Mitshamuselo yi gomogo omu nya mabhuku ma khumbugidwego omu nya Gibhukwana nya mitshangano nya thumo ni mavbanyelo
© 2024 Watch Tower Bible and Tract Society of Pennsylvania
4-10 NYA NOVEMBRO
DZITHOMBA NYA LITO LA NUNGUNGULU NDZIMO 105
“Uye a ngu dundruga pwanano waye kala gupindruga”
Mukhedziseyi 04.23 paj. 28, dzipar. 11-12
Tiyisa gukhodwa gwago avba nya gitumbiso gya Jehovha gi ganeyago khu mafu nya maphya
11 Wona silo nyo khaguri esi Jehovha a tumbisedego vathu vaye gale si nga ba si wonega gu khatsi kha si na nga girega. Uye a di embeya Abrahama ni Sara gu khuye va di hadzi gu velega gyanana ga tanga va nga vari ga iyo. (Gen. 17:15-17) Embede gambe Abrahama gu khuye situgulwana saye si di hadzi gu vbanya Khanani. Khu myaga nya yingi, situgulwana sa Abrahama si diri dzigumbi Egipito. Khu kharato, gitumbiso gile Jehovha a embedego Abrahama gi di wonega gu khatsi gima kha gi na nga tadzisega. Ganiolu igyo gi tadzisegide. Khu gu landreya, Jehovha a ganede gu khuye Elizabheti a nga ba a dandride gu tanga a di hadzi gu velega gyanana. Jehovha a embede gambe Mariya gu khuye a di hadzi gu velega gyanana gyaye, a gu gitumbiso a ganedego thembweni ga Edheni likhumi mazana myaga hwane.— Gen. 3:15.
12 Tepo hi dundrugeyago khu satshavbo situmbiso esi Jehovha a si tadzisidego ni edzi a nga si tadzisa khidzo, ho pwisisa gu khethu Uye a na ni tshivba nya yikhongolo. Khu kharato, gukhodwa hi gu nago avbo nya gitumbiso gi ganeyago khu mafu nya maphya gu na engedzeya gu tiya. (Leri Josuwa 23:14; Isaya 55:10, 11.) Nigu isoso si na hi dongiseya gasi gu phasa vambe gu pwisisa gu khavo gitumbiso gi ganeyago khu mafu nya maphya khandri loro. Jehovha a ganede khu ndzadzi nya yiphya ni mafu nya maphya. Uye a di khuye: “Magana yaya ma tumbegide, gambe khya lisine.” — Gutu. 21:1, 5.
Perspicaz-2 paj. 563, par. 3
Lito
Sivangwa nyo vbanye ni esi si gu mba vbanya, si ngu engisa lito la Nungungulu, nigu a nga si thumisa gasi gu tadzisa makungo yaye. (Ndz 103:20; 148:8) Lito laye li ngu tumbega nigu esi Nungungulu a tumbisago a ngu dundruga gu si tadzisa. (Dhet 9:5; Ndz 105:42-45) Kha nga edzi a ganedego khidzo, lito laye li na “simama kala gupindruga,” nigu gima kha li na nga vbweleya nya mba tadzisa makungo yaye. — Isa 40:8; 55:10, 11; 1Pe 1:25.
Kemba dzithomba nya liphuvbo
Mukhedziseyi 1/11/86 paj. 19, par. 15
Esi vaphya va yedego gu gira gasi gu ndraga yawe yi pwanana ni gu tsaka
15 “Va [di manya] mawundru [ya Josefa] khu sikete, va mu hunga thamoni khu makhetshe, kala gutadzisega magana yaye, mahungu ya Pfhumu Nungungulu ma di mu linga.” (Ndzimo 105:17-19) Ndrani nya 13 myaga, Josefa tshanisidwe kha nga gumbi a bwe a khothedwa kala gi tadzisega gitumbiso gya Jehovha. Gu tshaniseka gwaye gu mu dongisede. Ambari olu Jehovha a nga ba a siri uye a nga vangeya sigaradzo Josefa, uye a si dzumelede khu gighelo nyo khaguri. Ina Josefa a di hadzi gu simama gu tumba “mahungu ya Pfhumu Nungungulu,” ambari olu a nga ba a emisana ni sigaradzo? Ina a di hadzi gu tiyisa makhalelo yaye nya yadi a bwe a haguleya gu laphisa-monyo, gu dzi nogisa, gu vidzwa khu liphuvboni ni gu dzi emiseya gu gira thumo nyo garadze? Khu lisine Josefa, a di duga kha nga oru yi thedwego niloni gasi gu mburisedwa, ganiolu uye dugide na agide ngudzu nigu nari ni lisima ngudzu ga Nungungulu a bwe a mu thumisa khu ndziya nyo hlamadzise. — Genesi 41:14, 38-41, 46; 42:6, 9.
11-17 NYA NOVEMBRO
DZITHOMBA NYA LITO LA NUNGUNGULU NDZIMO 106
“Avo va di divala Nungungulu, Muvbanyisi wawe”
Mukhedziseyi 07.18 paj. 20, par. 13
“Khu mani a emago ni Jehovha?”
13 Vaisrayeli va di gu thava khu kotani nya edzi Nungungulu a yeyedzidego khidzo tshivba yaye, khu kharato Mosi a di hongola Gigomoni gya Sinayi a ya va ganeleya ga Jehovha. (Ekiso. 20:18-21) Ganiolu gu di vbindra tepo, Mosi na a si gu wuyi. So wonega nga khatshi vathu va di gu khade giwulani nya mba na muthangeyi. Ginani va nga hadzi gira? Adzina vaIsrayeli va di gu tumba ngudzu wuthangeyi nya muthu, a gu Mosi. Avo va di garadzega ngudzu va embeya Aroni khavo: “Hi wumbele vanungungulu va na gu hi thangelago mbeli, kholu Mosi a gu uye a hi dusidego khu tigoni ga Egipito, kha hi dziti gukhethu ginani gi mu manego.” — Ekiso. 32:1, 2.
