Mitshamuselo yi gomogo omu nya mabhukhu ma khumbugidwego omu nya Gibhukwana nya mitshangano nya thumo ni mavbanyelo
3-9 NYA JUNHO
DZITHOMBA NYA LITO LA NUNGUNGULU | VAGALATIYA 4-6
“‘Gipimaniso’ gi gu na ni tshamuselo gwathu”
(Vagalatiya 4:24, 25) Mahungu yaya gipimaniso kholu vanyamayi va vavili giyeyedzo nya sidzumeledzwano sa sivili: Gidzumeledzwano gya Sinayi gi velegago sanana wugumbini, khu Agari. 25 Wonani, Agari yoyu khu gigomo gya Sinayi gi guromo tigoni ga Arabhiya, a gu giwonelo gya Jerusalema ga muhuno a gu khumbi gumogo ni vathu vaye.
it-1 paj. 68, ndri. 3
Agari
Khu guya khu mupostoli Pawulo, Agari a di gu emeya Israyeli wa nyamani, a nga pwananiswa ni Jehovha khu gu thumiswa gidzumeledzwano nya Nayo, gi khangudwego Gigomoni gya Sinayi; gidzumeledzwano gi velegidego “sanana wugumbini.” Khu kotani nya sighoho nya vathu, litigo leli kha la si kodza gu landrisa milayo nya gidzumeledzwano gegi. Avba nya gidzumeledzwago gegi, vaIsrayeli va diri mwalo gutshulegani, va di wonwa nga sighohi si konedwego lufo; khu kharato, va diri dzigumbi. (Joh 8:34; Ro 8:1-3) Jerusalema ga matshiguni ya Pawulo gu di gu yelana ni Agari, tsindza gakone gu di gu emeya Israyeli wa nyamani, a nga ba ari wugumbini uye gumogo ni sanana saye. Ganiolu, maKristo ma todzidwego khu liphuvbo, sanana sa “Jerusalema wa ndzadzini,” a gu mwangadzi nyo fananise wa Nungunulu. Gufana ni Sara, nyamayi nya gutshulege, Jerusalema yoyu gima kha khala gumbi. Ganiolu, gufana ni Isaki a nga tshaniswa khu Ismayeli, sanana sa “Jerusalema wa ndzadzini” niso si tshudzisidwego khu Jesu, si tshanisidwe khu sanana sa Jerusalema si nga ba siri dzigumbi. Ambari ulolo, Agari ni gyanana gyaye va di tutumiswa, na va gu emeya Israyeli nya tumbunugo a tshepetidwego khu Jehovha nga litigo laye. — Ga 4:21-31; wona gambe Joh 8:31-40.
(Vagalatiya 4:26, 27) Gasi Jerusalema ga Ndzadzini gu tshulegide, khuye mayi wathu. 27 Khu lisine gu lovidwe gupwani: “Nengela uwe nyamayi nya gyumba, u si velegigo, womba mikulungwane nya gunengele, uwe u nga mbapwa mavbiselo nya guvelege. Kholu sanana sa nyamayi nya guhudwe singi ngudzu, guvbindra sa oyu a gu ni mwama waye.”
w14 15/10 paj. 10, ndri. 11
Manega ni gukhodwa nya mba ngudanguda khu Mufumo
Gidzumeledzwano gya Abrahama gi tadzisegide khu lisinesine avba nya situgulwana sa Abrahama tepo si nga beya omu nya Litigo nya Gitumbiso, ganiolu, Milowo ya gu yeyedza gu khiyo nayo wowu gambe wu ngu tadzisega khu liphuvboni. (Gal. 4:22-25) Avba nya gutadzisega gogu nya gukhongolo, mupostoli Pawulo tshamusede gu khuye gipandre nyo pheye nya gitugulwana gya Abrahama, khu Kristo, egi nya wuvili maKristo nya 144 000 ma todzidwego khu liphuvbo. (Gal. 3:16, 29; Gutu. 5:9, 10; 14:1, 4) Nyamayi a velegago gitugulwana khoyu va gu pwani “Jerusalema ga ndzadzini” — gipandre gya dzadzini nya hengeledzano ya Nungungulu, gi wumbwago khu sivangwa nya liphuvbo nyo tumbege. (Gal. 4:26, 31) Khu guya khu gitumbiso nya gidzumeledzwano gya Abrahama, gitugulwana gya nyamayi gi na resa makategwa ga vathu.
