Makani Aakalembwa aaJohane
7 Nizyakamana zintu eezi, Jesu wakali kweendeenda muGalili, nkaambo taakali kuyanda kuchita oobo muJudiya, mbukunga maJuda bakali kuyanda kumujaya. 2 Nikuba oobo, Pobwe lyamaJuda lyaMatente* lyakali lyaba aafwiifwi. 3 Nkinkaako, banike bakwe bakamubuzya kuti: “Zwa ookuno uye muJudiya, kuchitila kuti basikwiiya bako ambabo babone milimu njulikuchita. 4 Nkaambo muntu uuyanda kuzibinkana, taakwe chintu nchachita kalikusisikizya. Kuti kulikuchita zintu eezi, litondeezye kunyika.” 5 Kwaamba choonzyo, banike bakwe teebakalikwe lusyomo pe mulinguwe. 6 Nkinkaako, Jesu wakati kulimbabo: “Chiindi changu tachinasika pe pesi chanu chikkala kachiliwo. 7 Nyika tayikwe kaambo kapa kuti imuzonde pesi ime ilandizonda, nkaambo ndipa bukamboni bwakuti milimu yayo mibi. 8 Inywe amwiinke kupobwe pesi ime tandinayinka pe nkaambo chiindi changu tachinasika pe.” 9 Naakazwa kubabuzya zintu eezi, wakasyaala muGalili.
10 Pesi banike bakwe nibakatanta kabaya kupobwe, anguwe wakayinka chakusisikizya kutali aantanganana. 11 Nkinkaako, maJuda bakasaanguna kumuyanduula kupobwe kabati: “Ulikuli mwaalumi uulya?” 12 Alubo kwakaba kuvwiya-vwiya kwiingi atala anguwe munkamu yabantu. Bamwi bakali kwaamba kuti: “Jesu muntu uuli kabotu.” Pesi bamwi bakali kuti: “Jesu teemuntu uuli kabotu pe, weena bantu.” 13 Nikuba oobo, taakwe muntu wakali kwaambuula atala anguwe aantanganana, nkaambo bakali kuyoowa maJuda.
14 Pobwe nilyakaba aakati, Jesu wakanjila mutempele mpawo wakasaanguna kuyiisya. 15 MaJuda bakagamba mpawo bakati: “Mwaalumi ooyu wakalujana kuli luzibo lwaMagwalo* kakuli tayiide pe?”* 16 Pesi Jesu wakabasandula kuti: “Zintu nzindiyiisya teezyangu pe, pesi nzizyayooyo wakandituma. 17 Nkinkaako, kuti muntu kayanda kuchita kuyanda kwaLeza, ulaziba kuti zintu nzindiyiisya zizwa kuli Leza na naakuti ndaambuula nzindiliyeeyela. 18 Kufumbwa muntu waambuula zyakuliyeeyela, uliyandwiida bulemu bwakwe pesi muntu uuyanduula bulemu bwayooyo wakamutuma, ngwakasimpe alubo taakwe kutalulama pe mulinguwe. 19 Mozesi wakamupa Mulawu, teembubo na? Pesi taakwe naaba umwi aakati kanu uulikuutobela. Nkamboonzi nimuyanda kundijaya?” 20 Mpawo bantu bakati: “Ulaadimoni we, ngwani uuyanda kukujaya?” 21 Mpawo Jesu wakati kulimbabo: “Ndachita chintu chimwi biyo alubo chamugambya moonse. 22 Akaambo kamakani aaya, Mozesi wakamupa mulawu wakuti mupalulwe—mulawu ooyu teewakazwa kuli Mozesi pe, pesi wakazwa kumasianyookulu—alubo mulamupalula muntu musabata. 23 Kuti kamupalula muntu musabata kuchitila kuti mutatyoli mulawu waMozesi, nkamboonzi nimwandiluvuukila aabukali akaambo kakuti ndakaponia muntu musabata? 24 Amuleke kubeteka kwiinda mukulanga chiimo chamuntu, pesi amubeteke munzila iiluleme.”
