Mitshamuselo yi gomogo omu nya mabhuku ma khumbugidwego omu nya Gibhukwana nya mitshangano nya thumo ni mavbanyelo
© 2023 Watch Tower Bible and Tract Society of Pennsylvania
4-10 NYA MARÇO
DZITHOMBA NYA LITO LA NUNGUNGULU | NDZIMO 16–17
“[Jehovha], khuwe thomba yangu yatshavbo”
w18/12 paj. 26, par. 11
Muphya, u nga mana womi nyo tsakise
GIRA DZIPARI NYA DZADI
11 Leri Ndzimo 16:3. Dhavhidhe a di guti omu a na manago dzipari nya dzadi. Uye a di gu ‘tsaka ngudzu’ khu gu khala ni vathu va haladzago Jehovha, va nga ba va wonwa na vari ni mavbanyelo ‘ma agidego’ ni gululama. Mumbe muembi nya dzindzimo a di gu dzipwa khu ndziya nyo fane maningano ni gu hatha dzipari. Uye a di lova gu khuye: “Eni nyi pari ya vatshavbo va gu ningago githawo, ni ya vale va landrisago sileletelo sago.” (Ndzi. 119:63) Kha nga hi si wonidego ga ndrima yi vbindridego, u nga mana dzipari nya dzadi vbakari nya vathu va thumeyago Jehovha. Isoso sa gu pata gu hatha dzipari nya dzitanga nyo hambane-hambane.
w14 15/2 paj. 29, par. 4
“Ninga lisima wukhozeyi nya lisine”
Dhavhidhe a di embeleya gu khuye: “Pfhumu Nungungulu, uwe u thomba ni gikombe gyangu, khuwe u pharidego guvbanya gwangu. Nyi kabanisidwe giavelo malangani ma nyi tsakisago.” (Ndzi. 16:5, 6) Dhavhidhe a di gu bonga khu “thomba” yaye, yi thulago wupari nyo tiye a nga ba ari nawo ni Jehovha ni lithomo nya gu mu thumeye. Gu fana ni Dhavhidhe, hi nga tshangana ni sigaradzo nya singi, ganiolu hi na ni makategwa nya mangi ya liphuvboni. Khu kharato, hi yede gu simama gu ninga lisima wukhozeyi nya lisine hi bwe hi ‘bonga’ khu tempele ya Jehovha ya liphuvboni.
w08 15/2 paj. 3, dzipar. 2-3
Vega Jehovha mbeli gwago
2 Hatshavbo hi nga hevbula khu siyeyedzo si khumbugidwego omu nya Bhibhiliya nya nga— Abrahama, Sara, Mosi, Rute, Dhavhidhe, Esiteri, mupostoli Pawulo ni vambe. Ambari ulolo, hi nga wuyedwa khu matimo nya vathu va gu mba khumbugwa ngudzu omu nya Bhibhiliya. Gu dundrugeya khu matimo nya Bhibhiliya, si nga hi phasa gu gira esi si ganedwego khu muembi nya dzindzimo, uye a di khuye: “Gikhati gyatshavbo nya gu vega Pfhumu Nungungulu mbeli gwangu, khu guralo, uye khade nyamudye gwangu, gima kha nyi na thava gilo.” (Ndzi. 16:8) Ma gu thula ginani malito yaya?
3 Lisotswa li di gu oloveya gu phara espadha yalo khu libogo la nyamudye, iso si nga ba si gira gu si si kodzegi gu phara givhikelo khu libogo lalimwedo, khu ndziya yoyo gyatshavbo gipandre gya nyamudye kha gya nga ba gi vhikelegide. Ambari ulolo, ilo li di hadzi vhikelega limbe lisotshwa la gu dwana khu nyamudye gwalo. Ha gu dundruga Jehovha hi bwe hi gira gugola gwaye, uye a na hi vhikeya. Khu kharato, hongoleni hi wona edzi matimo nya Bhibhiliya ma nga hi phasago khidzo gu tiyisa gukhodwa gwathu, ‘khu gu simama gu vega Jehovha mbeli gwathu.’— Byington.
Kemba dzithomba nya liphuvbo
it-2 paj. 350
Ndzololo nya liso
Liso li na ni wukhetha ngudzu, ambari gyo beya gidzundzwana mwendro kudzudzwani si ngu pwala omu nya liso. Gipandre nya trasparenti nya liso, gi fenengedzago ndzololo nya liso, gi yede gu vhikedwa ni gu khathaledwa gwadi kholu gya gu beya gilo nyo khaguri gi nga vanga madwali, gu mba wona gwadi ambari kamu gu khala gikhumo. Bhibhiliya ya gu thumisa lito “ndzololo nya liso” gasi gu thula esi si yedego gu vhikedwa ni gu khathaledwa gwadi. Khu kharato, milayo ya Nungungulu yi yede gu khathaledwa khu ndziya nyo fane. (Mav 7:2) Dhewuteronome 32:10 tepo a ganeyago khedzi Nungungulu a khathaledego khidzo Vaisrayeli nga sanana saye wari khuye, a di va vhikeya nga khatshi i “ndzololo nya liso laye.” Dhavhidhe a di gombeya a lomba gu vhikedwa ni gu khathaledwa khu Nungungulu nga khatshi i “ndzololo nya liso Iaye.” (Ndz 17:8) Uye a di gu vbweta gu khuye Jehovha a vbiredza gu mu vhikeya tepo a nga ba a wugedwa khu valala. (Fananisa ni Zak 2:8, omu gu thumiswago lito nya gihebheru ba·vathʹ ʽaʹyin nga “ndzololo nya liso”)— Wona LISO.
11-17 NYA MARÇO
DZITHOMBA NYA LITO LA NUNGUNGULU | NDZIMO 18
“Jehovha . . . Mudzegisi wangu”
w09 1/5 paj. 14, dzipar. 4-5
Silo si hi hevbudzago makhalelo ya Jehovha
Bhibhiliya yi ngu fananisa Jehovha ni silo si gu mwalo womi. Uye o fananiswa ni “Giwindri gya Israyeli” ni “Giwindri nya gutiye” nigu o fananiswa gambe ni “Likhokhola.” (2 Samuweli 23:3; Ndzimo 18:2; Dhewuteronome 32:4) Khu ginani a fanago naso? Gu fana ni giwindri nya gikhongolo nyo tiye gi gu mba tsekatseka, Jehovha a nga khala gibuga nyo tiye nya gu gu vhikeye.