Kemba dzithomba nya liphuvbo
Mukhedziseyi 15/7/06 paj. 13, par. 9
Tshamuselo nya libhuku nya wuraru ni owu nya 4 la Dzindzimo
106:36, 37. Mavhesi yaya ma gu pwananisa gu khozeya sifananiso ni gu gireya miphaso madhemoni. Isoso so thula gu khiso muthu a khozeyago sifananiso a nga kutsedzedwa khu madhemoni. Bhibhiliya ya gu hi gengedza gu khiyo: “Dzi woneyeni ni sifananiso.”— 1 Johane 5:21.
18-24 NYA NOVEMBRO
DZITHOMBA NYA LITO LA NUNGUNGULU NDZIMO 107–108
“Rungudzani Pfhumu Nungungulu kholu khwadi”
Mukhedziseyi 15/4/07 paj. 20, par. 2
Libandla la gu dhumisa Jehovha
2 Libandla khandri tsawa nya vathu va pwananago basi. Khandri tsawa wu khalago ga gipandre nyo khaguri, wu manidego sihevbudzo nyo fane, wu golago gu gira silo sasimweso, wu tshanganago. Wulangani nya isoso, makungo nya gu pheye nya libandla gu dhumisa Jehovha. Gukhugeya gale, sa gu girega khu ndziya yeyi kha nga li tshingisago libhuku la Ndzimo. Omu ga Ndzimo 35:18 ha gu leri gu khethu: “Nyi na gu bonga vbakari nya tshangano nya wukhongolo, nyi na gu rungudza vbakari nya vathu nya vangi.” Nigu Ndzimo 107:31, 32 ya gu hi gengedza gu khiyo: “Rungudzani Pfhumu Nungungulu khu lihaladzo laye, khu mithumo nya gusamadzise a girelago vathu! A na kulungedwe tshanganoni nya vathu.”
Mukhedziseyi 15/1/15 paj. 9, par. 4
Bonga Jehovha u bwe u kategiswa
4 Gasi gu haguleya ni gu simama ni monyo nyo bonge, hi yede gu tugula makategwa hi ma hakhidego ga Jehovha ni gu dundrugeya khayo, ni gu dundrugeya edzi a hi yeyedzago khidzo wuwadi mwendro lihaladzo laye nyo tumbege. Tepo Muembi nya dzindzimo a nga gira isoso, uye a di hlamadziswa khu silo nya singi nyo mbure Jehovha a giridego. — Leri Ndzimo 40:5; 107:43.
Kemba dzithomba nya liphuvbo
Perspicaz-2 paj. 396, par. 3
Mowabhi
Khu gu gimbiya nya tepo, tepo Dhavhidhe a nga ba a fuma, Israyeli ni Mowabhi va di gu dwana. Vamowabhi va di gurumedzwa gu livba khupo ga Dhavhidhe. So wonegisa gu khatshi, gu hegisani nya nyimbi, va di songwa Vamowabhi va nga ba va enedza dzingodzi dzimbili. Adzina saye Dhavhidhe a di va ruma gasi gu lala vbavbatshi, khu kharato a va pima gasi guti ava va enedzago dzingodzi dzimbili va nga ba va yede gu songwa ni gu pima vambe va nga ba va yedwe gu vbanya. (2Sa 8:2, 11, 12; 1Dzik 18:2, 11) Adzina saye khiyo tepo yayimweyo Bhenaya, gyanana gya Joyadha a nga “songa . . . sanana sivili sa Ariyeli wa Mowabhi.” (2Sa 23:20, Tradução do Novo Mundo; 1Dzik 11:22) Khu gu ba Dhavhidhe a pade Vamowabhi gu di tadzisega malito nya giprofeto ya Bhalahama, ma profetidwego guvbindra 400 myaga hwane, ma gu khayo: “Gu na duga nyeledzi khavbo ga Jakobe ni ndronga nya wufumu khavbo ga Israyeli. Yi na khungumula mihungo ya va na Mowabhi, yi mbembisa sanana satshavbo sa Seti.” (Mit 24:17) Sa gu wonega gu khatshi, gu diri khu kotani nya gu pale gogu gu nga gira muembi nya dzindzimo a ganeya gu khuye Nungungulu a gu wona Vamowabhi kha nga ‘gyombo a hambelago umo.’ — Ndz 60:8; 108:9.
25 NYA NOVEMBRO–1 NYA DEZEMBRO
DZITHOMBA NYA LITO LA NUNGUNGULU NDZIMO 109–112
Seketeya Jesu, Pfhumu yathu!
Mukhedziseyi 1/9/06 paj. 3, par. 6
Tshamuselo nya libhuku nya wu 5 la Dzindzimo
110:1, 2 — Ginani egi “[mune wa Dhavhidhe], Jesu Kristo, a nga ba a gira tepo a nga ba a romo nyamudye ga Nungungulu? Hwane nya gu ba a wusidwe khu gufani, a di hongola ndzadzini a bwe a vireya khu nyamudye ga Nungungulu kala a pheya gu fuma khu 1914. Ndrani nya tepo yoyo, Jesu a di gu fuma valandreyi vaye vatodzidwego, a va thangeya avba nya thumo nyo tshumayele ni gu gira vapizane ni gu va dongiseya gambe gasi va fuma naye Mufumoni gwaye. — Matewu 24:14; 28:18-20; Luka 22:28-30.
Mukhedziseyi 1/4/00 paj. 18, par. 3
Avo va dwanago ni Nungungulu kha va na nga pindruga!
