Jehovha a gu hlamula kharini milombelo yathu?

1-2. Giwudziso muni vathu nya vangi va dzi girago?

U DI NGA dzi wudzisa gukhuwe ina Jehovha a ngu hlamula milombelo yangu? Abari gu ina, khandruwe wenga u dzi girago giwudziso gegi. Vandriyathu nya vangi va dzi giride giwudziso gegi ngudzu-ngudzu tepo va nga ba va tshangana ni gigaradzo nyo khaguri. Ha gu ba hi tshaniseka, isoso si nga hi garadzeya gu wona edzi Jehovha a hlamulago khidzo milombelo yathu.

² Hi na wona gu khethu khu ginani hi nga tiyisegago gu khethu Jehovha a ngu hlamula milombelo ya vakhozeyi vaye. (1 Joh. 5:15) Hi na wona gambe siwudziso sesi: Khu ginani dzimbe dzitepo si girago gu khatshi Jehovha kha hlamule milombelo yathu? Jehovha a gu hlamula kharini milombelo yathu muhuno?

JEHOVHA DZIMBE DZITEPO KHA NA NGA HLAMULA MILOMBELO YATHU KHU NDZIYA HI NGA BA HI YI VIREYA

3. Khu ginani Jehovha a vbwetago gu khuye hi gombeya gwaye?

³ Milowo ya gu hi tiyisegisa gu khiyo, Jehovha a ngu hi haladza ngudzu nigu ethu hi na ni lisima gwaye. (Agewu 2:7; 1 Joh. 4:10) Khu kharato, uye a ngu hi konvhidhari gasi hi gombeya hi mu lomba giphaso. (1 Ped. 5:6, 7) Uye o vbweta gu hi phasa gu hidzimeya gwaye ni gu hi phasa gu timiseya sigaradzo hi tshanganago naso.

4. Ha gu dziti kharini gu khethu Jehovha a ngu hlamula milombelo ya vakhozeyi vaye? (Wona fotu.)

⁴ Umo nya Bhibhiliya, dzitepo nya dzingi hi ngu leri gu khethu Jehovha a hlamude milombelo nya vakhozeyi vaye. Ina u ngu dundrugeya khu giyeyedzo nyo khaguri? Gimwegyo nya siyeyedzo soso khu pfhumu Dhavhidhe. Uye a diri ni valala nya vangi va nga ba va vbweta gu mu songa. Ganiolu, tepo yatshavbo uye a di gu lomba giphaso ga Jehovha khu nombelo. Khu tepo nyo khaguri, uye a gombede gu khuye: “PFHUMU Nungungulu hakha nombelo wangu, . . . yingisa gulila gwangu, nyi hakhe khu gululama ni gutumba gwago.” (Ndzi. 143:1) Jehovha a hlamude milombelo ya Dhavhidhe. (1 Sam. 19:10, 18-20; 2 Sam. 5:17-25) Khiso si giridego Dhavhidhe a ganeya gu khuye: “PFHUMU Nungungulu womo vbafuvbi ni vatshavbo va mu ranago.” Anethu hi nga tiyisega khu malito yaya. — Ndzi. 145:18.

5. Ina vakhozeyi va Jehovha va gale, tepo yatshavbo va di gu hlamudwa milombelo yawe khu ndziya va nga ba va yi vireya? Ninga giyeyedzo. (Wona fotu.)

⁵ Adzina Jehovha kha na nga hlamula milombelo yathu khu ndziya hi nga ba hi yi vireya. Khiso si giregedego Mupostoli Pawulo. Uye lombide Nungungulu gasi a mu dusa “muba givilini.” Ga siemo siraru Pawulo gombede khu gigaradzo gegi. Ina Jehovha hlamude milombelo yaye? Ina. Ganiolu, khandri khu ndziya eyi Pawulo a nga ba a yi virede. Vbavbandze nyo mu duseyi gigaradzo gile, Jehovha a di mu ninga tshivba a nga ba a yi vbweta gasi gu simama gu mu thumeya khu gutumbega. — 2 Kor. 12:7-10.

6. Ga dzimbe dzitepo, khu ginani si girago gu khatshi Jehovha kha hlamuli milombelo yathu?

⁶ Anethu, milombelo yathu adzina yi nga hlamudwa khu ndziya hi nga ne gu yi vireya. Hi nga tiyisega gu khethu Jehovha a ngu yiti ndziya nya yadi gasi gu hi phasa. Uye, “a ngu si kodza gu gira silo nya singi guvbindra satshavbo hi mu lombago mwendro hi si dundrugeyago.” (Efes. 3:20) Khu gighelo gyogyo, milombelo yathu yi nga hlamudwa khu tepo ni ndziya hi nga ne gu yi vireya.

