GIHEVBULO 20

Li sasamedzidwe kharini libandla nya Wukristo?

Nyo imprimirwi

Jehovha Nungungulu nyo sasamedze. (1 Vakorinto 14:33) Khu kharato, kha si hi hlamadzisi ho wona vathu vaye na va gira sa simweso. Gasi li sasamedzidwe kharini libandla nya Wukristo? Ginani hi nga girago gasi li gimbiya gwadi?

1. Khu mani muthangeyi nya libandla?

“Kristo [khuye] hungo nya libandla.” (Vaefeso 5:23) Nari khu ndzadzini, a gu woneleya mithumo nya vathu va Jehovha mafuni gwatshavbo. Jesu emiside “githumi nya gutumbege ni nya gugengeye,” a gu tsawa nya wudugwana nya madhota nyo vidzwe khu liphuvboni, wu ranwago gambe pwani Huwo nya Guthangeye. (Leri Matewu 24:45-47.) Matshiguni ya vapostoli, madhota ni vapostoli khavo va nga ba va ninga sileletelo ga mabandla Jerusalema, ganiolu muhuno Huwo nya Guthangeye khiyo yi ningago sileletelo ga mabandla mafuni gwatshavbo. (Mithumo 15:2) Ganiolu, vama vava khandri vathangeyi nya hengeledzano yathu. Avo vo hevbula Bhibhiliya gasi vati esi Jehovha a vbwetago gu khuye va gira, va bwe va dzumeya gu thangedwa khu Jesu.

2. I thumo muni wu girwago khu madhota?

Madhota vama nya Makristo va vidzidwego khu liphuvboni va thumisago Bhibhiliya gasi gu hevbudza vathu va Nungungulu. Nigu avo vo khala na va dzi emisede gu phasa ni gu tiyisa vathu va Jehovha. Avo kha va hakhiswi gilo khu thumo wowu. Ganiolu, vo thuma na va ‘tshulegide monyo kha nga idzo a dzinago khidzo Nungungulu; nasiri khu gu gurumedzwa. Kha va thumeli gu hakha dzitsapawu. Aholu vo thuma khu gudzina gwawe.’ (1 Pedro 5:1, 2) Madhota mo phasedzedwa khu vaphasedzeyi nya libandla, ava khu gu gimbiya nya tepo anavo va khalago madhota.

Huwo nya Guthangeye yi ngu emisa madhota nyo khaguri gasi ma thuma kha nga vawoneleyi nya sipandre. Vama vovo vo endreya mabandla gasi gu ninga sileletelo ni gu tiyisa vandriyathu, va bwe va hatha vama va gu na ni makhalelo ma thudwago omu nya Milowo gasi va thuma kha nga madhota ni vaphasedzeyi nya libandla.— 1 Thimoti 3:1-10, 12; Tito 1:5-9.

3. I thumo muni owu Dzifakazi dza Jehovha dzatshavbo dzi yedego gu gira?

Vatshavbo libandlani va ngu dhumisa lina la Jehovha khu gu hlamula, gu vega dziganelo ni simbe silo si girwago mitshanganoni ni gu tshumayela khavba va si kodzago khavbo. — Leri Ndzimo 148:12, 13.

GIRA WUGEVISISI NYO ETE

Wona gu khuwe Jesu muthangeyi nyo khale kharini, edzi madhota ma nga pimedzeyago khidzo giyeyedzo gyaye, ni edzi ethu hi nga engisago khidzo Jesu ni madhota.

4. Jesu muthangeyi nya wadi

Jesu a ngu hi kutsa hatshavbo gu dzumeya gu thangedwa khuye. Lerini Matewu 11:28-30, mu vbedza mu bhula khu giwudziso gegi:

Jesu muthangeyi nyo khale kharini? Nigu o vbweta gu khuye ethu hi dzipwa kharini?

Madhota mo pimedzeya kharini giyeyedzo gya Jesu? Sistirini VHIDHIYU.

VHIDHYU: Madhota ma phasago vandriyathu tigoni ga Nepal tepo gu nga manega girevareva (4:56)

Bhibhiliya yi ngu ganeya khu gukongoma edzi madhota ma yedego gu gira khidzo thumo wawe.

Lerini Isaya 32:2 ni 1 Pedro 5:1-3, mu vbedza mu bhula khu siwudziso sesi:

Wo dzipwa kharini khu guti gu khuwe madhota ma ngu dzi garadzeya gu phara gwadi vathu, gufana ni Jesu?
Ginani gimbe madhota ma girago gasi gu pimedzeya Jesu?

5. Madhota mo hevbudza khu giyeyedzo gyawe

Jesu o vbweta gu khuye madhota ma wu wona kharini thumo wawe? Sistirini VHIDHYU.

VHIDHYU: Madhota ma thangeyago gwadi! (7:39)

Jesu ningide sileletelo ga ava va thangeyago libandla. Lerini Matewu 23:8-12, mu vbedza mu bhula khu giwudziso gegi:

Khu sevbini sileletelo esi madhota ma yedego gu si landrisa? Ahati vapaderi ke, u ngu va wona na va landrisa sileletelo sesi?

A. Dzifoto: Lidhota li dzi khathaleyago khu liphuvboni li bwe li khathaleya ndranga yalo niyo. 1. Lo gombeya na li si pheyi gu hevbula Bhibhiliya. 2. Lo hevbudza Bhibhiliya gyanana gyalo nya gyadzyana na li gu phasedzedwa khu mwangadzi walo.

B. Lidhota la limwedo ni mwangadzi walo va wuseyago ndriyathu nya nyamayi wa libandlani gwawe a bhaxaridego xipitali.

Madhota ma ngu tiyisa wupari wadzo ni Jehovha ma bwe ma phasa dzindranga dzawe gu gira sa simweso
Madhota ma ngu khathala khu vatshavbo libandlani
Madhota ma ngu dzi garadzeya gu tshumayela tepo yatshavbo
Madhota vahevbudzi nya Lito la Nungungulu. Ayo ma ngu phasedza gambe guagisani nya Salawu nya Mufumo ni yimbe mithumo

6. Gu vbwetega hi phasedzeya madhota

Bhibhiliya yi ngu hi ninga gighelo nya lisima nya gu hi phasedzeya madhota. Lerini Vahebheru 13:17, mu vbedza mu bhula khu siwudziso sesi:

Khu ginani Bhibhiliya yi gu khiyo gu vbwetega hi engisa madhota khu monyo wathu watshavbo? Khu ginani u ganeyago isoso?

Lerini Luka 16:10, mu vbedza mu bhula khu giwudziso gegi:

Khu ginani si gu sa lisima gu engisa madhota ambari omu nya silo si wonegago nga khatshi si mwalo ngudzu lisima?

VAMBE VARI KHAVO: “Kha si lombi gu khiso u beya tshetshe nyo khaguri gasi gu khozeya Nungungulu.”

Khu ginani si gu sadi gu khozeya Nungungulu gumogo ni vathu va girago gipandre nya libandla laye?

REZUMO

Jesu khuye muthangeyi nya libandla, nigu madhota mo landreya sileletelo saye. Hi ngu tsaka ngudzu khu gu phasedzeya madhota kholu ayo ma na ni wuwadi nigu ma ngu hi hevbudza khu giyeyedzo gyawe.