3 Vathu va Jehovha va ngu wugedwa gukhugeya lizana myaga nya wu 20. Ga mayigo nya mangi, vathu nya gu vivbedwe khu monyo va gu vbwetedzeya dzindziya nya gu himbedzeye gu tshumayedwa nya mahungu nya yadi nya Mufumo wa Nungungulu. Avo va gu kutsedzedwa khu nala wathu nya khongolo, Dhiyabhulosi, a “dzuwulugeya[go] kha nga ngala yi ngurangurago na yi gu vbweta muthu nya gu mu hodze.” (1 Pedro 5:8) Gu hegisani nya “tepo yi nga vegiswa ya vanyamayigo” khu 1914, Nungungulu a di emisa Gyanana gyaye kha nga Pfhumu nya yiphya nya Mafu a bwe a gi ninga gileletelo nya gu ‘fume vbakari nya valala vagyo.’ (Luka 21:24; Ndzimo 110:2) Khu gu thumisa tshivba yaye, Kristo a di tutumisa Sathane a bwe a si mu dzumeleyi gu bweleya ndzadzini. Kha nga olu a dzitigo gu khuye a tshaledwe khu tepo nya yidugwana, Dhiyabhulosi a gu tshikuleya Makristo ma todzidwego ni ava va va phasedzeyago. (Gutuledwa 12:9, 17) I wuyelo muni va wu manidego vale va dwanago ni Nungungulu?
Beneficie-se paj. 76, par. 2
Simama gu dandra!
Gasi hi thumisa makodzelo hi gu nawo, hi yede gu gira gilogyo. Ina u ngu dzi garadza gasi gu thuma ni vambe thumoni nyo tshumayele? Ina u ngu vbwetedzeya mathomo gasi gu phasa ava va ngarigo guta libandlani gwago, vaphya ni ava va dwalago? Ina u ngu phasedzeya gu agisa Salawu nya Mufumo mwendro gu phasedzeya omu nya dzikongresu ni dziasembleya? Ina dzimbe dzitepo u ngu si kodza gu thuma kha nga piyoneru nyo phasedzeye khu gitepwana? Ina u na ni makodzelo nyo thume kha nga piyoneru nya tepo yatshavbo mwendro gu thuma omu nya libandla nyo khaguri li vbwetago giphaso? Ina u ngu dzi garadzeya gasi gu landrisa sileletelo nya Bhibhiliya gasi u dinganedwa khu gu khala muphasedzeyi nya libandla mwendro lidhota? Gu dzi ningedzeya gwago gasi gu phasedzeya ni gu dzumeya mithumo, sa gu yeyedza gu khiso wa gu dandra khu liphuvboni. — Ndzi. 110:3.
Kemba dzithomba nya liphuvbo
Perspicaz-2 paj. 559, par. 4
Pwanano
Pwanano gasi gu khala Muprista guya khu magirelo ya Melikizedheki. Pwanano wowu wa gu tshamusedwa omu ga Ndzimo 110:4, nigu mulovi nya libhuku la Vahebheru a gu wu thumisa ga Kristo omu ga Vahebheru 7:1-3, 15-17. I pwanano wu nga girwa basi khu Jehovha ni Jesu Kristo. So wonegisa gu khiso, Jesu a di gu ganeya khuye tepo a nga gira pwanano ni valandreyi vaye maningano ni Mufumo. (Lu 22:29) Guya khu gisambanyo gya Jehovha, Jesu Kristo, Gyanana gya Nungungulu wa ndzadzini, a di hadzi gu khala muprista guya khu magirelo ya Melikizedheki. Melikizedheki a diri Pfhumu ni muprista wa Nungungulu omu mafuni. Jesu Kristo a di hadzi gu khala Pfhumu ni gu thuma kha nga Muprista nya Khongolo ndzadzini nasiri mafuni. Uye a di ningwa mithumo yeyi gasi gu yi gira kala gupindruga, hwane nya gu ba a hongode ndzadzini. (Heb 6:20; 7:26, 28; 8:1) Pwanano wowu, wu na simama kala gupindruga, kholu Jesu a na gira satshavbo kha nga Pfhumu ni Muprista nya khongolo kala gupindruga na thangedwa khu Jehovha. — Heb 7:3.
2-8 NYA DEZEMBRO
DZITHOMBA NYA LITO LA NUNGUNGULU NDZIMO 113–118
Hi nga mu bonga kharini Jehovha?
Mukhedziseyi 1/1/01 paj. 11, par. 13
Vbahwa khu lihaladzo
13 Malito ya Jesu ma gu yeyedza gu khayo gupheya hi yede gu haladza Jehovha. Ganiolu, kha ha velegwa na hi gu haladza Jehovha khu gu vbeleya. Egi gilo hi yedego gu gi haguleya. Tepo hi nga pheya gu hevbula khu Jehovha, ethu hi di drindrwa gupima khesi hi nga sipwa. Vbadugwana-vbadugwana, hi di hevbula edzi a dongisedego khidzo mafu gasi gu ma ningeya vathu. (Genesi 2:5-23) Hi hevbude edzi a emisanago khidzo ni vathu, khu gu mba hi tsukula tepo gighoho gi nga beya vbakari nya ndranga nya vathu, ganiolu a gira malulamiselo gasi gu hi tshudzisa. (Genesi 3:1-5, 15) Uye a di phara gwadi ava va nga ba va tumbegide, nigu khu gu hegisa a di ningeya Gyanana gyaye gyagimwegyo gasi gu hi divaledwa sighoho sathu. (Johane 3:16, 36) Guti silo sesi, si hi phaside gu engedzeya gu bonga Jehovha. (Isaya 25:1) Pfhumu Dhavhidhe a di ganeya gu khuye a di gu haladza Jehovha kholu a nga ba a mu haladza ngudzu. (Ndzimo 116:1-9) Muhuno, Jehovha a ngu hi khathaleya, a ngu hi thangeya ni gu hi tiyisa. Tepo hi simamago gu hevbula khuye, lihaladzo lathu la gu engedzeya gu dandra. — Ndzimo 31:23; Sofoniya 3:17; Varoma 8:28.