7. Khu ginani si vbwetago gu hi vbindrugedza esi hi lombago umo nya milombelo yathu? Ninga giyeyedzo.

⁷ Ethu adzina hi nga vbweta gu vbindrugedza esi hi gombeyago khiso, gasi si gimbileyana ni gugola ga Jehovha. Wona giyeyedzo gya Martin Poetzinger. Hwane nya gu ba a tshadhide, ndriyathu Poetzinger a di khotedwa ga wulanga gu nga ba gu tshaniswa vathu. Gupheyani uye a di lomba Jehovha gasi a mu dusa khu wulanga wowo, gasi a si kodza gu khathaleya mwangadzi waye ni gu pheledza gu gira thumo waye nyo tshumayele. Hwane nya dzisemana dzimbili uye a di wona gu khuye Jehovha kha nga ba a gira gilogyo gasi a duga khu mule. Khu kharato, uye a di pheya gu gombeya ga Jehovha gu khuye: “Jehovha nyo lomba, nyi yeyedze esi u vbwetago gu khuwe nyi gira.” Khavbovbo, uye a di pheya gu dundrugeya khu sigaradzo vandriyathu va nga ba vari mule va nga ba va tshangana naso. Nya vangi vakona va di gu garadzega ngudzu kholu va di romo hwindzo ni sanana sawe ni vagadzi vawe. Ndriyathu Poetzinger a di gombeya khuye: “Jehovha nyi bongide ngudzu khu thumo wowu nya wuphya, nyi phase gu tiyisa vandriyangu.” Uye a vbedzide 9 myaga na gu gira kamo isoso.

8. Gilo muni nya lisima hi yedego gu gi dundruga tepo hi gombeyago?

⁸ Ethu hi yede gu dundruga gu khethu Jehovha a na ni makungo a na ma tadzisago ga tepo a yi hungidego. Makungo yoyo, ma gu pata gu vbedza khu gu vbeleya satshavbo sigaradzo si hi tshanisago muhuno nya nga dzimhango nya tumbunugo, madwali ni gufa. Jehovha a na tadzisa makungo yaye khu gu thumisa Mufumo waye. (Dhan. 2:44; Gutu. 21:3, 4) Ambari ulolo, na yi si vbohi tepo yoyo, Jehovha a ngo dzumeleya Sathane gu fuma mafu yaya.b (Joh. 12:31; Gutu. 12:9) Jehovha a gu lulamisa sigaradzo nya vathu olu, isoso si na gira gu khatshi Sathane a gu fuma gwadi litigo leli. Khu kharato, tepo hi vireyago Jehovha gasi gu tadzisa situmbiso saye, isoso kha si thuli gu khiso uye a na hi diga. Hongoleni hi wona dzindziya nyo khaguri edzi Jehovha a dzi thumisago gasi gu hi phasa.

DZINDZIYA EDZI JEHOVHA A DZI THUMISAGO GASI GU HLAMULA MILOMBELO YATHU MUHUNO

9. Jehovha a nga hi phasa kharini tepo hi vbwetago gu hunga makungo? Tshamuseya.

⁹ Khu gu hi ninga guti. Jehovha a ngu hi tumbisa gu hi ninga guti gasi hi hunga makungo nya yadi. Ethu hi ngu vbweta guti ga Nungungulu gasi hi hunga makungo ma na kuhago womi wathu watshavbo, nya nga gu tshadha mwendro gu mba tshadha. (Jak. 1:5) Wona giyeyedzo gya ndriyathu moyo nya nyamayi a nga si tshadhigo nyo pwani khu Maria.c Uye a di gu tsaka khu gu thuma kha nga piyonera tepo a ngati ndriyathu nyo khaguri. Uye wari khuye: “Wupari wathu wu di dandra ngudzu hi bwe hi pheya gu golana. Eni nyi di gu dziti gu kheni nyi di yede gu hunga gilo nyo khaguri. Eni nyi di gombeya ngudzu khu mahungu yaya. Nyi di vbwetedzeya sileletelo sa Jehovha, ganiolu nyi di gu dziti gu kheni Jehovha kha na nga nyi hungeya makungo.” Uye a si wonide gu khuye Jehovha a hlamude milombelo yaye. Khu ndziya muni? Uye a di gira wugevisisi umo nya mabhuku yathu a bwe a vbweta dzindrima nyo khaguri dzi nga mu phasa gu mana mihlamulo nya siwudziso saye. Uye gambe a phasidwe khu wusingalagadzi a ningidwego khu mamayi waye. Wusingalagadzi wowo, wu phaside Maria gu pimisa gwadi khedzi a nga ba a dzipwa khidzo. Khu gu hegisa uye a si kodzide gu hunga makungo nya yadi.