(Vagalatiya 4:28-31) Gasi enu, vandruye, mu idzosaye ni Isaki, mu sanana nya gitumbiso. 29 Ga matshigu yale, gyanana nya guvelegwe khu tumbunugo nya wuthu gi di sanisa egi nya guvelegwe khu tshivba nya Liphuvbo la Nungungulu; kala ni muhuno gambe khiso si dugelelago. 30 Gasi Milowo nya Guage yari khiyo ginani? Yari, khiyo: Tutumisa nyamayi nya khumbi ni gyanana gyaye, kholu gyanana nya khumbi kha gi na hodza thomba gumogo ni gyanana gya mwangadzi nya lisine. 31 Khavbo avbo, vandruye, ethu kha hiri sanana sa nyamayi nya khumbi, aholu sa mwangadzi nya lisine.
Kemba dzithomba nya liphuvbo
(Vagalatiya 4:6) “Khu gufela gu yeyedza gukhuye enu nenu mu sanana saye, Nungungulu rumede Liphuvbo la Mwamana waye myonyoni gwathu, khilo li ranago ndrani gwathu, khilo: “Abba: Gutshamuselago gupwani Baba!”
w09 1/4 paj. 13
U di gu dziti?
Khu ginani tepo Jesu a nga ba a gombeya ga Jehovha a thumisidego malito ‘Abba, Baba’?
Lito nya giAramayiko nya gu pwani ʼab·baʼʹ li nga tshamuseya “babe” mwendro “O Baba.” Ga dzitepo dza dziraru lito leli li manegago omu nya Milowo, la gu gira gipandre nya nombelo, nigu la gu thumisedwa gu thula Babe wa ndzadzini, a gu Jehovha. Khu vbwevbi tshamuselo nya lito leli?
The International Standard Bible Encyclopedia (Enciclopédia Bíblica Padrão Internacional) yari khiyo: “Omu nya maganelelo ya matshiguni ya Jesu, lito ʼabbāʼ khu tumbunugo wakone li di gu thumisedwa gu yeyedza pwanano nya wukhongolo gumogo ni githawo gi gu ni sanana khu vavelegi vaso.” Aya ma diri maganelelo nya lihaladzo, nigu gu diri ilo lito nyo pheye eli gyanana gi nga ba gi li hevbuleya gu ganeya. Jesu thumiside lito leli gasi gu gira gilombo nya lisima ga Babe waye. Thembweni ga Getsemani, na gu tshade gitepwana basi gasi a songwa, Jesu a di gira nombelo ga Jehovha a thumisa malito ‘Abba, Baba.’ — Marko 14:36.
Libhuku leli li khumbugidwego vbatshani vbavba, la gu simama khilo: “Khu guya khu mabhuku nya giJudha ya tepo nya giGreki nya giRoma, lito “ʼAbbāʼ li di si olovelegi, mwendro gu thumiswa gasi gu ganeya ni Nungungulu, kholu khu guya khu vaJudha si di gu yeyedza gu mba githawo gu ganeya ni Nungungulu khu gu thumisa malito nyo olovelege.” Ambari ulolo, “khu gu ba . . . Jesu a thumiside lito leli, gu diri ndziya nyo yeyedze gu khuye Uye a di gu pwanana ngudzu ni Nungungulu.” Mambe malanga ya mavili gu thumisidwego lito “Abba” — yatshavbo ma lovidwego khu mupostoli Pawulo — ma gu yeyedza gu khayo maKristo ya lizana myaga nyo pheye nayo ma di gu li thumisa lito leli omu nya milombelo yawe. — Varoma 8:15; Vagalatiya 4:6.
(Vagalatiya 6:17) Gukhugela olu, kha nyi vbweti gu garadzwa khu muthu, kholu, givilini gwangu nyi na ni sivanga si yeyedzago gupwani nyi githumi gya Jesu.
w10 1/11 paj. 15
U di gu dziti?
A di gu vbweta gu khuye ginani mupostoli Pawulo tepo a nga khuye givilini gwaye rwade ‘sivanga si yeyedzago gupwani githumi gya Jesu’? — Vagalatiya 6:17.
▪ Malito ya Pawulo si nga kodzega na ma pwisisidwe khu mapwisiselo nyo hambanehambane khava va ma engisedego ga lizana myaga nyo pheye. Khu giyeyedzo, teponi ya gale gu di gu thumiswa simbi nyo wogwe gasi gu funga sibotshwa si modwego nyimbitunu, dzimbafa nya tempele ni dzigumbi dzi nga ba dzi haganeya gu pfhuka. Gifungo nya nga igyogyo givilini nya muthu, gi di gu wonwa nga gilo nya dzitshoni.