Mukhedziseyi 15/7/09 paj. 29, dzipar. 4-5
Bonga khu gu hakha — Ninga khu monyo wago watshavbo
Muembi nya dzindzimo a di wudzisa gu khuye: “Nyi na bongisa guwani Pfhumu Nungungulu, khu wuwadi watshavbo a nyi giredego?” (Ndzi. 116:12) I wuyelo muni a nga ba a wu hakhide? Jehovha a mu khathalede tepo a nga ba a “thava ni gu tshaniseka,” nigu a mu vbulugiside gufa. Olu, muembi nya dzindzimo a di gu vbweta ‘gu livba’ Jehovha khu ndziya nyo khaguri. Ginani a hungidego gu gira? Uye a di khuye: “Nyi na landrisa sisambanyo nyi giridego ga Pfhumu Nungungulu.” (Ndzi. 116:3, 4, 8, 10-14) Uye a di hunga gu tadzisa situmbiso a giridego ga Jehovha ni gu gira yatshavbo mithumo.
U nga gira sasimweso. Khu ndziya muni? Khu gu tepo yatshavbo u vbanya khu milayo ni matshina nya milayo ya Nungungulu. Khu kharato, tiyisega gu khuwe gu khozeya Jehovha gilo nya lisima womini gwago u bwe u dzumeleya liphuvbo nya guage la Nungungulu li thangeya satshavbo u girago. (Muh. 12:13; Gal. 5:16-18) Lisine gu, gima kha wu na nga si kodza gu livba satshavbo esi Jehovha a gu giredego. Ambari ulolo, si ngu ‘tsakisa monyo wa Jehovha’ tepo a wonago gu khuye wa gu gira satshavbo u si kodzago thumoni gwaye. (Mav. 27:11) Lithomo nya likhongolo ngudzu gu tsakisa Jehovha khu ndziya yeyi!
Mukhedziseyi 11.19 dzipaj. 22-23, dzipar. 9-11
Sihevbudzo hi si manago omu nya libhuku la Levhi
9 Gihevbudzo nya wuvili: Ha gu thumeya Jehovha kholu hi ngu mu bonga. Gasi gu tshingisa gwadi isoso, hongoleni hi bhula khu muphaso nya guvbiswe, a gu gimbe gilo gi nga ba giri ni lisima ngudzu avba nya wukhozeyi nya lisine teponi ya vaIsrayeli. Avba nya libhuku la Levhi ha gu hevbula gu khethu vaIsrayeli va di gu ningeya muphaso nya gu vbiswe kha nga “gubonga.” (Levhi 7:11-13, 16-18) Uye a di gu ningeya muphaso wowu khu gu dzina, nasiri khu gurumedzwa. Khu kharato, uye a di gu gira isoso khu kotani nya olu a nga ba a haladza Nungungulu waye Jehovha. Oyu a nga ba a ningeya muphaso, ndranga yaye gumogo ni muphasi nya mhamba va di gu hodza nyama nya girengo gi phasedwego. Ganiolu sipandre nyo khaguri nya girengo si di gu lumba basi Jehovha. Khu sevbini sipandre sakona?
10 Gihevbudzo nya wuraru: Khu lihaladzo, ha gu ninga Jehovha silo sathu nya sadi ga satshavbo. Jehovha a di gu wona mafura kha nga gipandre nya gyadi ga satshavbo avba nya girengo. Nigu a di gu khuye sipandre nyo khaguri nya girengo nya nga dzitshwa, si diri ni lisima ngudzu. (Leri Levhi 3:6, 12, 14-16.) Khu kharato Jehovha a di gu tsaka a gu tshuka muIsrayeli a ningeya sipandre soso nya lisima ni mafura khu gudzina gwaye. Vaisrayeli va nga ba va ningeya sipandre soso ga Jehovha va di gu yeyedza gu khavo va di gu vbweta gu mu ninga silo sawe nya sadi ga satshavbo. Khu ndziya nyo fane, Jesu nuye ningide Jehovha silo saye nya sadi ga satshavbo khu gu Mu thumeya khu monyo watshavbo ni lihaladzo. (Joh. 14:31) Jesu a di gu tsaka ngudzu khu gu gira gugola ga Nungungulu, a di gu wu gola ngudzu nayo wa Nungungulu. (Ndzi. 40:8) Jehovha a di gu tsaka ngudzu tepo a nga ba a wona Jesu na gu mu thumeya khu monyo watshavbo!
11 Gufana ni miphaso yoyo nya guvbiswe, thumo wathu ga Jehovha giyeyedzo nya edzi hi dzipwago khidzo khuye. Ha gu ninga Jehovha silo sathu nya sadi ga satshavbo nigu ha gu gira isoso kholu hi ngu mu haladza. Jehovha a ngu tsaka ngudzu tepo a wonago dzimiliyoni nya sithumi saye na si gu mu thumeya khu lihaladzo si bwe si gola dzindziya dzaye! Si ngu thaveleya guti gu khethu Jehovha a ngu si wona ni gu ninga lisima esi hi si girago ni egi gi hi girago hi gira silo soso. Khu giyeyedzo wa gu ba u dandride khu tanga khavbovbo u si kodzi gambe gu thuma nga edzi u nga ba u dogoreya khidzo, tiyisega gu khuwe Jehovha a ngu si pwisisa. Si nga gira u dzipwa khatshi kha wu ngo kodza gu gireya nya singi Jehovha, ganiolu Jehovha a ngu li wona lihaladzo li gu kutsago gu gira esi u si kodzago. Uye a ngu tsaka khu gu hakha esi nya sadi u si kodzago gu gira.