5 Libhuku la Ndzimo lo ganeya khu silo nya gu hambane-hambane si tshamuseyago makhalelo ya Jehovha. Khu giyeyedzo, Libhuku la Ndzimo 84:11 lo ganeya gu khilo Jehovha “lidambo ni muvhikeli” kholu Uye gibuga nya wenengedzo, nya womi, nya tshivba ni gu vhikelega. Vbavbandze nya isoso, Ndzimo 121:5 yari khiyo: “[Jehovha] womo vbafuvbi gwago, khuye a gu vhikelago.” Gu fana ni mutsa wu hi vhikeyago lihane, Jehovha nuye a ngu vhikeya sithumi saye ga lihane nya sigaradzo, khu ngu si ninga gu vhikelega mutsani nya “gyandza” gyaye ni vbavbatshi nya “mambapi” yaye. — Isaya 51:16; Ndzimo 17:8; 36:7.
it-2 paj. 1219, par. 5
Lito
Nungungulu a ngupwa lito nya sithumi saye. Vale va thumeyago Nungungulu khu liphuvbo ni lisine, va nga rana Nungungulu na va gu tiyisega gu khavo Uye a ngu vapwa, na li si khathadzisegi lidimi va mu ranago khilo. Ambari ho mba ganeya khu lito nyo khugege, hi ganeya khu monyoni, Nungungulu atigo myonyo yathu a na ‘hipwa’ ni gu hi engiseya gwadi. (Ndz 66:19; 86:6; 116:1; 1Sa 1:13; Ne 2:4) Nungungulu a ngu wona gu garadzega ga vale va vbwetago giphaso, a ngu va engiseya nigu a ngu mati makungo ya vale va wugeyago ni gu vbweta gu gireya silo nyo vivbe sithumi saye. — Ge 21:17; Ndz 55:18, 19; 69:33; 94:9-11; Jer 23:25.
U nga timiseya kharini wa gu ba u garadzega?
2. Dundrugeya. Wa gu khedza edzi womi wago wu nga ba wu romo khidzo gale, ina u ngu kodza gu wona edzi u padego khidzo sigaradzo khu gu phaswa khu Jehovha? Tepo hi dundrugeyago khedzi Jehovha a hi phasidego khidzo gale ni edzi a phasidego khidzo sithumi saye gale, ethu ha gu engedzeya gu mu tumba. (Ndzi. 18:17-19) Lidhota limwedo nyo pwani khu Joshua lari khilo: “Nyi na ni sasamedzo nya milombelo yangu. Esi sa gu nyi phasa gu dundruga dzitepo nyi nga lomba Jehovha silo nya gu kongome a bwe a nyi hlamula.” Ha gu dundruga khesi Jehovha a hi giredego gale hi na mana tshivba nya gu emisane ni gu garadzega gwathu.
Kemba dzithomba nya liphuvbo
it-2 paj. 768, par. 3
Likerubhimi
Dzikerubhimi dzedzi kha dza nga ba dziri sifananiso nya guvatwe nya gu thavisi si nga ba si khozedwa khu vathu nya mayigo nga edzi vathu va nga ba va pimisa khidzo. Guya khu giolovedzo nya Gijudha gya gale (Bhibhiliya kha yi ganeye gilo khu mahungu yaya), Dzikerubhimi dzodzo dzi di gu fana ni sivangwa nya gu olovelege. Idzo dzi di gu vatidwe gwadi nigu dzi gu emeya sivangwa sa ndzadzini nyo mbure ngudzu, nigu idzo dzi giridwe guya khedzi Mosi a nga leletedwa khidzo khu Jehovha. (Eks 25:9) Mupostoli Pawulo a tshamusede gu khuye: “Gu diri ni dzikerubhimi dzi nga ba dzi fenengedza tapa nya arka.” (Heb 9:5) Dzikerubhimi dzi di gu yeyedza gu khidzo Jehovha womo ga wulanga wowo. Bhibhiliya yari khiyo: “Nyi na ta dzi wonegisa gwago khu vbagikhalotunu nya ditshedzo, vbakari nya dzikerubhimi dzi guromo vbatshani nya ngasa nya gidzumeledzwano.” (Eks 25:22; Mit 7:89) Khu ndziya yeyi, gu di gu ganedwa gupwani Jehovha a di gu khade “vbatshani [mwendro vbakari] nya dzikerubhimi.” (1Sa 4:4; 2Sa 6:2; 2Dzf 19:15; 1Dzik 13:6; Ndz 80:1; 99:1; Isa 37:16) Khu ndziya nyo fananise, Dzikerubhimi dzi di gu thuma kha nga ‘movha’ ya Jehovha a nga ba a endra khiyo (1Dzik 28:18), nigu mambapi nya dzikerubhimi ma di gu vhikeya ni gu gira lipfhumba li vbiredza. Khu kharato, omu nya ndzimo yaye, Dhavhidhe ganede khedzi Jehovha a mu phasidego khidzo khu gu vbiredza, uye a di khuye: “A di khilela likerubhimi, a puruma, a vbuvba dzimbapini nya phuvbo.” — 2Sa 22:11; Ndz 18:10.
18-24 NYA MARÇO
DZITHOMBA NYA LITO LA NUNGUNGULU | NDZIMO 19–21
“Ndzadzini gu ngu tivisa wudhumo wa Nungungulu”
w04 1/1 paj. 8, dzipar. 1-2
Vatshavbo va na dhumise Jehovha
DHAVHIDHE, gyanana gya Jese, a dandride kha nga muhavisi vbafuvbi ni tigoni ga Bhetlehema. Khu lisine, tepo a nga ba a havisa dzinvuta dza papayi waye panini, uye wonide dzinyeledzi nya dzingi ndzadzini vbakari nya wutshigu. Nya mba kanakana, esi a si wonidego a si dundrugide tepo a nga lova ni gu embeleya malito nyo mbure khu gu kutswa khu liphuvbo nya guage la Nungungulu, ma gomogo omu ga Ndzimo 19 ma gu khayo: “Ndzadzini gu ngu tivisa wudhumo wa Nungungulu, ndrengelenge wu ngu tivisa sigiro nya mandza yaye. Ambari ulo gudzuma gwa[ye] gu ngu pwala tigoni gwatshavbo, lito la[ye] li ngu pwala kala mahegiso nya mafu.”— Ndzimo 19:1, 4.