Ganiolu khandri dzitepo dzatshavbo gi nga ba gi wonwa khu liso nya livberu. Vathu nya vangi va gale va di gu gi thumisa gasi gu dzi yeyedza gu khavbo va gu lumba lifumbo mwendro wukhongeyi nyo khaguri. Khu giyeyedzo, khu guya khu Theological Dictionary of the New Testament (Dicionário Teológico do Novo Testamento), “vaSiriya va di gu dzi hendzeledza ga vanungungulu Hadhadhe ni Atarigatisi khu gu va dzi funga omu nya mawogo mwendro thamoni . . . Ava va nga dzi hendzeledza ga Dhiyonizu, va di gu dzi funga khu gu thumisa mahagane.”
Vaganeyi va matshigwanaya vari khavo Pawulo a di gu thula sivanga si vangidwego khu dzitshanisa a emisanidego nadzo ndrani nya mithumo yaye nya wuKristo nga misiyonariyo. (2 Vakorinto 11:23-27) Ganiolu adzina Pawulo a di gu vbweta gu ganeya gu khuye mavbanyelo yaye — nasiri sivanga nya lisine — ma di gu mu tivegisa nga muKristo.
10-16 nya Junho
DZITHOMBA NYA LITO LA NUNGUNGULU | VAEFESO 1-3
“Sasamedzo wa Jehovha ni lisima lakone”
(Vaefeso 1:8, 9) a nga hi vbaladzelago na wu tade khu guti ni gupima. 9 A hi tulede guti sihalo nya gikungo nya guhaladze gwaye khu ga Kristo, kha nga edzi a nga bani a vegiside khidzo khu gale,
it-3 paj. 554, ndri. 6
Sihalo nyo hathege
Mufumo nya wuMesiya. Omu nya milowo yaye Pawulo, a ngu ningeya tshamuselo watshavbo nya gutuledwa nya sihalo nyo hathege wa Kristo. Omu ga Vaefeso 1:9-11 a gu ganeya khu Nungungulu a tivegisago “sihalo” nyo hathege nya gugola gwaye, a bwe khuye: “Kha nga edzi a nga bani a vegiside khidzo khu gale, gukhuye si girege gutadzisegani nya matshigu: Gutshanganisa silo satshavbo si guromo mafuni, a emisa Kristo kha nga hungo ni muthangeli. Khu gwaye Kristo, hi hathidwe nethu guya ningwa thomba nya guvbanyiswe hi lulamisedwego khu gale, lihaladzo a thumago silo satshavbo khu gudzina ni gugola gwaye.” “Sihalo” wowu nyo hathege wa gu pata wufumu, Mufumo wa Nungungulu nya wuMesiya. “Silo si gomogo ndzadzini, NM” esi Pawulo a nga si thula, sihodza-thomba nya Mufumo wowo wa ndzadzini, gumogo ni Kristo. “Silo satshavbo si guromo mafuni” go thudwa ava va na fumedwago khuwo omu mafuni. Jesu tshingiside ga vapizane vaye gu khuye sihalo nyo hathege wu di hadzi gimbeleyana ni Mufumo, tepo a nga khuye: “Ga enu, mu ngu tiviswa misihalo [nyo hathege, NM] nya Mufumo waye.” — Mr 4:11.
(Vaefeso 1:10) gukhuye si girege gutadzisegani nya matshigu: Gutshanganisa silo satshavbo si guromo mafuni, a emisa Kristo kha nga hungo ni muthangeli.
w12 15/7 dzipaji. 27-28, dzindri. 3-4
“Jehovha moyo” a ngu tshanganisa ndranga yaye
Mosi a di embeya vaIsrayeli gu khuye: “Upwa Israyeli! Pfhumu Nungungulu wathu khuye basi a gu Pfhumu.” (Dhet. 6:4) Mithumo ni makungo ya Jehovha va na tapa ni likandarinya. Khu kharato, “guvbeyani nya dzitepo dzi emisidwego, NM”, Nungungulu a di gira “sasamedzo” — a gu malulamiselo nyo pwananise sivangwa saye satshavbo nya guti. (Leri Vaefeso 1:8-10.) Sasamedzo wowu wu na tadzisa makungo yawo khu sipandre sivili. Gipandre nyo pheye gu dongiseya libandla nya ava va todzidwego gasi gu ya vbanya ndzadzini vbavbatshi nya wuthangeyi nya Hungo wawe wa Liphuvboni a gu Jesu Kristo. Gipandre gegi gi phede khu Pentekosta nya 33 E.C. tepo Jehovha a nga pheya gu tshanganisa ava va na fumago ni Kristo ndzadzini. (Mithumo 2:1-4) Kha nga olu ava va todzidwego va sayedwego gululama gasi gu mana guvbanya khu kotani nya muphaso nya gutshudziswe wa Kristo, avo va gu dzegeya gu pwisisa gu khavo va hakhidwe kha nga “sanana sa Nungungulu.” — Rom. 3:23, 24; 5:1; 8:15-17.
