Milimu yaBaapostoli
27 Nikwakasalwa kuti tuye ku-Itali abwaato, Pawulu abamwi basungwa bakabikkwa mumaboko aamupati wamasoja uutegwa Juliyasi, wamukabunga ka-Agasto. 2 Twakatanta bwaato bwakali kuzwa ku-Adramitiyamu bwakali bwaba aafwiifwi kunyampuka kuti bwiinde muzito zyakali muchilikiti cha-Asiya, mpawo twakeenda. Aristakko wakuMakkedoniya uuzwa kuTesalonikka wakali aandiswe. 3 Mubuzuba bwakatobela, twakasika kuSidoni mpawo Juliyasi wakamufwida luzyalo Pawulu, nkaambo wakamuzumizya kuti ayinke kubeenzinyina, kuti bakamugwasye aazintu nzyaakali kuyanda.
4 Nitwakazwa ooko, twakatanta bwaato mpawo twakayinda munsi aakasuwa kaKkupro, nkaambo kakatusitide kuguwo lyakali kuzwida nkutwakali kuya. 5 Mpawo twakeenda aakati kalwizi, twabembelezya Kkilikkiya aPamfiliya, twasika kuchito chili kuMira iili muLikkiya. 6 Nkukooko, mupati wamasoja wakajana bwaato bwaku-Alekizandriya bwakali kuya ku-Itali, mpawo wakati tutante mbubo. 7 Nitwakali kuyabweenda mbichaani-mbichaani abwaato kwamazuba miingi, twakazoosika kuKkanayido katuli toomba loko. Mbukunga guwo lyakali kutukachizya kuya kunembo, twakaya kuSalimone, ooko nkutwakakusitwa kuguwo kukasuwa kaKkrete. 8 Mpawo twakabembelezya kasuwa aaka katuli toomba loko mpawo twakazoosika kundawu iitegwa Zito Zibotu, yakali aafwiifwi amuunzi waLasiya.
9 Aachiindi eechi, kwakali kwayinda mazuba miingi alubo kwakali kwaabuyoosya kuti twiinkilile kunembo alweendo lwesu, nkaambo nikuba kulyiimya kulya kuchitwa muBuzuba Bwakumaninsya Milandu, kwakali kwiinda, nkinkaako Pawulu wakabapa muzeezo 10 kati: “Nibaalumi, ndibwene kuti lweendo lwesu oolu luyoopa kuti tunjile mungozi akuti tusweekelwe loko azintu zili mubwaato, abwaato kuswaanizya abuumi bwesu.” 11 Nikuba oobo, mupati wamasoja wakaswiilila sikweenzya bwaato amwini bwaato, kutali Pawulu. 12 Mbukunga chito eecho teechakali kukkalika pe muchiindi champeyo, biingi bakapa muzeezo wakuti, muchiindi champeyo tuye kuchito chaFonikisi, chili muKkrete. Chito eechi chili kubbazu lyakunyika nkwiili kubuzwezuba, akumusanza nkuuli kubuzwezuba.
13 Moya uuzwida kubbazu lyakumusanza nwaakawunga kabotu-kabotu, bakayeeya kuti makanze aabo azwidilila mpawo bakaangununa bwaato,* beenda kabali kubembelezya kasuwa kaKkrete. 14 Pesi, nikwakayinda chiindi chifwiifwi, kwakasika guwo pati litegwa Yurokkwilo* mpawo lyakawuminina aabwaato. 15 Mbukunga guwo eeli lyakali kuuminina changuzu aabwaato, bwaato bwakakachilwa kwiinka kwakali kuzwida guwo, nkinkaako twakabulekela kabuya butontwa aaguwo. 16 Mpawo twakayumbilwa kukasuwa kaniini kategwa Kkawuda, kakatusita kuguwo pesi kaato* kakasungilidwe kusule aabwaato kakali kutukataazya loko. 17 Nibakakanjizya mukati, bakabweza ntambo mpawo bakaanga bwaato kuti busime. Mbukunga bakali kuyoowa kuti bwaato bulakonzya kuyoosimpa mumuseele uuli kuSitisi,* bakatebezya ntambo zyaseyili, mpawo bakabuleka kabulikutontwa aaguwo. 18 Mbukunga bwaato bwakali kutontwa aaguwo changuzu, mubuzuba bwakatobela, bakasaanguna kugwisya zintu zyakali mubwaato kuti buube. 19 Mpawo mubuzuba bwachitatu, bakasowa zibelesyo zyabwaato.