Kemba dzithomba nya liphuvbo
Mukhedziseyi 15/5/12 paj. 22, dzipar. 1-2
Siwudziso si girwago khu valeri
Muembi moyo nya dzindzimo a di lova gu khuye: “Gu na ni lisima mahoni ga Pfhumu Nungungulu gufa ga sihathwa saye.” (Ndzi. 116:15) Womi nya sithumi satshavbo sa Jehovha wu na ni lisima gwaye. Ganiolu, malito ma khumbugwago omu ga Ndzimo 116 kha ma thuli basi gufa nya muthu moyo.
Tepo yi vegwago ganelo nya malilo, kha si vbwetegi gu thumisa Ndzimo 116:15 ga ndriyathu yoyo a fudego, ambari na fude na tumbegide. Khu ginani? Kholu malito ya muembi nya dzindzimo ma na ni tshamuselo nyo ete. Isoso so thula gu khiso Nungungulu a ngupwa ngudzu gu luza tepo satshavbo sithumi saye nyo tumbege si fago. — Wona Ndzimo 72:14; 116:8.
9-15 NYA DEZEMBRO
DZITHOMBA NYA LITO LA NUNGUNGULU NDZIMO 119:1-56
“Muphya a nga simama kharini na agide?”
Mukhedziseyi 1/11/87 paj. 18, par. 10
Ina u ngu simama guaga khu dzindziya dzatshavbo?
10 Omu ga Vaefeso 5:5, Pawulo a di hi gengedza gu khuye: “Enu mu ngu dziti nigu mu ngu pwisisa gwadi gu khenu ni wevbini a girago wubhayi, a gu na ni mavbanyelo nyo nyenyeze ni wudogodogo si thulago gu khozeya sifananiso kha na nga mana thomba nya Mufumo wa Kristo ni Nungungulu.” Ambari ulolo, vathu nya vangi, myaga yatshavbo va ngu kawukwa ni gu duswa libandlani khu gu gira wubhayi — ‘va nyenyezisa givili gyawe.’ (1 Vakorinto 6:18) Dzitepo nya dzingi, isoso sa gu girega kholu muthu yoyo a gu mba ‘vegisa mahungu ya Nungungulu.’ (Ndzimo 119:9) Khu giyeyedzo, vandriyathu nya vangi va ngu huniseya mahungu ya Nungungulu ma ganeyago khu mavbanyelo tepo va dugago dziferiya. Avo va gu diga gu gira wupari ni Makristo khwathu, va gira wupari ni vale va gu siri Dzifakazi dza Jehovha. Na va gu ganeya gu khavo ‘avo vathu nya vadi,’ Makristo nyo khaguri ma di dzi pata navo ga mithumo nya mba handzega. Nigu vambe va giride wupari wa vbafuvbi ni sithumi khwathu. Lidhota nyo khaguri li diri ni wupari wa vbafuvbi ni githumi gyaye nya nyamayi nyo bwe li diga ndranga yalo li ya khala nagyo. Kha nga handro wakone, li di duswa libandlani. Bhibhiliya ya gu ganeya lisine tepo yi ganeyago gu khiyo: “Dzipari nyo vivbe dzi ngu vivbisa mavbanyelo nya yadi.”— 1 Vakorinto 15:33.
Mukhedziseyi 15/6/06 paj. 25, par. 1
“Nyi ngu nengela ngudzu khu milayo yago”
JEHOVHA a gu ninga sigengedzo vathu vaye gasi gu va phasa gu emisana ni silingo dziteponi dzedzi nyo garadze. Muthu a nga mana sigengendzo soso tepo a lerigo Bhibhiliya ni tepo apwago mihlamulo ya vandriyathu mitshanganoni nya Wukristo. Silo nya singi hi lerigo mwendro hi sipwago ga siemo soso, khandri siphya gwathu, adzina saye hi si hevbude gale. Ganiolu, khu kotani nya olu hi gu na ni gu wegeleya nya gu divale silo, si na ni lisima gu khaleya gu dundruga makungo, milayo ni sileletelo sa Jehovha. Hi yede gu ninga lisima sigengedzo sa Nungungulu. Iso si ngu hi ninga tshivba, nigu si ngu hi phasa gu vega gupima avba nya sighelo si hi kutsago gu ninga githawo Nungungulu. Khu kharato, muembi nya dzindzimo a di emba ga Jehovha gu khuye: “Nyi ngu nengela ngudzu khu milayo yago.” — Ndzimo 119:24.
Mukhedziseyi 15/4/10 paj. 20, par. 2
Ndreyisa maho yago ga silo si si phasigo
2 Ganiolu, esi hi si wonago si nga hi vangeya sigaradzo. Gu pwanana gu gomogo avba nya maho ni mapimo gukhongolo ngudzu, nigu esi hi si wonago si nga engedzeya gudogoreya hi gu nago monyoni. Ha gu vbanya ga litigo nyo vivbe, li tadego khu vathu va golago gu dzi tsakisa nigu li fumwago khu Sathane Dhiyabhulosi. Khu kharato, hi randredwe khu vathu va swayelago dzifotu ni dzinotisiya dzi nga hi girago hi diga gu gira esi nya sadi ambari ha gu dzi wona khavba ni avba. (1 Joh. 5:19) Kha si hlamadzise khu gu ba muembi nya dzindzimo a lombide Nungungulu gu khuye: “Ndreyisa maho yangu gasi nyi si woni silo si si phasigo, nyi tiyise ndzilani gwago.” — Ndzi. 119:37.
