Makani mabotu aakalembwa aaMateyo
16 Mpawo baFarisi abaSadusi bakasika kulinguwe, alubo kabayanda kumusunka, bakamubuzya kuti abachitile chitondeezyo kuzwa kujulu. 2 Mpawo wakabasandula kuti: “Nilyaba goko mwaamba kuti, ‘Bwiime bwakunze bunooli kabotu nkaambo kujulu kulasalala,’ 3 alubo kuseeni mwaamba kuti, ‘Inoowa alubo kunooli mpeyo nkaambo kujulu kulasalala alubo kuli mayoba aasiya.’ Mulikuzi kupandulula bwiime bwakunze, pesi tamukonzyi pe kupandulula zitondeezyo zyaziindi. 4 Zyalani bbi alubo lichita bumambi,* liliswini kuyanduula chitondeezyo, pesi taakwe chitondeezyo nchilitazoopegwe pe kunze kwachitondeezyo chaJona.” Mpawo wakeenda, wabasiya.
5 Basikwiiya bakazubukila mutaleeliya pesi bakaluba kubweza zinkwa. 6 Jesu wakati kulimbabo: “Amukkale kamujulide meso alubo muchenjelele bumena bwabaFarisi abaSadusi.” 7 Nkinkaako, bakasaanguna kwaambuula chabo-chabo kabati: “Teetwabweza zinkwa pe.” 8 Kazi zyakali kuchitika, Jesu wakati: “Nkamboonzi nimulikwaambuula aakati kanu kuti tamukwe zinkwa, inywe nimuli aalusyomo luniini? 9 Tamunakamvwisisisya na kaambo, naakuti, tamuchiziyeeyede na zinkwa zili musanu zyakaligwa abali 5 000, akuti mwakazuzya mabbasikiti aangana? 10 Naakuti zinkwa zili musanu azibili zyakaligwa aabali 4 000, akuti mwakazuzya mabbasikiti mapati* aangana? 11 Nkamboonzi nimutalikumvwisisisya kuti teendaambuula aandinywe atala azyachinkwa? Pesi amuchenjelele bumena bwabaFarisi abaSadusi.” 12 Mpawo bakamvwisisisya kuti wakali kwaamba kuti bachenjelele njiisyo zyabaFarisi abaSadusi kutali bumena bwachinkwa pe.
13 Naakasika muchilawu chaKkesariya Filipi, Jesu wakabuzya basikwiiya bakwe kuti: “Bantu baamba kuti Mwanaamuntu ngwani?” 14 Bakati: “Bamwi bati nguJohane Mubbabbatizi, bamwi bati ngu-Elija, nikuba oobo, bamwi bati nguJeremiya naakuti nguumwi wabapolofita.” 15 Mpawo wakati kulimbabo: “Ani inywe, muti ndimeni?” 16 Simoni Petro wakasandula kuti: “Nduwe Kkristu, Mwana waLeza uupona.” 17 Mpawo Jesu wakati kulinguwe: “Ulilongezedwe Simoni mwana waJona, nkaambo nyama aganzi teenzizyo pe zyakuyubunwida* pesi Taata uuli kujulu nguwe wakuyubunwida. 18 Alubo ndikubuzya kuti: Nduwe Petro, alubo aabbwe eeli, mpunditazooyakile mbungano yangu alubo mageedi aaKabanda* taazooyizundi pe. 19 Ndizookupa makkii aaBwaami bwakujulu alubo kufumbwa nchwaanga aanyika, chinooli chaangwa kale kujulu alubo kufumbwa nchwaangununa aanyika, chinooli chaangununwa kale kujulu.” 20 Mpawo wakachenjezya basikwiiya kuti batabuzyi muntu kuti nguKkristu.
21 Kuzwa kuchiindi eecho kaziya kunembo, Jesu wakasaanguna kupandulwida basikwiiya bakwe kuti, weelede kuya kuJerusalema kuti akapenzegwe loko aabaalu, abapati babapayizi, abalembi, akujayigwa mpawo mubuzuba bwachitatu azoobusigwe. 22 Pesi Petro wakamutola kumbali mpawo wakasaanguna kumukalalila kati: “Mwaami, lifwide luzyalo, zintu eezi tazizoochitiki pe kulinduwe.” 23 Pesi Jesu wakafutata mpawo wakabuzya Petro kuti: “Yinka kusulaangu, Saatani! Ulichilebyo kulindime nkaambo ulaamizeezo yabantu kutali yaLeza pe.”
24 Mpawo Jesu wakati kuli basikwiiya bakwe: “Kuti muntu kayanda kunditobela, aleke kupona mbuli mbayanda, mpawo anyampule chisamu chakwe chakupenzezya* alubo ayinkilile kunembo kunditobela. 25 Nkaambo kufumbwa muntu uuyanda kufutula buumi bwakwe, uzoosweekelwa aambubo pesi kufumbwa muntu uusweekelwa aabuumi bwakwe akaambo kangu, uzoobujana. 26 Kwaamba choonzyo, zigwasyaanzi kuti muntu ajane nyika yoonse pesi asweekelwe aabuumi bwakwe? Naakuti, niinzi muntu nchakonzya kupa kuti ajane buumi bwakwe? 27 Nkaambo Mwanaamuntu uzooza mubulemu bwaWisi angilozi zyakwe alubo uzoopa umwi awumwi kweendelana amilimu yakwe. 28 Kwaamba choonzyo, ndimubuzya kuti, kuli bamwi bayimvwi aano, batazooluboni pe lufu kusikila basaangune kubona Mwanaamuntu kaza muBwaami bwakwe.”