Gipandre nya wuvili gu dongiseya ava va na vbanyago mafuni vbavbatshi nya Mufumo wa Kristo nya wuMesiya. “Mwandra nya wungi ngudzu nya vathu” wa gu wumba gipandre nyo pheye nya tsawa wowu. (Gutu. 7:9, 13-17; 21:1-5) Ndrani nya Mufumo nya Likhumi mazana myaga, va na patwa ni dzibhiliyoni nya vathu va na wuswago khu gufani. (Gutu. 20:12, 13) Nga dundrugeya khedzi guwuswa khu gufani gu na yeyedzago khidzo gupwanana gwathu! Guvbeyani nya likhumi mazana myaga, “silo satshavbo si guromo mafuni” si na emisana ni gulingwa nyo hegise. Ava va na yeyedzago gutumbega va na ranwa gu pwani “sanana sa Nungungulu” sa mafuni. — Rom. 8:21; Gutu. 20:7, 8.
Kemba dzithomba nya liphuvbo
(Vaefeso 3:13) Khavbo avbo, nyi ngu mi khongotela gukheni mu nga garadzegi khu kotani nya sisaniso nyi si wonago khu kotani yanu; si na khale wuzundzo gwanu.
w13 15/2 paj. 28, ndri. 15
U nga dzumeleyi gilo gi gu himbedzeya gu hakha wuzundzo wa Nungungulu
Gutimiseya gwathu gu girani nya gugola ga Jehovha, gu ngu phasa vambe gu hakha wuzundzo wa Nungungulu. Pawulo lovede libandla la Efeso khuye: “Nyi ngu mi khongotela gukheni mu nga garadzegi khu kotani nya sisaniso nyi si wonago khu kotani yanu; si na khale wuzundzo gwanu.” (Efes. 3:13) Khu ga gevbi giemo sigaradzo sa Pawulo si nga ‘khala wuzundzo’ ga vaEfeso? Gudziemiseya ga Pawulo nyo simame gu va thumeya na si theyi kota khu silingo, a di hadzi yeyedza vaEfeso gu khuye malungelo va nga ba va ri nawo kha nga maKristo, khya lisima ngudzu. Nari khatshi Pawulo a di dzumelede gu rerekiswa khu silingo, ina na sa sa wonenga nga khatshi wupari wawe ni Jehovha, thumo wawe, ni gutumba gwawe khandri sa gilo? Gutimiseya ga Pawulo gu engedzede liphuvbo nya wuKristo gu bwe gu yeyedza gu khugo gu khala mupizane wa Jesu khya lisima ngudzu.
(Vaefeso 3:19) lihaladzo leli la Kristro, ambari olu a gu mwalo muthu a dzi kodzago gu liti khu guvbelela. Gasi enu mu mane gutala khu wufumu watshavbo wa Nungungulu.
cl paj. 299, ndri. 21
“Gasi muti lihaladzo leli la Kristo”
Lito nya giGreki li vbindrugedzedwego pwani “gasi muti” la gu thula guti silo khu “sigiro, mwendro khu wugulu.” Kha nga Jesu, ha gu yeyedza lihaladzo — khu gudzina, hi dzi emiseya gu seketeya vambe, hi va ninga giphaso khu guya khavba va gi vbwetago khavbo, ni gu bwe hi dzi emiseya gu va divaleya — hi na pwisisa gwadi gudzipwa gwavo. Khu kharato hi nati “lihaladzo leli la Kristo” eli li vbindrago guti gwatshavbo. Ni gu gambe, hi nga divalini gu khethu ha gu pimedzeya Kristo tepo yatshavbo, hi na engedzeya gu hidzimeleyana ni oyu a pimedzedwego khu Jesu khu guvbeleya, a gu Nungungulu wathu, Jehovha.
17-23 NYA JUNHO
DZITHOMBA NYA LITO LA NUNGUNGULU | VAEFESO 4-6
“Dzi vhikeleni khu matshari yatshavbo mu ningwago khu Nungungulu”
(Vaefeso 6:11-13) Dzi vhikeleni khu matshari yatshavbo mu ningwago khu Nungungulu, gasi mu kodze gu tiya, mu pale silingo sa Sathane. 12 Kholu khandri ha gu dwana ni vathu nya marambo ni nyama, aholu ha gu dwana ni dzi tshivba nyamba wonega dzi fumago tigoni momu nya gidema, ha gu dwana ni dzitshivba nya maphuvbo nya guvivbe ya Ndzadzini. 13 Khavbo avbo, dzi vhikeleni khu matshari mu ningwago khu Nungungulu, gasi mu pharise gutiya gikhati nya gulingwe, mu kodze gupala sigaradzoni gwatshavbo.
