Mitshamuselo yi gomogo omu nya mabhuku ma khumbugidwego omu nya gibhukwana nya mitshangano nya thumo ni mavbanyelo
3-9 NYA MAIO
DZITHOMBA NYA LITO LA NUNGUNGULU | MITENGO 27–29
“Pimedzeya pweya wusiwana wa Jehovha”
w13 15/6 dzipaj. 10-11, ndri. 14
Pimedzeya makhalelo ya Jehovha
14 Satshavbo sa 5 sagadzyana si di khuga si hongola ga Mosi siya mu wudzisa gu khiso: “Khu ginani lina la babe wathu li na futwago omu nya linyagwa laye khu kotani nya mba tshiya sanana nya vama?” Si di engedza khiso: “Hi ningeni nethu gipandre nya thomba ya babe wathu vbakari ga va ndriyaye”. Ina Mosi a di va hakha khuye, ‘kha nyi yeli gu fanya nayo?’ Ne, uye “a di yisa mahungu yaya ga Jehovha”. (Mit 27:2-5) Ginani egi Jehovha a hungidego? Uye a di embeya Mosi khuye: “Ina kamwe va nyamahegyane va Selofeyadi va na ni lisine. U na va ninga gipandre gyawe nya thomba vbakari ga vandruye va babe vawe”. Jehovha giride nyo vbindre esi uye a di embeya Mosi gasi gu embeya vaisrayeli khuye: “Mwama nya gu kari a gufa nya mba tshiya sanana nya sikhwathana ningelani thomba yaye ga gyanana gyaye nya gyagadzyana.” (Mit 27:6-8; Jos 17:1-6) Gu khugela litshigu lile vatshavbo vanyamayi va nga ba va emisana ni gigaradzo nya nga gile gi di gu lulamiswa.
w13 15/6 paj. 11, ndri. 15
Pimedzeya makhalelo ya Jehovha
15 Jehovha yeyedzide wuwadi! Uye pharide khu githawo vanyamayi vale va nga ba va romo ga giemo nyo garadze, nga edzi a nga ba a phara khidzo va le va nga ba va romo omu nya siemo nya tshukwana. (Ndz 68:5) Aya matimo nya ma dugwana yakona ma gu romo omu nya Bhibhiliya ma yeyedzago lisine nya gu: Jehovha a ngu phara sithumi saye khu ndziya ya yi mweyo nya mba na gihatheya. — 1Sa 16:1-13; Mith 10:30-35, 44-48.
w13 15/6 paj. 11, ndri. 16
Pimedzeya makhalelo ya Jehovha
16 Hi nga pimedzeya kharini likhalelo nya mbana gihatheya la Jehovha? Dundruga gu gumbana gihatheya gu kabanegide khu sipandre sivili. Hi na kodza basi gu phara vambe nya mbana gihatheya ho ba hiri mwalo gihatheya. Lisine gu hatshavbo hi ngu pimisa gu khethu, hi na ni mapimo nyo tshulege ni gu hi mwalo gihatheya. Ganiolu u ngu dziti gu khuwe si ngu garadza gu dzi sola ethu habune gasi hi dziti gu khethu hi vathu nya gu khale kharini. Khu kharato ginani hi nga girago gasi gu dziti gu hi na ni gihatheya mwendro ne? Jesu tepo a nga ba a vbweta gu dziti gu ginani vathu va pimisago khuye, a di wudzisa ga dzipari dzaye khuye: “Vathu vari khavo khuye mani mwamana wa muthu?” (Mt 16:13, 14) Anethu hi nga pimedzeya Jesu. U nga wudzisa pari u yi tumbago yi na gu embeyago lisine gu u ngu tidwa na wuri ni gihatheya. A gu gu embeya gu, a ngu tshuka a wona magavbudzu nyana ginani u yedego gu gira? Gombeya ga Jehovha khu monyo wago watshavbo, gasi a gu phasa gu dusa mapimo yoyo gasi u kodza gu dzegeleya makhalelo yaye nya yadi. — Mt 7:7; Kol 3:10, 11.
Dzithomba nya liphuvbo
it-3 paj. 123, ndri. 6
Miningelo
Miningelo nya wadwa. Miningelo nya wadwa yi di gu girwa gumogo ni yimbe miningelo, ngudzungudzu tepo vaisrayeli va nga ba va romo tigoni nya gitumbiso. (Mit 15:2, 5, 8-10) Gasi gu gira miningelo yeyi gu di gu thumiswa vhinyu (wadwa nyo levise) nigu yi di gu dzegwa yi vbaladzwa vbatshani nya giluvelo. (fananisa Mit 28:7, 14; ni Eks 30:9; Mit 15:10) Pawulo lovede esi Makristo ya Filipi: “Ambari gu lomba gu ningela womi wangu nyi gira mhamba nya phaso gasi gu pata ni miningelo yanu nya gu khodwe ga Nungungulu, eni singu nyi tsakisa gambe nyi ngu hengela gutsaka gogu ni enu mwatshavbo”. Avba uye thumiside lito ningelo, gasi gu yeyedza gudziemiseya a nga ba ari nago nya gu gire ni gevbini gasi gu emeya Makristo. (Flp 2:17) Na gu romo vbafuvbi ni gufa lovede esi ga Thimoti: “Eni nyi lulamide gu khala mhamba kholu gikhati gyangu nya gufe gi ngu vboha.” — 2Tm 4:6.