Kemba dzithomba nya liphuvbo
Mukhedziseyi 15/4/05 paj. 10, par. 2
Tumba Lito la Jehovha, Bhibhiliya
2 Hungo nya mahungu nya libhuku la Ndzimo 119 lisima nya lito la Nungungulu mwendro mahungu yaye. Mulovi, a di lova 176 mavhesi nya ndzimo yeyi khu dziletra dzi landrago alfabeto nya Gihebheru, adzina saye nari ni makungo nya gu vbevbugiseye vathu gu ma vegisa hungoni. Omu nya Gihebheru nya gupheye, mweyo ni mweyo nya 22 dziestrofi dzi na ni 8 dzilinya dzi pheyago khu letra nyo fane. Ndzimo yeyi, ya gu thula Nungungulu, lito laye, nayo, sigengedzo, mavbanyelo, sileletelo, gu lamula gwaye ni mahungu yaye. Avba nya ndrima yeyi ni eyi yi landreyago, hi na bhula khu Ndzimo 119 yi dzi seketeyago avba nya wuvbindrugedzeyi nya Bhibhiliya nya Gihebheru. Gu dundrugeya khesi si giregidego gale si nga pata sithumi sa Jehovha gale ni muhuno, si na engedzeya gubonga gwathu avba nya ndzimo yeyi yi lovidwego ni Lito la Nungungulu, Bhibhiliya.
16-22 NYA DEZEMBRO
DZITHOMBA NYA LITO LA NUNGUNGULU NDZIMO 119:57-120
U nga timiseya kharini sigaradzo?
Mukhedziseyi 15/6/06 paj. 20, par. 2
“Idzo nyi wu golago khidzo nayo wago!”
2 Adzina u nga dzi wudzisa gu khuwe: “Nayo wa Nungungulu wu di gu thaveleya kharini muembi nya dzindzimo?” Egi gi nga ba gi mu tiyisa gutumba a nga ba ari nago khu lihaladzo la Jehovha. Guti malulamiselo nya nayo si di gu tsakisa muembi nya dzindzimo ambari olu a nga ba a tshaniseka khu gu wugedwa. Uye a di gu dziti gu khuye Jehovha a di gu mu yeyedzide wuwadi. Gu diga isoso, gu landra nayo wa Nungungulu gu giride muembi nya dzindzimo a manega ni guti guvbindra valala vaye ni gu bwe a vbulugisa womi waye. Gu engisa nayo gu di gu mu ninga gurula ni livhalo li agidego. — Ndzimo 119:1, 9, 65, 93, 98, 165.
Mukhedziseyi 1/12/00 paj. 14, par. 3
Ina u ngu gola sigengedzo sa Jehovha?
3 Muembi nya dzindzimo a di gu ninga ngudzu lisima sigengedzo sa Nungungulu khu gu khuye: “Nyi ngu vbiredza [nigu] kha nyi hweli, gu landrisa sileletelo sago. Va nya guvivba va nyi randrede ni mazinga yawe, aholu, eni gima kha nyi na divala nayo wago.” (Ndzimo 119:60, 61) Sigengedzo sa Jehovha si ngu hi phasa gu timiseya gu wugedwa, kholu hi ngu tumba gu khethu Papayi wathu wa dzandzini a na ni makodzelo nya gu piye dzingodzi dzi thumiswago khu valala vathu gasi gu hi hunga. Ga tepo yakone, uye a na hi tshudzisa ga sigaradzo soso gasi gu tshumayela mahungu nya Mufumo. — Marko 13:10.
Mukhedziseyi 1/9/06 paj. 14, par. 4
Tshamuselo nya libhuku nya wu 5 la Dzindzimo
119:71 — Ginani gi tsakisago avba nya gu tshaniseke? Gu tshangana ni sigaradzo si nga hi phasa gu engedzeya gu tumba Jehovha, gu gombeya gwaye khu monyo wathu watshavbo, gu hevbula gwadi Bhibhiliya ni gu thumisa esi hi hevbulago. Gu diga isoso, esi hi girago tepo hi tshanganago ni sigaradzo si nga vega guagani mavbanyelo nyo khaguri hi yedego gu tshukwadzisa. Gutshaniseka kha gu na nga hi gira hi goroga ha gu dzumeleya gu khethu gu hi hevbudza.
Mukhedziseyi 07.17 paj. 13, dzipar. 3, 5
‘Liyani ni ava va liyago’
3 Jehovha gifefe nya wuthavelo watshavbo avbo gwathu. (Leri 2 Vakorinto 1:3, 4.) Uye a ngu pwisisa gwadi edzi hi dzipwago khidzo. Jehovha a gu hi tumbisa gu khuye: “Eni kheni kamwe nyi na gu mi tangadzisago.”— Isaya 51:12; Ndzimo 119:50, 52, 76.
5 Kha hi yeli gu kanakana gu khethu Jehovha tepo yatshavbo a dzi emisede gu hi phasa. Khu kharato, hi yede gu dzipwa na hi tshulegide gu mu embeya esi si gomogo monyoni gwathu ni edzi hi dzipwago khidzo. Jehovha a ngu pwisisa gudzipwa gwathu nigu a ngu hi ninga wuthavelo hi wu vbwetago. Ganiolu, Jehovha a gu hi thaveleya kharini?
