Samiyele Wachibili
5 Nikwakayinda chiindi, misyobo yoonse ya-Israyeli yakasika kuli Davida muHebburoni mpawo yakati: “Bona! Tuli zifuwa zyako anyama yako.* 2 Muchiindi chakayinda, Sawulu naakali mwaami wesu, nduwe wakali kuzulwida Israyeli munkondo nzyaakali kulwana.* Alubo Jehova wakati kulinduwe: ‘Uzooba mweembeli wabantu bangu ma-Israyeli alubo uzooba muzulwidi wama-Israyeli.’” 3 Nkinkaako, baalu boonse bama-Israyeli bakasika kumwaami kuHebburoni alubo Mwaami Davida wakapangana chizuminano ambabo kuHebburoni kunembo lyaJehova. Mpawo bakananika Davida kuti abe mwaami wa-Israyeli.
4 Davida wakali aaminyaka iili 30 naakaba mwaami alubo wakeendelezya kwaminyaka iili 40. 5 MuHebburoni wakeendelezya Juda kwaminyaka iili 7 amyeezi iili 6 alubo muJerusalema wakeendelezya ma-Israyeli boonse aJuda kwaminyaka iili 33. 6 Mwaami abaalumi mbaakalaabo bakayinka kuJerusalema kuti bakalwane maJebbusi bakali kukkala mundawu eeyo. Bakasampawula Davida kabati: “Tuzoonjili pe mundawu eeyi! Naba moofu amuntu uulemene bazookutanda.” Bakali kulibuzya kuti, ‘Davida tazoonjili pe oomuno.’ 7 Nikuba oobo, Davida wakabweza ndawu yakakwabilidwe yaZiyoni. Lino ndawu eeyo yiitwa kuti Muunzi waDavida. 8 Nkinkaako, mubuzuba oobo, Davida wakati: “Aabo batalwane maJebbusi beelede kweendela mumugelo wamaanzi kuti bakajaye ‘muntu uulemene amoofu,’ nkukwaamba aabo Davida mbazonda!” Nchikwaambwa kuti: “Moofu amuntu uulemene tabazoonjili pe mung’anda.” 9 Davida wakakkala kundawu yakakwabilidwe mpawo yakayitwa* kuti Muunzi waDavida. Alubo Davida wakasaanguna kuyaka miduli amayake aambi aaDundulundu* amuli zimwi ndawu mumuunzi ooyu. 10 Davida wakayinkilila kunembo kuba aamanguzu alubo Jehova Leza wamakamu wakali aanguwe.
11 Mwaami Hiramu wakuTire wakatuma batumwa kuli Davida alubo wakatumizya zisamu zyakkedari, ababezi, abasikuyaka miduli kababelesya mabwe alubo bakasaanguna kuyakila Davida ng’anda.* 12 Davida wakaziba kuti Jehova wakali wasimya bwaami bwakwe mu-Israyeli akuti wakali wasumpula bwaami bwakwe akaambo kabantu bakwe ma-Israyeli.
13 Davida wakakwata bamwi banakazi biingi muJerusalema naakazwa kuHebburoni alubo wakazyala bamwi bana balombe abasimbi. 14 Ngaya mazina aabana mbaakazyala kuJerusalema: Shamuwa, Shobbabbu, Natani, Solomoni, 15 Ibbara, Elishuwa, Nefegi, Jafiya, 16 Elishama, Eliyada a-Elifeleti.
17 MaFilisiti nibakamvwa kuti Davida wakali wananikwa kuti abe mwaami wama-Israyeli, maFilisiti boonse bakasika kuti bazooyanduule Davida. Davida naakamvwa makani aaya, wakakunukila kundawu yakuyubila. 18 MaFilisiti bakasika mpawo bakamwayikila muKkuti lyaRefayimu.* 19 Davida wakabuzya kuli Jehova kati: “Ndiinke na ndikabalwane maFilisiti? Ulababikka na mukuboko kwangu?” Jehova wakamusandula kuti: “Yinka, nkaambo kwaamba choonzyo, maFilisiti ndilababikka mukuboko kwako.” 20 Nkinkaako, Davida wakasika kuBbaala-perazimu alubo wakabajaya nkukooko. Mpawo wakati: “Jehova wayinka kunembo lyangu, wazunda basinkondoma mbuli maanzi miingi mbaadilizya muduli.” Nzizyo zyakapa kuti awuzike ndawu eeyo kuti Bbaala-perazimu.* 21 MaFilisiti bakasiya zibumbwa zyabo nkukooko alubo Davida abaalumi mbaakalaabo bakazibweza bayinkaazyo.
22 Mukuya kwachiindi, maFilisiti bakasika lubo mpawo bakamwayikila muKkuti lyaRefayimu. 23 Davida wakabuzya makani kuli Jehova, pesi Leza wakati: “Utabalulami pe, pesi zyunguluka kusule lyabo mpawo usike ubalwane kuli kunembo lyaziteyo zyabbakka. 24 Nutamvwe musindo uuli mbuli wabantu balikweenda aajulu aaziteyo zyabbakka, weelede kufwambaana kubweza ntaamu, nkaambo Jehova unooli weenda kunembo lyako kuti akajaye masooja aamaFilisiti.” 25 Nkinkaako, Davida wakachita mbuli Jehova mbaakamulayilila alubo wakajaya maFilisiti kuzwa kuGebba kusika kuGezeri.