Milimu yaBaapostoli
23 Pawulu naakabalangisisya bamuNkuta Mpati yamaJuda wakati: “Nibaalumi, nibeenzuma, ndakapona buumi bulikabotu kunembo lyaLeza kandili aamoyo uutandipi mulandu* kusikila sunu.” 2 Mpawo mupayizi mupati Ananiya wakabuzya bantu bakayimvwi aafwiifwi anguwe kuti bamuume kumulomo. 3 Mpawo Pawulu wakati kulinguwe: “Leza uzookuuma iwe nusikuupa-wupa.* Ulikkede mpawaawo kuti undibeteke kubelesya Mulawu, kakuli ulikutyola Mulawu kwiinda mukulayilila kuti nduumwe?” 4 Mpawo bantu bakayimvwi mpawaawo bakati: “Ulikutukila mupayizi mupati waLeza?” 5 Pawulu wakati: “Beenzuma, teendazi pe kuti mupayizi mupati nkaambo kulilembedwe kuti, ‘Toyelede kwaamba majwi mabi kumweendelezi wabantu bakulindinywe.’”
6 Pawulu kazi kuti imwi nkamu yakali yabaSadusi alubo imwi yakali yabaFarisi, wakoompolola muNkuta Mpati yamaJuda kati: “Nibaalumi, nibeenzuma, ime ndili muFarisi, mwana wamuFarisi, ndilikubetekwa akaambo kabulangilizi mbundilaabo, bwakuti bafwide bazoobusigwa.” 7 Naakaamba oobo, kwakaba kukazyania kupati aakati kabaFarisi abaSadusi. Mpawo nkuta yakaanzaana. 8 Nkaambo baSadusi baamba kuti taakwe kubusigwa naakuti ngilozi naakuti chilenge chamuuya, pesi baFarisi balazitambula* zyoonse eezi. 9 Nkinkaako, kwakaba lupyopyongano lupati alubo bamwi balembi bakabunga kabaFarisi, bakanyampuka mpawo bakasaanguna kukazya chabukali kabati: “Taakwe chintu chibi nchitwabona mumuntu ooyu, pesi kuti kakuli chilenge chamuuya naakuti ngilozi yakaambuula anguwe—.” 10 Kukazyania ooku nikwakakomena loko, mweendelezi wamasoja wakayoowa kuti balakonzya kumukwamuna Pawulu, mpawo wakalayilila masoja kuti baseluke, bakamugwisye aakati kabo mpawo bamutole kunkambi yamasoja.
11 Pesi busiku bwakatobela, Mwaami wakayimikila aafwiifwi anguwe mpawo wakati: “Utayoowi pe. Mbuli mbwaapa bukamboni buzwide atala andime muJerusalema, weelede kuyoopa bukamboni akuRoma.”
12 Nibwakacha, maJuda bakayanduula nzila yakuti bamujaye alubo bakakonkezya kuti tabakoolya pe nikuba kunywa kusikila bamujaye Pawulu. 13 Baalumi bakachitide chikonke chakuti bayanda kumujaya, bakali kwiinda ku 40. 14 Baalumi aaba, bakayinka kubapati babapayizi akubaalu mpawo bakati: “Twachita chikonke chakuti, tatukoolya pe kusikila tumujaye Pawulu. 15 Nkinkaako, inywe abamuNkuta Mpati, amukabuzye mweendelezi wamasoja kuti amuselusye kulindinywe, kube mbuli kuti muyanda kukalangisisya lubo kaambo kakwe. Pesi katanasika kulindinywe, iswe tunooli twalibambila kuti tumujaye.”
