Mitshamuselo yi gomogo omu nya mabhuku ma khumbugidwego omu nya Gibhukwana nya mitshangano nya thumo ni mavbanyelo
5-11 AGOSTO
DZITHOMBA NYA LITO LA NUNGUNGULU | 2 THIMOTI 1-4
“Nungungulu kha hi ninga liphuvbo nya hwanga”
(2 Thimoti 1:7) Kholu, Nungungulu kha hi ninga liphuvbo nya hwanga, aholu, a hi ningide liphuvbo nya tshivba ni lihaladzo ni gu dzi phara.
w09 15/5 paj. 15, ndri. 9
Vaphya — Gu dandra gwanu khu liphuvboni gu na wonege
Khu gu gimbiya nya tepo gasi gu phasa Thimoti, Pawulo a di mu dundrugisa khuye: “Nungungulu kha hi ninga liphuvbo nya hwanga, aholu, a hi ningide liphuvbo nya tshivba ni lihaladzo ni gu dzi phara.” (2 Thim. 1:7) “Gu dzi phara” go pata gu pimisa ni gu dundrugeya gwadi. Isoso sa gu pata gu wona silo khedzi si gu idzo kamo; nasiri khedzi u vbwetago gu khuwe si khala idzo. Vambe vaphya va gu matenvura va gu yeyedza liphuvbo nya hwanga nigu mapimoni gwawe va gu zama gu pfhuka gugaradzega khu gu va lala ngundzu, mwendro gu sixitiri televhizawu nya mba ema, gu daha mwendro gu vbumbureya wadwa, gu landriseya sipfhitsha, mwendro gu dzi bedza wubhayini. Makristo ma gu gengedzwa “gu diga mavbanyelo nyamba khodwa, ni gu [dogoreya] silo nya mafu yaya, gasi hi vbanye tigoni momu khu gu dzi phara, ni gululama, ni gutumbega ga Nungungulu.” — Tito 2:12.
(2 Thimoti 1:8) Khu kharato, u nga khali dzitshoni gu fakaza Pfhumu yathu, gambe u nga khali dzitshoni khu eni nyi gu gibotshwa khu kotani yaye. Aholu saniseka gumogo ni eni khu kotani nya Ivhangeli nu gu tiyiswa khu tshivba ya Nungungulu.
w03 1/3 paj. 9, ndri. 7
‘Tiya longo ni gutimiseya!’
Pawulo a di loveya Thimoti khuye: “Nungungulu kha hi ninga liphuvbo nya hwanga, aholu, a hi ningide liphuvbo nya tshivba . . . Khu kharato, u nga khali dzitshoni gu fakaza Pfhumu yathu.” (2 Thimoti 1:7, 8; Marko 8:38) Hwane nya gu ba hi leride mavhesi yaya hi nga dzi wudzisa khethu: ‘Nyi ngu khala dzitshoni khu kotani nya gukhodwa gwangu, mwendro nyi ngu tiya hwambo? Thumutunu gwangu (mwendro xikwatunu), va ngu dziti gu khavo nyi Fakazi ya Jehovha mwendro nyo zama gu va siheya? Nyi ngu khala dzitshoni khu gu ba nyi hambanide ni vambe, mwendro nyi ngu tangala khu gu ba vati gu khavo nyi pari ya Jehovha?’ Ga gu tshuka muthuyo a manega ni mawonelo nya mba yadi maningano ni thumo nyo tshumayele mahungu nya yadi mwendro gu thava gu dzipwa na si wonegi, a na dundruge khu wusingalagadzi Jehovha a ningidego Josuwa wu gu khuwo: “Tiya longo ni gutimisela.” Gima u nga divali, aya khandri mawonelo ya sithumi mwendro sihevbuli-kwanu, ganiolu mawonelo ya Jehovha ni Jesu Kristo. — Vagalatiya 1:10.
