Mitshamuselo yi gomogo omu nya mabhuku ma khumbugidwego omu nya Gibhukwana nya mitshangano nya thumo ni mavbanyelo
7-13 NYA OUTUBRO
DZITHOMBA NYA LITO LA NUNGUNGULU | JAKOBE 3-5
“Manega ni guti gutago khiyo ga Nungungulu”
(Jakobe 3:17) Aholu guti gutago khu ga Nungungulu khu gule gu tengidego, nya gurule, nya gwadi, nya gutale khu wuhidzi. Wa gu ninga mihandro nya mithumo nya yadi. Guti gogu gu mwalo maalakanyo nya guvivbe, mwendro gu pfhadzedzela.
cl dzipaji. 221-222, dzindri. 9-10
Ina “guti gutago khu ga Nungungulu” gu ngu thuma guvbanyani gwago?
‘Nyo pheye ga satshavbo, gu aga.’ Gu khala muthu nyo age sa gu thula gu manega ni mavbanyelo ni mapimo nya yadi. Bhibhiliya yari khiyo guti gu yinganide ni monyo, ganiolu ugo gima kha gu beyi omu nya monyo wu tshoredego khu mapimo ni gudogoreya nyo vivbe. (Mavingu 2:10; Matewu 15:19, 20) Khu kharato, myonyo nyathu ya gu ba yi agide — kala avba si kodzegago ga vathu nya gu mba vbeleya — hi na ‘hambana ni guvivba hi gira wuwadi.’ (Ndzimo 37:27; Mavingu 3:7) Ina kha si pwali ha gu khethu guaga likhalelo nyo pheye li vbwetegago avba nya sasamedzo nya guti? Kholu, ha gu ba hiri ni mavbanyelo nyo nyenyeze, hi nga si kodza gu yeyedza kharini mambe makhalelo nya guti gwa Nungungulu?
“Nya gurule.” Guti ga ndzadzini gu na hi kutsa gu manega ni gurula, a gu handro nya liphuvbo la Nungungulu. (Vagalatiya 5:22) Ho gira satshavbo hi si kodzago gasi hi si khungumuli “gurula” gu tshanganisago vathu va Jehovha. (Vaefeso 4:3) Ha gu gira gambe satshavbo hi si kodzago gasi gu yinga gurula ga gu tshuka gu kaviga. Khu ginani si gu sa lisima? Bhibhiliya yari khiyo: “[simamani] gu khala khu gurula, Nungungulu nya lihaladzo, ni gurula a na khale vbakari gwanu.” (2 Vakorinto 13:11) Gambe ni gambe hi simamago gu vbanya khu gurula, Nungungulu nya gurule a na khala vbakari gwathu. Edzi hi vbanyisanago khidzo ni vandriyathu gukhodwani, si ngu khuha khu gukongoma wupari wathu ni Jehovha. Hi nga yeyedza kharini gu khethu hi vathu va golago gurula? Wona giyeyedzo gimwegyo.
(Jakobe 3:17) Aholu guti gutago khu ga Nungungulu khu gule gu tengidego, nya gurule, nya gwadi, nya gutale khu wuhindzi. Wa gu ninga mihandro nya mithumu nya yadi. Guti gogu gu mwalo maalakanyo nya guvivbe, mwendro gu pfhadzedzela.
cl dzipaji. 223-224, ndri. 12
Ina “guti gutago khu ga Nungungulu” gu ngu thuma guvbanyani gwago?
“Nya guninganiseye, NM.” So thula ginani gu khala muthu nyo ninganiseye? Khu guya khu sihevbulo nyo khaguri, si ngu garadza gu vbindrugedzeya lito nya giGreki nya gu pwani “guninganiseya, NM” li gomogo omu ga Jakobe 3:17. Vambe vavbindrugedzeyi va di thumisa lito “gwadi,” ni “gu pwisisa.” Tshamuselo nyo kongome khu giGreki khuwo wu gu khuwo “gu dzi vbevbugisa.” Hi nga yeyedza kharini gu khethu hi ngu thumisa makhalelo yoyo nya guti ga ndzadzini guvbanyani gwathu?
cl dzipaji. 224-225, dzindri. 14-15
Ina “guti gutago khu ga Nungungulu” gu ngu thuma guvbanyani gwago?
