Ezra
4 Basinkondonyina baJuda aBbenjamini nibakamvwa kuti bantu bakaboola kuzwa mubuzike bakali kuyaka tempele lyaJehova Leza wa-Israyeli, 2 aachiindi eecho, bakasika kuli Zerubbabbeli akuli basilutwe bamaanda aamawisi mpawo bakati kulimbabo: “Atuyake aamwi andinywe nkaambo andiswe tukomba* Leza wanu alubo twakali kupa zipayizyo kulinguwe kuzwa mumazuba aaMwaami Esa-hadoni wa-Asiriya, wakatweeta okuno.” 3 Nikuba oobo, Zerubbabbeli, Jeshuwa abamwi basilutwe bamaanda aamawisi aama-Israyeli bakati kulimbabo: “Tamukwe cheelelo pe chakuyaka aamwi andiswe ng’anda yaLeza wesu, nkaambo atulikke tulabelekelaamwi tuyakile Jehova Leza wa-Israyeli mbuli mbaakatulayilila Mwaami Kkoreshi mwaami waPesiya.”
4 Mpawo bantu bamunyika eeyo bakayinkilila kunembo kubamana manguzu maJuda akubapa kuti baleke kuyaka. 5 Bakabbadala mali kuli basikupa lulayo kuti banyonganie makanze aabo mumazuba woonse aaMwaami Kkoreshi waPesiya kusika nikwakeendelezya Mwaami Dariyasi waPesiya. 6 Kumasaangunino aabweendelezi bwa-Ahasuwera, bakalemba lugwalo lwakutamikizya bantu bakali kukkala muJuda amuJerusalema. 7 Mumazuba aaMwaami Aritasasita waPesiya, Bbishilamu, Mitiredati, Tabbeli, abeenzinyina boonse bakalembela mwaami Aritasasita lugwalo. Lugwalo oolo bakalusandulwida mumulaka wachi-Aramu, bakalulemba mumabbii* aachi-Aramu.
8 * Rehumu mupati wabalupati-pati bamfulumende aShimushayi mulembi, bakalembela Mwaami Aritasasita lugwalo lwakutamikizya Jerusalema kabati: 9 (Lugwalo oolu lwakazwa kuli Rehumu mupati wabalupati-pati bamfulumende aShimushayi mulembi abamwi beenzinyina boonse, babetesi abeendelezi baniini, balembi, bantu baku-Erekki, bantu bakuBbabbiloni, bantu bakkala muSusa, nkukwaamba ma-Elamu, 10 azisi zyoonse eezyo Asenapa mupati alubo uulemekwa nzyaakatola mubuzike waakuzibikka mumuunzi waSamariya, abamwi bantu bakali muchilawu chili Mutala aaMulonga,* lino 11 oolu nduulugwalo ndubakamutumizya.)
“KuMwaami Aritasasita, kuzwa kubabelesi bako, baalumi bali muchilawu chili Mutala aaMulonga: Lino 12 mwaami azibe kuti maJuda bakaza ookuno kabazwa kulinduwe basika kuJerusalema. Balikuyakulula muunzi ooyu uupapila alubo mubi, baamba kumaninsya miduli akumaninsya ntalisyo. 13 Lino mwaami azibe kuti, kuti muunzi ooyu uyakululwe amiduli yawo imane, tabachinooteli pe mutelo, kupa zipo nikuba mutelo wamumugwagwa, eezi zilapa kuti kubulike mali muzibikkilo zyamali zyabaami. 14 Mbukunga tulya munyo uuzwa kung’anda yamwaami, twazibona kazitali kabotu kuti mwaami asweekelwe zintu eezi, nkinkaako, twatumizya lugwalo oolu kuti mwaami azibe, 15 kuchitila kuti kuyanduulisisigwe mumabbuku aachiindi aamasianyookulu. Mubbuku lyamakani aachiindi uzoojana kuti, muunzi uupapila, uubukila baami azilikiti* alubo mulinguwo mwakali bantu bakali kubusya musindo kuzwa chiindi. Eezi nzizyo zyakapa kuti muunzi ooyu unyonyoonwe. 16 Tulikuzibisya mwaami kuti, kuti muunzi ooyu uyakululwe, amiduli yawo imane, tuchinoolikwe nguzu zyakweendelezya* muchilawu chili Mutala aaMulonga.”
17 Mwaami wakatumizya mulayizyo kuli Rehumu mupati wabalupati-pati bamfulumende aShimushayi mulembi abamwi beenzinyina boonse bakali kukkala muSamariya abamwi boonse bali muchilawu chili Mutala aaMulonga kati:
“Ndamujuzya! 18 Lugwalo ndumwakatutumizya lwakabalwa* kunembo lyangu munzila iimvwisisika. 19 Ndakalayilila kuti kuyanduulisisigwe mpawo kwakajanika kuti kuzwa chiindi muunzi ooyu wakali kubukila baami, wakali kupapila alubo mulinguwo mwakali kuchitika manyongwe. 20 Kwakali baami bali aamanguzu muJerusalema bakali kweendelezya chilawu choonse chili Mutala aaMulonga alubo mutelo, zipo, amitelo yamumugwagwa yakali kubbadalwa kulimbabo. 21 Lino amubuzye baalumi aaba kuti baleke kubeleka, kuchitila kuti muunzi ooyu utayakululwi kusikila ndizoowambe. 22 Lino amubone kuti makani aaya achitwa chakufwambaana kuchitila kuti mwaami atayinkilili kunembo kusweekelwa zintu.”
23 Lino lugwalo lwakazwa kuMwaami Aritasasita nilwakabalwa kunembo lyaRehumu aShimushayi mulembi abeenzinyina, aachiindi nchicheecho bakayinka kuJerusalema kumaJuda mpawo bakabelesya nguzu kuti babalesye kubeleka. 24 Aachiindi eecho, mulimu wang’anda yaLeza yakali muJerusalema wakayimikila, wakachiliimvwi kusika mumunyaka wachibili wabweendelezi bwaMwaami Dariyasi waPesiya.