10-16 NYA MAIO
DZITHOMBA NYA LITO LA NUNGUNGULU | MITENGO 30–31
“Tadzisa gisambanyo gyago”
it-3 paj. 801
Gisambanyo
Gisambanyo nya gu girwe khu gu dzihatheya, ganiolu gi yede gu tadziswa gyagu girwa. Satshavbo sisambanyo si di gu girwa khu gu dzina. Ambari ulolo nayo wu di gu ganeya gu khuwo ni wevbini muthu a girago gisambanyo a yede gu gitadzisa. Khu kharato si di gu tala gu ganedwa gu, muthu a gu gira gisambanyo a gu ningela womi waye gasi gu yeyedza gu khuye khu lisine uye a na gi tadzisa. (Mit 30:2; wona gambe Ro 1:31, 32) Kha nga olu womi wa muthu yoyo wu nga ba wu romo madzani gwaye, milowo yi di gu kutsa gu muthu yoyo a pimisa ni gu dziwoneya na ngasi giri gisambanyo nyo khaguri. “Wa gu gira gisambanyo nya gukari ga PFHUMU Nungungulu wago, u nga hweli gu gi tadzisa; kholu kha na hweya gu gu hengula, gambe gwago gu na manega gighoho. Aholu wa gu thava gu gira gisambanyo, u na bani uri mwalo nandru.” — Dhet 23:21, 22.
it-3 paj. 801
Gisambanyo
Singi situmbiso hi nga girago ga Nungungulu, khu giyeyedzo, hi nga mu tumbisa gu mu ninga gilo nyo khaguri, gu mu gireya thumo nyo khaguri, ni gu mba mu gireya gilo nyo khaguri ambari silo soso na sa sa vivba. Gisambanyo gu diri gitumbiso nya gu gire khu gu dzihatheya nya mba gurumedzwa. Gisambanyo gi ngu fana ni gifungu, nigu ga dzimbe dzitepo malito yaya ya mavili ma ngu manega wulanga wumowo omu nya Bhibhiliya. (Mit 30:2; Mt 5:33) “Gisambanyo” gu dzi emiseya gwathu nya gu gire mwendro gu tadzisa gilo nyo khaguri, gifungo khu gile hi girago mwendro hi ganeyago ho ba hi romo vbakari nya dzipfhumu gasi gu yeyedza lisine nya esi hi ganeyago. Ga dzitepo nya dzingi gifungu gi di gu gimbileyana ni pwanano. — Ge 26:28; 31:44, 53.
w04 1/8 paj. 27, ndri. 4
Gukhanyiswa ga libhuku la Mitengo
30:6-8 — Ina si ngu kodzega gu mwama a dusa sisambanyo sa mwangadzi waye? Mayelano ni sisambanyo Jehovha a gu khedza khu moyo ni moyo oyu a si girago. Khu giyeyedzo, gudzihendzeledza ga Jehovha igyogyo gisambanyo nya muthu enga. (Vagalatiya 6:5) Mwama mwalo malungelo nya gu duse gisambanyo nya nga egi, nyamayi yede gu potsa sisambanyo si dwanisanago ni lito la Jehovha mwendro ni mwama waye.
Dzithomba nya liphuvbo
it-2 paj. 482, ndri. 2
Jefeti
Si di gu kodzega gu ningeya vathu ga Jehovha gasi va gira thumo nyo hathege wu nga ba wu gimbidzisana ni giluvelo. Vavelegi va di gu dzumeledwa gu gira isoso. Samuweli moyo nya avo a nga tumbiswa gu ningeya omu nya tabhernakeli khu mamayi waye Ana nasi gu velegwi. Gisambanyo gegi gi dzumeledwe khu mwama waye Elikana. Tepo Ana a nga digisa gu mamisa Samuweli a di dzegeya gu mu ningeya. A ningede gambe girengo gasi gu gira khigyo miphaso. (1 Sa 1:11, 22-28; 2:11) Samisoni nuye ningedwe thumoni ga Jehovha kha nga Munaziri— Val 13:2-5, 11-14; Fananisa esi, ni fanelo a gu nayo papayi vbatshani ga gyanana gyaye nya gyagadzyana omu ga Mit 30:3-5, 16.
17- 23 NYA MAIO
DZITHOMBA NYA LITO LA NUNGUNGULU | MITENGO 32–33
“Ndreyisa vatshavbo vavbanyi va tigoni”
w10 1/8 paj. 23
U di gu dziti?
Gu diri ginani malangani nya sigomo si khumbugwago omu nya milowo nya Gihebheru?
Tepo vaisrayeli va nga vbweta gu beya tigoni nya gitumbiso, Jehovha a di va embeya gu va yede gu khungumuleya yatshavbo malanga ma nga ba ma thumiswa khu Vakhanani va nga ba va vbanya gipandreni mule gasi gu khozeya va nungungulu vawe. “Gu vbwetega mu . . . Phalalegisela sifananiso satshavbo nya va nungungulu vawe nya gu girwe khu simbi mu khungumulela malanga yawe yatshavbo nya gu khugege.” (Mitengo 33:52) Malanga ma nga ba ma thumiswa gu khozeya sifananiso adzina gu diri malanga nya mba sihalega nya nga vbatshani nya sigomo mwendro mambe malanga ma nga vbahwa, nya nga omu nya misimbo mwendro omu nya madhoropa. (1 Dzipfhumu 14:23; 2 Dzipfhumu 17:29; Ezekiyeli 6:3) Malangani momo adzina gu diri ni siluvelo, sihuru nya miphaso, sifananiso, libani ni simbe silo va nga ba va si thumisa avbo nya wukhozeyi wawe.
w08 15/2 paj. 27, dzindri. 6-7
Hevbula khu miphazamo ya va na Israyeli
Muhuno hi ngu emisana ni sigaradzo nya gu fane ni esi va nga emisana naso vana Israyeli. Muhuno ga tshigu vathu va ngu fumedwa khu silo nya nga esi. Dzitsapawu, vaembi, vaveteyi nya bola mwendro mimbe mihagano, politika, vathangeyi nya wukhongeyi mwendro kamo khu valongo. Ha gu mba dziwoneya hi nga tshuka hi vega gimwegyo nya esi nga gilo nyo pheye womini gwathu. Ha gu gira wupari ni muthu a gu mba haladza Jehovha si nga hi gira gi vbola khu liphuvboni.