“Gu dzi emiseya gu engisa, NM.” Lito nya giGreki li vbindrugedzedwego gu pwani “gu dzi emiseya gu engisa” kha li manwi wumbe wulanga omu nya Milowo nya giGreki. Khu guya khu tshamuselo nyo khaguri, lito leli la gu thumisedwa “gutala nya dzitepo omu nya wusotshwa.” Lito leli lo ningeya mawonelo nya gu khayo “gu dzumeya wuthangeyi.” Muthu a fumwago khu guti ga ndzadzini a gu dzi emiseya gu thangedwa khu Milowo. Kha tidwi nga muthu nya gu bange hungo, a gu khuye gikolokolo gu na thumiswe mawonelo yaye. Vbavbandze nya isoso, uye a gu dzegeya u vbindrugedza mawonelo yaye guya khu mawolelo nya Milowo. Uwe ke, khidzo u tidwago khidzo kharato?
“Nya gutale khu wuhindzi ni mihandro nya yadi”
“Nya gutale khu wuhindzi ni mihandro nya yadi.’ Wuhindzi gipandre nya lisima nya guti gutago khu ndzadzini, guti gogo ga gu ranwa pwani “Nya gutale khu wuhindzi.” Wona gu khuwe “wuhindzi” ni “mihandro” nya yadi va na tapa ni likandarinya. Isoso si di hiso kwata, kholu omu nya Bhibhiliya, gutala nya dzitepo wuhindzi go thudwa gu khathaleya vambe, gu theya kota khu vambe avba nya gu hi kutsega gu gira mithumo nya lihaladzo. Libhuku nyo khaguri lo tshamuseya wuhindzi nga “gugaradzega muthu a gupwago a gu wona mumbe omu nya giemo nyo garadze, ni gu bwe a zama gu mu phasa.” Guti gwa Nungungulu kha gwa banga mwendro gu vbola, ganiolu ugo gu vbevbugide, gu na ni lihaladzo nigu gu ngu ninganiseya. Hi nga yeyedza kharini gu khethu hi na ni wuhindzi?
(Jakobe 3:17) Aholu guti gutago khu ga Nungungulu khu gule gu tengidego, nya gurule, nya gwadi, nya gutale khu wuhidzi. Wa gu ninga mihandro nya mithumu nya yadi. Guti gogu gu mwalo maalakanyo nya guvivbe, mwendro gu pfhadzedzela.
cl dzipaji. 226-227, dzindri. 18-19
Ina “guti gutago khu ga Nungungulu” gu ngu thuma guvbanyani gwago?
“Guti gogu gu mwalo maalakanyo nya guvivbe.” Guti gwa Nungungulu gu ngu ninga tshivba nya gu pale gihatheya. Ha gu thangedwa khugo, ni na kula ni wevbini khamba nya gihatheya wu tsitsidego monyoni. (Jakobe 2:9) Kha hi na nga ninga lisima vambe vathu khu kotani nya sihevbulo savo, dzithomba mwendro malungelo va gu nawo libandlani; gambe gima kha hi na nga tshepeta vandriyathu ambari ha gu ba hi va woneya vbavbatshi. Abari gu Jehovha va yeyedzide lihaladzo laye, khethu vamani nya gu hi tsarama gu va haladza.
“[gu mba] pfhadzedzela.” Lito nya giGreki li gu khilo “gu pfhadzedzela” li nga thula “wule a girago gipandre nya hagano.” Dziteponi dza gale, vahagani nya giRoma ni giGreki va di gu gira mihagano na va ambade dimaxikara. Khu kharato, lito nya giGreki nyo pwani “gu pfhadzedzela” li di pheya gu thumisedwa gasi gu rana muthu a dzi yeyedzago nari oyu a gu siri uye. Kha nga hi dzitigu gu khethu guti gwa Nungungulu khandri gwa “gu pfhadzedzela,” si yede gu hi kutsa gu phara gwadi vandriyathu ni gu bwe hi dundrugeya wuwadi khawe.