2 Nya mba na lito, nya mba ganeya, nya mba na malito, wutshigu ni mihani sivangwa nyo hlamadzise sa ndzadzini sa gu yeyedza wudhumo wa Jehovha. Sivangwa gima kha si digi gu dhumisa Nungungulu, nigu hi ngu kutswa gu dundrugeya khu wufakazi wowu wu tiviswago “mafuni gwatshavbo” nigu wu wonwago khu vathu vatshavbo. Ambari ulolo, wufakazi wu ningwago khu sivangwa kha wu eneyi. Khu kharato, vathu nyo tumbege va ngu kutswa gu ninga wufakazi wowo khu lito nyo khugege. Muembi nya dzindzimo li gu mba khumbugwa lina laye, a di embeya sithumi nyo tumbege malito ma gu khayo: “Dhumisani Pfhumu Nungungulu khu tshivba ni wuzundzo waye. Khusedzani Pfhumu Nungungulu khu wuzundzo nya lina laye.” (Ndzimo 96:7, 8) Ava va gu na ni wupari nyo tiye ni Jehovha va ngu tsaka khu gu landrisa gigengedzo gegi. Ganiolu, sa gu pata ginani gu dhumisa Nungungulu?
w04 1/6 paj. 11, dzipar. 8-10
Sivangwa sa gu dhumisa Nungungulu
8 Khu gu landreya, Dhavhidhe tshamusede gimbe givangwa nyo hlamadzise gya Jehovha, uye a di khuye: “Khiyo [ndzadzini] a vbahedego tshatsha lidambo. Ambari ulo gudzuma gwawe gu ngu pwala tigoni gwatshavbo, lito lawe li ngu pwala kala mahegiso nya mafu; khiyo a vbahedego tshatsha lidambo. Ilo gu wonega mahegiso ga Khugadambo, li hegisa liendro Iaye mahegiso ga Muhwadambo, gi mwalo gilo gi si furumedzwigo khu lihani laye.” — Ndzimo 19:4-6.
9 Ha gu fananisa lidambo ni dzimbe dzinyiledzi, ilo lidugwana. Ambari ulolo, ilo la gu wonega na liri likhongolo guvbindra dzimbe dzinyeledzi. Wu gevesisi nyo khaguri wa gu ganeya gu khuwo lidambo la gu peza tanga nya “dzibhiliyoni nya dzitoneladha” (2 octilhões) yi tshamuseyago 99, 9 por cento nya sistema solar. Tshivba yi gu na ni lidambo yi ngu gira gu mafu ma dzundrulugeya tanga nya 150 dzimiliyoni nya dzikilometru, nya mba hidzimeya ambari gu khala hwindzo ni lidambo. Mafu ma gu mana vbadugwana gwakone gu furumeya nya lidambo, ganiolu hi ngu si kodza gu vbanya.
10 Muembi nya dzindzimo, a di ganeya khu lidambo khu ndziya nyo fananise gasi gu tshamuseya edzi “muthu nya tshivba” a tutumago khu mahegiso ga Khugadambo kala mahegiso ga Muhwadambo litshigu latshavbo, khavbovbo a hefemula omu nya “tshatsha” vbawutshigutunu. Tepo nyeledzi yoyo nya yikhongolo yi vbohago mahegiso ga muhwadambo, sa gu gira gu khatshi la gu beya omu nya “tshatsha” gasi gu hefemula. Ni dzimindru tepo li dugago la gu wenengedza nigu “gi mwalo gilo gi si furumedzwigo khu lihani laye.” Dhavhidhe kha nga muhavisi a di gu dziti gu khuye vbawutshigutunu gu ngu dzidziya ngudzu. (Genesi 31:40) Uye a di gu dundruga edzi lihani li nga ba li mu furumedza khidzo khu gu vbiredza ni edzi li nga ba li wenengedza khidzo avba a nga ba a romo. Khu lisine, lihani kha la nga ba li garala khu gu khuga khu Khugadambo kala Muhwadambo tshigu ni tshigu, ganiolu li di gu gira gu khatshi “muthu nya tshivba” a dzi emisedego gu pheledza liendro lalimwedo.
g95 8/11 paj. 7, par. 3
Meseri a gu mba thedwa kota matshigoni yathu
Ha gu khedziseya gwadi sivangwa si hi randredego si na hi phasa guti gwadi Muvangi wathu. Ga giemo nyo khaguri, Jesu a embede vapizane vaye gu khedziseya sifilori nya likhabi si nga ba si romo Galileya. Uye a di khuye: “Hevbulani gilogyo avba nya sifilori nya likhabi, edzi si dandrago khidzo, ne kha si thumi, ne kha si soni sombo; ganiolu nyi ngu mi embeyani gu kheni: Ambari Solomoni mufumoni waye watshavbo, gima kha ambala nga gimwegyo nya iso.” (Matewu 6:28, 29) Gu mbura nya sifilori nya likhabi, si nga hi dundrugisa gu khiso Nungungulu a na hi ninga esi hi si vbwetago gasi hi vbanya.
Kemba dzithomba nya liphuvbo
U nga si kodza gu ‘tshula muthu wa gale’
10 Tiyisega gu khuwe milayo ya Jehovha khyadi. Hi nga wuyedwa ha gu gira satshavbo esi Jehovha a lombago gu hi gira. Vale va vbanyago khu milayo yaye va ngu dzi ninga githawo avo va mune, va ni makungo guvbanyani nigu va ngu tsaka khu lisine. (Ndzi. 19:7-11) Gu hambana ni vale va bombago milayo ya Jehovha, avo va ngu mana mihandro nya mba yadi khu gu ba va gira mithumo nya wuthu. Wona esi mwama moyo nyo pwani khu Elie a ganeyago maningano khu gu bomba milayo ya Nungungulu. Uye a dandrisidwe khu vavelegi va haladzago Jehovha. Ganiolu tepo Elie a nga ba ari muphya, uye a hathide dzipari nya mba dzadi. A di pheya gu thumisa sidahadaha, gu manega ni mavbanyelo nya gu nyenyezi ni guba. Elie wari khuye a di pheya gu khala muthu nya mba hweya gu goroga ni gu gola mayunga. Uye a gu ganeya gu khuye: “Khu lisine nyi di pheya gu gira satshavbo iso nyi nga ba nyi embedwe gu mba gira kha nga Mukristo.” Ambari ulolo, Elie kha divala esi a nga hevbula na ngari muphya. Khu gu hegisa, uye a di pheledza gambe gu hevbula Bhibhiliya. Uye a dzi garadzede ngudzu gasi gu diga mavbanyelo nyo vivbe a bwe a bhabhatiswa khu 2000. Gu vbanya khu milayo ya Jehovha si mu phaside kharini? Elie wari khuye: “Olu nyi na ni gurula mapimoni nigu nyi na ni livhalo li agidego.” Giyeyedzo gya Elie gya gu yeyedza gu khigyo vale va bombago milayo ya Jehovha va gu dzi vangeya sigaradzo khu vabune. Ambari ulolo, Jehovha a dzi emisede gu va phasa gu vbindrugedza.