Wubhayi a gu gimwegyo nya silo nya lisima avbo nya wukhozeyi wa bhahali wu sengedzede ni gu ndrindra Vaisrayeli nya vangi ngudzu. Minaphwi nya nga eyi yi nga gu thumiswa gasi gu ndrindra vathu va Jehovha. Gu thumisa komputadhori mwendro telefone na gu romo enga mu gu sihalani, khiso si nga vbwetwago khu muthu a gu mba kodza gu dzi sayisa, gasi a kodza gu ghoha livhalo laye. Idzo si gu mba tsakisa khidzo gu wona mukristo na gu sengedzedwa khu ponografiya umo nya interneti!
it-1 paj. 417, ndri. 2
Khanani
Josuwa khu guti “giwalo ni giwegyo a nga mba gi landrisa ga satshavbo esi PFHUMU Nungungulu a leletedego Mosi”. (Jos 11:15) Ganiolu va na Israyeli va di pheya gu bomba wuthangeyi waye ni gu bomba gu dusa khu gu vbeleya esi si nga ba si nyenyezisa litigo lile. Khu kotani nya olu Vakhanani va nga simama gu manega vbakari gwawe Vaisrayeli va di nyenyeziswa khu mavbanyelo yawe. Nigu igyogyo gimwegyo nga gighelo gi nga gira gu Vaisrayeli vafa ngudzu hwane nya gitepwana (nya mba pata wughevenga, wubhayi ni wukhozeyi na sifananiso) iso si nga gira gu, wu vegwa nayo nya gu songe vatshavbo Vakhanani nari khatshi isoso si di gu tadzisidwe khu gu tumbega. (Mit 33:55, 56; Val 2:1-3, 11-23; Ndz 106:34-43) Jehovha a di gu embede vaisrayeli gu khuye, gulamula gwaye na siri nya gihatheya va gu tshuka vaisrayeli va pheya gu patana ni Vakhanani khu gu tshadha navo, gu hengeya wukhongeyi navo mwendro gu dzipata omu nya sihena sawe, kholu isoso si di gu fana nigu dzi resaya libango nya likhongolo vbatshani gwawe vabune — Eks 23:32, 33; 34:12-17; Le 18:26-30; Dhet 7:2-5, 25, 26.
Dzithomba nya liphuvbo
it-3 paj. 695, ndri. 1
Vbingano
Hwane nya gu na dzi rinyidwe dzisoriti gasi gu yeyedza omu lihundzu nyo khaguri li yedego guya khala umo, gu di gu vbwetega gambe gu yeyedza wukhongolo nya wulanga wowo ganiolu guya khu gighelo nya wuvili a gu wukongolo nya lihundzu. “Muna na kabanisela litigo khu gu lola dzisolo vbakari nya dzindranga dzanu. Mu na ningela thomba nya yingi ga ava va gu vangi, mu ninga nya yidugwana ga ava va gu va dugwana avbo soriti yi na thegago avbovbo gu na kala gwawe” (Mit 33:54) Esi soriti yi nga ba yi hunga mayelano ni gipandre nyo khaguri si di yede gu khala kharato ganiolu si di gu kodzega gu si vbindrugedza guya khu wukongolo nya gipandre gyogyo. Khu kharato tepo gu nga tugudwa gu pwani gipandre gya Judha gikhongolo ngudzu gi di vbungudwa gi dingedwa ga lihundzu la Simiyoni — Jos 19:9.
24- 30 NYA MAIO
DZITHOMBA NYA LITO LA NUNGUNGULU | MITENGO 34–36
“Vhikedwa khu Jehovha”
w17.11 paj. 9, ndri. 4
Ina u ngu dzumeya Jehovha a khala wuthavelo wago?
4 Ginani gi nga ba gi girega a gu tshuka muthu a songa mumbe khu gu phazama? Muthu a gu songa mumbe muthu ambari nari khu gu phazama a di gu ningwa nandru khu gu vbaladza novba. (Ge 9:5) Ganiolu ma di gu romo malulamiselo nya lihaladzo nya gu vhikeye oyu a nga ba a gira esi. Oyu a nga songa mumbe si di gu kodzega gu a tutuma a hongola ga mweyo nya 6 nya dzi sidhadhi nya wuthavelo gasi a si modwi khu muphodzeli, ni gu uye a di yede gu khala eyi kala Muphasi nya khongolo mhamba afa.— Mt. 35:15, 28.
w17.11 paj. 9, ndri. 6
Ina u ngu dzumeya Jehovha a khala wuthavelo wago?
6 A gu tshuka muthu a songa mumbe khu gu phazama a di yede gu dzi wonegisa ga madhota mwanyatunu nya mweyo nya dzi sidhadhi nya wuthavelo, ayo ma di yede gu hakha gwadi muthu yoyo. (Jos 20:4) Na yi vbindride tepo nyo khaguri, a di gu dzegwa a hongola aya wonana ni madhota ya sidhadhi yile a nga songa muthu, madhota ya sidhadhi yile a nga songwa muthu khayo ma nga ba ma lamula mahungu. (Leri Mitengo 35:24, 25.) Muthu wule a nga songa mumbe a di gu bweleya sidhadhi nya wuthavelo madhota ma gu wona gu a di songa muthu khu gu phazama.
w17.11 paj. 11, ndri. 13
Ina u ngu dzumeya Jehovha a khala wuthavelo wago?
