe mu bhula khu giwudziso gegi:

• Khu ginani Dzifakazi dza Jehovha dzi gu mba livbiseya dzitsapawu ava va hongolago mitshanganoni yadzo?

Wusedza ni muhevbudzi wago mahungu ma na hevbudwago avbo nya mitshangano nya dzisemana dzi tago.

• Khu gevbini gipandre nya tshangano gi gu tsakisago ngudzu mwendro u gi wonago na gi gu phasa ngudzu?

U di gu dziti?

Omu nya jw.org u nga mana wulanga ni ora nya mitshangano ni hayini u gomogo mafuni.

1. Mitshanganoni gwathu gu ngu vegwa dziganelo, hi wona dzivhidhyu hi bwe hi dongisedwa gu tshumayela ni gu hevbudza. Mitshangano yo pheya yi bwe yi hegisa khu ndzimo ni nombelo

2. Ndrani nya sipandre nyo khaguri nya tshangano, vaengiseyi va ngu hlamula siwudziso si girwago

3. Mitshangano yeyi khya vathu vatshavbo: vama, vanyamayi, ava va gumbidego, ni sanana

4. Mitshanganoni yathu, mwalo muthu a hengulago dzitsapawu muthu gasi gu beya

5. Gu vbwetega hi dzi garadza gasi hi hongola mitshanganoni

Nga dundrugeya khu ndranga ya Jesu. Mwaga ni mwaga va di yede gu gimbiya pfhuka nya 100 dzikilometro omu nya litigo nyo tale khu sigomo, va hongola tempeleni Jerusalema na va khugeya Nazareta. Lerini Luka 2:39-42, mu bwe mu bhula khu siwudziso sesi:

• Wo si wona kharini, ina si di gu lomba gu va dzi garadza kamo gasi gu gira liendro leli?

• Khu ginani u yedego gu dzi garadza gasi gu hongola mitshanganoni?

• Wo si wona kharini, ina si ngu dingana kamo gu dzi garadza u hongola mitshanganoni? Khu ginani?

• Khu ginani hi yedego gu hongola mitshanganoni semana ni semana?

REZUMO

Gu hongola mitshanganoni si na gu phasa gu hevbula silo nya singi khu Jehovha, si tiyisa wupari wago naye, u bwe u mana lithomo nyo mu khozeye ni Makristo makwawe.

Siwudziso nyo wusedze

• Khu ginani Jehovha a hi kutsago gu hongola mitshanganoni?

• Ginani u na ya gi hevbulago mitshanganoni nya Dzifakazi dza Jehovha?

• Ginani gambe u wonago gu khuwe mitshangano yi nga gu phasa ga igyo?

HEVBULA SIMBE

Ina u ngu ndrendremeya khu hwanga tepo u pimisago gu hongola mitshanganoni? Wona giyeyedzo gya mwama moyo a nga ba thava nuye, ganiolu khu gu gimbiya nya tepo a di yi gola ngudzu mitshangano.

Kha hi divali edzi va nga hi hakha khidzo! (4:16)

Wona esi si giridego lidzaha limwedo li yi gola mitshangano ni esi li giridego gasi li si digi gu hongola mitshanganoni.

Mitshangano nyi di yi gola ngudzu! (4:33)

Wona edzi vambe va yi wonago khidzo mitshangano.

“Khu ginani hi yedego gu hongola mitshanganoni Salawuni nya Mufumo?” (Ndrima nya jw.org, khu Giputukezi)

Wona edzi womi wa mwama nyo khaguri a nga ba a lumba tsawa mowo nya sighevenga wu vbindrugedzidego khidzo tepo a nga pheya gu hongola mitshanganoni nya Dzifakazi dza Jehovha.

“Gu mwalo wulanga nyi nga ba nyi hongola nya mba giphisa” (Mukhedziseyi nya 1 nya Julho nya 2014, khu Giputukezi)

5. Litigo li vbindrugedzide ngudzu gukhugeya khu 1914

Sistirini VHIDHYU.

VHIDHYU: Litigo li vbindrugedzide gukhugeya khu 1914 (1:10)

Jesu profetide esi si nga hadzi girega mafuni tepo a nga hadzi pheya gu fuma. Lerini Luka 21:9-11, mu vbedza mu bhula khu giwudziso gegi:

• Khu guya khu mavhesi yaya, khu sevbini silo u si wonago na si girega muhuno?

Mupostoli Pawulo ganede khu makhalelo va nga hadzi manega nawo vathu matshiguni nya guhegise nya gu fume nya vathu. Lerini 2 Thimoti 3:1-5, mu vbedza mu bhula khu giwudziso gegi:

• Wo si wona kharini, ina vathu muhuno va nawo makhalelo yaya?

6. Hi yede gu dzi emiseya gu seketeya Mufumo wa Nungungulu

Lerini Matewu 24:3, 14, mu vbedza mu bhula khu siwudziso sesi:

• Khu wevbini thumo nya lisima wu yeyedzago gu khuwo Mufumo wa Nungungulu wu phede gu fuma?

• U nga hengeya kharini thumoni wowu?

Mufumo wa Nungungulu wu ngu fuma, nigu litshigu nya gu wu pheya gu fumeya mafu yatshavbo lomo vbafuvbi. Lerini Vahebheru 10:24, 25, mu vbedza mu bhula khu giwudziso gegi:

• Ginani egi moyo ni moyo wathu a yedego gu gira kha nga olu hi wonago gu ‘khethu litshigu la Pfhumu li ngu vboha’?