10. Guya khu Vafilipi 4:13, ginani egi Jehovha a girago gasi gu phasa vakhozeyi vaye? Ninga giyeyedzo. (Wona fotu.)

¹⁰ Uye a ngu hi ninga tshivba gasi gu timiseya. Gu fana ni esi a giredego Mupostoli Pawulo, Jehovha a na hi ninga tshivba hi yi vbwetago gasi gu timiseya sigaradzo hi tshanganago naso. (Leri Vafilipi 4:13.) Wona edzi Jehovha a phasidego khidzo ndriyathu moyo nyo pwani khu Benjamin gu timiseya sigaradzo saye. Wuphya waye watshavbo, uye a vbanyide ni papayi waye, mamayi waye, ni 4 vandriyaye, omu va nga ba va thaveya umo vathu África. Benjamin wari khuye: “Nyi di gombeya tepo yatshavbo, nyi lomba Jehovha gasi a nyi ninga tshivba nya gu gire esi si gu sadi mahoni gwaye. Jehovha hlamude milombelo yangu khu gu nyi ninga gurula ni gutiya-hwambo gasi nyi simama gu tshumayela ni gu hevbula mabhuku ma nga nyi phasa gu simama gu hidzimeya gwaye.” Uye o ganeya gambe gu khuye: “Gu leri matimo ya vandriyathu ni gu hevbula edzi Jehovha a va phasidego khidzo gu timiseya si nyi tiyiside nigu si nyi phaside gu simama na nyi tumbegide.”

11-12. Jehovha a nga thumisa kharini vandriyathu gasi gu lulamisa sigaradzo sathu? (Wona fotu.)

¹¹ Uye a gu thumisa ndranga yathu ya liphuvboni. Ga wutshigu a nga hadzi songwa, Jesu a gombede khu tepo nya yingi. Uye a di lomba Jehovha khu monyo waye watshavbo gasi vathu va si pimisi gu khavo a di gu vala Nungungulu, va bwe va mu ninga nandru khu kotani nya isoso. Ganiolu, Jehovha phaside Jesu khu gu rumeya ngilozi mweyo gasi guya mu tiyisa. (Luka 22:42, 43) Anethu, Jehovha a nga hi phasa khu gu thumisa vandriyathu tepo vatago va ta hi wuseya ni gu hi tiyisa. Hatshavbo hi nga vbwetedzeya mathomo nyo embeye “magana nya yadi” vandriyathu. — Mav. 12:25.

¹² Wona giyeyedzo nyo khaguri gya ndriyathu moyo nya nyamayi nyo pwani khu Miriam. Hwane nya dzisemana nyo khaguri mwama waye na fude, Miriam a di gu khala enga nigu a di gu dzipwa na vbede tshivba ni gu dzipwa enga. Uye a di gu khaleya gu liya ngudzu nigu a di gu vbweta muthu nyo bhule naye. Uye wari khuye: “Eni nyi diri mwalo tshivba nyo ligareye muthu gasi gu ganeya naye, khu kharato eni nyi di gombeya ga Jehovha. Tepo nyi nga ba nyi gombeya na nyi guliya, telefoni yangu yi di rana. Li diri lidhota nyo khaguri li nga ba liri pari yathu.” Miriam a di thaveledwa khu lidhota lile ni mwangadzi walo. Uye a ngu tiyisega gu khuye khu Jehovha a nga thumisa ndriyathu wule gasi gu mu ligareya.

13. Ninga giyeyedzo nya edzi Jehovha a thumisago khidzo vale va gu mba mu khozeya gasi gu hlamula milombelo yathu.

¹³ Uye a nga thumisa vathu va gu mba mu khozeya. (Mav. 21:1) Dzimbe dzitepo, Jehovha a ngu hlamula milombelo yathu khu gu thumisa vathu va gu mba mu khozeya gasi gu hi phasa. Khu giyeyedzo, uye a thumiside Pfhumu Aritaserisi gu dzumeya gilombo gya Nehemiya nyo bweleye Jerusalema gasi guya phasedzeya avbo nya gu vbahedze lidhoropa. (Neh. 2:3-6) Muhuno, Jehovha gambe a nga thumisa vale va gu mba mu khozeya gasi gu hi ninga giphaso tepo hi gi vbwetago.

14. Matshango ya Soo Hing mo gu tiyisa kharini? (Wona fotu.)

¹⁴ Ndriyathu moyo nya nyamayi nyo pwani khu Soo Hing wari khuye a wonide gu khuye Jehovha a mu phaside khu gu thumisa dhogodheya. Gyanana gyaye gyo tshaniswa khu madwali nya mapimo. Ganiolu, tepo gyanana gyaye gi nga manega ni asidhenti, uye ni mwama waye va di lomba gu ema gu thuma gasi gu khathaleya gyanana gyawe. Kha nga handro wakone, avo va diri mwalo dzitsapawu. Soo Hing wari khuye a di garala khu gu midzeya esi a nga ba a tshangana naso, khavbovbo a di gombeya ga Jehovha khu monyo waye watshavbo gasi gu lomba giphaso. Dhogodheya a di hunga gu vbwetedzeya ndziya nyo phase uye ni ndranga yaye. Khu kotani nya isoso avo va di phasedzedwa khu mufumu, va bwe va ningwa wulanga nyo khale. Soo Hing wari khuye: “Ethu hi wonide edzi Jehovha a hi phasidego khidzo. Uye khu lisine a ngu engisa ‘milombelo yathu.’” — Ndzi. 65:2.