13 Hwane nya gu ba na vbohide ga sidhadhi nya wuthavelo uye a di yede gu dzipwa na vhikelegide. Jehovha ganede esi khu dzi sidhadi dzile: “idzo dzina mi vhikela ga avo va vbwetago gu phodza.” (Jos 20:2, 3) Jehovha a di si henguli muthu a songidego mumbe gu a lamudwa khu mahungo ya mamowo, vbavbandze nya soso, uye a di yede gu mba thava kholu muphodzeli kha nga ba a yede gu beya umo nya sidhadhi nya wuthavelo gasi gu mu songa, na ngo simama umo nya sidhadhi yile a di gu vhikedwa khu Jehovha. Sidhadhi nya wuthavelo yi di siri lipaso. Si di gu kodzega gu manega ni womi nyo tsakise mule, kholu muthu si di gu kodzega gu a thuma a phasa vambe ni gu khozeya Jehovha khu gu rula!
Dzithomba nya liphuvbo
w91 15/2 paj. 13, ndri. 13
Dzegiso wu emeyago vatshavbo
13 Ambari Adhamu ambari Evha kha va phasegi khu dzegiso. Nayo wa Mosi wu diri ni litshina leli nya nayo: “Mu nga tshuki mu hakha nivbo nya gu dzegise womi wa muthu a fanedego gu songwa kholu fanede gu songwa khu lisine”. (Mitengo 35:31) Adhamu khandri a di sengwa, khu kharato uye a di ghoha nyagigwenye. (1 Thimoti 2:14) Si di gu fana ni gu songa sanana saye iso si hakhide gu mba vbeleya gwaye, khidzo kharato gu nga beya gufa. Nya mba kanakana Adhamu a di yede gufa kholu kha nga olu a nga ba a vbelede uye a di hatha gu mba engisa nayo wa Nungungulu. Nari khatshi Adhamu a di gu phasega, khu lisine isoso na si gu hambana ni matshina nya milayo ya Jehovha. Gu livba gighoho gi nga girwa khu Adhamu sa gu thula gu dusa gufa avbo nya sanana saye! (Varoma 5:16) Khu kharato tshivba nya gu songe nya gighoho yi diya sigudwa khu khamba wakona. Mutshudzisi a di vbindrugedza gufa gu khala guvbanya nya vathu a tshaniseka khu kotani nya sighoho gasi gu tshula sanana sa Adhamu. — Vahebheru 2:9; 2 Vakorinto 5:21; 1 Pedro 2:24.
31 NYA MAIO–6 NYA JUNHO
DZITHOMBA NYA LITO LA NUNGUNGULU | DHEWUTERONOME 1–2
“Gu lamula gu tago khiyo ga Nungungulu”
w96 15/3 paj. 23, ndri. 1
Jehovha a ngu haladza gululama ni lisine
Madhota ma yede gu lamula mahungu nya makhongolo. (1 Vakorinto 5:12, 13) Tepo va girago isoso, va ngu dundruga gu khavo gu lamula ga Jehovha tepo yatshavbo gu ngu gimbileyana ni wuwadi. Avo va gu mba yeyedza du dzi sola kha va fanedwi gu yeyedzwa wuwadi. Ganiolu madhota kha ma tutumisi gighohi gasi gu phodza. Ayo ma gu mu dusa libandlani, gasi a yeyedza gu a ngu dzi sola mwendro ne. (Wona Ezekiyeli 18:23) Na ma thangedwa khu Kristo, madhota ma gu thuma khu gu tsakeya ni gu lulama nigu ayo ma gu fana ni wulanga nya wuthavelo. (Isaya 32:1, 2) Khu gighelo gyogyo, ayo ma yede gu yeyedza gu mbana gihatheya ni gu dinganiseya. — Dhewuteronome 1:16, 17.
w02 1/8 paj. 9, ndri. 4
Tumbega ga wuthangeli wu nga emiswa khu Jehovha
4 Gasi gu vama vale va thuma nga valamuli si di gu si eneyi basi gu vati nayo. Kha nga vathu nya mba vbeleya madhota yale ma di yede gu dzi woneya ga silo si nga va ndrindrago gu gira esi nya mba yela nya nga gu mba khatala khu vambe, gihatheya ni makolo esi si nga girago gu va si lamuli khu ndziya nya yadi. Mosi a di va embeya gu khuye: “Mu nga lamuli khu gihathela, yingisani uye nya dugwana kha nga uye nya khongolo; mu nga thavi khovbe ya muthu, khoIu gulamula khwa Nungungulu.” Khu lisine valamuli va Israyeli, va di gu lamula na va gu rumwa khu Nungungulu. Eli lithomo nya likhongolo va nga ba vari nalo! — Deuteronomy 1:16, 17.
Dzithomba nya liphuvbo
w13 15/9 paj. 9, ndri. 9
Sileletelo sa Jehovha si ngu tumbega
9 Tepo Vaisrayeli va nga vbedza 40 myaga na vari giwulani nya gikhongolo nya gu thise Jehovha kha va embeya edzi a nga ba a vbweta gu va thangeya khidzo, gu va vhikeya khidzo, mwendro gu khathaleya khidzo, dzitepo nya dzingi uye a va yeyedzide gu va nga mu tumba bwelo khavbo va tumba sileletelo saye. Khu gu thumisa lipfhi vbamihanitunu ni nilo wutshigutunu Jehovha a di gu dundrugisa Vaisrayeli gu khuye uye a di gu va khataleya ni gu va gimbidzisa mudzindziyani gwatshavbo va nga ba va bela khumo. (Dhet 1:19; Eks 40:36-38) Uye a di gu va ninga esi va nga ba va si vbweta gasi gu dzi vbanyisa. Dzingandzu dzawe gima kha dza nga hagala ni mawundru yawe kha ma nga simba, khu lisine gima kha va nga hamuga gilo. — Neh. 9:19-21.