Kemba dzithomba nya liphuvbo
(Jakobe 4:5) Mwa gu alakanya gukhenu Milowo nya guage ya gu ganela mahala, yi gu khiyo: “Ina Liphuvbo li vbanyago milini gwathu, [“la gu simama na li tade khu gudogoreya nya lidiwo gani,”? NM]”
w08 15/11 paj. 20, ndri. 6
Dzithomba dza omu nya malangaliya ya Jakobe ni Pedro
4:5 — Khu wevbi lowo wu nga ba wu khumbugwa khu Jakobe avba? Jakobe kha khumbuga livhesi nyo kongome. Ganiolu malito yaya a ma lovidego khu tshivba ya Nungungulu adzina ma gu dzi seketeya avba nya mongo wa omu ga Genesi 6:5; 8:21; Mavingu 21:10 ni Vagalatiya 5:17.
(Jakobe 4:11, 12) Vandriyangu, mu nga ganelelani guvivba khu gyanu. Oyu a ganelago guvivba khu ndriyaye mwendro gu mu lamula, a ngu ganela guvivba khu nayo, a wu lamula. Uwe wa gu lamula nayo, gu yeyedza gupwani khuri muthu u landrisago nayo, aholu u muthu u lamulago nayo. 12 Nungungulu khuye basi a vegago milayo, khuye gambe basi mulamuli. Uye basi khuye a dzi kodzago gu vbanyisa ambari gu khungumula. Gasi khuwe mani uwe u lamulago ndriyago, na?
w97 15/11 dzipaji. 20-21, ndri. 8
Gukhodwa ga gu hi gira hi khala vathu nyo laphise monyo ni gu gombeya
Gighoho gu ganeya guvivba khu vandriyathu. (Jakobe 4:11, 12) Vambe va ngu ganeya guvivba khu vandruyi, adzina khu kotani nya makhalelo yawe nya wufarisinyana, mwendro va gu vbweta gu dzi khusedza khu gu gandredzeya vambe. (Ndzimo 50:20; Mavingu 3:29) Lito nya giGreki li vbindrugedzedwego pwani ‘gu ganeya guvivba’ la gu wegeleya omu nya wuvivbi, mwendro gu anga malipha khu mumbe mwendro gu vbindrisa. Isoso sa gu thula gu lamula ndriyathu khu wuvivbi. Khu ginani isoso a gu ‘gu ganeya guvivba khu nayo wa Nungungulu’? Wona gu khuwe, Vafarisi ni vahevbudzi va di gu “tshipisa milayo ya Nungungulu” va lamula khu gu thumisa milayo yawe. (Marko 7:1-13) Khu gufana, ha gu lamula ndriyathu oyu Jehovha a nga hadzi gu mba mu lamula, ina khandri sasimweso ni gu kona ‘gulamula ga Nungungulu’ ni gu bwe hi ningeya mawonelo nyo hosege ngudzu nyo khethu gulamula gwaye kha gu phasi? Nigu, ha gu ganeya guvivba khu ndriyathu gutshamba na gu romo, sa gu fana ni gu veta nayo nya lihaladzo khu lisabi. — Varoma 13:8-10.
14-20 NYA OUTUBRO
DZITHOMBA NYA LITO LA NUNGUNGULU | 1 PEDRO 1-2
“Enu agani”
(1 Pedro 1:14, 15) Khalani sanana nya guyingise, mu nga dzumeli guvbanya gwanu gu fumwa khu gudogoreya nya mavbanyelo yanu ya gale; na mu si gu pimini gilo. 15 Aholu, vbelelani guaga ga satshavbo esi mu girago, kha nga Uye a mi ranidego a agidego.
w17.02 paj. 9, ndri. 5
Gudzegiswa — “Giningwa nya gululame” gitago khiyo ga Jehovha
Hi nga yeyedza kharini gu khethu hi ngu haladza lina la Jehovha? Khu mavbanyelo yathu. Jehovha a gu vbweta gu khuye hi khala vathu nyo age. (Leri 1 Pedro 1:15, 16) Isoso sa gu thula gu khiso ha gu khozeya basi Jehovha ni gu bwe hi mu engisa khu monyo watshavbo. Ambari ha gu ba hi tshaniswa, ha gu gira ni gevbini hi gi kodzago gasi gu vbanya guya khu wusingalagadzi ni milayo yaye nyo lulame. Ha gu gira silo nya sadi, ha gu wenengedza, nigu isoso sa gu rungudzisa lina la Jehovha. (Mat. 5:14-16) Ha gu vbanya khu mavbanyelo nyo age, hi na yeyedza gu khethu milayo ya Jehovha khyadi, ganiolu gusingedza ga Sathane khwa malipha. Ha gu hosisa, kha nga hatshavbo hi hosisago, hi na dzi laya hi bwe hi diga ni gevbini gi gorosago Jehovha. — Ndzi. 79:9.