HI YEDE GU MANEGA NI GUKHODWA GASI GU VBWETEDZEYA NI GU DZUMEYA MILHAMULO YA JEHOVHA

15. Ginani gi phasidego ndriyathu moyo nya nyamayi gu tugula gu khuye milombelo yaye yi di gu hlamudwe?

¹⁵ Milombelo yathu, dzitepo nya dzingi kha yi hlamudwi khu ndziya nyo hlamadzise ngudzu, ganiolu mihlamulo hi ningwago khiyo kamu hi nga ba hi yi vbweta gasi gu simama na hi tumbegide ga Papayi wathu wa ndzadzini. Khu kharato, zama gu wona edzi Jehovha a hlamulago khidzo milombelo yathu. Ndriyathu moyo nya nyamayi nyo pwani khu Yoko a di gu pimisa gu khuye Jehovha kha nga ba a hlamula milombelo yaye. Ganiolu, uye a di pheya gu lova esi a nga ba a lomba Jehovha. Hwane nya tepo nyo khaguri, uye a di khedza esi a lovidego a bwe a tugula gu khuye Jehovha a di hlamude milombelo nya yingi a yi giridego, ambari ni milombelo a nga ba a giride ganiolu a nga ba a yi divade. Dzimbe dzitepo, ethu hi yede gu ema hi bwe hi dundrugeya khedzi Jehovha a hlamulago khidzo milombelo yathu. — Ndzi. 66:19, 20.

16. Hi nga yeyedza kharini gukhodwa tepo hi girago nombelo? (Vahebheru 11:6)

¹⁶ Ethu kha hi yeyedzi basi gukhodwa khu gu gombeya ga Jehovha, ganiolu khu gu dzumeya ndziya eyi milombelo yathu yi hlamudwago khidzo. (Leri Vahebheru 11:6.) Wona giyeyedzo gya Mike ni mwangadzi waye Chrissy. Va diri ni misuwu nya gu thume Bheteli. Mike wari khuye: “Hi di prenxeri petisawu khu dzitepo nya dzingi hi bwe hi gombeya ga Jehovha khu gu phindra-phindra khu misuwu yathu. Ganiolu, ethu kha ha ranwa gu hongola Bheteli.” Mike ni Chrissy va simamide gu tiyisega gu khavo Jehovha a ngu dziti edzi a nga hadzi gu va thumisa khidzo thumoni waye. Avo va simamide gu gira satshavbo va nga si kodza khu gu thuma kha nga vapiyoneru nya tepo yatshavbo umo gu nga ba gu vbwetega ngudzu giphaso ni gu phasedzeya omu nya dziprojetu nya gu vbahe. Muhuno, avo va gu thuma nga vawoneleyi nya Sirkwitu. Mike wari khuye: “Jehovha tepo yatshavbo kha nga ba a hlamula milombelo yathu khu ndziya hi nga ba hi yi vireya. Ganiolu, a hlamude milombelo yathu khu ndziya hi nga ba ha sa yi vireya.”

17-18. Guya khu Ndzimo 86:6, 7 ginani hi nga tiyisegago khigyo?

¹⁷ Leri Ndzimo 86:6, 7. Muembi nya dzindzimo Dhavhidhe a di gu tiyisega gu khuye Jehovha a ngu engiseya ni gu hlamula milombelo yaye. Anuwe u nga manega ni gutumba gogo. Siyeyedzo hi si wonidego avbo nya ndrima yeyi si ngu hi tiyisegisa gu khiso Jehovha a nga hi ninga guti ni tshivba hi yi vbwetago gasi gu timiseya sigaradzo. Uye a ngu thumisa vandriyathu ni vale va gu mba mu khozeya gasi gu hi phasa khu ndziya nyo khaguri.

¹⁸ Ambari olu, Jehovha dzimbe dzitepo a si hlamuligo milombelo yathu khu ndziya hi nga mba hi yi vireya, ethu hi ngu dziti gu khethu uye a na hi hlamula. Uye a na hi ninga esi hi si vbwetago khu tepo yakone. Simama gu gombeya na wu tiyisega gu khuwe Jehovha a na gu khathaleya olu ni gu a hi khathaleya mafuni nya maphya matago. — Ndzi. 145:16.