7- 13 NYA JUNHO
DZITHOMBA NYA LITO LA NUNGUNGULU | DHEWUTERONOME 3–4
“Milayo ya Jehovha guti ni gu yi lulamide”
it-1 paj. 816, ndri. 3
Gupwisisa
Gu manega ni sighingi khu gu hevbula lito la Nungungulu ni gu landriseya sileletelo saye, si nga gira muthu a manega ni guti nya gu vbindre muhevbudzi waye ni gu pwisisa gu vbindra avo va dandridego khu tanga. (fananisa Ndzimo 119:99, 100, 130; ni Luka 2:46, 47.) Esi sa gu kodzega kholu, guti ni gu pwisisa, khu lisine kha si hambaniswi ni sileletelo nya guage ni milayo ya Nungungulu, khu gighelo gyogyo, mayigo ma nga ba ma romo vbafuvbi ni Israyeli ma di gu wona vathu va Israyeli nga vathu nya guti ni wugengeyi. (fananisa Dhet 4:5-8; Ndz 111:7, 8, 10; ni 1Dzf 2:3) Muthu a pwisisago a ngu dziti gu kha yeli gu gira esi lito la Nungungulu li gu khilo kha yeli gu si gira, a gu dzi garadzeya gu gira esi li ganeyago, tepo yatshavbo a lomba giphaso ga Nungungulu. (Ndz 119:169) A gu dzumeya gu lito la Nungungulu li mu vbaha (Mt 13:19-23) a si lova monyoni gwaye (Mav 3:3-6; 7:1-4) nigu a “ngu nyenya dzindzila dzatshavbo nya malipha” (Ndz 119:104). Gyanana gya Nungungulu tepo gi nga ba gi romo mafuni gi yeyedzide gupwisisa nya nga ogu, ambari tepo a nga bomba gufa vbasimbotuno kholu gasi gu tadzisega milowo a di yede gufa khu magirelo yale. — Mt 26:51-54.
w99 1/11 paj. 20, ndri. 6-7
Go ba guri ni wuwadi nya wungi
Na yi gu hlamala khesi yi nga sipwa ni gu si wona khu gu dzinogisa pfhumugadzi yi di hlamula gu khiyo: “Va kategide vathu vago, si kategide sithumi sesi sago, si guromo mbeli gwago gikhati gyatshavbo si yingisa guti gwago!” (1Dzf 10:4-8) Uye kha ganeya gu khuye sithumi sa Solomoni si di gu kategide kholu si nga ba si randredwe khu dzithomba ambari olu si nga ba siri nayo. Sithumi sa Solomoni si di gu kategide kholu, tepo yatshavbo si di gu khala si engiseya magana nya guti ogu Solomoni a ningidwego khu Nungungulu. Pfhumugadzi ya tigoni ga Sebha muhuno giyeyedzo nya gyadi ga vathu va Jehovha kholu va ngu tsakeya guti ga muvangi ni ugo ga gyanana gyaye Jesu Kristo!
Pfhumugadzi ya tigoni ga Sebha khu gu landreya yi di ganeya khiyo: “A na bongwe PFHUMU Nungungulu wago”. (1 Dzipfhumu 10:9) Uye wonide gyandza gya Jehovha avbo nya guti ni gu dugeleya ga Solomoni. Esi sa gu fana ni esi Jehovha a nga ba a tumbiside Israyeli. A di khuye: “si vegedzeni ni gu si landrisa, kholu esi a na bani ari wugengeli wanu ni gupima gwanu mahoni ga vathu avo va na pwago milayo yatshavbo yeyi, va na ganela, khavo: Khu lisine litigo leli nya likhongolo li na ni vathu nya guti ni wugengeli”. — Dhewuteronome 4:5-7.
w07 1/8 paj. 29, ndri. 13
Gu ghanya mahoni ga Nungungulu
13 Tepo Jehovha a ningago makategwa vathu vaye uye agu va ninga esi nya sadi basi. (Jakobe 1:17) Khu giyeyedzo, litigo eli Jehovha a ningidego Vaisrayeli gu va vbanya ilo litigo li gogago mahwe ni wulombe. Ambari olu Egipito wu nga ba wu ganedwa khu ndziya nya gu fane litigo eli Jehovha a ningidego Vaisrayeli li di gu hambanide khu gilo gimwegyo nya lisima. Mosi a di khuye: “Litigo li sayiswago khu Pfhumu Nungungulu wanu.” Khu mambe maganelelo, avo va di hadzi gu dugeleya kholu Jehovha a di hadzi gu va khathaleya. Tepo Vaisrayeli va nga simama na va tumbegide gwaye uye a di gu va khathaleya ni gu womi wawe wu diri nya wadi ni nyo khugege ngudzu gu vbindra yatshavbo mayigo vbafuvbyana mule. Nya mba kanakana makategwa ya Jehovha khayo ma ghanyisago. — Mitengo 16:13; Dhewuteronome 4:5-8; 11:8-15
Dzithomba nya liphuvbo
w04 15/9 paj. 25, ndri. 3
Gu khanyiswa ga libhuku la Dheuteronome
4:15-20, 23, 24 — Ina gu himbedzedwa nya gu gire sifananiso nya gu vatwe, sa gu thula gu khiso si vivbide gu dzi gireya sithombe gasi gumburisa khiso malanga? Ne. Esi si nga ba si himbedzedwa gu diri gu gira sifananiso gasi gu khidzima mbeli gwaso si khozedwa. Milowo kha yi himbedzeyi gu gira sithombe mwendro gu pintar silo nyo khaguri gasi gu mburiseya khiso malanga.— 1 Dzipfhumu 7:18, 25.