(1 Pedro 1:16) Kholu Milowo nya Guage yari khiyo: “Enu agani, kholu eni nyi agide.”
lvs paj. 77, ndri. 6
Hi nga hatha kharini sivbungadzo
Jehovha a gu hi embeya khuye: “Enu agani, kholu eni nyi agide.” (1 Pedro 1:14-16; 2 Pedro 3:11) Jehovha a na hakha basi wukhozeyi wathu wa gu ba wu agide. (Dhewuteronome 15:21) Jehovha gima kha na nga hakha wukhozeyi wathu ha gu ba hi gira silo nya ndzilo si mu gorosago, nya nga wubhayi, mayunga, mwendro gu dzi tshanganisa ni madhemoni. (Varoma 6:12-14; 8:13) Ni gu gambe Jehovha kha na nga tsaka ha gu vbungadza khu silo soso. Thumo nya silo soso gu tsundzisa wukhozeyi wathu ni gu bwe wu si hakwi khu Jehovha. Gimbe gambe, silo soso sa gu gira gu khiso wupari wathu ni Jehovha wu tsagateya.
Kemba dzithomba nya liphuvbo
(1 Pedro 1:10-12) Vaprofeti va wudzisede ni gu gevisisa gwadi mahungu nya guvbanyiswe gogo, va tiviside mahungu nya giningwa nya guvbanyiswe gi vegisedwego gu ningwa enu. 11 Va zamide gu vbweta guti gikhati muni, matelo muni; Liphuvbo la Kristo li nga bani liri gwawe li va tiviside gikhati gyogyo khu gu va embela sisaniso a nga hadzi gu si mana Kristo, ni wudhumo wu nga vbweta gu manega khu hwane nya iso. 12 Gikhati vaprofeti va ganedego khu Mahungu nya Yadi, aya mu ma pwidego enu olu, Nungungulu tiviside gukhuye thumo wawe wu di si phasi avo, aholu wu di phasa enu. Vagimbidzisi nya Mahungu nya Yadi nya Ivhangeli va nga ganela khu tshivba nya Liphuvbo nya Guage, li nga rumedwa khu ndzadzini, khavo va mi embedego lisine leli. Silo nya gu, ambari dzingilozi dzi di gu gola nidzo gu siti.
w08 15/11 paj. 21, ndri. 10
Dzithomba dza omu nya malangaliya ya Jakobe ni Pedro
1:10-12. Dzingilozi dzi di gu tsakeya gu wona khu vbafuvbi ni gu bwe dzi pwisisa lisine nyo ete eli vaprofeti va Nungungulu va lovidego maningano ni libandla nyo todzwe nya wuKristo. Ganiolu lisine lolo li wonegide gwadi tepo khiyo Jehovha a phedego gu thangeya libandla. (Efes. 3:10) Ina khandri tshukwana hi pimedzeya giyeyedzo nya dzingilozi ni gu bwe hi dzi garadzeya gu gevisisa “misihalo nya guete ya Nungungulu”? — 1 Kor. 2:10.
