Chiyubunuzyo chaJohane
19 Nizyakayinda zintu eezi, ndakamvwa chimwi chintu chakali mbuli jwi pati lyankamu mpati kujulu. Bakati: “Amutembawule Ja!* Lufutuko abulemu amanguzu nzizyaLeza wesu, 2 nkaambo mbeta zyakwe nzyakasimpe alubo zililuleme. Nkaambo wabeteka wuule pati lyakabisya nyika abwaamu* bwalyo, alubo walipa nzilyeelede akaambo kaganzi lyabazike bakwe lili mumaboko aalyo.”* 3 Aachiindi nchicheecho, bakaamba kachibili kuti: “Amutembawule Ja!* Alubo busi bulawuntumuka kuzwa aalindilyo kabuya kujulu kusikila kukabe kutamani.”
4 Mpawo baalu bali 24 azilenge zyuumi zine zyakavuntama aansi akukomba Leza, ooyo uukkala aachuuno chabwaami kaziti: “Ameni! Amutembawule Ja!”*
5 Alubo, jwi lyakazwa kuchuuno chabwaami kaliti: “Amutembawule Leza wesu, inywe nibazike bakwe boonse, bamuyoowa, baniini abapati.”
6 Alubo ndakamvwa chimwi chintu chakali kumvwikka mbuli jwi lyankamu mpati alubo chakali mbuli kuvuuma kwamaanzi miingi alubo chakali mbuli kudilima kupati. Bakati: “Amutembawule Ja,* nkaambo Jehova* Leza wesu, Singuzuzyoonse, wasaanguna kweendelezya kali mwaami! 7 Atubotelwe, tukondwe loko alubo tumupe bulemu, nkaambo muchado waMwanaambelele wasika alubo mwanakazi wakwe walibambila. 8 Kwaamba choonzyo, wazumizigwa kuzwaata chigogo ching’ayima, chibotu, chitakwe doti—nkaambo chigogo chibotu chiiminina milimu iiluleme yabasalali.”
9 Alubo yakandibuzya kuti: “Lemba kuti: Balabotelwa aabo batambidwe kuchilalilo chamuchado waMwanaambelele.” Mpawo yakandibuzya lubo kuti: “Aaya, majwi aaLeza aakasimpe.” 10 Mpawo ndakavuntama kumawulu aayo kuti ndiikombe. Pesi yakandibuzya kuti: “Peepe! Utachiti oobo pe! Ime ndili muzike biyo mbuli nduwe abakombinyokwe bali aamulimu wakupa bukamboni atala aJesu. Komba Leza! Nkaambo bukamboni buli atala aJesu ngiimakanze aabupolofita.”
11 Ndakabona julu kalijulikide, lino bona, kwakali bbiza lituba. Ooyo wakakkede aalindilyo wiitwa kuti Uusyomeka alubo Wakasimpe, alubo ulabeteka akulwana nkondo mubululami. 12 Meso aakwe mulilo uuvwilima, alubo kumutwe wakwe kuli ngowani zyiingi zyabwaami.* Ulaazina lilembedwe litazibinkene aawumwi muntu kunze kwakwe alikke, 13 alubo uzweete chigogo chaajulu chili aaganzi,* alubo wiitwa kuti Jwi lyaLeza. 14 Alubo, makamu aamasoja aakujulu akali kumutobela kaatantide mabbiza aatuba, alubo akazweete zigogo zibotu zituba, zitakwe doti. 15 Alubo munkanwa lyakwe mwakazwa panga damfu libosya, lyakunyonyoona zisi, alubo uzoozyeembela ankoli yansimbi. Mukuyungizya, ulyatuuka chikandilo chawayini chakunyema kwabukali bwaLeza Singuzuzyoonse. 16 Aachigogo chakwe chaajulu, nkukwaamba aachibelo chakwe, kulembedwe zina lyakuti, Mwaami wabaami aSimalelo wabasimalelo.
17 Alubo ndakabona imwi ngilozi kayiimvwi muzuba alubo yakoompolola ajwi pati mpawo yakabuzya bayuni boonse bawuluka mumulenga-lenga* kuti: “Amuze ookuno, mubunganaamwi kuchilalilo chipati chaLeza, 18 kuchitila kuti mulye nyama yabaami, anyama yabapati bamasoja, anyama yabantu bali aamanguzu, anyama yamabbiza ayabaabo bakkede aalingawo, anyama yabantu boonse, yabantu baangunukide kuswaanizya ayabazike ayabaniini abapati.”
19 Mpawo ndakabona munyama abaami banyika amakamu aamasoja aabo, kababungenaamwi kuti balwane ooyo wakakkede aabbiza ankamu yamasoja aakwe. 20 Mpawo munyama wakajatwa, kuswaanizya amupolofita wakubeja, ooyo wakali kuchita zitondeezyo kunembo lyamunyama, eezyo nzyaakabelesya kweena aabo bakatambula chitondeezyo chamunyama abaabo bakomba chibumbwa chawo. Kabachili bawumi, boonse bakawaalilwa mulwizi lwamulilo uuyaka aasalufa. 21 Pesi bamwi boonse bakajayigwa aapanga damfu lyakali kuzwa munkanwa lyayooyo wakakkede aabbiza. Alubo bayuni boonse bakakkuta nyama yabo.