14-20 NYA JUNHO
ZITHOMBA NYA LITO LA NUNGUNGULU | DHEWUTERONOME 5–6
“Hevbudzani sanana nanu gu haladza Jehovha”
w05 15/6 paj. 20, ndri. 11
Vavelegi, khathaleyani dzindranga dzanu
11 Guya khu mahungu yaya adzina wu mwalo wumbe lowo wu thumiswago ngudzu gu vbindra Dhewuteronome 6:5-7. Tula Bhibhiliya u leri mavhesi yaya. Wona gu vavelegi va yede gu pheya khavo va tiyisa lihaladzo lawe khu Jehovha ni gu khodwa ga lito laye. Khu lisine, hi yede gu khala sihevbuli nya sadi nya lito la Nungungulu, khu gu hi leri Bhibhiliya tshigu ni tshigu hi bwe hi dundrugeya khesi hi lerigo, khavbo u na kodzago gu pwisisa gwadi lisine nya dzindziya, matshina nya milayo, ni milayo ya Jehovha ni gu engedzeya gu yi gola. Khu gu u gira esi, monyo wago wuna tala khu lisine nya gu tsakise nya Bhibhiliya li na gu girago u dzipwa nu tsakide u manega ni githawo ni lihaladzo khu Jehovha. U na ba uri ni silo nya singi nya sadi gasi gu ninga sanana sago. — Luka 6:45.
w07 15/5 dzipaj. 15-16
Hi nga gira kharini gasi gu ninga sihevhudzo nya lisine sanana sathu?
Misuwo yago, mawonelo ni simbe silo nya lisima kha si khugeyi basi ga esi u ganeyago ganiolu ni esi u girago gambe. (Varoma 2:21, 22) Sanana na si ngari sidugwana sa gu khedziseya gwadi esi si girwago khu vavelegi vaso. Iso si ngu pwisisa esi si gu na ni lisima ga vavelegi vaso, khu kharato dzimbe dzitepo khiso si si wonago na siri ni lisima tepo si dandrago. Wa gu ba u haladza Jehovha, khu lisine sanana sago niso ni na pwisisa. Khu giyeyedzo, iso si na wona gu, gu leri Bhibhiliya ni gu hevbula silo nya lisima womini gwago. Iso si na wona gu u ngu vega Mufumo wa Nungungulu kha nga gilo nyo pheye womini wago. (Matewu 6:33) Wo manega mitshanganoni tepo yatshavbo ni gu patega omu nya thumo nyo tshumayele, u na ba nu si yeyedza gu khuwe gu thumeya Jehovha khigyo gilo nyo pheye womini gwago. — Matewu 28:19, 20; Vahebheru 10:24, 25.
w05 15/6 paj. 21, ndri. 14
Vavelegi, khathaleyani dzindranga dzanu
14 Kha nga edzi Dhewuteronome 6:7 li yeyedzago, vavelegi va na ni dzitepo nya dzingi va nga hevbulago silo nya singi ni sanana sawe. Khu giyeyedzo tepo va endrago, tepo va girago mithumo nyo khaguri ndrangani mwendro va haganago, vavelegi va nga vbwetedzeya tepo nyo ganeye khu silo nya liphuvbo ni sanana sawe. Lisine gu kha va yeli gu khaleya gu ganeya khu sihevbudzo nya Bhibhiliya ni sanana sawe tepo yatshavbo. Vbavbandze nya isoso, vavelegi va yede gu vbwetedzeya dzindziya nya gu mabhulo yawe ma ri ya liphuvboni, khu gu na ma ri nya wupari nigu na ma vbaha. Khu giyeyedzo, revhista Khendzugani! yi na ni dzindrima dzi ganeyago khu mahungu nya mangi. Dzindrima dzodzo dzi nga gira gu mu velegi a manega ni mabhulo ni sanana saye ma ganeyago khu sivangwa sa Jehovha, nya nga sirengo, malanga nya gu mbure ngudzu ni mitumbunugu nya gu hambanehambane nya vathu. Mabhulo yaya ma nga gira gu vaphya va khaleya gu leri mabhuku hi ningwago khu Githumi nya gutumbege ni nyo gengeye. — Matewu 24:45-47.
Dzithomba nya liphuvbo
Lihaladzo ni gu lulama dziteponi dza Israyeli
11 Sihevbudzo: Jehovha o wona esi nyo vbindre esi si wonegago khu vbavbandze nya muthu. Uye a gu wona edzi hi khadego khidzo khu ndrani monyoni gwathu. (1Sa 16:7) Kha si kananakanisi gu khiso gu mwalo mapimo ambari sigiro si sihadego mahoni gwaye. uye a gu khedza a bwe a hi kutsa gu wona silo nya sadi. ganiolo a gu vbweta gu khuye hi tugula hi bwe hi woneleya mapimo nyo vivbe ma ma si gu hi bedzi mhangoni.— 2Dzik 16:9; Mt 5:27-30.