25-31 NYA MARÇO
DZITHOMBA NYA LITO LA NUNGUNGULU | NDZIMO 22
Bhibhiliya yi tshamusede gwadi khu gufa ga Jesu
w11 15/8 paj. 15, par. 16
Avo va manide Mesiya!
16 Si di hadzi wonega gu khatshi Mesiya a di digwa khu Nungungulu. (Leri Ndzimo 22:1.) “Omu nya dzi 15 ora Jesu a di khusedza lito, khuye: ‘Eli, Eli, lama sabhaktani?’ Si thulago gu khiso: ‘Nungungulu wangu, Nungungulu wangu, khu ginani u nga nyi diga?’” (Marko 15:34) Jesu kha nga ba vbeledwe khu gukhodwa a nga ba ari nago khu Papayi waye wa ndzadzini. Nungungulu a di diga Jesu mandzani ga valala vaye khu gu ema gu mu vhikeya ga tepo yile, gasi gu tumbega gwaye gu lingwa khu gu vbeleya. Gu liya ga Jesu gu tadziside libhuku la Ndzimo 22:1.
w11 15/8 paj. 15, par. 13
Avo va manide Mesiya!
13 Dhavhidhe a di profeta gu khuye Mesiya a di hadzi gu vadwa. (Leri Ndzimo 22:7, 8.) Jesu a di vadwa tepo a nga ba a tshaniseka avba nya simbo nya tshanisa. Matewu a di khuye: “Ava va nga ba va vbindra khu vbale va di gu mu vala na va gu kutsunga mihungo, na va gu khavo: ‘Uwe u nga ba u vbweta gu tshungunula tempele u bwe u yi vbaha khu matshigu mararu, dzi vbulugise! Wa gu ba uri gyanana gya Nungungulu, tshiga khu vbasimbotunu nya tshanisa!’” Khu gufana, vaprista nya vakhongolo ni valovi gumogo ni madhota, va di pheya navo gu mu poyileya, khavo: “Uye vbulugiside vambe, ganiolu kha kodzi gu dzi vbulugisa abune! Uye Pfhumu ya Israyeli, a na tshige kamo olu khu vbasimbotunu nya tshanisa, hi na khodwa gwaye. A di gu tumba Nungungulu; a na vbulugiswe khuye olu a gu ba a mu tsakeya, kholu a di khuye: ‘Eni nyi Gyanana gya Nungungulu.’” (Mat. 27:39-43) Ambari ulolo, Jesu timisede satshavbo khu githawo. Khu lisine, uye giyeyedzo nya gyadi gwathu!
w11 15/8 paj. 15, par. 14
Avo va manide Mesiya!
14 Va di kabana sombo saye khu gu thumisa dzisolo. Muembi nya dzindzimo lovide gu khuye: “Va kabana khu gyawe guambala gwangu, va gira nyatumbatumbane khu libhadzi langu.” (Ndzi. 22:18) Isoso si di girega kholu “hwane nya gu ba (masotshwa ya Roma) ma mu khokhotede avba nya simbo, va di kabana sombo saye khu gu thumisa dzisolo.” — Mat. 27:35; leri Johane 19:23, 24.
Kemba dzithomba nya liphuvbo
w06 1/11 paj. 29, par. 7
Dzindziya nya gu yeyedze githawo khu mitshangano
7 Hi na ni dzindziya nya dzingi hi nga yeyedzago khidzo githawo khu mitshangano. Mweyo nya dzindziya gu manega mitshanganoni tepo yatshavbo ni gu embeleya dzindzimo nya Mufumu. Dzimbe dzakone dzi lovidwe nga khatshi milombelo, khu kharato dzi yede gu embeledwa khu githawo. Omu ga Ndzimo 22, Pawulo lovide maningano khu Jesu gu khuye: “Nyi na huwulela lina lago ga vandriyangu; nyi na embelela wudhumo vbakari nya tshangano.” (Vahebheru 2:12) Khu kharato, hi yede gu manega malangani yathu mu phare nya tshangano na si hi lombi gu khuga hi embeleya ndzimo, nigu hi yede gu vega gwadi gupima ga malito tepo hi embeleyago. Gu embeleya gwathu gu yede gu yeyedza edzi muembi nya dzindzimo a dzipwidego khidzo tepo a nga khuye: “Nyi na rungudza Pfhumu Nungungulu khu monyo wangu watshavbo, vbakari nya tshangano wa va nya gululama.” (Ndzimo 111:1) Nya mba kanakana, gu embeleya dzindzimo nya gu dhumise Jehovha si na hi kutsa gu heguleya gu vboha mitshanganoni hi bwe vega gwadi gupima gwayo kala yi vbeya.
w03 1/9 paj. 20, par. 1
A na dhumiswe Jehovha “vbakari nya tshangano”
Gu fana ni gale gu giridwe malulamiselo nya gu vathu va ganeya gukhodwa gwawe “vbakari nya tshangano.” Vatshavbo va na ni lithomo nyo hlamule siwudziso si girwago mitshanganoni nya libandla. Gima u nga kanyisi wuyelo wu manwago khu gu gira isoso. Khu giyeyedzo, mihlamulo yi ganeyago khedzi hi nga timiseyago khidzo ni gu potsa sigaradzo, yi na phasa vandriyathu gu thumisa matshina nya milayo nya Bhibhiliya. Mihlamulo yi tshamuseyago milowo nya Bhibhiliya mwendro mahungu ma manidwego khu gu gira dzipeskiza, ma na kutsa vambe gu manega ni giolovedzo nya gu gire gwadi gihevbulo nya Bhibhiliya.
