U na dongiseya kharini Gidundrugiso?

Gu khugeya mwaga yoyu, hi na ba hiri ni tepo nya yingi nyo dongiseye Gidundrugiso nya gufe ga Kristo. Ga gu tshuka Gidundrugiso gi kotsana nari vbakari nya semana, semana yoyo gu na ba guri mwalo tshangano nya Thumo ni mavbanyelo nya wuKristo. Gya gu kotsana nari guvbeyani nya semana, gu na ba guri mwalo mitshangano ya guvbeyani nya semana, a gu ganelo ya guagani ni gihevbulo nya Mukhedziseyi. Ina u na londrola gwadi tepo yeyi u tshaledwago khiyo? Khu giyeyedzo, ga lizana myaga nyo pheye, gu di gu thumwa ngudzu gasi gu dongiseya gigiro gegi nyo hathege. (Lu 22:7-13; km 3/15 paj. 1) Ganiolu, hatshavbo hi yede gu dongiseya myonyo yathu. Hi nga gira kharini?

• Dundrugeya khu lisima nya gu manege Gidundrugisotunu. — 1Ko 11:23-26

• Gombeya, u popola gwadi wupari wago ni Jehovha. — 1Ko 11:27-29; 2Ko 13:5

• Leri u bwe u dundrugeya khu Milowo yi gimbileyanago ni Gidundrugiso. — Joh 3:16; 15:13

Vambe vahuweleyi va gu leri ni gu bwe va dundrugeya khu Milowo yi gimbileyanago ni gigiro gegi, yi gomogo omu nya Lowo nya litshigu. Vambe va gu leri mavhesi nya Bhibhiliya ma gomogo avba nya kwadru yi gomogo vbavbatshi vbavba. Vambe gambe va gu thumisa dzindrima nya Mukhedziseyi dzi ganeyago khu Gidundrugiso, gumogo ni lihaladzo eli Jehovha ni Jesu va hi yeyedzidego. Ni wevbini longoloko u na wu hathago, wu na engedzeya wupari wago ni Jehovha gumogo ni Gyanana gyaye.