Giwudziso nya gidugwana gi nga resa mihandro nya yadi

Mary ni mwama waye, John,a va gu vbanya ga gipandre nyo khaguri, umo va nga tshumayelago mahungu nya yadi sithumi sitago khu Filipinas. Ndrani nya tungo nya COVID-19, Mary a phede gu gimbidzisa sihevbulo nya Bhibhiliya nasiri basi omu a nga ba a vbanya umo, ganiolu ga mambe malanga. Giride kharini isoso?

Mary a di gu wudzisa sihevbuli saye nya Bhibhiliya gu khuye: “Ina u nguti muthu a vbwetago gu hevbula Bhibhiliya?” Va gu ganeya gu khavo ina, a di gu va lomba gasi a ganeya navo. Giwudziso nya gidugwana nya nga egi gi nga resa mihandro nya yadi. Khu ginani? Kholu vathu va tsakiswago khu Lito la Nungungulu va gu vbweta gu bhuleya valongo vawe ni dzipari dzawe khesi va si hevbulago. Khu wevbini handro wu manegidego khu gu gira giwudziso gegi?

Jasmin, gihevbuli nya Bhibhiliya gya Mary gi di mu yeyedza 4 vathu va nga ba va vbweta gu hevbula Bhibhiliya. Moyo wawe, Kristine, a di gu gola ngudzu gu hevbula nyo bwe a lomba Mary gasi gu hevbula guvili khu semana. Tepo Mary a nga mu wudzisa gu khuye a di guti muthu nyo khaguri a vbwetago gu hevbula Bhibhiliya, Kristine a di ganeya gu khuye: “Ina, nyi na gu yeyedza dzipari dzangu.” Ndrani nya dzisemana nyo khaguri, Kristine a di yeyedza Mary 4 dzipari dzaye dzi nga ba dzi vbweta gu hevbula. Hwane nya isoso, Kristine a di mu yeyedza dzimbe dzipari dzaye, dzimbe dzakone dzi nga gira sasimweso.

Kristine gambe a di gu vbweta gu khuye valongo vaye va vbanyago Filipinas va hevbula navo maningano ni Bhibhiliya. Khu kharato, a di ganeya ni gyanana gyaye Andrea. Gupheyani, Andrea a di gu pimisa gu khuye: ‘Dzifakazi dza Jehovha i tshetshe nya mba pwisisega, idzo kha dzi khodwi ga Jesu nigu dza gu thumisa Testamenta ya Gale.’ Ganiolu, ga tepo nyo pheye a nga hevbula Bhibhiliya a di vbindrugedza mapimiselo yaye. Tepo a nga ba a hevbula, uye a di gu dzi embeya gu khuye: “Kha nga olu Bhibhiliya yi ganeyago esi, isoso so thula gu khiso lisine!”

Khu gu gimbiya nya tepo, Andrea a di yeyedza Mary dzipari dzaye nya dzivili ni githumi khwathu, va nga pheya gu hevbula. Nigu gambe, tiya wa Andrea nyo pwani khu Angela a nga ba ari gikhumo, a di gu engiseya gihevbulo gyawe, Mary na si dziti. Khu gu landreya, ga litshigu limwedo, Angela a di lomba Andrea gasi a mu lombeya ga Mary gu hevbula naye Bhibhiliya. Angela a di gu si gola esi a nga ba a hevbula. Khu ngima mowo basi a di vegedza milowo hungoni a bwe a vbweta gu hevbula 4 dzitepo khu semana! Khu gu phaswa khu Andrea, Angela a di pheya gu sixitiri mitshangano khu gu thumisa videoconferência.

Tepo Mary a nga wona gu khuye mwama wa Kristine, Joshua, tepo yatshavbo a di gu khaleya vbafuvbi tepo khiyo va nga ba va hevbula Bhibhiliya, Mary a di mu wudzisa gu khuye a di gu dogoreya gu hevbula Bhibhiliya navo. Joshua a di ganeya gu khuye: “Nyi na engiseya basi, ganiolu u nga nyi giri siwudziso, wa gu nyi gira siwudziso nyi na khuga khavba.” Ndrani nya 5 dzimeneti tepo gi nga pheya gihevbulo gyawe, uye a di gira siwudziso nya singi ngudzu guvbindra Kristine nigu a di gu vbweta nuye gu simama gu hevbula Bhibhiliya.

Giwudziso nya gidugwana a giridego Mary gi mu giride a manega ni sihevbuli nya singi nya Bhibhiliya. Khu kotani nya olu a nga ba ari ni sihevbuli nya singi, uye a di gira malulamiselo gasi simbe sakone si hevbula ni vambe va gu Dzifakazi dza Jehovha. Khu gu piya, Mary a di gimbidzisa 28 sihevbuli nya Bhibhiliya si lumbago 4 mayigo nyo hambane.

Jasmin, a gu gihevbuli nyo pheye a khumbugidwego avba nya matshango yaya, a bhabhatisidwe khu Abril nya 2021. Kristine a bhabhatisidwe khu Maio nya 2022, nigu bwelede Filipinas gasi guya khala ni ndranga yaye. Sihevbuli sivili esi Kristine a nga si yeyedza ga Mary aniso si bhabhatisidwe. Angela a di bhabhatiswa ga migima yi nga landreya nigu olu a gu thuma kha nga piyonera nya tepo yatshavbo. Mwama wa Kristine, Joshua, gyanana gyawe Andrea ni simbe sihevbuli va ngo simama gu hevbula Bhibhiliya ni gu tiyisa wupari wawe ni Jehovha.

Ga lizana myaga nya gupheye, mahungu nya yadi ma di gu phalalega khu gu vbiredza vbakari nya valongo ni dzipari. (Joh. 1:41, 42a; Mith. 10:24, 27, 48; 16:25-33) Wudzisa sihevbuli sago nya Bhibhiliya mwendro vambe gu khuwe: “Ina u nguti muthu nyo khaguri a vbwetago gu hevbula Bhibhiliya?” Wa gu gira giwudziso gegi nya gidugwana, adzina saye anuwe u na mana vathu nya vangi va vbwetago gu hevbula Bhibhiliya.