Makani Aakalembwa aaLukka
8 Nikwakayinda chiindi chifwiifwi biyo, wakeenda mumyuunzi amutuunzi kayabukambawuka akwaambilizya makani mabotu aaBwaami bwaLeza. Wakalaamwi abali Kkumi Ababili, 2 kuswaanizya abamwi banakazi bakagwisidwe myuuya mibi akusilikwa malwazi. Aakati kabo, kwakali Mariya, ooyo wakali kwiitwa kuti Magadalina, wakagwisidwe madimoni aali musanu aabili, 3 Jowana mwanakazi waKkuza sikulanga-langa zintu zyamung’anda yaHerodi, Susana, abamwi banakazi biingi bakali kubagwasya aazintu zyabo.
4 Nkamu mpati yabantu niyakabunganaamwi abaabo bakali kuza kulinguwe kabazwa mumuunzi amuunzi, wakababuzya chikozyanisyo chakuti: 5 “Sikubyala wakaya kukubyala mbuto yakwe. Naakali kubyala, imwi yakawida kumbali aanzila yakalyatuukwa, alubo bayuni bakujulu bakayilya. 6 Imwi yakawida aamwaala, mpawo niyakamena yakapya nkaambo teekwakalikwe butete pe. 7 Imwi yakawida mumaamvwa mpawo maamvwa akakomenaayo, ayisyanikizya. 8 Pesi imwi yakawida aanyika mbotu, mpawo niyakamena, yakazyala michelo kwaziindi zyiindulwidwe tuli 100.” Naakamaninsya kwaamba zintu eezi, wakoompolola ajwi pati kati: “Ooyo uuli aamatwi aamvwa, amvwe.”
9 Pesi basikwiiya bakwe bakamubuzya kuti chikozyanisyo eechi chaambaanzi. 10 Wakati: “Inywe mwakapegwa kumvwisisisya nsiswa zisalala zyaBwaami bwaLeza pesi kulibamwi boonse, zintu eezi zinooli muzikozyanisyo, kuchitila kuti, nikuba kuti balalanga, bataboni pe, akuti nikuba kuti balamvwa, batazimvwisisisyi pe zyaambwa. 11 Mbobu bupanduluzi bwachikozyanisyo eechi: Mbuto, ndijwi lyaLeza. 12 Eeyo yakali kumbali aanzila, mbaabo bamvwa jwi mpawo Dyabbulosi ulasika, abweze jwi lili mumyoyo yabo kuchitila kuti batasyomi akuti bafutulwe. 13 Eeyo yakali aamwaala, mbaabo banga mbubatamvwe jwi, balitambula kabakondwa pesi tabakwe miyanda pe. Balasyoma kwachiindi chifwiifwi pesi aachiindi chakusunkwa, balaleka kusyoma. 14 Eeyo yakawida mumaamvwa, mbaabo bamvwa jwi pesi akaambo kakupambulwa aamakataazyo, abunoti, akulikondelezya kwamubuumi oobuno, balasyanikizigwa chakumaninina alubo tabazyali michelo iisima. 15 Eeyo yakali aanyika mbotu, mbaabo banga mbubatamvwe jwi amoyo uululeme alubo mubotu, balijatisisya mpawo bazyala michelo kabalisimya.
16 “Taakwe muntu uunga wayasya lambe, mpawo walivumba aachimwi chintu naakuti walibikka munsi aabulo, pesi ulibikka aachibikkilo chalambe kuchitila kuti aabo banjila mung’anda bamunikilwe. 17 Nkaambo taakwe chintu chisisidwe chitazooyubununwi alubo zintu zyoonse zivumbidwe kabotu-kabotu zizoozibinkana alubo zizooba aantanganana. 18 Nkinkaako, amuchenjelele nzila njimuswiililaayo, nkaambo kufumbwa ulaazyo, uzoopegwa zyiingi pesi ooyo uutakwe chintu, uzoonyangwa nichiba eecho nchayeeyela kuti ulaacho.”