Kemba dzithomba nya liphuvbo
(2 Thimoti 2:3, 4) Tshaniseka gumogo ni eni sigaradzoni gwangu gwatshavbo, nga musotshwa wa Kristo Jesu. Oyu a hongolago litungatunu aya dwana mwalo mahungu ni gu khedza silo nya guvbanye gwaye, a gu vega mapimo yaye ga muphari nya litunga, gasi a mu tsakisa.
w17.07 paj. 10, ndri. 13
Vbwetedzeya dzithomba nya lisine
Thimoti a diri mwama nya gukhodwe. Hwane nyo rane Thimoti nga “musotshwa wa Kristo Jesu,” Pawulo a di mu embeya khuye: “Oyu a hongolago litungatunu aya dwana mwalo mahungu ni gu khedza silo nya guvbanye gwaye, a gu vega mapimo yaye ga muphari nya litunga, gasi a mu tsakisa.” (2 Thim. 2:3, 4) Muhuno, valandreyi va Jesu gu pata ni libuthu nya sithumi nya tepo yatshavbo li vbindrago miliyoni mweyo, vo gira satshavbo va si kodzago gasi gu landra wusingalagadzi wa Pawulo khavba va si kodzago khavbo. Avo kha va dzumeyi gu pfhadzwa khu mikutsedzelo nya litigo. Nigu gambe kha va divali esi Bhibhiliya yi ganeyago: “Gisiwana gya gufumedwa khu gitetema, ni uye a fiyarigo mangava, a gu khala khumbi ya mufiyarisi.” (Mav. 22:7) Litigo la Sathane gimwalo gimbe gilo li gi vbwetago vbavbandze nya gu hi wone na hi gu haganiseya tepo ni tshivba yathu na hi gu landriseya silo nya mafu yaya. Simbe silo hi hungago guvbanyani si nga hi khadzisa dzigumbi nya litigo khu myaga ni myaga. Khu giyeyedzo, vambe vathu va gu wusa mangava nya makhongolo khu gu zama gu renga dzindranga mwendro gu livheya dzixikola nya univerisidhadhe. Vambe va ngu vbedza myaga nya yingi na va gu livbeya mangava va ma wusidego gasi gu gira fexita nya mutshadho mwendro gu renga movha. Ganiolu ethu ho dzi garadzeya gu vbevbugisa womi. Khu kharato ho dzipwa na hi tshulegide gu khala sithumi sa Nungungulu nasiri nya litigo leli. — 1 Thim. 6:10.
(2 Thimoti 2:23) U nga dzumeli gu hakha mahungu nya wupumbu. U ngu dziti gwadi nya gukhuwe ma gu vanga guhambana.
w14 15/7 paj. 14, ndri. 10
Vathu va Jehovha ‘kha va dzumeyi mahungu nya wupumbu’
Muhuno, vathu va Jehovha kha va ngo oloveya gu vhikisana gambe ni wupandrugi libandlani. Ambari ulolo, ha gu tshangana ni sihevbudzo nya wupumbu hi yede gu dzegeya gu si bomba, ambari na si guta khu hayi. Wupumbu nya wukhongolo gu dzi bedzedzeya omu nya mabhulo nya vapandrugi, gani khu wugulu, gani khu gu hakha mabhulo omu nya dzisayiti nya mabhulo, mwendro simbe. Ambari makungo na guri gu phasa muthuyo, isoso si na ba si hambana ngudzu ni gileletelo nya Milowo hi ganedego khigyo. Vbavbandze nya isoso basi, khu gu, kha nga hi gu vathu va Jehovha, hi yede gu potsa, ina, gu potsa wupandrugi khu gu vbeleya.
12-18 NYA AGOSTO
DZITHOMBA NYA LITO LA NUNGUNGULU | TITO 1–FILEMONI
“Vega vathangeli nya libandla”
(Tito 1:5-9) Nyi gu tshide gidwane gya Kereta gasi u fela gu lulamisa esi si nga tshadego gu lulamiswa, ni gu vega vathangeli nya libandla madhoropani gwatshavbo. Alakanya sileletelo sangu: 6 Muthangeli gu vbwetega nari muthu nyambana gihoso ni vathu, a gu ni nyamayi moyo basi; sanana saye siri vakhodwa, nyambana ndruma nya guvivbe ni gumba yingisa. 7 Kholu muthangeli nya Libandla, a rwadego thumo nya gusayise silo sa Nungungulu, gu vbwetega nari muthu nyambana gihoso, nyamba dzi gugumugisa, nyambana wukhusu, a si gu bewudzi, nyambana sighirimuka, a si gu pari nya wugwewo nya guvivbe. 8 Aholu, gu vbwetega oyu a kodzago gu hakha vapfhumba, a gola esi nya sadi, gu vbwetega muthu nya mapimo a gu ni lisine, a gu mukhodwa, ni ndruda; 9 gu vbwetega oyu a tiyidego, a tumbegidego omu nya sihevbudzo nya lisine, afela gu kodza gu tiyisa vakwawe khu sihevbudzo nya lisine, ni gu kawuka ava va ganedzago sihevbudzo sesi.