w18.05 paj. 21, ndri. 1
Vaphya emani mu tiya, mu wugeya Dhiyabhulosi
MUPOSTOLI Pawulo fananiside maKristo ni masotshwa. Ethu hi womo nyimbini, nigu valala vathu valala nya lisine! Ganiolu khandri ha gu dwana ni vathu; ha gu dwana ni madhemoni. Avo va na ni myaga nya yingi na va gu dwana nigu vadwani va vidzidwego. Khu kharato si nga wonega nga khatshi kha hi na nga si kodza gu pala nyimbi yoyo, ngudzungudzu ho ba hiri vaphya. Ina vaphya va nga si kodza gu pala valala vovo nya tshivba ngudzu? Ina, va nga si kodza! Khu ginani? Kholu avo va ngu ningwa tshivba khu Jehovha. Gimbe gambe, kha nga masotshwa ma vidzidwego, avo va ngu ‘dzi vhikeya khu matshari yatshavbo va ningwago khu Nungungulu’ gasi gu va dzi dongiseya nyimbi. — Leri Vaefeso 6:10-12.
(Vaefeso 6:14, 15) Khalani na mu dongide, mu phara lisine mandzani, mu li gira libhandri nya guhunge giwununi gwanu; gululama mu gu gira givhikelo nya khana yanu; 15 gukhathala gwanu khu gu gimbila mu gu tivisa Mahungu nya Yadi nya gurule gu na khale silato nya migondro yanu.
w18.05 dzipaji. 22-23, dzindri. 4, 7, 10
Vaphya emani mu tiya, mu wugeya Dhiyabhulosi
Kha nga libandri lolo, lisine hi li hevbulago omu nya Lito la Nungungulu li ngu hi vhikeya ga sihevbudzo nya malipha. (Joh. 8:31, 32; 1 Joh. 4:1) Tepo hi yago hi gola lisine nya Lito la Nungungulu, sa guya si hi vbevbugeya gu vbanya khu milayo ya Nungungulu, mwendro gu ambala “givhikelo nya khana” yathu. (Ndzi. 111:7, 8; 1 Joh. 5:3) Gimbe gambe, tepo hi yago hi li pwisisa gwadi lisine leli, hi na kodza gambe gu li emeya gwadi ga valala vathu. — 1 Ped. 3:15.
Milayo nya gululame ya Jehovha, yi vhikeyago “monyo” wathu, mwendro muthu wathu wa ndrani, yi nga fananiswa ni givhikelo gyogyo. (Mav. 4:23) Musotshwa gima kha vbindrugedzi givhikelo nya simbi a thumisa gimbe nyo girwe khu simbi nya mba tiya. Khu ndziya yamweyo, anethu gima kha hi na nga vbindrugedza milayo ya Jehovha nya esi nya sadi khu mawonelo yathu nya esi si gu sadi. Ethu hi mwalo wugengeyi nyo ningane gu vhikeya monyo wathu habune. (Mav. 3:5, 6) Khu kharato hi yede gu khala na hi khedza gu khethu ina “givhikelo nya khana” yathu gi nga gu vhikeya monyo wathu mwendro ne.
Kha nga olu silato nya masotshwa nya vaRoma si nga ba si va phasa gu dugeleya nyimbitunu, silato sathu nyo fananise hi ambalago sa gu hi phasa gu gimbiya hi “tivisa Mahungu nya Yadi nya gurule.” (Isa. 52:7; Rom. 10:15) Ambari ulolo, dzimbe dzitepo so lomba gutiya-hwambo nya gukhongolo gasi gu tshumayela. Bo, a gu na ni 20 myaga, wari khuye: “Nyi di gu thava gu tshumayela sihevbuli sikhwathu. Nyi di gu khala dzitshoni. Nya gu khedza hwane, kha nyi gi woni gighelo nya gu thave. Olu nyi ngu tsaka khu gu tshumayela sihevbuli sikhwathu.”