19 Mpawo banyina abanike bakwe bakasika kulinguwe, pesi teebakakonzya pe kusika aafwiifwi anguwe akaambo kankamu yabantu. 20 Nkinkaako, bantu bakati kulinguwe: “Banyoko abanike bako baliimvwi aanze, bayanda kukubona.” 21 Mpawo wakabasandula kuti: “Baama abanike bangu mbaaba bamvwa jwi lyaLeza akuchita nzilyaamba.”
22 Bumwi buzuba Jesu abasikwiiya bakwe bakanjila mubwaato, mpawo wakati kulimbabo: “Atuzubukile mutaleeliya aalwizi.” Mpawo bakeenda. 23 Pesi nibakali kweenzya bwaato, Jesu wakoona. Mpawo kwakasika guwo pati mulwizi alubo bwaato bwabo bwakasaanguna kuzula maanzi zyakuti bakali baba mumapenzi. 24 Nkinkaako, bakayinka baakumubusya kabati: “Muyiisi, Muyiisi, twaamba kufwa!” Mpawo wakabuka wakalalila guwo amayuwe mpawo zyakabatama alubo kwakawumuna wii! 25 Mpawo wakati kulimbabo: “Ani lwaya kuli lusyomo lwanu?” Pesi bakayoowa loko alubo bakagamba, kabalikubuzyania kuti: “Muntu ooyu ngwani loko? Nkaambo ulakonzya kulayilila niliba guwo amaanzi mpawo zilamuswiilila.”
26 Mpawo bakasika kunkomwe, muchilawu chabantu bakuGerasa, chilangene aaGalili. 27 Jesu mbaakazwa biyo mubwaato, umwi mwaalumi wamumuunzi ooyo, wakali aadimoni wakaza kulinguwe. Mwaalumi ooyo wakali waba aachiindi chilamfu katazwaati zigogo alubo taakali kukkala aang’anda pe, pesi wakali kukkala kutubanda.* 28 Naakabona Jesu, wakoompolola, wawida kumawulu aakwe mpawo wakati ajwi pati: “Ndileenzi anduwe Jesu, Mwana waLeza Sijulu Lyamajulu? Ndakombelela, utandipenzyi pe.” 29 (Nkaambo Jesu wakaliswini kabuzya muuya mubi kuti uzwe mumwaalumi ooyo. Muuya ooyo, wakali waba aaziindi zyiingi kawumusikila* alubo wakali kusungwa aancheni ansimbi alubo wakali kulindwa. Pesi wakali kuzidunsula zyaanzyo eezyo alubo dimoni lyakali kupa kuti aye kundawu zitakwe bantu.) 30 Jesu wakamubuzya kuti: “Nduweni zina lyako?” Wakati: “Ndime Ligiyoni,” nkaambo wakanjidwe aamadimoni miingi. 31 Madimoni akaliswini kumukombelezya kuti ataalayilili kuti aye mumulindi uutagoli. 32 Tanga pati lyangulube lyakali kuchela aachilundu, nkinkaako, akamukombelezya kuti aazumizye kuti akanjile mungulube eezyo, mpawo wakaazumizya. 33 Madimoni akazwa mumwaalumi ooyo aakunjila mungulube mpawo tanga eelyo lyakalundumukila kujeleele,* mpawo zyakawida mulwizi zyayinkila. 34 Pesi basikuzyeembela nibakabona zyakachitika, bakachija baakwaamba zintu eezi mumuunzi amutuunzi twakali aafwiifwi.
