Baami Wakusaanguna
14 Aachiindi eecho, Abbija mwana mulombe waJerobbowamu wakachiswa. 2 Nkinkaako, Jerobbowamu wakabuzya mwanakazi wakwe kuti: “Ikaka, buka ulisise kuchitila kuti bantu batakuzibi kuti uli mwanakazi waJerobbowamu, wiinke kuShilo. Bona! Ahija mupolofita uli nkukooko. Nguwe wakaamba kuti ndizooba mwaami wabantu aaba. 3 Bweza zinkwa zili kkumi, makkekke, akankuli kabuchi wiinke kulinguwe. Mpawo uyookubuzya zitachitike kumwana.”
4 Mwanakazi waJerobbowamu wakachita nzyaakamubuzya. Wakanyampuka waya kuShilo mpawo wakasika kung’anda ya-Ahija. Meso aa-Ahija akalijulikide, pesi taakachili kubona pe akaambo kakuchembaala.
5 Pesi Jehova wakali wabuzya Ahija kuti: “Ngoyu mwanakazi waJerobbowamu ulikuza kuti azoobuzye makani kulinduwe aali atala amwanaakwe, nkaambo ulikuchiswa. Ndilakubuzya nzutamubuzye.* Naasika ulalisisa kuti utamuzibi pe.”
6 Ahija mbaakawumvwa biyo musindo wamawulu aamwanakazi ooyu naakali kunjila kumulyango, wakati: “Njila mwanakazi waJerobbowamu. Nkamboonzi nulikulisisa? Ndatumwa kuti ndikubuzye mulumbe uuchisa. 7 Yinka ukabuzye Jerobbowamu kuti, ‘Nzezi nzyaamba Jehova Leza wa-Israyeli: “Ndakakubusya aakati kabantu bako kuti ndikubikke kuba muzulwidi wabantu bangu ma-Israyeli. 8 Mpawo ndakadelula bwaami kung’anda yaDavida ndabupa nduwe. Pesi iwe teewaba mbuli mubelesi wangu pe Davida, ooyo wakabamba milawu yangu akunditobela amoyo wakwe woonse, kachita ziluleme kupela mumeso aangu. 9 Pesi iwe wachita zibi zyiingi kwiinda aabo boonse bakakusaangunina. Walipangila umwi leza azikozyano zyansimbi* kuti undinyemye, alubo ndime ngwaafutatila. 10 Akaambo kazeezi, ndili kwiiyetela mapenzi ng’anda yaJerobbowamu, alubo ndizoonyonyoona* baalumi* boonse bamung’anda yaJerobbowamu, kuswaanizya abatagwasyi abatakwe manguzu mu-Israyeli. Ndizooyayila ng’anda yaJerobbowamu, mbuli muntu mbakukulula mafumba kusikila woonse amana! 11 Kufumbwa wamung’anda yaJerobbowamu uutazoofwide mumuunzi, uzooligwa aabankala. Kufumbwa uutazoofwide musokwe, uzooligwa aabayuni bamujulu, nkaambo Jehova mbaamba.”’
12 “Lino nyampuka. Yinka kumuunzi wako. Mbutanjile biyo mumuunzi, mwana ulafwa. 13 Ma-Israyeli boonse bazoomulila akumuzikka, nkaambo nguwe alikke wamumpuli yaJerobbowamu uutazoozikkwe mukabanda, nkaambo nguwe alikke wamung’anda yaJerobbowamu, Jehova Leza wa-Israyeli ngwaajana kali aachimwi chintu chibotu mulinguwe. 14 Jehova uzoobusya mwaami wa-Israyeli uutazoonyonyoone* ng’anda yaJerobbowamu kuzwa mubuzuba oobo kaziya kunembo, niliba lino biya. 15 Jehova uzoowuma Israyeli mbuli tete liteketa mumaanzi, uzoonyukula Israyeli munyika eeyi mbotu njaakapa masianyinakulu, alubo uzoobamwayila mutala aaMulonga,* nkaambo bakalipangila zisamu zisalala* kabali kunyemya Jehova. 16 Leza uzoolekelezya Israyeli akaambo kazibi Jerobbowamu nzyaachita anzyaapa kuti Israyeli achite.”
17 Mpawo mwanakazi waJerobbowamu wakanyampuka weenda waakusika kuTiriza. Mbaakasika biyo aamulyango wang’anda, mwana wakafwa. 18 Nkinkaako, bakamuzikka, alubo ma-Israyeli boonse bakamulila, kweendelana ajwi lyaJehova ndyaakali waamba kwiinda mumubelesi wakwe Ahija mupolofita.
19 Makani aachiindi woonse aali atala aJerobbowamu, mbaakalwana nkondo ambaakeendelezya, alilembedwe mubbuku lyamakani aachiindi aaziindi zyabaami ba-Israyeli. 20 Jerobbowamu wakeendelezya kwaminyaka iili 22. Kuzwa waawo, wakalazikwaamwi amasianyinakulu. Mwanaakwe Nadabbu wakaba mwaami mundawu yakwe.
21 Aachiindi nchicheecho, Rehobbowamu mwana waSolomoni wakali waba mwaami muJuda. Rehobbowamu wakali aaminyaka iili 41 naakaba mwaami. Wakeendelezya kwaminyaka iili 17 muJerusalema, muunzi Jehova ngwaakasala aakati kamyuunzi yoonse yamisyobo ya-Israyeli kuti abikke zina lyakwe. Banyina baRehobbowamu bakali kutegwa Naama mu-Amoni. 22 MaJuda bakali kuchita zibi mumeso aaJehova, alubo zibi nzibakachita zyakamunyemya loko kwiinda zibi zyakachitwa aamasianyinakulu. 23 Ambabo bakaliswini kuliyakila ndawu zyakukombela, mapila aasalala, akulipangila zisamu zisalala* aatulundu toonse, amunsi aaminsamu yoonse iifwefwema. 24 Alubo munyika eeyo kwakali mawuule baatempele bachaalumi. Bakachita zintu zyoonse zisesemya zyakali kuchitwa aazisi eezyo Jehova nzyaakatanda kunembo lyama-Israyeli.
25 Mumunyaka wamusanu wabweendelezi bwaMwaami Rehobbowamu, Mwaami Shishakki wa-Ijipita wakasika kuzoolwana Jerusalema. 26 Wakabweza zintu ziyandikana zyamung’anda yaJehova azintu ziyandikana zyamung’anda yamwaami.* Wakazibweza zyoonse kuswaanizya antobo zyangolida eezyo Solomoni nzyaakali wapanga. 27 Nkinkaako, Mwaami Rehobbowamu wakapanga ntobo zyakkopa* mundawu yazyo, alubo wakazibikka mukuboko kwabasilutwe babalindi,* aabo bakali kulinda mulyango wang’anda yamwaami. 28 Kufumbwa chiindi mwaami naakali kwiinka kung’anda yaJehova, balindi bakali kuzibweza, mpawo bakali kuzibweedezya kukaanda kabalindi.
29 Makani aachiindi woonse aali atala aRehobbowamu, azintu zyoonse nzyaakachita, taalembedwe na mubbuku lyamakani aachiindi aaziindi zyabaami baJuda? 30 Kwakali nkondo chiindi choonse aakati kaRehobbowamu aJerobbowamu. 31 Mpawo Rehobbowamu wakalazikwaamwi amasianyinakulu alubo wakazikkwaamwi amasianyinakulu muMuunzi waDavida. Banyina bakali kutegwa Naama mu-Amoni. Mwanaakwe Abbijamu* wakaba mwaami mundawu yakwe.