21-27 NYA JUNHO
DZITHOMBA NYA LITO LA NUNGUNGULU | DHEWUTERONOME 7–8
“U nga dzegani ni vathu nya mayigo”
w12 1/7 29 ¶ 2
Khu ginani Nungungulu a nga ba a vbweta gu khuye sithumi saye si dzegana ni oyu a khozeyago uye basi?
Jehovha a di gu dziti gu khuye Sathane a gu vbweta gu nyenyezisa vathu vaye khu gu va gira va khozeya sifananiso. Khu gighelo gyogyo Nungungulu a di gengedza vathu vaye khu gu va embeya gu khuye vale va gu mba mu khozeya na va giride gu vathu vaye va diga gu mu landreya ni gu khu gu hegisa va khozeya vambe vanungungulu. Satshavbo si di romo mandzani gwawe. Nari khatshi Vaisrayeli va di khozeya vambe vanungungulu na va luzide lithomo nya gu vhikedwe khu Nungungulu nigu valala vawe na si va vbevbugeya gu va dhumeya. Nari khatshi isoso di gu giregide Mesiya a nga ba a tumbisidwe na dugede hayi? Sa gu dzegeya gu wonega gu Sathane a diri ni sighelo nya singi nya gu gire gu Vaisrayeli va tshadha ni vathu nya ba va si khozeyi Nungungulu.
w15 15/3 dzipaj. 30-31
Gu dzegana pfhumuni basi si nga gu thuma ni muhuno?
Omu nya lito laye Jehovha a ngu ganeya gu khuye sithumi saye si yede gu dzegana pfhumuni basi. Khu ginani? Kholu a ngu siti esi si gu tshukwana ga vathu vaye. Uye kha vbweti gu va vhikeya basi ga esi si nga giregago khu gu gira silo khu ndziya nya mba yadi ganiolu a ngu dogoreya gu va wona gambe na va tsakide. Ga matshigu ya Nehemiya tepo Vajudha va nga ba va tshadha ni vanyamayi nya vambe mayigo nya gu va di si khozeyi Jehovha Nehemiya ganede khu giyeyedzo nya mba gyadi gya Solomoni. Ambari olu Solomoni a nga ba a godwa khu Nungungulu waye vagadzi vaye va mabe mayigo va mugiride a ghoha. (Ne 13:23-26) Khu kharato gasi gu vathu vaye va khadzisega Jehovha a ngu va leleteya gu va tshadha basi ni va khozeyi nya lisine. (Ndz 19:7-10; Isa 48:17, 18) makristo ma ngu bonga Nungungulu kholu a ngu ma khataleya nigu ayo ma ngu tumba sileletelo saye. Khu gu ma dzi vega vbavbatshi nya wufumo wawe ni gu va dzumeya uye kha nga mufumeli waye. — Mav 1:5.
w15 15/8 paj. 26-27, ndri. 12
Hatha gwadi dzipari matshigoni yaya nyo hegise
12 Gu dzi woneya avbo nya gu hathe dzipari kha lisima ngudzu, ngundzungundzu ga Makristo nya sikwendra ganiolu madogoreyago gu tshadha. Sileletelo nya Lito la Nungungulu somo guagani: “Mu nga hengeli guvbanya ni ava nya mba khodwa. Wu na nega kharini wuhengeli nya gululame ni gu wugela? Gu ngu dzi kodza kharini guhengela gu wonegela ni gidema?” (2Ko 6:14) Bhibhiliya yari khiyo sithumi sa Nungungulu si dogoreyago gu tshadha si yede gu gira isoso “Pfumuni basi”, si thulago gu a yede gu tshadha ni muthu a thumeyago Jehovha basi, a dzi hendzeledzidego a bhabhatiswa nigu gambe a gu vbanya khu sihevbudzo nya Bhibhiliya. (1Ko 7:39) Tepo Mukristo a tshadhago ni muthu a haladzago Jehovha, uye a gu mana pari yi na mu phasago gu simama gu tumbega ga Nungungulu.
Dzithomba nya liphuvbo
w04 1/2 dzipaj. 13-14, ndri. 4
Jehovha a hi ninga esi hi si vbwetago tshigu ni tshigu
4 Tepo hi girago nombelo gasi hi mana guhodza nya gu hodze litshigu lolo hi yede gu dundruga gambe gu khethu hi ngu vbweta guhodza ga liphuvboni tshigu ni tshigu. Ambari olu Jesu a nga ba a ari ni ndzala nya yikhongolo hwane nya gu na khade matshigu nya mangi nya mba hodza gilo uye si kodzide gu timiseya ga gilingo gya Sathane nya gu vbindrugedze siwindri si khala dzipawu khu gu mu embeya gu khuye: “ Gu lovidwe gu pwani, muthu kha vbanyi khu gu hodza basi aholu khu mahungu yatshavbo ma dugago khu ga Nungungulu.” (Matewu 4:4) Avba Jesu ganede khu muprofeti Mosi a nga Vaisrayeli khuye: “Uye a di gu poyila a gu diga upwa ndzala a gu hodzisa manaha uwe u nga ba ni u si mati ambari vababe vago va di si mati gasi u kodza gu pima gu khuwe muthu kha vbanyi basi khu gu hodza aholu khu satshavbo esi si dugago khu kanani ga PFUMU Nungungulu isoso si ngu vbanyisa muthu.” (Dhewuteronome 8:3) Khu gu ba Jehovha a ningide manaha Vaisrayeli khandri va di gu khataleya basi khu nyamani aholu a di gu ninga gambe sihevbudzo ‘vathu va di yede gu duga litshigu ni litshigu va roleya esi si na eneyago gu hodza litshigu limwedo’ avo va nga ba va roleya nya singi nyo vbindre litshigu lolo si di gu nunga si bwe si duga siwungu. (Ekisodha 16:4, 20) Ganiolu khu litshigu nya 6 va di gu yede gu roleya nya mangi nyo eneye ni Sabhadho nigu ayo ma di gu si hini. (Ekisodha 16:5, 23, 24) Manaha ma va yeyedzide gu va di yede gu engisa nigu va di si yeli gu khaleya gu ganeya basi khu guhodza ganiolu “khu yatshavbo magana ma dugago khu kanani ga Jehovha.”