1-7 NYA ABRIL
DZITHOMBA NYA LITO LA NUNGUNGULU | NDZIMO 23–25
“[Jehovha] muhavisi wangu”
w11 1/5 paj. 31, par. 3
“[Jehovha] muhavisi wangu”
Jehovha a ngu hetedza dzinvuta dzaye. Nya mba na muhavisi, dzinvuta dzi nga dzimeya. Khu ndziya nyo fane, hi ngu vbweta giphaso gya Jehovha gasi hi mana ndziya nya lisine womini. (Jeremiya 10:23) Kha nga edzi a tshamuseyago Dhavhidhe, Jehovha a ngu hetedza vathu vaye “panini nya mwasi nya gunyuge” ni “matini nya gutenge.” Uye a ngu va gimbidzisa “dzindzilani nya gululame.” (Mavhesi 2, 3) Siyeyedzo sesi nya muhavisi sa gu hi tiyisegisa gu khiso hi nga tumba Nungungulu. Ha gu landrisa sileletelo nya liphuvbo nya guage si gomogo omu nya Bhibhiliya, hi na mana womi nyo tsakisi, gurula ni gu vhikelega.
w11 1/5 paj. 31, par. 4
“[Jehovha] muhavisi wangu”
Jehovha a ngu vhikeya dzinvuta dzaye. Nya mba na muhavisi, dzinvuta dzi nga thava dzi bwe dzi hamuga gilo nyo gire. Jehovha a gu embeya sithumi saye gu khuye kha si yeli gu thava, ambari sa gu “gimbila kovani nya gidema nya lufu” mwendro dziteponi nyo garadze. (Livhesi 4) Jehovha a ngu si khathaleya nigu tepo yatshavbo a dzi emisede gu si phasa. Uye a nga ninga vakhozeyi vaye guti ni tshivba gasi gu timiseya sigaradzo.— Vafilipi 4:13; Jakobe 1:2-5.
w11 1/5 paj. 31, par. 5
“[Jehovha] muhavisi wangu”
Uye a ngu hodzisa dzinvuta dzaye. Dzinvuta dza gu khedziseya muhavisi wadzo gasi gu dzi ninga guhodza. Anethu hi nga hodza khu liphuvboni, khu gu phaswa khu Nungungulu. (Matewu 5:3) Egi gi tsakisago khu gu Jehovha, Muningi a gu na ni wuwadi nigu uye a gu dongiseya meza yi tadego khu guhodza ga liphuvboni. (Livhesi 5) Bhibhiliya ni mambe mabhuko hi ma thumisago gasi gu hevbula khayo, nya nga mukhedziseyi u lerigo olu, sibuga nya guhodza ga liphuvboni si hi phasago guti makungo nya womi ni makungo a gu nawo Nungungulu khethu.
Kemba dzithomba nya liphuvbo
w11 15/2 paj. 24, dzipar. 1-3
Gola gululama khu monyo wago watshavbo
JEHOVHA khu gu thumisa lito laye ni liphuvbo laye nya guage a ngu gimbidzisa vathu vaye “dzindzilani nya gululame.” (Ndzi. 23:3) Ganiolu, khu kotani nya olu hi nga mba vbeleya, hi nga tshuka hi duga ndziyani nya gululame. Khu kharato, hi yede gu dzi garadzeya gu gira silo nya sadi. Ginani gi na hi phasago gu gira isoso? Gu fana ni Jesu hi yede gugola gululama. — Leri Ndzimo 45:7.
2 Ginani ‘dzindziya nya gululame’? Ndziya nya gululame, ndziya nya mba djikadjika mwendro nya mba na dzikurvha. Dzindziya dzodzo dza gu yeyedzwa khu matshina nya gululame ya Jehovha. Khu Gihebheru ni Gigreki lito “gululama” lo thula gu gira silo nya sadi, si patago gu vbanya khu matshina nya milayo nya mavbanyelo. Kha nga olu Jehovha a gu ‘wulanga nya gululame,’ vakhozeyi vaye va ngu tsaka khu gu Uye a va yeyedza ndziya nya gululame va yedego gu gimbiya khiyo. — Jer. 50:7.
3 Si nga kodzega basi gu tsakisa Nungungulu ha gu dzi garadza khu monyo wathu watshavbo gu vbanya khu matshina nya gululame. (Dhet. 32:4) Hi nga pheya khu gu hevbula satshavbo maningano khu Jehovha omu nya Lito laye, Bhibhiliya. Tepo hi yago hi muti gwadi Jehovha, hi na hidzimeya gwaye nigu hi na engedzeya gu gola gululama. (Jak. 4:8) Hi yede gu engisa sileletelo hi si manago omu nya Bhibhiliya tepo hi hungago makungo nya lisima womini.
8-14 NYA ABRIL
DZITHOMBA NYA LITO LA NUNGUNGULU | NDZIMO 26–28
Dhavhidhe a tiyiside kharini gutumbega gwaye?
w04 1/12 paj. 14, dzipar. 8-9
Simama gu gimbiya dzilani nya gululame
8 Dhavhidhe a gombede khuye: “Nyi khedzise, Pfhumu Nungungulu, nyi linge, wona gugola nya monyo wangu ni mipimiso yangu.” (Ndzimo 26:2) Monyo wa gu khala ndrani nya givili nya muthu. Monyo, muthu wathu wa ndrani wu emeyago sigiro ni gudzipwa gwathu. Tepo Dhavhidhe a nga lomba Jehovha gu a gevisisa monyo waye, a di gu vbweta gu khuye Jehovha a gevisisa gwadi sigiro saye ni gudzipwa gwaye.
9 Dhavhidhe a di lomba Jehovha gu khuye a wona monyo waye. Jehovha a gu wona kharini edzi hi gu idzo khu ndrani? Dhavhidhe a ganede gu khuye: “Nyi ngu rungudza Pfhumu Nungungulu a nyi layago, ni vbakari nya wutshigu, monyo wangu wu ngu nyi dundrugisa.” (Ndzimo 16:7) Malito yaya ma gu thula ginani? Ma gu thula gu khayo, wusingalagadzi wa ndzadzini wu kuhide monyo wa Dhavhidhe ni gu vbindrugedza mapimiselo ni gudzipwa gwaye. Esi si nga girega gwathu nethu, khu gu hi engisa wusingalagadzi hi wumanago omu nya Bhibhiliya, wusingalagadzi hi wu manago ga ava Jehovha a va hathidego gasi gu hi thangeya ni ga hengeledzano yaye hi bwe hi dzumeleya gu khethu wusingalagadzi wowo wu kuha monyo wathu. Gombeya ga Jehovha tshigu ni tshigu u lomba gu khuwe a wona monyo wago. Wa gu gira isoso, Uye a na gu phasa gu gimbiya ndziyani nya gululame.
w04 1/12 paj. 15, dzipar. 12-13
Simama gu gimbiya dzilani nya gululame
12 Dhavhide ganede khu gimbe gilo gi mu phasidego gu tiyisa gutumba gwaye, a di khuye: “Kha nyi khali dangamwedo ni sidambane, kha nyi gimbili ndzila mweyo ni vakanganyisi; nyi ngu yi nyenya mitshangano ya va nya guvivba, kha nyi khali gumogo ni sighohi.” (Ndzimo 26:4, 5) Dhavhidhe a di gu nyenya khu gu vbeleya gu ‘khala’ ni vathu nya guvivbe. Nigu a di gu nyenya dzipari nya mba dzadi.