w14 15/11 dzipaji. 28-29
Siwudziso sa valeri
Ambari olu Milowo yi si tshamuseyigo khu gimwegyo ni gimwegyo edzi gu nga ba gu hathwa khidzo vathangeyi nya libandla gale yoyo, hi na ni guwonegeya nya edzi si nga ba si girwa khidzo. Hi wonide gu khethu tepo Pawulo ni Bharnabha va nga ba vari ndziyani nyo wuye khu liendroni lawe nyo pheye nya wumisiyonariyo, “va di hatha madhota khu libandla ni libandla va gu ma vega mandzani ga Pfhumu va khodwego gwaye.” (Mith. 14:23) Hwane nya myaga, Pawulo a di loveya pari yaye Tito, khuye: “Nyi gu tshide gidwane gya Kereta gasi u fela gu lulamisa esi si nga tshadego gu lulamiswa, ni gu vega vathangeli nya libandla madhoropani gwatshavbo. Alakanya sileletelo sangu.” (Tito 1:5) Khu gu fana, Thimoti, a gu moyo a gimbiyagibidego ngudzu ni Pawulo, so woneya na ningidwe nuye thumo wowu. (1 Thim. 5:22) Vbavbandze nyo kanakane, madhota yoyo ma di gu emiswa khu vawoneleyi va gimbiyagimbiyago, nasiri vapostoli, vandruyi va dandridego khu tanga va Jerusalema.
Huwo nyo Thangeye nya Dzifakazi dza Jehovha, na yi gu thumisa wuthangeyi nya milowo, yi tshukwadziside edzi gu emiswago khidzo madhota mwendro vaphasedzeyi nya libandla. Gu khugeya khu 1 nya Setembro nya 2014, madhota ni vaphasedzeyi nya libandla va gu emiswa kharati: Vawoneleyi vatshavbo nya sipandre va gu wona gwadi satshavbo si pategago avba nya vandruyi va hathidwego va gipandreni gyawe. Ndrani nya semana a wuseyago libandla lolo, a na zama khavba a si khodzago guti gwadi ndriyathu yoyo khu gu a thuma naye gutshumayelani sa gu kodzega. Hwane nya guba a bhude ni huwo nya madhota nya libandla lolo, muwoneleyi nya gipandre na ni thumo nyo emise madhota mwendro vaphasedzeyi nya libandla. Malulamiselo yaya kha ma tshiyani nesi si nga ba si girwa ga lizana myaga nyo pheye.
Khu wevbi thumo nya moyo ni moyo a pategago avba nya silo sesi? Kha nga giolovedzo, ‘githumi nya gutumbege ni nya gugengeye’ gi na ni thumo nyo pheye nyo hodzise. (Mat. 24:45-47) Isoso so pata gu gevisisa Milowo, khu gu phaswa khu liphuvbo nyo age, gasi guti matshina nya Bhibhiliya ma yeyedzago edzi hengeledzago yi yedego gu gimbiya khidzo. Khavbovbo, iyo yi hi ninga sileletelo hi yedego gu si landreya. Huwo nyo thangeye gambe ya gu emisa vawoneleyi nya sipandre ni sivbango nya Kometi nya Litamo. Aniyo Kometi nya Litamo yo ningeya siphaso nya edzi hi nga landreyago khidzo sileletelo hi ningwago. Khavbovbo, huwo nya madhota wu na ni thumo nya wukhongolo nyo wone gu khiyo vandruyi ha hathwago gasi gu khala madhota mwendro vaphasedzeyi va ngu ninganedwa guya khu milowo gani. Muwoneleyi ni muwoneleyi nya gipandre na ni thumo nya wukhongolo nyo wone gwadi, na gu si gombeleya maningano nava va hathidwego khu huwo nya madhota gu khala madhota mwendro vaphasedzeyi nya libandla va ninganedwago.
Kemba dzithomba nya liphuvbo
(Tito 1:12) Khidzo a nga ganelago moyo nya muprofeti wawe wa gidwane gya Kereta, khuye: “Vathu va Kereta vathu nya malipha gikhati gyatshavbo, sirengo nya gugaradze, makhondrobwa, migara.”
