Paradhesi mafuni

Jehovha a na fuvisa guvivba gwatshavbo gu vangidwego khu Sathane. Jehovha emiside Jesu kha nga Pfhumu mafuni gwatshavbo. Vbavbatshi nya wufumu waye, mafu ma na khala paradhesi. — Dhaniyeli 7:13, 14; Luka 23:43.

Jehovha a gu tumbisa silo sesi:

GUHODZA NYA GUNGI: ‘Mafu ma na velega mihandro yaye, Nungungulu, Nungungulu wathu a na hi kategisa.’ ‘Tigoni gu na fumwa dzimbewu, dzi fenengedza kala vbatshani nya sigomo.’ — Ndzimo 67:6; 72:16.
DZINYIMBI DZI NA FUVISWA: “Deluni, mu ta wona sigiro sa [Jehovha] Nungungulu, khuye a girago siliwugiso mafuni. Uye a ngu vbedza mayunga kala mahegiso nya litigo.” — Ndzimo 46:8, 9.
VATHU NYA MAVBANYELO NYA GUVIVBE VA NA FUVISWA: “Kholu va nya likhulo va na fuviswa . . . Aholu khadukhadu, kha gu na wonega gambe muthu nya guvivbe, u na vbweta gu wona wulanga waye u si wu mani.” — Ndzimo 37:9, 10.
MADWALI, GUTSHANISEKA, AMBARI GUFA SI NA FUVISWA: “Khavbo avbo, maho nya sikhumu ma na tulega ni sivbwiri si na tulega ndzindzeve sipwa. Silima si na ndragandraga kha nga dzimangwa, ni malimi nya sidudu ma na kulungela khu gutsaka.” — Isaya 35:5, 6.

“A na bani ari Nungungulu wawe. Uye a na va bavbula marongo mahoni gwawe, kholu gima kha gu na manega gambe gufa, gulila gu na vbela, ni gudilela ni wuvi, kholu dzitshanisa dza gale dzi vbindride.” — Gutuledwa 21:3, 4.

Guhambana ni Sathane ni madhemoni, Nungungulu kha liphi. Satshavbo esi a si tumbisago si na tadzisega. (Luka 1:36, 37) Jehovha a ngu gu haladza nigu a gu vbweta gu khuye u vbanya omu nya Paradhesi a na yi girago. Dzifakazi dza Jehovha dzi na gu phasa guti mambe mahungu nyo tsakise ma gomogo omu nya Bhibhiliya. Wa gu thumisa lisine nya Bhibhiliya guvbanyani gwago, u na dzipwa nu tshulegide; khu na nga khodwa silo nya malipha. Khu gu gimbiya nya tepo khu na nga garadzega gambe khu kotani nya gighoho ni gufa. Jesu ganede gu khuye: “Mu natini lisine, gambe ilo lisine li na mi gira vathu nya gutshulege.” — Johane 8:32.