Kemba dzithomba nya liphuvbo
Mukhedziseyi 1/9/06 paj. 14, par. 5
Tshamuselo nya libhuku nya wu 5 la Dzindzimo
119:96, Tradução do novo mundo — Malito ma gu khayo “guvbeleya gwatshavbo gu na ni mahegiso” ma gu thula ginani? Muembi nya dzindzimo a di gu ganeya khu gu vbeleya guya khu mawonelo nya vathu. So wonega gu khatshi uye a di gu dziti gu khuye mawonelo nya muthu maningano ni guvbeleya, gu di gu hegedwa. Gu hambana ni isoso, milayo yaye yi mwalo gu hegedwa. Sileletelo saye si ngu thuma ga siemo satshavbo womini gwathu. Nova Versão Internacional wa gu ganeya gu khuwo: “Nyi ngu dziti gu kheni gu vbeleya gwatshavbo gu ngu hegedwa, ganiolu gu mwalo gu hegedwa avba nya nayo wago.”
23-29 NYA DEZEMBRO
DZITHOMBA NYA LITO LA NUNGUNGULU NDZIMO 119:121-176
U nga potsa kharini gu garadzega ngudzu?
Mukhedziseyi 06.18 paj. 16, dzipar. 5-6
Diga milayo ni matshina nya milayo ya Nungungulu ma thangeya livhalo lago
5 Ho ba hi vbweta gu phaswa khu milayo ya Nungungulu, hi yede gu gira simbe vbavbandze nyo yi leri mwendro gu yiti basi. Hi yede gu yi gola ni gu yi ninga githawo. Bhibhiliya yari khiyo: “Nyenyani guvivba, mu gola wuwadi.” (Amosi 5:15) Ganiolu hi nga si gira kharini isoso? Gu vbwetega gu hi hevbula gu wona silo khu ndziya eyi Jehovha a si wonago khiyo. Nga dundrugeya khesi: Dzi dundrugeye na wu si mani gwadi ligovbe, dhogodheya wago a gu ruma gu hodza guhodza nya gwadi, gu tiyisa mili, ni gu vbindrugedza silo nyo khaguri guvbanyani gwago. U landreya wusingalagadzi waye, si bwe si gu kata! Wa gu dzipwa kharini khu wusingalagadzi wa dhogodheya yoyo?
6 Khu ndziya nyo fane, Muvangi wathu a ngu hi ninga milayo gasi gu hi vikeya ga mihandro nyo vivbe nya gighoho ni gu tshukwadzisa womi wathu. Khu giyeyedzo, Bhibhiliya ya gu hi hevbudza gu khiyo kha hi yeli gu lipha, gu ndraga milayo, guba, gu gira wubhayi, gu manega ni maghilivindra mwendro gu gira ni gevbini gi gimbileyanago ni wudhemoni. (Leri Mavingu 6:16-19; Gutu. 21:8) Tepo hi wonago mihandro nya yadi nyo engise Jehovha, lihaladzo lathu khuye ni milayo yaye lo dandra.
Mukhedziseyi 15/4/93 paj. 17, par. 12
Vaphya, ginani mu gi ningago lisima?
12 Gu diga isoso, u na ba u yede gu nyenya ni gu potsa silo nyo vivbe. (Ndzimo 97:10) U nga nyenya kharini silo si girago gu khatshi si ngu tsakisa? Khu gu dundrugeya khu mihandro nya mba yadi u na yi manago. “Mu nga dzi sengi: Nungungulu khandri wa gu hagana khuye; esi muthu a yalago khiso a na vbwerago. Kholu uye a yalago khu nyama, a na vbwera gufuviswa.” (Vagalatiya 6:7, 8) Tepo u lingwago gu gira wubhayi, dundrugeya egi gi gu na ni lisima, a gu edzi Jehovha Nungungulu a na dzipwago khidzo. (Fananisa ni Ndzimo 78:41.) Dundruga gu khuwe u nga mana mimba mwendro madwali nya nga SIDHA. Dundruga edzi u na tshanisekago khidzo mwendro edzi si na kuhago khidzo womi wago watshavbo. Ndriyathu nya nyamayi a gu ganeya gu khuye: “Eni ni mwama wangu hi di gu hengede malawu ni vathu nya gu hambane na hi si tivani. Ambari olu hi gu Makristo, esi hi giridego gale si ngu hi gira hi pweyana lidiwo ndrani nya mutshadhu wathu.” Si na ni lisima gu dundruga gu khethu hi nga luza malungelo mwendro gu duswa libandlani. (1 Vakorinto 5:9-13) Ina gu dzi tsakisa nya gitepwana gu na ni lisima ngudzu?
Kemba dzithomba nya liphuvbo
Mukhedziseyi 01.23 paj. 2, par. 2
Tiyisega gu khuwe mahungu ya Nungungulu “lisine”
2 Kha nga sithumi sa Jehovha, ethu hi ngu khodwa gu khethu uye “Nungungulu nya lisine” nigu tepo yatshavbo uye a ngu hi suveya silo nya sadi. (Ndzi. 31:5; Isa. 48:17) Ethu hi ngu dziti gu khethu hi nga tumba esi hi lerigo umo nya Bhibhiliya kholu hi ngu khodwa gu khethu “mahungu [ya Nungungulu] ma tiyide ma na ni lisine.” (Leri Ndzimo 119:160.) Ethu hi ngu dzumeleyana ni esi gihevbuli gimwegyo nya Bhibhiliya gi lovidego, igyo gi lovide esi: “Gimwalo ni gilo gimwegyo egi Nungungulu a ganedego gi gu siri lisine mwendro gi na digago gu girega. Vathu va Nungungulu va nga khodwa esi uye a ganeyago kholu avo va ngu mu tumba.”