w89 15/5 paj. 31, ndri. 5
Siwudziso sa valeri
Khandri khatshi a di gu dzumeleyana ni mawonelo nyo hatheye mafumbo mwendro gu khuye vaKereta kha va phasi. Hi nga tiyisega khu isoso kholu Pawulo a di gu dziti gu khuye vaKereta va diri maKristo nya yadi aya Nungungulu a nga ba a ma hathide ni gu bwe a ma todza khu liphuvbo Laye nyo age. (Mithumo 2:5, 11, 33) Gu diri ni maKristo nya mangi nyo dziningedzeye gasi gu emisa mabandla khu “lidhoropa ni lidhoropa, NM.” Ambari olu maKristo yoyo ma nga bari vathu nya gu mba vbeleya, hi ngu tiyisega gu khethu va diri mwalo malipha ni wukhondrobwa; kholu nari khatshi va diri vathu nya makhalelo yoyo, na va sa simama gu hakhwa khu Jehovha. (Vafilipi 3:18, 19; Gutuledwa 21:8) Kha nga si giregago mafuni gwatshavbo muhuno, adzina nugo tigoni ga Kereta gu diri ni vathu nya vadi va nga ba va garadzega khu mavbanyelo nya wundranga milayo ma nga ba ma ri mule, ni gu bwe va dzi emiseya gu hakha mahungu nya wuKristo. — Ezekiyeli 9:4; wona gambe Mithumo 13:48.
(Filemoni 15, 16) A gu dzina saye a di hambana nago gikhati gidugwanana, gasi u fela gu mu mana u khala naye gikhati gyatshavbo. 16 Nasiri gambe gu mu gira kha nga khumbi; aholu mu hakhe kha nga ndriyago, nyi mu golago ngudzu eni, aholu ngudzungudzu uwe, a gu ndriyago khu wuthu ni ga Pfhumu.
w08 15/10 paj. 31, ndri. 4
Dzithomba dza omu nya madangaliya ya Tito, Filimoni, ni Vahebheru
15, 16 — Khu ginani Pawulo a nga ne lomba Filimoni gu tshula Onesimo? Pawulo a di gu vbweta gu phareleya gwadi thumo waye nyo ‘hevbudze mahungu ma ganeyago khu Pfhumu Jesu Kristo.’ Khu kharato, a di wona na guri tshukwana gu mba dzi bedzedzeya omu nya silwana, gasi a si khali gumbi nya silo soso. — Mithumo 28:31.
19-25 NYA AGOSTO
DZITHOMBA NYA LITO LA NUNGUNGULU | VAHEBHERU 1-3
“Gola gululama u nyenya guvivba”
(Vahebheru 1:8) Aholu, na gu thula Mwamana, a di khuye: “Uwe u Nungungulu, mufumo wago wu na simama kala gupindruga. U ngu fumela litigo lago khu gululama.
w14 15/2 paj. 5, ndri. 8
Rungudza Kristo, Pfhumu nyo hathege!
Jehovha emiside Mwanaye nga Pfhumu nya wuMesiya ndzadzini khu 1914. Kha nga olu ‘mufumo waye wu na simamago kala gupindruga,’ vbavbandze nyo kanakane gu na ba guri ni gululama nigu vathu va na ba vari khu gufana mufumoni waye. Wufumeli waye khwa wusumbudwa, nigu ‘Nungungulu gikhalo gyaye nya wufumu.’ Isoso so thula gu khiso Jehovha khuye muwumbi nya wufumu waye. Ni gu gambe, wukhalo nya wufumu wa Jesu wu na “simama kala gupindruga.” Ina kha wu tsaki gu thumeya Jehovha vbavbatshi nya wufumo wa Pfhumu nya tshivba yi hathidwego khu Nungungulu?
(Vahebheru 1:9) U ngu gola gululama, u nyenya guvivba. Khu guralo, Nungungulu, a gu Nungungulu wago, a gu todzide khu mafura nya gunengele, a gu khusedza vbatshani ga dzipari dzago.”
w14 15/2 dzipaji. 4-5, ndri. 7
Rungudza Kristo, Pfhumu nyo hathege!
Leri Ndzimo 45:6, 7. Khu kotani nya lihaladzo nya likhongolo la Jesu khu wululame, ni olu a nyenyago ni gevbini gi nga gorosago Papayi waye, Jehovha mu todzide nga Pfhumu nya Wufumo nya wuMesiya. Jesu todzidwe khu “mafura nya gunengele” gu vbindra ‘vatshavbo a palisanago navo,’ dzipfhumu dza Judha nya sasamedzo wa Dhavhidhe. Khu ginani? Nyo pheye, Jesu a di todzwa khu Jehovha khu wugulu. Nya wuvili, Jehovha todzide Jesu nga Pfhumu ni Muphasi nya mhamba. (Ndzi. 2:2; Hebh. 5:5, 6) Ni gu gambe, Jesu kha todzwa khu mafura ganiolu khu liphuvbo nyo age, nigu wufumo waye khandri wa mafuni ganiolu khwa ndzadzini.
