Detoronomi

27 Mpawo Mozesi abaalu ba-Israyeli bakalayilila bantu kuti: “Amubambe milawu yoonse njindili kumulayilila sunu. 2 Mubuzuba nimutazoozubuke Jodani kamuya kunyika Jehova Leza wanu njalikumupa, muzooyimikizye mabwe mapati, mwaamate.* 3 Mpawo mulembe aalingawo majwi woonse aaMulawu nimwazubuka kuchitila kuti munjile munyika Jehova Leza wanu njalikumupa, nyika iikunka malili abuchi mbuli mbaakamusyomezya Jehova, Leza wamasianyookulu. 4 Nimwazubuka Jodani, mweelede kwiimikizya mabwe aaya muChilundu cha-Ebbali mwaamate* mbuli mbundili kumulayilila sunu. 5 Mweelede kuyakila Jehova Leza wanu chipayililo chamabwe ooko. Mutabelesyi zibelesyo zyansimbi aali ngawo. 6 Mweelede kuyakila Jehova Leza wanu chipayililo chamabwe aatabezedwe mpawo mupe zipo zitentwa kuli Jehova Leza wanu aali nchicho. 7 Mweelede kupa zipayizyo zyalumvwanano akuzilida nkukooko alubo mukondwe kunembo lyaJehova Leza wanu. 8 Mpawo majwi aaya woonse aaMulawu ooyu mwaalembe ziboneka aamabwe.”

9 Mpawo Mozesi abapayizi maLevi bakaambuula aama-Israyeli boonse kabati: “Amuumune muswiilile nima-Israyeli, sunu mwaba bantu baJehova Leza wanu. 10 Mweelede kuswiilila jwi lyaJehova Leza wanu akubamba milawu yakwe amalayilile aakwe ngindili kumulayilila sunu.”

11 Mubuzuba oobo, Mozesi wakalayilila bantu kati: 12 “Nimwazoozubuka Jodani, misyobo eeyi iitobela izooyimikila muChilundu chaGerizimu kuti ilongezye* bantu: Simiyoni, Levi, Juda, Isakkara, Josefa, aBbenjamini. 13 Mpawo misyobo iitobela izooyimikila muChilundu cha-Ebbali kuti yaambilizye lutuko: Rubbeni, Gadi, Asha, Zebbuloni, Dani, aNafutali. 14 MaLevi beelede koompolola kuma-Israyeli boonse kabati:

15 “‘Ulitukidwe muntu uupanga akusisa chikozyano chibezedwe naakuti chifulidwe, ichintu chisesemya kuli Jehova, ichakapangwa aamuntu uuli aaluzibo lwakupanga zintu.’* (Bantu boonse bayoowamba kuti ‘Ameni!’)

16 “‘Ulitukidwe muntu uunyansya wisi naakuti banyina.’ (Bantu boonse bayoowamba kuti ‘Ameni!’)

17 “‘Ulitukidwe muntu uusunzulusya mugaano wasimayakilane wakwe.’ (Bantu boonse bayoowamba kuti ‘Ameni!’)

18 “‘Ulitukidwe muntu uupa kuti moofu aleye munzila. (Bantu boonse bayoowamba kuti ‘Ameni!’)

19 “‘Ulitukidwe muntu uupa kuti mweenzu, muchaala naakuti mukamufu babetekwe munzila iitali kabotu.’ (Bantu boonse bayoowamba kuti ‘Ameni!’)

20 “‘Ulitukidwe muntu woona aamwanakazi wawisi nkaambo unooli wawubula wisi.’ (Bantu boonse bayoowamba kuti ‘Ameni!’)

21 “‘Ulitukidwe muntu woona aamunyama.’ (Bantu boonse bayoowamba kuti ‘Ameni!’)

22 “‘Ulitukidwe muntu woona aamuchizi wakwe, mwana musimbi wawisi naakuti wabanyina.’ (Bantu boonse bayoowamba kuti ‘Ameni!’)

23 “‘Ulitukidwe muntu woona aabanyinazyala.’ (Bantu boonse bayoowamba kuti ‘Ameni!’)

24 “‘Ulitukidwe muntu uubwatilila simayikalane wakwe akumujaya.’ (Bantu boonse bayoowamba kuti ‘Ameni!’)

25 Ulitukidwe muntu uutambula chisinkamulomo kuti ajaye muntu uutakwe mulandu.’ (Bantu boonse bayoowamba kuti ‘Ameni!’)

26 “‘Ulitukidwe muntu uutazooleke kutobela majwi aaMulawu ooyu akwaachita. (Bantu boonse bayoowamba kuti ‘Ameni!’)