(Vaefeso 6:16, 17) Pharani ngudzungudzu gukhodwa mu gu gira gitshangu nya guvhike matshari yatshavbo nya nilo wa Sathane. 17 Ambalani gihugu nya guvbanyiswe, gasi magana ya Nungungulu ma phareni kha nga litshari mu ningwago khu Liphuvbo nya Guage.
w18.05 dzipaji. 25-26, dzindri. 13, 16, 20
Vaphya emani mu tiya, mu wugeya Dhiyabhulosi
Khu mevbi “matshari . . . nya nilo” aya Sathane a nga gu rinyeyago? Yimbe tepo a nga gu wugeya khu malipha maningano ni Jehovha. Sathane o vbweta gu khuye u dzipwa nga khatshi Jehovha kha gu haladzi nigu mwalo a khathalago khuwe. Ida, a gu na ni 19 myaga, wari khuye: “Nyi ngu tshuka nyi dzipwa nga khatshi Jehovha womo hwindzo ni eni ni gu khatshi uye kha dzini gu khala pari yangu.” Ginani egi uye a girago tepo a dzipwago kharato? “Mitshangano yi ngu engedzeya gukhodwa gwangu. Nyi di gu oloveya gu khala basi nyi si hlamuli, na nyi gu pimisa gu kheni mwalo a na vbwetago gu engiseya esi nyi ganeyago. Olu nyi ngu dongiseya mitshangano nyi bwe nyi zama gu hlamula guvili mwendro guraru. Si ngu garadza, ganiolu olu nyi ngu dzipwa gwadi nya gu gira isoso. Nigu vandriyathu va ngu nyi tiyisa ngudzu. Tepo yatshavbo nya gu wuya khu mistshanganoni na nyi gu dziti gu kheni Jehovha a ngu nyi haladza.”
Kha nga olu gihugo gi vhikeyago wuluvi nya lisotshwa, “gutumba nya guvbanyiswe” gwathu gu ngu vhikeya mapimo yathu. (1 Tes. 5:8; Mav. 3:21) Gutumba go hi phasa gu vega gupima avba nya situmbiso sa Nungungulu nigu hi si vbeyi tshivba khu kotani nya sigaradzo sathu. (Ndzi. 27:1, 14; Mith. 24:15) Ganiolu ha gu ba hi vbweta gu khethu gukhodwa gwathu gu hi vhikeya, gu vbwetega gu hi gu wona na guri ga lisine. Gu vbwetega gu hi ambala “gihugo” gyathu hungoni, hi si gi phari khu mandza!
Mupostoli Pawulo ganede gu khuye Lito la Nungungulu la gu fana ni litshari hi ningidwego khu Jehovha. Ganiolu gu vbwetega gu hi hevbula gu li thumisa gwadi gasi gu emeya gukhodwa gwathu mwendro gu vbindrugedza mapimiselo yathu. (2 Kor. 10:4, 5; 2 Thim. 2:15) U nga tshukwadzisa kharini mathumiselo yago nya litshari lolo? Sebastian, a gu na ni 21 myaga, wari khuye: “Nya gu lova livhesi limwedo nya gipimo ni gipimo nya Bhibhiliya nyi lerigo. Nyi sasamedza mavhesi nyi ma golago ngudzu.” Isoso si ngu mu phasa gu pwisisa gwadi mapimiselo ya Jehovha. Danieli nuye wari khuye: “Tepo nyi lerigo Bhibhiliya, nya gu vegedza mavhesi nyi dundrugeyago gu kheni ma na phasa vathu nyi va manago gutshumayelani. Nyi ngu wona gu kheni vathu va ngu dzumeya va gu wona gu khavo u ngu yi gola Bhibhiliya nigu u ngu gira ni gevbini u gi kodzago gasi gu va phasa.”
Kemba dzithomba nya liphuvbo
(Vaefeso 4:30) Mu nga theyi wusiwana Liphuvbo nya Guage la Nungungulu, kholu Liphuvbo khigyo gifungo mu lovidwego khu Nungungulu. Khigyo mu nata tidwago khigyo litshigu Nungungulu a natago a ta mi tshula wugumbini nya guvivbe gwatshavbo.
it-3 paj. 527, ndri. 2
Guaga
Liphuvbo nya guage. Tshivba yi thumiswago khu Nungungulu, mwendro, liphuvbo li woneledwago khuye li bwe li tadzisa makungo yaye tepo yatshavbo. Ilo li agide, li hathegide, nigu li vegedwe gu thumiswa khu Nungungulu. Khiso si girago li ranwa pwani “liphuvbo nya guage.” (Ndz 51:11; Lu 11:13; Ro 1:4; Ef 1:13) Liphuvbo nya guage li thumago avba nya muthu tshivba nya guage. Mavbanyelo yatshavbo nyo nyenyeze mwendro mithumo nya guvivbe ya gu wugeya mwendro gu ‘theya wusiwana’ liphuvbo nya guage. (Ef 4:30) Ambari olu liphuvbo nya guage khu labune li gu siri muthu, ilo li ngu yeyedza makhalelo nyo age ya Nungungulu nigu si ngu kodzega gu li ‘theya wusiwana.’ Ni gevbini egi muthu a girago khu gu ndraga milayo, a gu ‘degudza lito nya liphuvbo nya guage.’ (1Tes 5:19) Ga gu tshuka muthoyo a simama ni mavbanyelo yoyo, liphuvbo nya guage la Nungungulu li na “swihala,” nigu isoso si nga gira gu gindraga milayo gyogyo gi khala nala wa Nungungulu. (Isa 63:10) Muthu a gu theya wusiwana liphuvbo nya guage avba nya gu a li hembulula, Jesu a di khuye gighoho gyogyo gima kha gi na nga divaledwa ne olu, ambari ga tepo yi tago. — Mt 12:31, 32; Mr 3:28-30; wona LIPHUVBO.