Kemba dzithomba nya liphuvbo
(Vahebheru 1:3) Mwamana khuye gungangamela nya wudhumo wa Nungungulu, khuye gambe giwonelo nya guvbelele gya Nungungulu. Khuye a pharago silo satshavbo khu tshivba nya magana yaye. Hwane nya gu na agiside vathu vatshavbo, a diya khala wulanga waye ndzadzini, nyamudye ga Nungungulu nya Tshivba Yatshavbo.
it-2 paj. 382, ndri. 1
Gifananiso
Ina Jesu a di gu yeyedza makhalelo ya Papayi waye khu guvbeleya?
Gyanana nya matewula gya Nungungulu, khu gu gimbiya nya tepo gi nga tidwa gu pwani khu Jesu, gi giridwe khu gifananiso gya Babe waye. (2Ko 4:4) Kha nga olu Gyanana gyogyo a gu egi Nungungulu a nga ganeya khuye: “Hongoleni hi gire muthu khu mufananiso wathu,” gifananiso gyogyo nya Gyanana ni Babe wagyo, Muvangi, gyomo gukhugeya guvangwani ga Jesu. (Ge 1:26; Joh 1:1-3; Kol 1:15, 16) Tepo Jesu a nga ba a romo mafuni nga muthu nyo vbeleye, a di gu yeyedza makhalelo ya Papayi waye khu talo ni talo, ndrani nya makodzelo nya muthu, avba a nga khuye: “Uye a nyi wonago, a ngu wona Babe” (Joh 14:9; 5:17, 19, 30, 36; 8:28, 38, 42) Gufanana gog o gu tshingisidwe tepo khiyo Jesu a wusidwego nga muthu nya liphuvbo, ni tepo khiyo a nga ningwa “tshivba yatshavbo nya gufume Ndzadzini ni mafuni” khu Papayi waye, Jehovha Nungungulu. (1Pe 3:18; Mt 28:18) Kha nga olu Nungungulu a ‘khusedzidego Jesu,’ Olu Gyanana gya Nungungulu gi na ni wuzundzu nya wukhongolo gu vbindra owu gi nga ba giri nawo na gi nga si guti mafuni. (Flp 2:9; Heb 2:9) Olu uye “giwonelo nya guvbelele gya Nungungulu.” — Heb 1:2-4.
(Vahebheru 1:10-12) A engedza gambe, khuye: Uwe Pfhumu, guphela u di vanga litigo, ni dzindzadzi sigiro nya mandza yago, 11 aholu sigiro satshavbo nya mandza yago si na vbela, gasi uwe u na simama kala gupindruga; si na kuwuluga kha nga guambala. 12 U na si fumba kha nga gifenengelo, u si vbindrugedza kha nga guambala; aholu, uwe u na simama gu khala idzosaye, gima khu na nga gumba.
it-1 paj. 491, ndri. 2
Ndzadzini
Malito ma gomogo omu ga Ndzimo 102:25, 26 mo thumeya ga Jehovha Nungungulu, ganiolu mupostoli Pawulo lovide malito yaya na gu thula Jesu Kristo. Gighelo khu gu Gyanana gi velegidwego gyonga gya Nungungulu gi di thumiswa khu Nungungulu guvangwani nya silo satshavbo hi si wonago. Pawulo a gu yeyedza guhambana gu gomogo avba nya gusimame ga Jesu ni sivangwa, esi Nungungulu a gu dzina, a nga hadzi gu si “fumba kha nga gifenengedzo” a si vega khu phuvbo. — Heb 1:1, 2, 8, 10-12; wona gambe 1Pe 2:3.
26 NYA AGOSTO–1 NYA SETEMBRO
DZITHOMBA NYA LITO LA NUNGUNGULU | VAHEBHERU 4-6
“U ngu dzi garadzeya gu beya guhefemulani gwa Nungungulu?”
(Vahebheru 4:1) Gitumbiso nya gubele guhefernula-ni hi ningwago khu Nungungulu gi nga tiyide kala na muhuno. Khu guralo, dzi woneleni, vandruye, gasi ni moyo wanu a si luzi gu mana wurendra wowo nya gubele guhefemulani momo.
