Kulonga

36 “Bbezaleli ulabelekaamwi a-Oholiyabbu abaalumi boonse bali aaluzibo, aabo Jehova mbaapa busongo akumvwisisisya, kuchitila kuti bazibe mbubeelede kuchita mulimu woonse uusalala mbuli mbaakalayilila Jehova.”

2 Mpawo Mozesi wakayita Bbezaleli a-Oholiyabbu abaalumi boonse bali aaluzibo, aabo Jehova mbaakapede busongo. Boonse bakalipeda amoyo woonse kuti bazoochite mulimu. 3 Bakabweza zipo zyoonse zyakali kuli Mozesi, zyakali zyeetwa aama-Israyeli kuti zizoobelesegwe mumulimu uusalala. Nikuba oobo, ma-Israyeli bakachili kweeta zipo zyakuliyandila buzuba abuzuba.

4 Nibakasaanguna kuchita mulimu uusalala, babelesi boonse bali aaluzibo bakali kusika kabatobelana 5 kuli Mozesi akumubuzya kuti: “Zintu nzibali kweeta bantu zyavulisya kwiinda ziyandikana kuti kuchitwe mulimu ngwaakalayilila Jehova.” 6 Nkinkaako, Mozesi wakalayilila kuti kupegwe chizibisyo mukkeempu yoonse chakuti: “Nimataata animamaama, mutacheeti zipo zyamulimu uusalala.” Akaambo kazeezi, bantu bakayimikizigwa kweeta zipo. 7 Zintu zyakeetwa zyakali kukkwana kuchita mulimu woonse wakali kuyanda kuchitwa alubo zyakavulisya kwiinda zyakali kuyandikana.

8 Bantu boonse bali aaluzibo bakapanga tente lyakukombela kababelesya milembo yatente iili kkumi iipangidwe aabusumyo bubotu boosedwe, busumyo bwabbuluu, wulu yapepulu abusumyo busalala. Alubo wakasuminina* zifanikisyo zyamakkerubbi aalinjiyo. 9 Mulembo watente umwi awumwi wakali kulampa makkiyubbiti* aali 28 alubo wakali aabusasa bwamakkiyubbiti aali 4. Milembo yoonse yatente yakaleelene. 10 Wakaswaanizya milembo yatente iili musanu mpawo imwi iili musanu wakayiswaanizya aamwi. 11 Kuzwa waawo, wakapanga tukole kumupeto wamulembo watente kabelesya busumyo bwabbuluu nkuwakali kuzooswaanizigwa aawumwi. Wakachita zikozyenie akumupeto wamulembo watente nkuwakali kuzooswaanizigwa aawumwi. 12 Wakapanga tukole tuli 50 aamulembo watente wakusaanguna atumwi tuli 50 aali umwi mulembo mpaakali kuzooyiswaanizya alubo tukole ooto twakalilangene. 13 Kumamanino, wakapanga tupini twangolida tuli 50 mpawo wakaswaanizya milembo eeyo kabelesya tupini ooto, mpawo tente lyakukombela lyakaba chintu chimwi.

14 Mpawo wakapanga milembo yakuvumbya tente lyakukombela kabelesya boya bwampongo. Milembo eeyo yakali 11. 15 Mulembo watente umwi awumwi wakali kulampa makkiyubbiti aali 30 alubo wakali aabusasa bwamakkiyubbiti aali 4. Milembo yatente kayili 11 yakaleelene. 16 Wakaswaanizya milembo yatente iili musanu mpawo imwi iili musanu awumwi wakayiswaanizya aamwi. 17 Mpawo wakapanga tukole tuli 50 kumupeto wamulembo watente nkuwakali kuzooswaanizigwa atumwi tuli 50 kumupeto wawumwi mulembo watente nkuwakali kuzooswaanizigwa. 18 Wakapanga tupini twakkopa tuli 50 twakuswaanizya matente kuti abe chintu chimwi.

19 Wakapanga chakuvumbya tente kabelesya chikumba chamugutu chinikidwe mumusila uusalala alubo aajulu aacho wakabikka chakuvumbya chazikumba ziteteete.*

20 Mpawo wakapanga mafulemu aatente lyakukombela aamukoka, aakali kuzooyimikizigwa. 21 Fulemu limwi alimwi lyakali kulampa makkiyubbiti aali kkumi alubo lyakali aabusasa bwakkiyubbiti iimwi ahafu. 22 Fulemu limwi alimwi lyakali atuulu tubili, kamwi kakali kumbali aakamwi. Oobu mbaakaapanga mafulemu woonse aatente lyakukombela. 23 Wakapanga mafulemu aali 20 aapanga bbazu lyakumusanza lyatente lyakukombela. 24 Mpawo wakapanga zikkazikizyo zyansiliva zili 40 nzyaakabikka aansi aamafulemu aali 20. Tuulu tubili twafulemu twakali kunjila muzikkazikizyo zibili, nkukwaamba kuti tuulu tubili twafulemu limwi alimwi twakeelede kunjila muzikkazikizyo zibili. 25 Limwi bbazu lyatente lyakukombela, nkukwaamba kubbazu lyakunyika wakalipangila mafulemu aali 20 26 azikkazikizyo zyawo zyansiliva zili 40, zikkazikizyo zibili zyakali aansi aafulemu limwi, nkukwaamba kuti zikkazikizyo zibili zyakali aansi aafulemu limwi alimwi.

27 Wakapanga mafulemu aali musanu alimwi aakusule lyatente lyakukombela nkukwaamba kubbazu lyakububbila. 28 Wakapanga mafulemu aabili aakali kubeleka mbuli mapila kumakkona aabili aakusule lyatente lyakukombela. 29 Wakaabikka kaali aabili kuzwa ansi kusika kujulu, kuring’i yakusaanguna. Eezi nzizyo nzyaakachita kumapila aaya aabili aamumakkona. 30 Bakabikka mafulemu aali musanu aatatu azikkazikizyo zyawo zyansiliva zili 16. Fulemu limwi alimwi lyakakkede aazikkazikizyo zibili.

31 Wakapanga mbalo zyamukoka, zili musanu zyakali zyakujata mafulemu aabbazu limwi lyatente lyakukombela, 32 zimwi zili musanu zyakali zyakujata mafulemu aabbazu limbi lyatente lyakukombela mpawo zimwi zili musanu zyakali zyakujata mafulemu aatente lyakukombela aali kusule, nkukwaamba kububbila. 33 Mpawo wakapanga imwi mbalo yakali kwiinda aakati kamafulemu kuzwa kukkona limwi kuyoosika kukkona limbi. 34 Wakazilulula mafulemu aayo angolida alubo wakaapangila turing’i twangolida mwakali kuzoonjila mbalo. Mbalo eezyo wakazizilulula aangolida.

35 Wakapanga kketeni kabelesya busumyo bwabbuluu, wulu yapepulu, busumyo busalala abusumyo bubotu boosedwe. Wakasuminina zifanikisyo zyamakkerubbi aalindilyo. 36 Mpawo wakalipangila mapila aane aamukoka akwaazilulula aangolida alubo wakalipangila ngobyo zyangolida azikkazikizyo zine zyansiliva. 37 Mpawo wakapanga mulembo wakumanjililo* aatente kabelesya busumyo bwabbuluu, wulu yapepulu, busumyo busalala abusumyo bubotu boosedwe 38 amapila aawo aali musanu angobyo zyawo. Wakaazilulula kujulu azyakujatanizya zyawo* kabelesya ngolida, pesi zikkazikizyo zyawo zili musanu zyakapangidwe aakkopa.