SIWUDZISO SI GIRWAGO KHU VAPHYA
Nyi nga potsa kharini gu pimisa silo nya mba sadi?
Wa gu dzi wona nga muthu nyo khale kharini?
Gu khaleya gu wona silo khu ndziya nya yadi
“Nya gu zama gu tsaka ni gutshulega khavba nyi si kodzago khavbo. Eni nya gu zama gu hega ni gu tsaka matshigu yatshavbo.” — Valerie.
Gu khaleya gu wona silo khu ndziya nya mba yadi
“Tepo gi giregago gilo nya gyadi, eni nyo dzegeya gu pimisa gu kheni khandri lisine.” — Rebecca.
Gu wona edzi silo si gu idzo khidzo
“Wa gu khaleya gu wona silo khu ndziya nya yadi, u na vbeya tshivba silo sa gu mba dugeleya gwadi, nigu wa gu khaleya gu wona silo khu ndziya nya mba yadi kha wu na nga tsaka. Esi si nyi phasago gu wona silo edzi si gu idzo khidzo.” — Anna.
Khu ginani isoso si gu na ni lisima
Bhibhiliya yari khiyo: “Monyo wu tengidego, matshigu yatshavbo khya buzo.” (Mavingu 15:15) Khu lisine, vathu va potsago gu pimisa khu ndziya nya mba yadi tepo yatshavbo ni gu wona womi khu ndziya nya yadi va ngu tsaka. Avo gambe va ngu si kodza gu gira dzipari nya dzingi. Tepo muthu nyo khaguri a golago gu pimisa khu ndziya nya mba yadi tepo yatshavbo, vathu nya vangi kha va goli gu khala naye.
Ambari muthu a khaleyago gu wona silo khu ndziya nya yadi, somo silo a na tshanganago naso a yedego gu emisana naso. Khu giyeyedzo:
Omu nya mahungu ya tshigu ni tshigu u napwa na gu ganedwa khu nyimbi, wuwugeyi ni wughevenga.
Adzina saye u na emisana ni sigaradzo ndrangani gwago.
Nya mba kanakana, u yede gu emisana ni gu mba vbeleya gwago.
Adzina pari yago yi nga gu khunguvanyisa.
Wulangani nya gu vete khu magata sigaradzo sago mwendro gu si khedza basi, zama gu emisana naso. Gu wona silo edzi si gu idzo khidzo, si na gu phasa gu mba pimisa silo nya mba sadi ni gu dzumeya edzi womi wu gu idzo nya mba vbedzwa tshivba khiso.
U nga timiseya singulo nya womi mwendro sigaradzo, na wu gu tiyisega gu khuwe lihani li na duga nya mba hweya
Ginani u nga girago?
Wona gu mba vbeleya gwago khu gu dinganiseya.
Bhibhiliya yari khiyo: “Mafuni momu, mwalo muthu nya gululame, a thumago basi iso nya sadi nyamba ghoha.” (Muhevbudzi 7:20, Bhibhiliya khu lidimi la muhuno) Khu gu ba u phazama mwendro gu hosisa so yeyedza gu khiso u muthu, ganiolu kha si thuli gu khiso kha wu phasi gilo.
Edzi u nga wonago khidzo edzi silo si gu idzo khidzo: Zama gu tshukwadzisa omu u hosisago, ganiolu u nga vireyi gu khuwe u vbeleya. Muphya nyo khaguri nyo pwani khu Caleb wari, khuye: “Eni nyo zama gu mba vega gupima avba nya sihoso sangu si na nyi vbedzago tshivba. Wulangani nya isoso, nya gu zama gu hevbula khu sihoso sangu gasi gu wona omu nyi yedego gu tshukwadzisa.”
Potsa gu dzi fananisa ni vambe.
Bhibhiliya yari khiyo: “Hi nga zami gu dzi vbweteya wuzundzo wu si hi faneyigo, hi palisana khu gyathu ni gu gireyana lidiwo.” (Vagalatiya 5:26) Gu wona dzifotu nya dzipari dzago na dzi romo festatuno u nga mba ranwa omu nya dziredhi sociais, si nga gu gira upwa likhulo. U nga pheya gu wona dzipari dzago nga valala vago.