(Vahebheru 4:4) Umo nya Milowo nya Guage gu lovidwe kharati, khu mahungu nya litshigu nya livbandre na mavili, pwani: “Na vbedzide mithumo yaye yatshavbo, Nungungulu a di hefemula khu litshigu nya livbandre na mavili.”
w11 15/7 dzipaji. 24-25, dzindri. 3-5
So thula ginani guhefemula gwa Nungungulu?
Gu nani silo sivili si hi girago hi khodwa gu khethu litshigu nya livbandre na mavili li di nga romo ga lizana-myaga nyo pheye E.C. Nyo pheye, wona malito ya Jesu a embedego vawugeyi va mu kawukidego gu khavo a gu hawulugisa madwali khu litshigu nya Sabhadho, esi avo va nga ba va si wona nari thumo nyo khaguri. Pfhumu yi di va embeya khiyo: “Babe wangu a gu thuma gikhati gyatshavbo, eni neni nyi ngu thuma.” (Johane 5:16, 17) Wu diri wevbi mongo nya isoso? Jesu a di gu kawukwa khu gu thuma khu Sabhadho. Jesu a di kona vawugeyi khu gu khuye: “Babe wangu a gu thuma gikhathi gyatshavbo.” Gwadigwadi a di gu embeya vawugeyi vale gu khuye: ‘Eni ni Papayi wangu, hi pharegide avba nya thumo wawumowo. Kha nga olu Papayi wangu a thumago khu mazanazana nya Sabhadho yaye, gwangu nyi tshusegide gu thuma khu Sabhadho.’ Khu kharato, Jesu vegide gu agani gu khuye, maningano ni mafu, Sabhadho nya yikhongolo nya guhefemule gwa Nungungulu, matshiguni yaye yi di nga si vbindri.
Gighelo nya wuvili khegi gi ganedwego khu mupostoli Pawulo. Khu gu ba a khumbugide Genesi 2:2 maningano ni guhefemula ga Nungungulu, a di lova khuye: “Ethu hi khodwago, hi ngu bela guhefemulani gu thudwago khu Nungungulu.” (Hebh. 4:3, 4, 6, 9) Khu kharato litshigu nya livbandre na mavili li di nga gu gimbiya matshiguni ya Pawulo. Litshigu leli nya guhefemule li di gu hadzi simama kala lini?
Gasi gu hlamula giwudziso gegi, gu pheya hi yede gu dundruga khu makungo nya litshigu nya livbandre na mavili. Genesi 2:3 a ngu li tshamuseya, wari khuye: “Nungungulu a di kategisa litshigu lolo nya livbandre na mavili, li khala litshigu nya guphasedwe Uye.” Litshigu lolo li di ‘phasedwa’ — gu agiswa, mwendro gu vegwa khu phuvbo, khu Jehovha — gasi gu tadzisa makungo Yaye. Makungo yoyo khayo nya gu khayo vama gumogo ni manyamayi nyo engise va na vbanya mafuni va bwe va ma fumeya. (Gen. 1:28) Gutadzisani nya makungo yoyo Jehovha Nungungulu ni Jesu Kristo, “mune nya Sabhadho,” va gu “thuma gikhati gyatshavbo.” (Mat. 12:8) Litshigu nya guhefemule gwa Nungungulu gu na simama kala gutadzisegani nya makungo yaye guvbeyani nya wufumo wa Kristo nya Likhumi Mazana Myaga.
(Vahebheru 4:6) Vale va nga hegula gu hakha Mahungu nya Yadi kha va bela guhefemulani gwa Nungungulu, kholu kha va khodwa. Aholu, vomo vambe va na gu belago va hefemula naye.
w11 15/7 paj. 25, ndri. 6
So thula ginani guhefemula gwa Nungungulu?
Makungo ya Nungungulu ma di tshamusedwe gwadi ga Adhamu ni Evha, ganiolu kha va kodza gu ma tadzisa. Khu lisine, Adhamu ni Evha khavo vathu nyo pheye va khadego sindranga milayo. Gu khugeya iyoyo, gu dugelede dzimiliyoni nya sindraga milayo. Ambari kamo vathu va hathidwego khu Nungungulu, a gu litigo la Israyeli, khu gu bweleleya va khade sindraga milayo. Si ngu pwisisega gu ba Pawulo a gengedzide maKristo ya lizana-myaga nyo pheye gu khuye vbakari gwawe si ngu kodzega vambe va thegeya maraga ya mamowo ma thegedwego khu vaIsrayeli. A di lova khuye: “Khavbo avbo, hongoleni hi dzi garadze khu gu bela guhefemulani momu, gasi hi si landri giwonelo gya avo va ngamba yingela giwulani, va tandrega gu gu bela.” (Hebh. 4:11) Wona gu khuwe Pawulo a di pwananisa gu mba engisa ni gu mba beya guhefemulani gwa Nungungulu. Isoso so thula ginani gwathu? Abari gu khu ndziya nyo khaguri hi ngu wugeya makungo ya Nungungulu, ina hi womo mhangoni nya gu mba beya omu nya guhefemule gwa Nungungulu? Khu lisine, hlamulo nya giwudziso gyogyo khwa lisima, nigu hi na ganeya khuwo. Olu, hongoleni hi wona gambe egi hi gi hevbulago khu giyeyedzo nya mba gyadi gya vaIsrayeli maningano ni gu beya guhefemulani gwa Nungungulu.