20 Nikwakayinda mazuba miingi katutaboni zuba niziba nyenyeezi, twakawidwa aamvula mpati loko yakali aaguwo, mpawo kumamanino, bulangilizi mbutwakalaabo bwakuti tulafutuka, bwakasaanguna kumana. 21 Nikwakayinda mazuba miingi kakutakwe nchibalya, Pawulu wakayimikila aakati kabo, mpawo wakati: “Nibaalumi, kaansinga mwakaaswiilila majwi ngindakaamba, akuleka kuzwa kuKkrete, nikuli teetwanjila mupenzi eeli akusweekelwa aazintu. 22 Nikuba oobo, lino ndimusungwaazya kuti mutayoowi pe, nkaambo taakwe naaba uumwi uutafwe pe, bwaato mbubo butanyonyooke kupela. 23 Mansiku aayinda, ngilozi yaLeza ngundikomba alubo ngundibelekela mulimu uusalala, yakayimikila aafwiifwi andime 24 mpawo yakati: ‘Utayoowi pe Pawulu, weelede kuyooyimikila kunembo lyaKkesari, alubo bona, Leza wakupa bantu boonse mbuyobweendaabo mubwaato.’ 25 Nkinkaako, mutayoowi pe beenzuma, nkaambo ndilamusyoma Leza, kuti zizoochitika mbuli mbundakabuzigwa. 26 Nikuba oobo, tweelede kuyoosowelwa kuli kamwi kasuwa.”
27 Nibwakaba busiku bwachi 14, bwaato kabulikutontwa aaguwo mulwizi lwa-Adriya, aakati kamansiku, basikweenzya bwaato bakasaanguna kuyeeyela kuti bakali baba aafwiifwi kusika aanyika njumu. 28 Mbukunga bakali kuyanda kuziba kuti kubbila zisikaali, bakapima mpawo bakajana kuti akali mamita aali 36, mpawo bakeenda kwakasinzo bapima lubo mpawo bajana kuti akali mamita aali 27. 29 Mbukunga twakali kuyoowa kuti bwaato bulakonzya kuuminina aamabwe, basikweenzya bwaato bakawaala ngobyo zine mumaanzi, zyakali* kusule aabwaato alubo bakalombozya kuti kaansinga bwacha. 30 Pesi basikweenzya bwaato nibakasaanguna kweezya kuchija mubwaato, kabali kuchitaanga balikuselusya ngobyo zyakali kunembo abwaato, kakuli bakalikuselusya kaato, 31 Pawulu wakabuzya mupati wamasoja amasoja kuti: “Tamukoofutuka pe kunze kwakuti baalumi aaba bakkala mubwaato.” 32 Mpawo masoja bakadunsula ntambo zyakaangide kaato aako mpawo kakawida mumaanzi.
33 Kaziya kubuchedo, Pawulu wakasungwaazya bantu boonse kuti balye, kati: “Sunu mbuzuba bwachi 14 kamulikukataazikana akulangilila alubo taakwe nchimwali kulya pe. 34 Nkinkaako, ndimusungwaazya kuti mulye. Kuchita oobo kugwasya ndinywe, nkaambo taakwe nikaba kasusu kamwi kali mumutwe wawumwi awumwi wanu katanyonyooke.” 35 Naakaamba oobo, wakabweza chinkwa, walumba Leza kunembo lyabo boonse, wachikwamuna, mpawo wakasaanguna kulya. 36 Nkinkaako, boonse bakaba aachibindi mpawo bakasaanguna kulya. 37 Toonse nitwakali mubwaato, twakali 276. 38 Nibakalya bakkuta, bakasaanguna kwaasowela mulwizi masaka aawiiti, kuchitila kuti bwaato buube.
39 Nibwakacha, teebakayiziba pe ndawu eeyo, pesi bakabona ndawu yakali aamuseele, mpawo bakasala kuti bakayimikizye bwaato nkukooko, kuti kazikonzeka. 40 Mpawo bakadunsula ntambo zyangobyo, bazileka zyawida mulwizi, alubo aachiindi nchicheecho bakali kutebezya ntambo zyaanga nsoke. Nibakatalamuna seyili lyakali kunembo aabwaato kuti lilange kwakali kuzwa moya, bakalulama kunkomwe. 41 Bwaato bwakaakujimpa mumuseele mpawo chipanzi chakunembo chakabbaja, mpawo bwaato bwakakachilwa kweenda. Pesi chipanzi chakusule chakakwamuka chaba zipanzi-panzi akaambo kamayuwe aakali kuuminina changuzu. 42 Nizyakachitika zintu eezi, masoja bakayeeya kujaya basungwa nkaambo bakali kuyeeya kuti baladwaya mpawo bachije. 43 Pesi mupati wamasoja wakali kuyanda kumusisya kabotu Pawulu, nkinkaako, wakabakasya kuchita nzibakali kuyanda kuchita. Mpawo wakalayilila aabo bakonzya kudwaya kuti basotokele mulwizi kuchitila kuti bakasaangune kusika aanyika njumu, 44 mpawo aabo bakasyeede bakatobela, bamwi kabajisilidi aamapulanga, bamwi kabajisilidi aazipanzi zyabwaato. Nkinkaako, boonse bakasika kabotu aanyika njumu.