(1 Pedro 2:25) Kholu enu, gale mu di gu khala nga dzinvuta nya gudzimele, olu mu wuyisidwe ndzilani, gasi muta landra Muhavisi ni Musayisi nya mihefemulo yanu.
it-3 paj. 658, ndri. 3
Muthangeyi
Muthangeyi nya khongolo. Pedro nyo pheye 2:25 sa gu wonega na gu ganeya khu Isaya 53:6 a thulago ava va fanago ni “dzinvuta nya gudzimele,” khavbovbo Pedro a di khuye: “Olu mu wuyisidwe ndzilani, gasi muta landra Muhavisi ni Musayisi nya mihefemulo yanu.” Avba sa gu wonega muhavisi nari go thudwa Jehovha Nungungulu, kholu ava Pedro a va lovedego gima kha va nga diga Jesu Kristo, ganiolu, khu kotani gwaye, va wuyisedwe ga Jehovha Nungungulu oyu a gu Muhavisi nya Khongolo nya vathu vaye. (Ndz 23:1; 80:1; Jer 23:3; Eze 34:12) Jehovha gambe muthangeyi, oyu a holeyago myonyo nya vathu. (Ndz 17:3) Lito gu holeya (giGreki, e·pi·sko·peʹ) li nga gimbileyana ni lito nya wulamuli, kha nga ga lizana myaga nyo pheye teponi yathu, Jerusalema a nga ne tugula ‘litshigu nya guholedwe khilo [giGreki, e·pi·sko·pesʹ].’ (Lu 19:44) Mwendro adzina si di hadzi manega ni mihandro nya yadi, nya nga ga ava va rungudzago Nungungulu ga “litshigu” nya guholeye gwaye [giGreki, e·pi·sko·pesʹ]. — 1Pe 2:12.
21-27 NYA OUTUBRO
DZITHOMBA NYA LITO LA NUNGUNGULU | 1 Pedro 3-5
“Mahegiso nya silo satshavbo gomo vbafuvbi”
(1 Pedro 4:7) Mahegiso nya silo satshavbo gomo vbafuvbi. Gu vbwetega mu gengela, mu dzi wonela, gasi mu kodze gu lombelela.
w13 15/11 paj. 3, ndri. 1
“Gu vbwetega mu gengela, mu dzi wonela, gasi mu kodze gu lombelela”
MWAMA moyo a nga ba a thuma wutshiguwule a di khuye: “Tepo nyo garadze ngudzu gu khala nu khedzugide vbawutshigutunu, mamba gugya.” Ava navo va thumago wutshigu, adzina va ngu dzumeleyana ni malito yaya. Khu gufana, maKristo muhuno ma ngu emisana ni gigaradzo gya gimwegyo, kholu wutshigu nyo laphe wa Sathane mwendro magimbidziselo yaye nya silo ma ngu ramisa gikatawu. (Rom. 13:12) Si na vanga mhango nya yikhongolo ha gu haganeya gu lala ga tepo yeyi nyo hegise! Khya lisima gu “gengela” hi bwe hi landrisa gigengedzo hi ningwago khu Milowo nyo khigyo gu vbwetega hi “dzi wonela” hi pharisa milombeloni. — 1 Ped. 4:7.
(1 Pedro 4:8) Aholu ga silo satshavbo, haladzanani khu gyanu nyamba pfhadzedzela, kholu, lihaladzo li ngu dzi kodza gu tsetselela sighoho nya singi.
w99 15/4 paj. 22, ndri. 3
Hi nga tugula ni gu pala kharini ni gevbini gighodho khu liphuvboni
Khu gu hegisa, vegedzani gwadi gigengedzo gya mupostoli Pedro nyo khuye: “Mahegiso nya silo satshavbo gomo vbafuvbi. Gu vbwetega mu gengela, mu dzi wonela, gasi mu kodze gu lombelela. Aholu ga silo satshavbo, haladzanani khu gyanu nyamba pfhadzedzela, kholu, lihaladzo li ngu dzi kodza gu tsetselela sighoho nya singi.” (1 Pedro 4:7, 8) Si ngu vbevbuga gu dzumeleya gu mba vbeleya — gwathu mwendro ga vambe — gu beya mapimoni ni monyoni gwathu, gu hegisa khu gu hi tshunganisa. Sathane a ngu guti gwadi gu wegeleya nya vathu. Mweyo nya dzindziya a dzi thumisago, gu kabanisa gasi gu pala. Khu kharato, gu vbwetega hi vbiredzeya gu fenengedza sihoso soso khu gu hi haladza vandriyathu khu tshimatshima, ni gu bwe hi si “ningi wulanga Sathane.” — Vaefeso 4:25-27.