(Vaefeso 5:5) Dzitini gwadi gukhenu muthu nya wubhayi, nya liphuphulu ni ligungo, ni va nya gukhozela vanungungulu nya malipha, gima kha va na hodza thomba mufumoni wa Kristo ni wa Nungungulu.
it-2 paj. 179, ndri. 4
Mahingigedzo nya guvivbe
Ma gu dzi yeyedza khu mithumo. Mahingigedzo nya guvivbe ma gu dzi yeyedza khu mithumo yi yeyedzago gudogoreya nyo vivbe gu gu na ni muthu nyo khaguri. Moyo nya mulovi nya Bhibhiliya nya gu pwani khu Jakobe, a gu hi embeya gu khuye gudogoreya nya guvivbe gwa gu khura mimba gwa gu velega gighoho. (Jak 1:14, 15) Muthu nya mahingigedzo nya guvivbe a gu tugudwa khu mithumo yaye. Pawulo ganede gu khuye muthu a gu ni gudogoreya nya guvivbe, a nga ranwa gambe pwani mukhozeyi nya sifananiso. (Ef 5:5) Muthu yoyo, monyoni gwaye, a gu vbindrugedza egi a gi dogoreyago gi khala nungungulu waye, a thangisa igyo guvbindra gu khozeya Muvangi. — Ro 1:24, 25.
24-30 NYA JUNHO
DZITHOMBA NYA LITO LA NUNGUNGULU | VAFILIPI 1-4
“Mu nga garadzegi khu gilo”
(Vafilipi 4:6) Mu nga garadzegi khu gilo. Omu nya milombelo yanu lombani esi mu si vbwetago ga Nungungulu, khu monyo nya gubonge.
w17.08 paj. 10, ndri. 10
“Gurula ga Nungungulu gu dzi kodzago gu vboha ni omu hi si gu alakanyigo”
Ginani gi nga hi phasago gu mba garadzega ambari go dugeleya ni gevbini, ni gu bwe hi dzi buza khu “gurula ga Nungungulu”? Malito ya Pawulo a ma yisidego ga vaFilipi, ma gu hi yeyedza gu khayo nombelo khuwo rendre nya gugaradzega. Khu kharato, ha gu garadzega gu vbwetega hi si pata omu nya milombelo yathu. (Leri 1 Pedro 5:6, 7.) Gira nombelo ga Jehovha khu gukhodwa gwatshavbo, na wu gu tiyisega gu khuwe a na gu khathaleya. Gombeya khu liphuvbo nya gu “bonge Nungungulu,” na wu gu dundrugeya khu makategwa a gu ningago. Gutumba gwathu gu na tsitsa mikhamba ha gu sayisa mapimo nya gu khayo uye a nga gira “satshavbo esi hi mu lombago, ambari ni esi hi alakanyago, khu tshivba Yaye yi thumago ndrani gwathu.” — Efes. 3:20.
(Vafilipi 4:7) Gurula ga Nungungulu gu dzi kodzago gu vboha ni omu hi si gu alakanyigo, gu na sayise myonyo ni mapimo khu ga Kristo Jesu.
w17.08 paj. 10, ndri. 7
“Gurula ga Nungungulu gu dzi kodzago gu vboha ni omu hi si gu alakanyigo”
Tepo vandruye va tigoni ga Filipi va nga leri lidangaliya la Pawulo, va di wona gu khavo Jehovha giride silo nyo samadzisi gasi gu tshudzisa Pawulo ni Silasi. Gihevbudzo muni va ningidwego khu Pawulo? Gwadigwadi khegi: Mu nga garadzegi. Gombeyani, mu na hakhani gurula ga Nungungulu. Ganiolu wona gu khuwe “Gurula ga Nungungulu gu dzi kodzago gu vboha ni omu hi si gu alakanyigo.” Sa gu thula ginani isoso? Wumbe wuvbindrugedzeyi wari khuwo “guvbindrago esi hi si lorago” mwendro “guvbindra esi hi kodzago gu si pwisisa.” Khu kharato Pawulo a di gu khuye “gurula ga Nungungulu” gu ngu samadzisa ngudzu guvbindra esi hi si pimisago. Ambari olu khu guya khu mawonelo nya vathu si si kodzegigo gu wona rendre nya sigaradzo sathu, Jehovha a ngu wu wona, nigu a nga hi gireya esi hi ngu mba si vireya. — Leri 2 Pedro 2:9.