16 Nikuba oobo, mwana wamuchizi waPawulu naakamvwa kuti maJuda bakali kuyanda kubwatilila Pawulu, wakanjila munkambi yamasoja mpawo zintu eezi wakazibuzya Pawulu. 17 Pawulu wakayita umwi mupati wamasoja mpawo wakamubuzya kuti: “Yinka aamulombe ooyu kumweendelezi wamasoja, nkaambo kuli zimwi zintu nzyayanda kumubuzya.” 18 Nkinkaako, mupati wamasoja wakamubweza wiinkaawe kumweendelezi wamasoja, mpawo wakamubuzya kuti: “Pawulu musungwa wandiita alubo wandibuzya kuti ndize amulombe ooyu kulinduwe, nkaambo kuli zimwi zintu nzyayanda kukubuzya.” 19 Mpawo mweendelezi wamasoja wakajata mulombe ooyo kukuboko, wamutola kumbali mpawo wakati: “Uyanda kundibuzyaanzi?” 20 Mulombe ooyo wakati: “MaJuda bazuminana kuti bazookukumbile kuti uselusye Pawulu aye kuNkuta Mpati juunza, kakubaanga kuli zimwi nzibayanda kuziba atala akaambo kakwe. 21 Pesi utazumini kuti bakuyunge, nkaambo baalumi bayinda ku 40 balimubwatilide, alubo bakonkezya kuti tabakoolya pe nikuba kunywa, kusikila bamujaye. Lino balibambila alubo balindila nduwe kuti ubazumizye.” 22 Nkinkaako, mweendelezi wamasoja wakaleka mulombe ooyu kuti ayinke, naakamubuzya kuti: “Utabuzyi muntu pe kuti wandibuzya zintu eezi.”
23 Mpawo mweendelezi wamasoja wakayita bapati bamasoja babili alubo wakababuzya kuti: “Amubweze masoja aali 200, basimabbiza bali 70 abasimasumu bali 200, mwiinke kuKkesariya kuma 9* mansiku. 24 Alubo Pawulu mumupe mabbiza ngatatante, kuchitila kuti akasike kabotu kumweendelezi Felekisi.” 25 Mpawo mweendelezi wamasoja wakalemba lugwalo lwakali kuti:
26 “Ime ndiKkilawudiyasi Lusiyasi, ndilikukulembela numweendelezi Uulemekwa Felekisi. Ndakujuzya! 27 Mwaalumi ooyu wakajatwa aamaJuda alubo bakali kuyanda kumujaya, pesi ndakafwambaana kusika amasoja aangu kuti ndimuvune nkaambo ndakamvwa kuti muRoma. 28 Mbukunga ndakali kuyanda kuziba kuti nkamboonzi nibakali kumupa mulandu, ndakamuselusya mpawo ndakamutola muNkuta Mpati yamaJuda. 29 Mpawo ndakajana kuti bakali kumupa mulandu uuli atala aMulawu wabo pesi kakutakwe chintu nichiba chimwi chakali kukonzya kupa kuti ajayigwe naakuti asungwe. 30 Mbukunga ndakamvwa kuti bakapangana kujaya mwaalumi ooyu, ndamweeta kulinduwe, alubo aabo bali aatwaambo anguwe, ndibalayilila kuti baze bazoowambe twaambo ntubalaato atala amwaalumi ooyu kunembo lyako.”
31 Nkinkaako, masoja bakachita nzibakabuzigwa mpawo bakabweza Pawulu bayinkaawe mansiku ku-Antipatri. 32 Mubuzuba bwakatobela, masoja beenda aamawulu bakaleka basimabbiza kuti beendaawe mpawo bo bakabweeda kunkambi yamasoja. 33 Basimabbiza bakasika kuKkesariya mpawo bakapa mweendelezi lugwalo alubo bakasiya Pawulu kulinguwe. 34 Mweendelezi ooyu wakabala lugwalo oolo, mpawo wakabuzya kuti uzwa kuchilikiti chili, wakaziba kuti uzwa kuKkilikkiya. 35 Mpawo wakabuzya Pawulu kuti: “Kaambo kako ndizookalanga-langa buzwide nibasika aabo bali aakaambo anduwe.” Alubo wakalayilila kuti Pawulu alindwe mumuunzi wabwaami waHerodi.