(Vahebheru 4:9-11) Khu magirelo yoyo, gu yeyedza gupwani vathu va Nungungulu va si gu beli guhefemulani nya gukhongolo nya nga ogu Nungungulu a gu manego khu litshigu nya livbandre na mavili. 10 Kholu, oyu a belago guhefemulani gwa Nungungulu a na rula mithumo yaye yatshavbo a gu hefemula nga edzi a hefemudego khidzo Nungungulu. 11 Khavbo avbo, hongoleni hi dzi garadze khu gu bela guhefemulani momu, gasi hi si landri giwonelo gya avo va ngamba yingela giwulani, va tandrega gu gu bela.
w11 15/7 paj. 28, dzindri. 16-17
So thula ginani guhefemula gwa Nungungulu?
Makristo manganiyana muhuno ma di hadzi simama gu landreya silo nyo khaguri nya Nayo wa Mosi gasi gu vbanyiswa. Malito ya Pawulo a ma yisidego ga vaEfeso momo guagani: “Kholu mu vbanyisidwe khu wuhindzi khu kotani nya gukhodwe gwanu; Guvbanyiswa khandri mwa gu gu mana khu tshivba yanu, kholu giningwa gya Nungungulu. Khandri handro nya mithumo yanu, mu yelago gu dzi gugumugisa khiyo.” (Efes. 2:8, 9) Esi so thula ginani ga maKristo maningano ni gu beya guhefemulani ga Nungungulu. Jehovha a di vega litshigu nya livbandre na mavili — litshigu nya guhefemule gwaye — gasi gu makungo yaye khu mafu ma tadzisega khu ndziya nyo hathege. Hi nga beya guhefemulani gwa Nungungulu mwendro gu patana naye guhefemulani khu gu hi thuma khu gupwanana ni makungo yaye a hi yeyedzago khu gu thumisa hengeledzano yaye.
Khu lisine, ha gu kanyisa wusingalagadzi wu seketedwago omu nya Bhibhiliya hi ningwago khu githumi nya gutumbege ni nya gugengeye, hi hatha gu dzi thangeya khu habune, sa gu thula gu tshala hwane tepo makungo ya Nungungulu ma gimbiyago. Isoso si nga gira gu wupari wathu ni Jehovha wu tsagateya. Avba nya ndrimana yi landreyago hi na wona silo nyo khaguri si nga thapheyago sithumi sa Nungungulu. Ni gu gambe hi na wona edzi esi hi si hungago si nga yeyedzago khidzo gu khiso ina kamo hi bede guhefemulani gwa Nungungulu mwendro ahihi.
Kemba dzithomba nya liphuvbo
(Vahebheru 4:12) Mahungu ya Nungungulu khya guvbanya, ma nani tshivba, ma ngu vbira gu vbindra litshari nya gulodzwe eno ni eno. Ma gu paya, ma bela kala matshanganoni nya womi nya muthu. Ma ngu hambanisa gutshangana nya mongo ni marambo; ma ngu tugula mahingigedzo ni mapimo ma sihadego monyoni nya muthu.
w16.09 paj. 13
Siwudziso sa valeri
Ginani “mahungu ya Nungungulu” aya Vahebheru 4:12 a gu khuye “khya guvbanya, ma nani tshivba”?
Mongo wo yeyedza gu khuwo mupostoli Pawulo a di gu thula malito nya makungo ya Nungungulu, nya nga aya hi ma manago omu nya Bhibhiliya.