(1 Pedro 4:9) Hakhani gwadi vapfhumba, nyamba garadzega.
w18.03 dzipaji. 15-16, dzindri. 2-3
Lisima nya gu hakhe gwadi vapfhumba
Vbakari nya silo nya singi esi Pedro a kutsidego vandriyaye gu gira, a di khuye: “Hakhani gwadi vapfhumba.” (1 Pedro 4:9) Pedro a di gu kutsa vandriyaye gu khuye va hakha gwadi “vapfhumba” tepo va endreyanago khu gyawe, ambari olu va nga ba va tivana khu gale mwendro gu thuma gumogo. Gu hakha gwadi vapfhumba gu di hadzi va phasa kharini?
Gu di hadzi va gira va pwanana. Ahati uwe ke? U di nga ranedwa khu muthu nyo khaguri gu hongola gaya gwaye? U ngu gu dundruga gutsaka u gu pwidego khu gu ba u hongode gaya gwaye? Ahati tepo u nga rana muthu nyo khaguri ata gaya gwago? Isoso si engedzede gupwanana gwanu. Ndziya nya yadi nyo tivane gwadi ni vandriyathu khu gu va rana dzindrangani gwathu. Makristo ma nga ba ma vbanya matshiguni ya Pedro ma di yede gu pwanana khu gyawo tepo sigaradzo si nga ba si engedzeya. “Matshiguni [yaya] nya guhegise,” anethu gu vbwetega gu hi gira sasimweso. — 2 Thim. 3:1.
Kemba dzithomba nya liphuvbo
(1 Pedro 3:19, 20) A di hongola gambe aya tivisa Mahungu ga maphuvbo ma nga bani ma khothedwe. 20 Maphuvbo ya vale va ngamba yingela Nungungulu, gikhati uye a nga virela khu gutimisela, matshigu yale Nowa a nga bani a gu gira litaro. Avo nya vadugwana, nya livbandre na vararu vathu, va nga bani varomo litaroni, khavo va nga vbuluga gufa khu talo nya mati.
w13 15/6 paj. 23
Siwudziso sa valeri
Bhibhiliya yari khiyo Jesu a di “tivisa mahungu ga maphuvbo ma nga bani ma khothedwe.” (1 Pedro 3:19) Sa gu thula ginani isoso?
Mupostoli Padro wari khuye ayo, “Maphuvbo ya vale va ngamba yingela Nungungulu, gikhati uye a nga virela khu gutimisela, matshigu yale Nowa a nga bani a gu gira litaro.” (1 Ped. 3:20) Gwadigwadi, Pedro a di gu thula sivangwa nya liphuvbo si nga dzi pata avba nya wu wugeyi wa Sathane. Na gu ganeya khu dzingilozi “dzi ngamba kodza gu sayisa wurendra wawe” ganiolu dzi bhangudego malanga yawe, Judha wari khuye Nungungulu ‘dzi hungide khu makhetshe nya gupindruge, phalani nya gidema, omu Nungungulu a dzi vegidego dzi virela Litshigu nya likhongolo nya gulamudwe.’ — Judha 6.
Khu ginani gu gu pwani sivangwa nya liphuvbo kha sa engisa matshiguni ya Nowa? Na yi nga si giregi Ndrambi, maphuvbo nyo vivbe, ma di ambala sivili nya nyama — ayoyo gu di siri makungo ya Nungungulu. (Gen. 6:2, 4) Ni gu gambe, dzingilozi dzodzo dzi hengedego malahu ni vanyamayi, dzi di gira silo nya dzitshoni ngudzu. Nungungulu kha gira dzingilozi gasi gu hengeya malahu. (Gen. 5:2) Dzingilozi dzodzo nya sindraga milayo, Nungungulu a na dzi fuvisa khu tepo yakone. Gu ema kholu, kha nga a ganedego Judha, dzingilozi dzodzo dzomo “phalani nya gidema” — khu mambe maganelelo, dzi khothedwe khu liphuvboni.