13 Ahati ethu? Ina hi ngu nyenya gu ‘khala ni vathu nya guvivbe’ khu gu thumisa milongoloko nya televizawu, dzivhidhyu, interneti ni simbe? Ina hi ngu khaleya hwindzo ni vale va gu mba dzi yeyedza gukhavo khavo vamani khu lisine? Vathu nyo khaguri xikwatuno mwendro thumotuno, va nga khala dzipari dzathu khu makungo nyo khaguri nyo vivbe. Ina hi ngu gira wupari ni vathu va gu mba gimbiya ndzilani nya lisine la Nungungulu? Vawugeyi va nga ganeya mahungu nya khatshi lisine, ganiolu khu makungo nya gu hi ndreyise ndziyani nya gu thumeye Jehovha. Hi nga gira ginani a gu ba muthu nyo khaguri libandlani a vbanya miwomi mivili? Muthu yoyo, a gu siha edzi a gu idzo khu lisine. Jayson, olu a thumago kha nga muphasedzeyi nya libandla a diri ni dzipari nya nga edzi tepo a nga ba a ri muphya. Uye wari, khuye: “Litshigu nyo khaguri mwenyo nya dzipari dzango yi di nyi embeya gu khiyo: ‘Gu nga khatadzisegi esi hi girago olu, kholu tepo mahegiso ma na vbohago ethu hi na ba hi fude. Ne kha hi na nga dziti gu khethu hi luzide gilogyo.’ Mabhulo nya nga aya ma khade gigengedzo gwangu. Kha nyi vbweti gufa na ma si gu vbohi mahegiso.” Khu wugengeyi, Jayson a pide wupari a nga ba ari nawo ni dzipari dzaye. Mupostoli Pawulo hi gengedzide gu khuye: “Mu nga dzi sengi. Dzipari nyo vivbe dzi ngu vivbisa mavbanyelo nya yadi.” (1 Vakorinto 15:33) Si na ni lisima gu potsa dzipari nya mba dzadi!
w04 1/12 paj. 16, dzipar. 17-18
Simama gu gimbiya dzilani nya gululame
17 Tabhernakeli ni giluvelo nya miphaso, gu diri avbo tsindza nya wukhozeyi wa Jehovha, Israyeli. Gasi gu yeyedza edzi a nga ba a wu gola khidzo wulanga wule, Dhavhidhe a gombede, khuye: “Pfhumu Nungungulu, eni nyi ngu gola wumburi nya Nyumba yago, ni wulanga wu wonegago avbo wudhumo wago.”— Ndzimo 26:8.
18 Ina hi ngu gola ngudzu gu tshangana ga malanga hi hevbulago maningano khu Jehovha? Dzatshavbo Dzisalawu nya Mufumu, dzi na ni matshigu gumogo ni dziora dzi emisedwego gasi gu gira wukhozeyi nya lisine. Vbavbandzi nya isoso, khu mwaga ni mwaga hi na ni dziasembleya dzimbili ni kongresu. Ga mitshangano yeyi, hi ngu mana “sileletelo” mwendro sihevbudzo sa Jehovha. Ha gu hevbuleya gu ‘gola ngudzu’ mitshangano yeyi, si na hi kutsa gu manega ga iyo hi bwe hi vega gwadi gupima ga esi si na hevbudwago. (Ndzimo 119:167) Si ngu tsakisa ngudzu gu tshangana ni vandriyathu gukhodwani va khathalago gwadi khu moyo ni moyo wathu ni gu hi phasa gu simama na hi tumbegide!— Vahebheru 10:24, 25.
Kemba dzithomba nya lipuvbo
w06 15/7 paj. 28, par. 15
15 Muembi nya dzindzimo Dhavhidhe wari, khuye: “Kholu, babe ni mayi wangu va gu nyi diga, Pfhumu Nungungulu a na nyi hakha.” (Ndzimo 27:10) Si ngu thaveleya guti gu khethu lihaladzo la Jehovha li ngu vbindra lihaladzo la wevbwini muvelegi. Ambari ha gu tshaniswa, hi pharwa khu ndziya nya mba yadi, hi digwa khu papayi mwendro khu mamayi, isoso kha si na nga hi hambanisa ni lihaladzo la Jehovha. (Varoma 8:38, 39) Dundruga gu khuwe Nungungulu a gu rana ava a va haladzago. (Johane 3:16; 6:44) Gu nga khatadzisegi edzi vambe vathu va gu pharago khidzo, tiyisega gu khuwe u ngu haladzwa khu Papayi wago wa ndzadzini.
15-21 NYA ABRIL
DZITHOMBA NYA LITO LA NUNGUNGULU | NDZIMO 29–31
Gu kawukwa — Giyeyedzo nya lihaladzo la Jehovha
it-1 paj. 929, par. 3
Khovbe
‘Gu siha khovbe’ si nga thula silo nya singi, guya khu giemo gyakone. Gu sihedwa khovbe ya Jehovha Nungungulu, dzimbe dzitepo so thula gu luza lithomo nya gu vhikedwe khuye. Isoso si nga girega o tshuka muthu nyo khaguri a si engisi mwendro tsawa nyo khaguri wu diga gu engisa, gu fana ni esi si nga giregeya Vaisrayeli. (Job 34:29; Ndz 30:5-8; Isa 54:8; 59:2) Ga simbe siemo, hi nga wona gu khatsi Jehovha o hweya gu gira gilogyo mwendro kha hlamuli milombelo yathu khu gu ba a vireya tepo a yi emisidego. (Ndz 13:1-3) Dhavhidhe a di lomba khuye: “Siha khovbe yago u si woni sighoho sangu,” a di lomba ga Nungungulu divalelo nya sighoho saye. — Ndz 51:9; fananisa ni Ndz 10:11.
w07 1/3 paj. 19, par. 1
Tsaka khu gu vireya Jehovha
Hi nga fananisa wuyelo hi wu manago khu gu kawuka ga Jehovha ni edzi handro nyo khaguri wu dandrago khidzo kala wu vidzwa. Bhibhiliya ya gu ba yi ganeya khu gu kawuka ga Jehovha yari khiyo: “Ganiolu ha gu dzumeya gu kawukwa, khu gu gimbiya nya tepo, ugo gu na velega gwathu mihandro nya gurule ni gululama.” (Vahebheru 12:11) Gu fana ni mihandro yi vbwetago tepo gasi gu vidzwa, anethu hi nga vbweta tepo gasi gu vbindrugedza mavbanyelo yathu tepo hi ningwago sihevbudzo khu Jehovha. Khu giyeyedzo, ha gu tshuka hi luza malungelo nyo khaguri libandlani, kha hi na nga bweleleya hwane khu kotani nya gu dziemiseyi hi gu nago nya gu vireye Nungungulu. Ga siemo nya nga esi hi nga tiyiswa khu malito ya Dhavhidhe ma gu khayo: “Likhulo laye [Nungungulu] kha li hweli guvbindra; makategwa yaye ma gu pindruga gikhati gyatshavbo, vbasilambotunu, gu manega gililo, vbadzimindrutunu, gu wuga gutsaka.” (Ndzimo 30:5) Ha gu haguleya likhalelo nya gu vireye hi bwe hi thumisa wusingalagadzi hi wu manago omu nya Lito la Nungungulu ni hengeledzano yaye, ‘tepo nyo tsakise’ yi na vboha.