35 Mpawo bantu bakazwa kuti bakabone zyakali zyachitika. Bakasika kuli Jesu, mpawo bakajana mwaalumi wakali wagwisigwa madimoni, kazweete, kali waba kabotu mumizeezo alubo kakkede kumawulu aaJesu mpawo bakayoowa loko. 36 Aabo bakali babona zyakachitikide, bakabuzya aabo bakasikide mbaakaponesegwa mwaalumi wakali aamadimoni. 37 Mpawo bantu biingi bakali kuzwa mumyuunzi yakazyungulukide chilawu chabantu bakuGerasa, bakakumbila Jesu kuti azwe mundawu yabo nkaambo bakayoowede loko. Nkinkaako, wakatanta bwaato kuti ayinke. 38 Nikuba oobo, mwaalumi wakagwisigwa madimoni wakaliswini kamukombelezya kuti atamusiyi pe, pesi Jesu wakamubuzya kuti abweede kati: 39 “Bweeda kulindinywe alubo wiinkilile kunembo kwaamba nzyaakuchitila Leza.” Nkinkaako, wakeenda kayabwaambilizya mumuunzi woonse nzyaakachitilwa aaJesu.
40 Jesu naakabweeda, nkamu yabantu yakamutambula kabotu nkaambo boonse bakali kumulangilila. 41 Lino bona, umwi mwaalumi uutegwa Jayirosi wakasika. Mwaalumi ooyu wakali mweendelezi wachikombelo. Mpawo wakawida kumawulu aaJesu, wasaanguna kumukombelezya kuti ayinke kung’anda yakwe, 42 nkaambo mwanaakwe musimbi wakazyedwe aalikke, ooyo wakali aaminyaka iisika ku 12, wakali waamba kufwa.
Jesu naakali kuyabweenda, bantu bakali kuyabumusyanikizya. 43 Kwakali umwi mwanakazi wakali waba aaminyaka iili 12 kali aabulwazi bwakuzwa ganzi* alubo taakwe muntu wakali kukonzya pe kumusilika. 44 Wakamuzida kusule, mpawo wakajata mupeto wachigogo chakwe chaajulu mpawo ganzi lyakaleka kuzwa mpawaawo. 45 Mpawo Jesu wakati: “Ngwani wandijata?” Bantu boonse nibakali kukaka, Petro wakati: “Muyiisi, bantu balikuzyungulukide alubo balikukusyanikizya.” 46 Pesi Jesu wakati: “Kuli muntu wandijata, nkaambo ndamvwa kuti manguzu azwa mulindime.” 47 Mwanakazi ooyo naakabona kuti bamubona, wakaza kalikuzazama mpawo wakaliwaala kunembo lyaJesu, mpawo wakaamba kunembo lyabantu boonse chakapede kuti amujate ambaakaponesegwa chakufwambaana. 48 Pesi wakati kulinguwe: “Mwanaangu, lusyomo lwako lwakuponia. Yinka muluumuno.”
49 Naakachili kwaambuula, mwiiminini wamweendelezi wachikombelo wakasika, mpawo wakati: “Mwanaako wafwa, utachimukataazyi pe Muyiisi.” 50 Jesu naakamvwa oobo, wakabuzya Jayirosi kuti: “Utayoowi pe, iwe syoma biyo, mwanaako ulapona.”* 51 Naakasika aang’anda, taakwe ngwaakazumizya kuti anjilaawe mung’anda, kunze kwaPetro, Johane, Jakkobo abazyali bamwana. 52 Pesi bantu boonse bakali kulila, kabalyuuma aatwaango akaambo kakuusa akaambo kamwana. Nkinkaako, Jesu wakati: “Mutalili pe, nkaambo mwana tafwide pe pesi ulikoona.” 53 Mpawo bakasaanguna kumuseka kabalikumufubaazya, nkaambo bakalizi kuti mwana wafwa. 54 Pesi wakamujata kuboko, wamwiita kati: “Yoomwana, buka!” 55 Mpawo muuya wakwe wakaboola* mpawo wakabuka mpawaawo alubo Jesu wakati apegwe chakulya. 56 Bazyali bakwe bakabotelwa loko, pesi Jesu wakababuzya kuti batazibuzyi muntu pe zintu eezi zyakali zyachitika.