Lini, nigu, Jesu tshumayede kharini “maphuvbo ma nga bani ma khothedwe”? Pedro a di lova gu khuye isoso si dugelede hwane nya gu ba Jesu na “wusidwe [nga] liphuvbo.” (1 Ped. 3:18, 19) Wona gambe gu khuwe Pedro a di khuye Jesu a di “tivisa mahungu.” Edzi Pedro a lovidego khidzo mahungu yaya, sa gu yeyedza gu khiso Jesu tiviside mahungu, Pedro na nga si lovi lidangaliya nyo pheye. So wonega nga khatshi hwane nya gu bani a wusidwe khu gufani, Jesu a di huweleya ga maphuvbu yale nyo vivbe maningano ni tsayiso nyo vbeleye ma nga hadzi wu mana. Gutshumayela gogo gu di si ma ningi guvireya nya gwadi. Gu diri gutshumayela nya gulamule. (Jona 1:1, 2) Hwane nya gu ba Jesu a yeyedzide gukhodwa ni gutumbega gwaye kala guwuswani khu ga vafudego — a yeyedza gu khuye Dhiyabhulosi kha mani pawu gwaye — Jesu a diri ni gisekelo nyo huweleye mahungu nya tsayiso. — Johane 14:30; 16:8-11.
Ga tepo yi tago, Jesu a na tsapa Sathane ni vamata vaye a va rinya phalani nyo ete. (Luka 8:30, 31; Gutu. 20:1-3) Kala iyoyo, maphuvbo yaya ma na simama omu nya gidema khu liphuvboni, nigu gu khungumudwa gwawe khu gu vbeleya, kha gu na nga thindrega. — Gutu. 20:7-10.
(1 Pedro 4:6) Khigyo gi nga gira gu tiviswa Ivhangeli ga vale va fudego, ga vale va nga lamudwa va nga gu vbanya mafuni momu, kha nga gu lamudwago sivangwa satshavbo. Va tivisidwe Mahungu nya Yadi gasi guvbanyani gwawe nya liphuvbo, va vbanye kha nga edzi Nungungulu a vbanyago khidzo.
w08 15/11 paj. 21, ndri. 8
Dzithomba dza omu nya malangaliya ya Jakobe ni Pedro
4:6 — Khu vamani “vale va fudego” va nga “tiviswa ivhangeli”? Gu diri vale va nga ba va ‘fude khu kotani nya sihoso ni sighoho sawe,’ mwendro vale va nga ba va fude khu liphuvboni na va nga si gupwi mahungu nya yadi ya Nungungulu. (Efes. 2:1) Hwane nya gu ba va khodwe avba nya mahungu nya yadi, va di pheya “guvbanya” khu liphuvboni.
28 NYA OUTUBRO–3 NYA NOVEMBRO
DZITHOMBA NYA LITO LA NUNGUNGULU | 2 PEDRO 1-3
“Lirela guta nya Litshigu la Nungungulu”
(2 Pedro 3:9, 10) Pfhumu kha yi hweli gu gira esi yi nga tumbisago, kha nga edzi va hingigedzago khidzo vambe vathu. Aholu iyo yi na ni gutimisela khu enu, kholu kha yi dzini na moyo wanu a mbemba, aholu ya gu vbweta gukhiyo mu vbindrugedze. 10 Aholu Litshigu la Pfhumu li na vboha kha nga mbafa vbakari nya wutshigu. Litshigu lolo, ndzadzi yi na mwalalega gu pwala ligwaha nya gusamadzise. Satshavbo si guromo ndzadzini si navbya, litigo ni satshavbo si guromo tigoni si na fuviswa.
w06 15/12 paj. 27, ndri. 11
Jehovha “a na dzegela gu si lamula”
Hi yede gu pwisisa kharini gitumbiso gya Jesu nyo khuye Jehovha “a na dzegela gu si lamula”? Bhibhiliya ya gu hi yeyedza gu khiyo ambari olu Jehovha a gu ni “gutimisela,” ya gu vboya tepo yakone, a na dzegeya gu lamula. (Luka 18:7, 8; 2 Pedro 3:9, 10) Matshiguni ya Nowa, tepo Ndrambi yi nga veta, va nya guvivba va di dzegeya gu fuviswa. Matshiguni ya Loti nugu, tepo wu ngata nilo khu ndzadzini va nya guvivba va di dzegeya gu fuviswa. Jesu a di huye: ‘Gu na girega kharato litshigu Mwamana wa Muthu a na wonegiswago.’ (Luka 17:27-30) Olu nugu, va nya guvivbedwa khu myonyo va na ‘mbembiswa.’ (1 Vatesalonika 5:2, 3) Vbavbandze nyo kanakane, Jehovha kha na nga dzumedzisa gu khuye litigo la Sathane li simama, gu vbindra esi si vegisidwego khu wulamuli.