28 NYA JUNHO–4 NYA JULHO
DZITHOMBA NYA LITO LA NUNGUNGULU | DHEWUTERONOME 9–10
“Ginani egi Jehovha Nungungulu a lombago gwago?”
w09 1/10 paj. 10, dzindri. 3-4
Ginani Jehovha a lombago gwathu?
Ginani gi nga hi kutsago gu engisa Nungungulu nya mba gurumedzwa? Mosi a ganede gimwego gyakone “Ninga githawo PFUMU Nungungulu wago.” (Livesi 12) Avba khandri ga gu ganedwa khu gu thava nyo mani wuyelo nya mba yadi ganiolu go ganedwa khu githawo nya gikhongolo khu Nungungulu ni edzi a girago khidzo silo. Ha gu manega ni githawo nyo ete khu Nungungulu hi vbweta gu gira satshavbo hi si kodzago gasi hi si mu gorosi.
Khu gevbini gigelo nya lisima gi nga hi gira hi engisa Nungungulu? Mosi ganede gu khuye: “Gola ni gu thumela PFUMU Nungungulu wago khu monyo wago watshavbo ni hefemulo wago watshavbo.” (Livesi 12) Gu haladza Nungungulu sa gu pata guvbindra edzi hi pwago khidzo. Obra mweyo nya referensiya ya gu tshamuseya esi: “Dziverbhu nya Gihebheru dzi tshamuseyago gu dzipwa dzimbe dzitepo dzi ngu thula sigiro esi hi si girago khu gu dzipwa gogo.” Obra yayimweyo yi ngu ganeya gu khiyo “gu haladza Nungungulu sa gu tshamuseya gu gira silo khu lihaladzo khu uye. Khu mambe maganelelo ha gu ba hi haladza Nungungulu khu lisine hi na gira silo na gu dziti gu khethu si ngu mu tsakisa. — Mavingu 27:11.
w09 1/10 paj. 10, ndri. 6
Ginani Jehovha a lombago gwathu?
Gu engisa gwathu gu na hi ninga makategwa nya mangi. Mosi lovide gu khuye: “Vegisa sirumu sa PFUMU Nungungulu ni milayo yaye si muhuno nyi gu leletedego gasi u mane makategwa.” (Livesi 13) Khu lisine yatshavbo milayo hi ningwago khu Jehovha, ni satshavbo esi uye a hi lombago a gu si gira gasi gu hi sayisa. Gu mwalo yimbe ndziya nya gu a gira khiyo esi kholu Bhibhiliya yari khiyo: “Nungungulu lihaladzo”. (1 Johane 4:8) Khu kharato uye a hi ningide milayo yi na hi phasago gu sayisega kala gupindruga. (Isaya 48:17) Gu gira esi Jehovha a hi lombago si na hi phasa gu mba garadzega olu nigu hi na mana makategwa nya mba vbeya vbavbatshi nya Mufumu waye.
cl gip. 2, paj. 16, ndri. 2
Ina si ngu kodzega gu hidzimeya vbafuvbi ga Nungungulu?
2 Abrahama wa gale mwama moyo a nga dzibuza khu gu manega vbafuvbi ga Nungungulu. Jehovha mu ranide gu khuye “pari yangu”. (Isaya 41:8) Khidzo, Nungungulu a di wona Abrahama nga pari yaye. Abrahama wuyedwe ngudzu khu wupari a nga ba a ri nawo ni Jehovha kholu uye a di gu khodwa gwaye. (Jakobe 2:23) Muhuno gambe, Jehovha a ngu bwetedzeya dzindziya nya gu gire wupari ni ava va mu thumeyago khu lihaladzo. (Dhewuteronome 10:15) Lito laye la gu hi kutsa gu gira esi: “Hidzimelani vbafuvbi ga Nungungulu, uye nuye a na mi hidzimelela.” (Jakobe 4:8) Khu lisine malito yaya konvhite ni gu gitumbiso.
Dzithomba nya liphuvbo
it-1 paj. 127
Anaki
Gu diri lifumbo nya vathu vakhongolo ngudzu ni gu lapha va nga ba va vbanya musigomoni sa khanani ni omu nya áreas costeiras ngudzungudzu sul ga kona. Ga tepo nyo khaguri, vama vararu va nga ba va tidwa ngudzu nya vaAnaki a gu Ayimani, Sesayi, ni talmayi va vbanyide Hebroni. (Mit 13:22) Khumo omu 12 vasoli nya va Hebheru va nga wona va Anaki khu tepo nyo pheye ni gu 10 nya avo va bwelede ni mubiko nya gu thise na va gu khavo va diri sanana nya sidandrangulu ga dziteponi dza Nowa va nga vbuluga avbo nya talo nya ndrambi ni gu khu gu dzi fananisa navo Vahebheru va di gu fana ni dzi gafanhoto. (Mit 13:28-33; Dhet 1:28) Wukhongolo wawe wu thumisidwe gasi gu fananisa vama nya sidandrangulu nya Varefayi ni Vaemisi. Khu kotani nya tshivba yawe gu ganedwe esi: Khu mani ava tiyelago vana Anaki? — Dhet 2:10, 11, 20, 21; 9:1-3.