3. Dzindziya nyo yeyedze khidzo gubonga

Nga dzi dundrugeya nu dzama, khavbovbo guta muthu a ta gu vbulugisa! Ina u di hadzi dzegeya gu si divala esi muthu yoyo a nga gu gireya? Mwendro u hadzi gira satshavbo u si kodzago gasi gu mu bonga khesi a gu giredego?

Na siri ga Jehovha, na hiri mwalo gutumba nyo vbanye kala gupindruga. Lerini 1 Johane 4:8-10, mu vbedza mu bhula khu siwudziso sesi:

• Khu ginani muphaso wa Jesu wu gu giningwa nya guhathege?

• Wo dzipwa kharini khu guti esi Jehovha ni Jesu va gu giredego?

Hi nga yeyedza kharini gu khethu hi ngu bonga khesi Jehovha ni Jesu va hi giredego? Lerini 2 Vakorinto 5:15; 1 Johane 4:11; 5:3. Hwane nyo leri milowo yeyi yatshavbo, bhulani khu giwudziso gegi:

• Khu guya khesi u nga leri, ginani hi nga girago gasi hi yeyedza gubonga gwathu?

1. Ginani gi kutsago muthu gu dzi hendzeledza?

Lihaladzo khilo li hi kutsago gu dzi hendzeledza ga Jehovha. (1 Johane 4:10, 19) Bhibhiliya yi ngu hi gengedza khiyo: ‘Haladza Jehovha Nungungulu wago khu monyo wago watshavbo, khu hefemulo wago watshavbo, khu mapimo yago yatshavbo ni tshivba yago yatshavbo.’ (Marko 12:30) Kha hi hegeyi gu ganeya basi khu likana khethu hi ngu mu haladza Nungungulu, ganiolu ho yeyedza gambe khu sigiro sathu. Khu giyeyedzo, mwama ni nyamayi vo ba va haladzana khu monyo watshavbo, vo hunga gu tshadha. Khu ndziya nyo fane, gu haladza Jehovha khiso si hi kutsago gu dzi hendzeledza gwaye ni gu bhabhatiswa.