Sa gu thula ginani gu dzi laya khu lisine?
18 Muthu a dusidwego libandlani yede gu gira silo nyo khaguri si yeyedzago gu khiso uye a dzi layide khu lisine. Uye yede gu hongola mitshanganoni tepo yatshavbo a bwe a engisa wusingalagadzi a ningidwego khu madhota, nya gu gombeye tepo yatshavbo ni gu hevbula Bhibhiliya. Nigu, uye yede gu gira satshavbo a si kodzago gasi gu potsa silo si nga mu girago a ghoha. Muthu a gu dzi garadzeya gu wusedza wupari waye ni Jehovha a nga tiyisega gu khuye Jehovha a nga mu divaleya nigu madhota ma nga mu phasa gambe gu wuyela libandlani. Tepo madhota ma zamago gu tugula gu muthu nyo khaguri dzi layide mwendro ne, ma yede gu pwisisa gu khayo siemo si hambanide, khu kharato ma yede gu potsa gu lamula khu ndziya nya mba yadi.
Kemba dzithomba nya liphuvbo
w06 15/5 paj. 19, par. 13
Tshamuselo nya libhuku la Ndzimo
31:23 — Muthu a dzi khusedzago a gu wuyedwa kharini? Wuyelo wu thudwago avba gu tsayiswa. Muthu nyo lulame a gu gira sihoso khu gu phazama a ngu wuyedwa khu gu kawukwa khu Jehovha. Ganiolu, muthu a dzi khusedzago a gu mba dzi laya khu silo nyo vivbe a giridego, a gu mana wuyelo waye khu gu tsayiswa. — Mavingu 11:31; 1 Pedro 4:18.
22-28 NYA ABRIL
DZITHOMBA NYA LITO LA NUNGUNGULU | NDZIMO 32–33
Khu ginani hi yedego gu ganeya sighoho sathu?
w93 15/3 paj. 9, par. 7
Wuwadi wa Jehovha wu ngu hi vbulugisa ha gu ba hi garadzega
7 Ha gu ba hiri ni nandru khu gu ba hi drangide milayo ya Jehovha, si nga hi garadzeya gu ganeya sighoho hi giridego, ambari kamo ga Jehovha. Ginani gi na giregago ga siemo nya nga esi? Omu ga ndzimo 32, Dhavhidhe ganede gu khuye: “Gikhati nyi nga degula, marambo yangu ma di banga, khu gudilela gwangu nya matshigu yatshavbo. Kholu wutshigu ni mihani mandza yago ma di nyi lemela, tshivba yangu yi di vbela khu guvbisa nya lihani.” (Mavhesi 3, 4) Khu gu ba Dhavhidhe a zamide gu siha gihoso gyaye si mu giride a lemeledwa khu livhalo a bwe a garadzega. Gu garadzega gwaye gu mu vbedzide tshivba nyo bwe a fana ni simbo wu nga banga. Khu lisine, isoso si kuhide gudzipwa gwaye nigu si mu bede litsako. A gu tshuka moyo wathu a manega ga giemo nya nga egi, ginani a yedego gu gira?
cl paj. 262, par. 8
Nungungulu ‘a dzi emisede gu divaleya’
8 Dhavhidhe a di khuye: “Nyi dawulede gwago [gihoso] gyangu. kha nya gu sihela guvbanya gwangu; . . . Uwe u di handza guvivba gwangu, u nyi divalela guvivba nya gighoho gyangu.” (Ndzimo 32:5) Lito gu “divalela” la gu tshamuseya mongo nya lito nya Gihebheru li gu khilo “gu khuga” mwendro “gu dzega.” Avba nya mongo wowu, wa gu tshamuseya gu dusa “nandru, gighoho ni guvivba.” Khu kharato, sa gu fana ni gu ba Jehovha a khugide a dzega sighoho sa Dhavhidhe a si dzudzuga hwindzo. Khu lisine, isoso si duside gu garadzega ogu Dhavhidhe a nga ba ari nago. (Ndzimo 32:3) Anethu hi nga tumba Nungungulu khu gu vbeleya, kholu uye a gu dzudzuga hwindzo sighoho sa vale va vbwetago gu divaledwa na dzi seketeya avba nya gukhodwa va gu nago khu dzegiso wa Jesu. — Matewu 20:28.
w01 1/6 paj. 30, par. 1
Gu ganeya sighoho sathu si ngu hi ninga gurula
Hwane nya gu ba Dhavhidhe a ganede gighoho gyaye, uye kha dzipwa na si phasi gilo. Malito a lovidego omu nya dzindzimo dzaye ma gu yeyedza gu khayo a pwide gurula nigu a di dzi emiseya gu thumeya Nungungulu waye khu gu tumbega. Khu giyeyedzo, wona ndzimo 32. Livhesi 1 lari khilo: “Kategide wule a divaledwago sighoho saye, wule [gihoso] gyaye gi futidwego.” Gani gighoho nya gikhongolo mwendro nya gidugwana muthu yoyo a giridego, a nga tsaka a gu dzi laya khu lisine. Uye a nga yeyedza gu khuye a dzi layide khu lisine, khu gu dzumeya wuyelo a wu manago khu kotani nya sighoho a giredego, nga edzi a giridego Dhavhidhe. (2 Samuweli 12:13) Uye kha zama gu dzi emeleya ga Jehovha ambari kamo gu ninga nandru vambe. Livhesi 5 lari khilo: “Nyi dawulede gwago [gihoso] gyangu. kha nya gu sihela guvbanya gwangu; eni nyi di ganela, kheni: ‘Nyi ngu hongola ga Pfhumu Nungungulu, nyi ya dawulela guvivba gwangu!’ Uwe u di handza guvivba gwangu, u nyi divalela guvivba nya gighoho gyangu.” Gu ganeya sighoho si ngu ninga gurula nigu oyu a ghohidego kha lemeledwe khu livhalo.