30 NYA DEZEMBRO –5 NYA JANEIRO
DZITHOMBA NYA LITO LA NUNGUNGULU NDZIMO 120–126
Va yade na va gu liya, ganiolu va vbweride na va gu tsakide
Mukhedziseyi 1/6/04 paj. 16, par. 10
Oyu a rungudzago Nungungulu a ngu kategiswa
10 Tepo hi rwalago pingo nya wupizane, ha gu dwana ni Sathane. Libhuku la Jakobe 4:7 la gu tumbisa gu khilo: “Wugeya[ni] Dhiyabhulosi, uye a na mi tutuma.” Kha si thuli gu khiso gu gira isoso si ngu vbevbuga. Hi yede gudzigaradza gasi gu thumeya Nungungulu. (Luka 13:24) Ganiolu, Bhibhiliya yi ngu gira gitumbiso gi gu romo omu ga Ndzimo 126:5 gi gu khigyo: “Avo va yalago na va gu lila, va na vbwera na va gu tsaka.” Khu lisine, kha hi khozeyi Nungungulu a gu mba yeyedza gubonga. Uye “a ngu tshatshazeya ava va mu vbwetedzeyago khu lisine,” nigu a ngu kategisa ava va mu rungudzago. — Vahebheru 11:6.
Mukhedziseyi 11.21 paj. 24, par. 17
Ina gukhodwa gwago gu na ba gu tiyide?
17 Ina wa gu tshaniseka khu kotani nya olu u fedwego khu muthu u mu golago? Dzi ninge tepo nya gu tiyise gukhodwa gwago avbo nya gutumba nya gu wuswe ga ava va fudego khu gu hevbula matimo nya Bhibhiliya ya ava va wusidwego khu gufani. Ina wa gu tshaniseka khu kotani nya olu givbango gimwegyo nya ndranga yago gi dusidwego libandlani? Hevbula gasi gu tiyisega gu khuye ndziya eyi Nungungulu a kawukago khiyo tepo yatshavbo khyadi. Ni gevbini gigaradzo u tshanganago nagyo, gi wone kha nga lithomo nyo tiyise gukhodwa gwago. Embeya Jehovha edzi u dzipwago khidzo, u nga khali wenga, ganiolu dzi tshanganise ni vandriyathu. (Mav. 18:1) Gira silo si na gu phasago gu timiseya, ambari sa gu lomba gu gira isoso na wu gu liya khu esi si gu dugeledego. (Ndzi. 126:5, 6) Simama gu hongola mitshanganoni, thumoni nyo tshumayele ni gu hevbula Bhibhiliya. Nigu, simama gu dundrugeya khu silo nyo tsakise esi Jehovha a tumbisago gu gu ninga mindru wa tshigu. Wa gu wona edzi Jehovha a gu phasago khidzo olu, gukhodwa gwago gu na engedzeya gu tiya.
Mukhedziseyi 15/7/01 dzipaj. 18-19, dzipar. 13-14
Simamani gu vbwera!
13 Sithumi sa Nungungulu si girago thumo nya gu vbwere, ngudzu-ngudzu esi si wugedwago, si ngu thaveledwa khu malito ma gomogo omu ga Ndzimo 126:5, 6 ma gu khayo: “Avo va yalago na va gu lila, va na vbwera na va gu tsaka. Va diya guyalatunu na va gu lila, olu va ngu wuya na va gu kulungela na va rwade situndru nya dzimbewu.” Malito ya muembi nya dzindzimo ma ganeyago khu gu yala ni gu vbwera, ma gu tshamuseya edzi Jehovha a khathaledego ni gu kategisa khidzo ava va nga wuya khu wugumbini wa Bhabhiloni wa gale. Avo va tsakide ngudzu khu gu ba va tshudzisidwe, ganiolu adzina va di gu lila tepo va nga ba va rinya dzimbewu omu nya mathembwe ma nga ba ma ri ni 70 myaga nya mba limwa. Ambari ulolo, vale va nga simama gu yala ni gu vbaha va manide mihandro nya yadi va bwe va tsaka khu thumo wawe.
14 Adzina hi nga liya tepo hi tshanganago ni silingo mwendro tepo vandriyathu va pharwago khu ndziya nya mba yadi. (1 Pedro 3:14) Gupheyani, thumo wathu nya gu vbwere wu nga garadza, kholu si nga gira gu khatshi gudzigaradza hi gu girago thumoni nyo tshumayele kha wu ningi mihandro. Ganiolu, ha gu simama gu yala ni gu thedzeya mati, Nungungulu a na si gira si dandra ngudzu guvbindra esi hi nga ba hi si dundrugeya. (1 Vakorinto 3:6) Isoso si ngu wonega khu mihandro yi manegago khu gu kabanisedwa nya Dzibhibhiliya ni mabhuku ma seketedwago khu Bhibhiliya.
Kemba dzithomba nya liphuvbo
Achegue-se a Jeová paj. 73, par. 15
Tshivba nya wuvhikeli — “Nungungulu wuthavelo wathu”
15 Gupheya, wona edzi a hi vhikeyago khidzo. Ethu sithumi sa Jehovha, hi nga tiyisega gu khethu a na hi vhikeya kha nga tsawa. Wulangani nya isoso, si di hadzi gu vbevbugeya Sathane gu hi mola. Dundrugeya khesi: Sathane, “pfhumu nya litigo leli,” a di hadzi gu tsaka khu gu fuvisa wukhozeyi nya lisine. (Johane 12:31; Gutuledwa 12:17) Vafumeli nyo khaguri nya tshivba, va di zama gu himbedzeya thumo wathu nyo tshumayele va bwe va zama gu hi fuvisa. Ambari ulolo, vathu va Jehovha va gu simama na va tiyide, nigu va gu simama gu tshumayela nya mba ema. Khu ginani dzipfhumu dzedzi dzi nga mba kodza gu emisa thumo nya tsawa wowu nya Makristo nya wudugwana, wu girago gu khatshi wu mwalo muvhikeyi? Kholu Jehovha, khu ndziya nyo fananisi a gu hi vhikeya khu mambapi yaye nya tshivba. — Ndzimo 17:7, 8.