Edzi u nga wonago khidzo silo edzi si gu idzo khidzo: Dzumeya gu khuwe kha wu na nga ranwa ga dzatshavbo dzifesta. Vbavbandze nya isoso, dzifotu edzi u dzi wonago umo nya dziredhi sociais kha dzi tshamuseyi satshavbo si pategago. Muphya moyo nyo pwani khu Alexis wari, khuye: “Gutala nya dzitepo, vathu va gu theya umo nya dziredhi socias silo nya lisima va giridego, nigu avo kha va yeyedzi satshavbo si pategago.”
Andrisa gurula, ngudzu-ngudzu ni va ndrangani gwago.
Bhibhiliya yari khiyo: “Girani satshavbo mu si kodzago gasi gu vbanya khu gurula ni vathu vatshavbo.” (Varoma 12:18) U mwalo makodzelo nya gu woneleye esi vambe va girago, ganiolu u na ni makodzelo nya gu vbindrugedze esi uwe u girago. U nga hatha gu andrisa gurula.
Edzi u nga wonago khidzo edzi silo si gu idzo khidzo: Dzi emiseye gu mba engedzeya sigaradzo ndrangani gwanu, ganiolu u andrisa gurula ndrangani gufana ni wevbini wulanga. Muphya moyo nyo pwani khu Melinda wari, khuye: “Mwalo a nga vbeleya nigu dzimbe dzitepo hi nga gandrana sinyalana. Nigu hi yede gu hunga gu khethu hi na hlamula khu gurula mwendro ne.”
Hevbuleya gu bonga.
Bhibhiliya yari khiyo: “Yeyedzani gu khenu mu vathu nya gu bonge.” (Vakolosi 3:15) Wa gu ba uri muthu u yeyedzago gubonga, u na vega gupima avba nya silo nya sadi si giregago womini gwago na siri esi nya mba sadi.
Edzi u nga wonago khidzo edzi silo si gu idzo khidzo: U yede guti gwadi sigaradzo sago, ganiolu u nga digi isoso si gu gira u si woni silo nya sadi womini gwago. Muphya moyo nyo pwani khu Rebecca wari, khuye: “Tshigu ni tshigu, nya gu lova gilo nyo khaguri gi nga nyi tsakisa avba nya kadhernu wangu. Eni nyo dundrugeya gu kheni ambari nyi gu na ni sigaradzo, nyi na ni silo nya singi nya sadi gasi gu dundrugeya khiso.”
Dundrugeya khu dzipari u dzi hathidego.
Bhibhiliya yari khiyo: “Dzipari nyo vivbe dzi ngu vivbisa mavbanyelo nya yadi.” (1 Vakorinto 15:33) Vathu u vbedzago navo tepo va gu ba va gola gu tsorodzeya mwendro gu khaleya gu pimisa khu silo nya mba sadi, mavbanyelo yawe nya mba yadi ma na gu kuha.
Edzi u nga wonago khidzo edzi silo si gu idzo khidzo: Dzipari dzathu dzi na tshangana ni sigaradzo dzimbe dzitepo, nigu dzi nga manega ni mawonelo nya mba yadi khu womi wadzo. Sa gu girega isoso, va phase, ganiolu u nga dzumeleyi gu khuwe sigaradzo sawe si gu vbedza tshivba. Muphya nyo khaguri nyo pwani khu Michelle wari, khuye: “Kha hi yeli gu vbedza tepo basi ni vathu va wonago silo khu ndziya nya mba yadi.”
Hevbula nya singi maningano khu mahungu yoyo
Ethu ho vbanya ga tepo eyi Bhibhiliya yi ranago gu khiyo: “Dzitepo nyo garadze gu emisana nadzo.” (2 Thimoti 3:1) Ina si ngu gu garadzeya gu manega ni mawonelo nya yadi mafuni momu gu tadego khu sigaradzo nya singi? Leri gipimo gi gu khigyo: “Khu ginani gu tshanisekwago ngudzu?”