Kulonga
35 Mozesi wakazoobunganizya mbungano yoonse yama-Israyeli mpawo wakati kulimbabo: “Nzezi nzyaalayilila Jehova kuti zichitwe: 2 Mulakonzya kubeleka kwamazuba aali musanu alimwi, pesi buzuba bwamusanu aabili, bulaba buzuba busalala kulindinywe, ndisabata lyakupumuna chakumaninina kuli Jehova. Kufumbwa muntu uuchita mulimu mubuzuba oobo, ulajayigwa. 3 Mutakutuli mulilo mundawu zyoonse nzimukkala mubuzuba bwaSabata.”
4 Mpawo Mozesi wakati kumbungano yoonse yama-Israyeli: “Nzezi nzyaalayilila Jehova, 5 ‘Amumupe zipo Jehova. Kufumbwa uuli aamoyo uuyanda, ayete chipo kuli Jehova: changolida, chansiliva, chakkopa, 6 chabusumyo bwabbuluu, chawulu yapepulu, chabusumyo busalala, chamulembo mubotu, chaboya bwampongo, 7 chazikumba zyabagutu zyakanikwa mumusila uusalala, chazikumba ziteteete,* chamapulanga aamukoka, 8 chamafuta aamalambe, chabbalisamu yakupanga mafuta aakunanika aatununkilizyo, 9 chamabwe aa-onikisi aamwi mabwe aakubikka aakabaki kabupayizi akukagogo kakukaango.
10 “‘Bantu boonse bali aaluzibo* aakati kanu, abaze bazoopange zintu zyoonse Jehova nzyaalayilila, 11 nkukwaamba, tente lyakukombela atente lyalyo achivumbyo chalyo, tupini twalyo amafulemu aalyo, mbalo zyalyo, mapila aalyo, zikkazikizyo zyalyo; 12 Bbokesi azisamu zyalyo, chivunisyo, kketeni lyakujala; 13 tebbulu azisamu zyalyo azibelesyo zyalyo zyoonse achinkwa chachitondeezyo; 14 chibikkilo chamalambe aakumunisya azibelesyo zyacho amalambe aacho amafuta aakumunisya; 15 chipayililo chatununkilizyo azisamu zyacho; mafuta aakunanika atununkilizyo; kketeni lyakumanjililo aatente lyakukombela; 16 chipayililo chazipo zitentwa ansefa yacho yakkopa, zisamu zyacho azibelesyo zyacho; bbavu achikkalilo chalyo; 17 makketeni aalubuwa, mapila aalo azikkazikilo zyawo; kketeni lyakumanjililo aalubuwa; 18 nkanka zyatente lyakukombela azyalubuwa antambo zyazyo; 19 zigogo zibotu zyakubelesya mundawu iisalala, zigogo zisalala zya-Aroni mupayizi azigogo zyabana bakwe batabeleke kabali bapayizi.’”
20 Mbungano yoonse yama-Israyeli yakazwa kunembo lyaMozesi. 21 Mpawo muntu woonse wakali aamoyo uuyanda alubo wakali kutumwa aamoyo wakwe wakeetela Jehova chipo chakuti chibelesegwe kutente lyakuswaanganina akumilimu yalyo yoonse akuzigogo zisalala. 22 Baalumi abanakazi bakali aamyoyo iizumina bakaliswini kweeta nkopela mbotu, malangu-langu, nweenwe azimwi zintu zyakulibotya kuswaanizya azintu zyoonse zyangolida. Boonse bakapa Jehova zipo zyabo* zyangolida. 23 Bantu boonse bakali aabusumyo bwabbuluu, wulu yapepulu, busumyo busalala, mulembo mubotu, boya bwampongo, zikumba zyabagutu zinikidwe mumusila uusalala azikumba ziteteete* bakazyeeta. 24 Bantu boonse bakali aazipo zyansiliva angolida bakazipa Jehova alubo bantu boonse bakali aamapulanga aamukoka aakali kukonzya kubelesegwa kumulimu ooyu bakaayeta.
25 Banakazi boonse bakali aaluzibo bakoosa aamaboko aabo mpawo bakeeta nzibakali boosa nkukwaamba busumyo bwabbuluu, wulu yapepulu, busumyo busalala abusumyo bubotu. 26 Banakazi boonse bakali aaluzibo alubo bakali kutumwa aamyoyo bakoosa boya bwampongo.
27 Basilutwe bakeeta mabwe aa-onikisi aamwi mabwe aakeelede kubikkwa aakabaki kabupayizi akukagogo kakukaango 28 abbalisamu amafuta aakumunisya amafuta aakunanika aatununkilizyo. 29 Baalumi abanakazi boonse bakali kutumwa aamyoyo yabo bakeeta zimwi zintu zyakali kuzoobelesegwa mumulimu Jehova ngwaakalayilila Mozesi kuti uchitwe. Ma-Israyeli bakazyeeta kazili chipo chakuliyandila kuli Jehova.
30 Mpawo Mozesi wakati kuma-Israyeli: “Amubone, Jehova wasala Bbezaleli mwana wa-Uri mwana waHuri wamusyobo waJuda. 31 Wamuzuzya muuya waLeza akumupa busongo, kumvwisisisya aluzibo lwakupanga zintu zyamisyobo yoonse, 32 lwakupanga zintu zibotu loko kabelesya ngolida, nsiliva akkopa 33 aluzibo lwakunengulula akusekka mabwe alwakupanga zintu zyoonse zibotu kabelesya mapulanga. 34 Leza wapa kuti we a-Oholiyabbu mwana wa-Ahisamakki wamusyobo waDani bakonzye kuyiisya bantu. 35 Wabazuzya luzibo lwakuti bachite milimu yoonse yakupanga zintu, yakusuminina, yakuluka kababelesya busumyo bwabbuluu, wulu yapepulu, busumyo busalala, busumyo bubotu ayakupanga milembo. Baalumi aaba bazoochita milimu yoonse akupanga zintu zyoonse.