Kemba dzithomba nya liphuvbo
w06 15/5 paj. 20, par. 1
Tshamuselo nya libhuku la Ndzimo
33:6 — Ginani “liphuvbo” la kanani ga Jehovha? Liphuvbo lolo tshivba ya Nungungulu mwendro liphuvbo nya guage, a li thumisidego gasi gu vanga satshavbo si gu romo ndzadzini. (Genesi 1:1, 2) La gu ranwa gupwani liphuvbo la kanani kholu a ngu li rumeya gasi gu ya gira esi a si vbwetago nari khu hwindzo.
29 NYA ABRIL–5 NYA MAIO
DZITHOMBA NYA LITO LA NUNGUNGULU | NDZIMO 34–35
‘Nyi na rungudza Jehovha tepo yatshavbo’
w07 1/3 paj. 22, par. 11
Hongoleni hi dhumisa lina la Jehovha gumogo
11 “Nyi na rungudza Pfhumu Nungungulu gikhati gyatshavbo, Likana langu li na embelela wudhumo waye kala gupindruga.” (Ndzimo 34:1) Tepo Dhavhidhe a nga ba a thava, adzina garadzegide khedzi a nga hadzi gu dzi sayisa khidzo, ganiolu kha nga edzi ma yeyedzago khidzo malito yaya, uye a di gu ninga ngudzu lisima gu dhumisa Jehovha guvbindra esi a nga ba a si vbweta gasi gu dzi sayisa khiso. Dhavhidhe giyeyedzo nya gyadi gwathu tepo hi tshanganago ni sigaradzo. Gani hi womo xikwatuno, thumothuno, ni vandriyathu mwendro thumoni nyo tshumayele, gu dhumisa Jehovha gu yede gu khala nya lisima gwathu. Dundrugeya khu sighelo nya singi hi gu naso gasi gu gira isoso. Khu giyeyedzo, gu tugula ni gu dzi buza khu sivangwa nyo hlamadzise sa Jehovha, gu mwalo mahegiso. Nigu dundrugeya khesi uye a girago khu gu thumisa hengeledzano yaye mafuni. Jehovha a ngu thumisa vathu nyo tumbege ambari olu va nga mba vbeleya. Hi nga fananisa kharini mithumo ya Jehovha ni mithumo nya vathu nya litigo? Adzina u ngu seketeya malito ya Dhavhidhe ma gu khayo: “Vbakari nya vanungungulu vatshavbo mwalo a fananago ni uwe, Pfhumu; mwalo a kodzago gu gira mithumo uwe u yi girago.” — Ndzimo 86:8.
w07 1/3 paj. 22, par. 13
Hongoleni hi dhumisa lina la Jehovha gumogo
13 “Hefemulo wangu wu na dzi zundza khu Pfhumu Nungungulu, avo va dzi nogisago va napwa va nengela.” (Ndzimo 34:2) Dhavhidhe kha nga ba a dzi khusedza khesi a nga ba a gira. Khu giyeyedzo, uye kha dzi khusedza khu ndziya a nga yi thumisa gasi gu senga pfhumu ya Gati. Uye a di gu dziti gu khuye isoso si di kodzega khu gu ba Jehovha a mu vhikede ni gu mu vbulugisa tigoni ga Gati. (Mavingu 21:1) Khu ndziya yoyo, uye a di yisa wuzundzo watshavbo ga Jehovha. Khiso si nga gira vathu nya vadi va hidzimeya ga Jehovha. Khu ndziya nyo fane, Jesu a di gu zundza lina la Jehovha, nigu isoso si giride gu vathu nya gu dzi nogise ni gu dzi emiseya gu hevbula va hidzimeya ga Jehovha. Muhuno, vathu nya vadi va mayigoni gwatshavbo va ngu gira gipandre nya mabandla ma thangedwago khu Makristo nya gu todzwe nigu Jesu hungo nya mabandla yoyo. (Vakolosi 1:18) Vathu vava nya vadi, va ngu kuhwa myonyo khu gupwa lito la Nungungulu na li gu rungudzwa khu sithumi saye nyo tumbege ni gu pwisisa mahungu nya yadi nya Bhibhiliya khu gu phaswa khu liphuvbo nya guage la Nungungulu. — Johane 6:44; Mithumo 16:14.
w07 1/3 paj. 23, par. 15
Hongoleni hi dhumisa lina la Jehovha gumogo
15 “Nyi vbwetide Pfhumu Nungungulu, uye a nyi hathide; a nyi tshula guthavani gwangu gatshavbo.” (Ndzimo 34:4) Esi Dhavhidhe a tshanganidego naso si diri ni lisima gwaye. Khu kharato, uye a simamide gu ganeya gu khuye: “Gisiwana gi di lila, Pfhumu Nungungulu a gi yingisa, a gi vbulugisa sigaradzoni saye satshavbo.” (Ndzimo 34:6) Tepo hi tshanganago ni vandriyathu, hi na ni mathomo nya gu ganeye edzi Jehovha a hi phasago khidzo gu timiseya dziteponi nyo garadze. Isoso si ngu tiyisa gukhodwa ga vandriyathu, gu fana ni edzi malito ya Dhavhidhe ma tiyisidego khidzo gukhodwa ga vaphasedzeyi vaye. Vaphasedzeyi va Dhavhidhe ‘va di wona Jehovha va tala khu litsako, dzikhovbe dzawe gima kha dza khala dzitshoni.’ (Ndzimo 34:5) Ambari olu va nga ba va tutuma Pfhumu Sawule, avo kha va khala dzitshoni. Va di gu tumba gu khavo Nungungulu a diri ni Dhavhidhe nigu va di gu tsakide. Khu ndziya nyo fane, ava va pheyago gu tsakeya ni ava va gu Makristo khu tepo nyo laphe va ngu vbwetedzeya giphaso gya Jehovha. Kha nga olu va wonago giphaso gyaye, myonyo yawe yi ngu tala khu gu tsaka ni gu dzi emiseya gu simama na va tumbegide.
Kemba dzithomba nya liphuvbo
w06 15/5 paj. 20, par. 1
Tshamuselo nya libhuku la Ndzimo
35:19 — Khu ginani Dhavhidhe a nga lomba Jehovha gasi a si digi vale va mu nyenyago va ‘khwavbiya maho’? Gu khwavbiya maho si di gu thula gu khiso valala va Dhavhidhe va di gu tsaka khu gu wona makungo yawe nya gu mu wugeye na ma gu duguleya. Khu kharato, Dhavhidhe a di lomba gu khuye isoso si si giregi.