25 Mpawo bamwi bantu bakkala muJerusalema bakasaanguna kwaamba kuti: “Ani ooyu tee nguumwaalumi ngubayanda kujaya na? 26 Pesi amubone, ulikwaambuula kaangunukide alubo taakwe nzibalikwaamba pe. Sa beendelezi balizi kuti ooyu nguuKkristu? 27 Nikuba oobo, swe tulikuzi nkwazwa mwaalumi ooyu, pesi naazoosika Kkristu, taakwe utazoozibe pe kuti uzwa kuli.” 28 Mpawo Jesu naakali kuyiisya mutempele, wakoompolola kati: “Mulindizi alubo mulikuzi nkundizwa. Teendakaza aakuyanda kwangu pe, pesi Ooyo wakandituma ngwachoonzyo alubo tamumuzi pe. 29 Ime ndilimuzi nkaambo ndilimwiiminini wakazwa kulinguwe alubo Ooyo ngunguwe wakandituma.” 30 Nkinkaako, bakasaanguna kuyanduula nzila yakuti bamujate pesi taakwe wakabikka kuboko kwakwe aalinguwe, nkaambo chiindi chakwe teechakalinasika pe. 31 Nikuba oobo, bantu biingi bakaba aalusyomo mulinguwe alubo bakali kwaamba kuti: “Kkristu aazoosika, uzoochita zigambyo zyiingi loko na kwiinda mwaalumi ooyu?”
32 BaFarisi bakamvwa bantu kabalikuvwiya-vwiya atala azintu eezi zili atala anguwe alubo bapati babapayizi abaFarisi bakatuma balindi kuti bakamujate.* 33 Mpawo Jesu wakati: “Ndinooli aandinywe kwachiindi chifwiifwi biyo, kanditanabweeda kuli Yooyo wakandituma. 34 Muzoondiyanduula pesi tamuzoondijani pe alubo ooko nkundinoobede tamukonzyi pe kukusika.” 35 Nkinkaako, maJuda bakati muli chabo-chabo: “Ani muntu ooyu uyanda kuya kuli, nalikuti tatuzoomujani pe? Tee uyanda kuyookkala aamaJuda bamwayikide mundawu zyamaGrikki kuti ayiisye maGrikki? 36 Ani ulikutyeni nalikuti, ‘Muzoondiyanduula pesi tamuzoondijani pe alubo ooko nkundinoobede tamukonzyi pe kukusika’?”
37 Mubuzuba bwamamanino, mubuzuba bupati bwapobwe, Jesu wakayimikila mpawo wakoompolola kati: “Kuti kakuli muntu uuli aanyota, aze kulindime azoonywe. 38 Kufumbwa uuba aalusyomo mulindime, mbuli mbulwaamba lugwalo: ‘Tulonga twamaanzi aapa buumi, tuzooyenda mukati mulinguwe.’” 39 Nikuba oobo, Jesu wakali kwaambuula atala amuuya ngubakali kuyanda kutambula aabo bamusyoma, nkaambo kuchiindi eecho, taakwe wakali watambula muuya uusalala nkaambo Jesu taakalinapegwa bulemu pe. 40 Bamwi bantu bakali munkamu nibakamvwa majwi aaya, bakasaanguna kwaamba kuti: “Kwaamba choonzyo, muntu ooyu mupolofita.” 41 Bamwi bakali kuti: “Ooyu nguKkristu,” pesi bamwi bakali kuti: “Kkristu weelede kuzwa kuGalili na? 42 Ani magwalo taambi na kuti, Kkristu uzoozwa kubana baDavida akuBbetelehema, muunzi ngwaakali kukkala Davida?” 43 Nkinkaako, bantu bakasaanguna kukazyania atala anguwe. 44 Bamwi aakati kabo bakali kuyanda kumujata,* nikuba oobo taakwe wakabikka kuboko kwakwe aalinguwe.
45 Balindi nibakabweeda kubapati babapayizi akubaFarisi, baFarisi bakati kulimbabo: “Mwalekelaanzi kuzaawe?” 46 Balindi bakasandula kuti: “Tatunabona muntu waambuula oobuya pe!” 47 Mpawo baFarisi bakati kulimbabo: “Teebiya andinywe mwaakweenwa? 48 Kuli mweendelezi naakuti muFarisi wamusyoma na? 49 Pesi bantu aaba batazi Mulawu balitukidwe.” 50 Mpawo umwi wabo uutegwa Nikkodimasi, wakayinkide kuli Jesu bumwi buzuba, wakati kulimbabo: 51 “Mulawu wesu waamba kuti, tweelede kumvwa makani kumuntu ulaamulandu saansi akuziba nzyaakachita, nitutazoomubeteke, teembubo na?” 52 Mpawo bakamusandula kuti: “Teebiya anduwe uzwa kuGalili? Yanduulisisya ubone, taakwe mupolofita uunga ulazwa kuGalili pe.”*