(2 Pedro 3:11, 12) Olu silo satshavbo si na gu mbembisago guralo, gu vbwetega mu vbanya khu mavbanyelo nya yadi nya wukhodwa, nya gutsakise Nungungulu. 12 Dzi woneleni ni gu lirela guta nya Litshigu la Nungungulu, avbo ndzadzini gu na khungumudwago khu nilo, satshavbo si guromo ndzadzini si na nyungulugiswa.
w06 15/12 paj. 19, ndri. 18
“Litshigu nya likhongolo la Jehovha lomo vbafuvbi”
Kha si samadzisi gu ba mupostoli Pedro na hi gengedzide maningano ni gu sayisa “guta nya Litshigu la Nungungulu”! Hi nga gira kharini? Mweyo nya ndziya gu manega ni “mavbanyelo nya yadi nya wukhodwa, nya gu tsakise Nungungulu.” Lito nya giGreki li vbindrugedzedwego pwani “gu lirela” khu gu kongoma la gu thula “guvbiredzeya.” Ethu kha hi vbiredzeyi guta nya litshigu la Jehovha khu gu kongoma. Ganiolu, na hi ngo vireya guvboha nya litshigu lolo, ha gu pharega thumoni wa Jehovha si na gira nga khatshi tepo ya gu tutuma gu tutuma. — 1 Vakorinto 15:58.
Kemba dzithomba nya liphuvbo
(2 Pedro 1:19) Khavbo avbo, hi na ni gutumba ga Mahungu ma nga tiviswago khu vaprofeti, ma gukhayo: Mu ngu gira gwadi mwa gu engisa mahungu yoyo, kholu, ma ngu fanana ni guwonegela gu wenengedzago gidemani kala gugya; thandra nya masase yi na wenengedze myonyoni gwanu.
w08 15/11 paj. 22, ndri. 2
Dzithomba dza omu nya malangaliya ya Jakobe ni Pedro
1:19 — Khu mani “thandra nya masase,” nigu yi wonegide lini? Ha gu dziti kharini? “Thandra nya masase” khu Jesu Kristo tshivbani nya Mufumo wa Nungungulu. (Gutu. 22:16) Khu 1914, Jesu a di wonega ga sivangwa satshavbo nga Pfhumu nya wuMesiya, na gu tivisa gugya nya limbe litshigu. Gu vbindrugedzwa gwaye gu di gu ningeya magavbudzu nya wudhumo wa Jesu ni tshivba nya Mufumo, na gu tshingiswa gutumbega nya malito nya giprofeto gya Nungungulu. Gu vega gupima avba nya malito yoyo, si ngu wenengedza myonyo yathu, nigu, hi na dziti gu khethu Thandra nya masase yi wonegide.
(2 Pedro 2:4) Nungungulu kha divaleya dzingilozi dzi nga ghohago, aholu, a di dzi yisa phalani nya guete nya gidema a dzi diga mugidemani, a lindrela litshigu nya gu dzi lamule,
w08 15/11 paj. 22, ndri. 3
Dzithomba dza omu nya malangaliya ya Jakobe ni Pedro
2:4 — Go thula ginani ‘phalani nya guete’ nigu lini dzingilozi nya sindraga milayo si rinyidwego umo? Liphala nya guete giemo gi fananiswago ni lipaso gu khothedwago umo sivangwa nya liphuvbo basi, na siri vathu. Gidema nya gikhongolo mapimoni, avba si thulago gu khiso umomo kha gu wonwi situmbiso nyo tsakise sa Nungungulu. Ava va gomogo omu nya liphala lolo, va mwalo guvireya khu wumindru. Matshiguni ya Nowa, Nungungulu a di rinya dzingilozi nya sindraga milayo omu nya liphala, idzo dzi na khala umomo kala gu vboha litshigu dzi na fuviswago.