Vahebheru 4:12 dzimbe dzitepo a ngu khumbugwa omu nya mabhuku yathu gasi gu yeyedza gu khiso Bhibhiliya yi na ni tshivba nyo vbindrugedze mavbanyelo, nigu si ngu pwala gu pimisa kharato. Ganiolu si ngu phasa gu wona esi Pawulo a ganedego na nga si lovi ni hwane nya gu ba na lovide malito yaya. Pawulo a di gu kutsa maKristo nya giHebheu gu hengeya avba nya makungo ya Nungungulu. Wungi nya makungo yoyo ma lovidwe omu nya milowo nyo age. Pawulo thumiside giyeyedzo gya vaIsrayeli va tshudwego wugumbini Egipito. Na va bede omu nya litigo li tumbisidwego “tigoni gu gogago mahwe ni wulombe,” iyo va nga hadzi gu ya dzi buza khu guhefemula nya lisine. — Ekiso. 3:8; Dhet. 12:9, 10.
Isoso si di gu gira gipandre nya makungo ya Nungungulu. Ganiolu vaIsrayeli va di khala vawugeyi nigu kha va yeyedza gukhodwa; khu kharato nya vangi kha va beya guhefemulani gule. (Mite. 14:30; Jos. 14:6-10) Ganiolu Pawulo a di khuye gu nga ri ni “gitumbiso nya gubele guhefemulani” gwa Nungungulu. (Hebh. 3:16-19; 4:1) “Gitumbiso” gyogyo gipandre nya makungo ya Nungungulu. Kha nga ma giridego maKristo nya giHebheru, anethu hi nga leri ni gu bwe hi longoloka ni makungo yoyo. Gasi gu yeyedza gu khuye gitumbiso gyogyo gi di gu dugeya omu nya milowo, Pawulo a di khumbuga sipandre nya Genesi 2:2 ni Ndzimo 95:11.
Hi ngu tsaka khu gu dziti gu khethu “Gitumbiso nya gubele guhefemulani hi ningwago khu Nungungulu gi nga tiyide kala na muhuno.” Hi ngu khodwa avba nya gitumbiso gya omu nya Bhibhiliya nyo khigyo si ngu kodzega gu beya guhefemulani gogo. Ethu hi dzegide mazambo nyo gire isoso, ganiolu khandri khu gu landreya Nayo wa Mosi mwendro khu gu gira basi silo nya sadi ganiolu khu gu hi khodwa ga Jehovha ni gu bwe hi longoloka ni makungo yaye. Khandrethu honga. Ganiolu dzimiliyoni nya vathu mafuni gwatshavbo va ngu hevbula Bhibhiliya ni gu bwe va tugula esi Nungungulu a si yeyedzidego maningano ni makungo yaye. Nya vangi va ngu kutsega gu vbindrugedza silo nyo khaguri guvbanyani, va manega ni gukhodwa ni gu bwe va bhapatiswa kha nga maKristo. Satshavbo soso so yeyedza gu khiso “mahungu ya Nungungulu khya guvbanya, ma nani tshivba.” Esi Nungungulu a hi yeyedzidego omu nya Bhibhiliya maningano ni makungo yaye si vbindrugedzide mavbanyelo yathu, ni gu gambe si na simama gu khuga womi wathu.
(Vahebheru 6:17, 18) Nungungulu a di vbweta gu tiyisa gukhuye gikungo gyaye gima kha gi na vbindrugedza ga vale va nga fanela gu hakha gitumbiso gyaye, khu guralo, a di tiyisa gitumbiso khu gusambanya. 18 Khu kharato, silo sivili si si kodzigo gu vbindrugedza: Gitumbiso ni gisambanyo. Ga esi silo, Nungungulu kha dzi kodzi gu hi senga. Kharato, ethu hi tumbago uye hi ngu dzipwa na hi gu tiyisedwa khu gutumba hi ningidwego.
it-2 paj. 22, ndri. 5
Gutumba
Gutumba gogu nya womi nya pindrugedwa, ni gu mba hina ga vale va ‘ranidwego khu Nungungulu’ (Heb 3:1) gu tiyide nigu gu ngu tumbega. Go seketedwa avba nya silo sivili a gu esi: gitumbiso gyaye ni gusambanya gwaye. Gutumba gomo ga Kristo uye olu a gu ni givili gisifigo ndzadzini. Khu kharato, go ganedwa khu gutumba gogu kha nga “giwindri nya gutiye ni gulemela, nya gurikise guvbanya gwathu gu bela kala ndzadzini, vbagikhalotunu nya wufumu wa Nungungulu. Khumo a hi thangedego, a gu bela umo Jesu, afela gu phasa ethu, a gu khala muphasi nya khongolo nya mhamba, kala gupindruga khu nayo nya wuphasi wa Melikisedheki.” — Heb 6:17-20.