w17.08 paj. 12, ndri. 16
“Gurula ga Nungungulu gu dzi kodzago gu vboha ni omu hi si gu alakanyigo”
Tshatshazelo muni hi na wu manago ha gu hakha “Gurula ga Nungungulu gu dzi kodzago gu vboha ni omu hi si gu alakanyigo”? Milowo ya gu hlamula khu gu khiyo: ‘Gu na sayisa myonyo ni mapimo yathu khu ga Kristo Jesu.’ (Filp. 4:7) Lito nya giGreki nyo pwani gu “sayisa” la gu dugeya avba nya masotshwa ma nga ba ma vhikeya lidhoropa. Isoso si di gu girega tigoni ga Filipi. Avo va nga ba va khala eyi va di gu hodza gu releya kholu va di gu dziti gu khavo gu na ni masotshwa ma woneleyago lidhoropa. Khu gufana, ha gu ba hiri ni “gurula ga Nungungulu,” myonyo ni mapimo yathu sa gu pepemeya. Hi ngu dziti gu khethu Jehovha a ngu hi khathaleya nigu a gu vbweta gu khuye hi dugeleya. (1 Ped. 5:10) Guti isoso si ngu hi gira hi si khali na hi garadzegide, mwendro gu vbeya tshivba.
Kemba dzithomba nya liphuvbo
(Vafilipi 2:17) Ambari gu lomba gu ningela womi wangu nyi gira mhamba nya phaso gasi gu pata ni miningelo yanu nya gukhodwe ga Nungungulu. Eni si ngu nyi tsakisa, gambe nyi ngu hengela gutsaka gogu ni enu mwatshavbo.
it-3 paj. 123, ndri. 6
Miningelo
Miningelo nya vbinyu mwendro miningelo nyo sedwe. Miningelo yeyi di gu ningedwa gumogo ni yimbe miningelo, ngudzungudzu hwane nya gu ba vaIsrayeli va vbohide Tigoni nya Gitumbiso. (Mit 15:2, 5, 8-10) Wu di gu girwa khu vhinyu ni gu wu di gu porodzodzwa vbagiluvelotunu. (Mit 28:7, 14; fananisa ni Eks 30:9; Mit 15:10.) Mupostoli Pawulo lovede maKristo ya tigoni ga Filipi khuye: “Ambari gu lomba gu ningela womi wangu nyi gira mhamba nya phaso mwendro kha nga ningelo nyo sedwe gasi gu pata ni miningelo yanu nya gukhodwe ga Nungungulu. Eni si ngu nyi tsakisa, gambe nyi ngu hengela gutsaka gogu ni enu mwatshavbo.” Avba thumiside giyeyedzo nya wadwa gasi gu tshingisa gudziemiseya gwaye nyo dzi garadze gu thumeya maKristo-kwanu khavba a si kodzago khavbo. (Flp 2:17) Na si gufi, a di loveya Thimoti khuye: “A gu bani ari eni, nyi lulamide gu khala mhamba kholu, gikhati gyangu nya gufe gi ngu vboha.” — 2Tm 4:6.
(Vafilipi 3:11) ni gitumbo nya gumane guwuga khu ga vafudego.
w07 1/1 dzipaji. 26-27, ndri. 5
‘Guwuga khu ga vafudego’ nyo pheye gomo vbafuvbi ngudzu!
Khu gulandreya, ava va todzidwego a gu “libandla latshavbo la Nungungulu” va na patana ni Pfhumu Jesu Kristo omu nya wudhumu wa ndzadzini, iyo va na khalago ni “Pfhumu kala gupindruga.” (Vagalatiya 6:16; 1 Vatesalonika 4:17) Gigiro gyogyo gya gu ranwa pwani “guwuga khu ga vafudego” nyo hegule. (Vafilipi 3:10; Gutuledwa 20:6) Tepo khiyo gu na hegisago guwuswa gogo, gu na ba gu vbohide tepo nya gu wuswe dzimiliyoni nya vathu gasi va vbanya omu mafuni ni makungo nyo vbanye kala gupindruga Paradhesini. Khu kharato, gutumba hi gu nago gani khogu nyo ya vbanye ndzadzini, gani khogu nyo vbanye mafuni, hi gu lambede ngudzu “guwuga khu ga vafudego” nyo hegule. Gasi gu wuswa nyo khale kharini ugogo? Gu na girega khu tepo muni?