Detoronomi
21 “Kuti kwajanika muntu uufwide musokwe munyika Jehova Leza wanu njalikumupa kuti ibe yanu, mpawo kakutazibikene kuti ngwani wakamujaya, 2 baalu ababetesi banu beelede kweenda bakapime musinzo uuzwa aamuntu uufwide kuyoosika kumyuunzi iimuzyungulukide. 3 Baalu bamuunzi uuli aafwiifwi amuntu ooyo beelede kusala ng’ombe mpwizi iichili niini iitanabelesegwa pe, iitanabikkwa jokwe. 4 Mpawo baalu bamuunzi ooyo beelede kutola ng’ombe eeyo mumusena uukunka maanzi, uutanalimwa naakuti kubyalwa mbuto. Ng’ombe eeyo beelede kwiityola nsingo mumusena ooyo.
5 “Bapayizi maLevi bazoosika nkaambo Jehova Leza wanu wakasala mbabo kuti bamubelekele, kuti baambilizye zilongezyo muzina lyaJehova. Bazoowambilizya mbuzyeelede kubambululwa nkani zyoonse zili atala akulwana. 6 Mpawo baalu boonse bamuunzi uuli aafwiifwi amuntu uufwide, beelede kusamba mumaboko aajulu aang’ombe mpwizi yakatyolwa nsingo mumusena. 7 Mpawo beelede kwaamba kuti, ‘Maboko eesu taakatila ganzi lyamuntu ooyu pe alubo teetwakalibona pe kalitilwa. 8 Ikaka Jehova, utabapi mulandu ooyu bantu bako ma-Israyeli mbwaakanununa, alubo utazumizyi kuti mulandu waganzi lyamuntu ooyu uutakwe mulandu ube aalimbabo.’ Mpawo tabakoopegwa mulandu waganzi pe. 9 Kuti mwachita oobo, munooli mwagwisya mulandu waganzi lyamuntu uutakwe mulandu aakati kanu kwiinda mukuchita zintu ziluleme mumeso aaJehova.
10 “Kuti wayinka kunkondo kuti ukalwane basinkondonyokwe mpawo Jehova Leza wako wapa kuti ubazunde akubabweza mpawo wiinke aabo. 11 Mpawo aakati kabantu mbwaabweza wabona mwanakazi mubotu, wamuyanda mpawo wayanda kumubweza kuti abe mwanakazi wako, 12 ulakonzya kumunjizya mung’anda yako. Mwanakazi ooyo weelede kugela susu, anengulule maala, 13 agwisye zigogo nzyaakaza kazweete, mpawo akkale mung’anda yako. Uyoolila wisi abanyina kwamweezi woonse, kuzwa waawo, ulakonzya koonaawe; uyooba mulumaakwe mpawo anguwe ulaba mwanakazi wako. 14 Pesi kuti taakukonda, weelede kumuleka ayinke kufumbwa nkwaayanda. Pesi toyelede kumuuzya aamali naakuti kumujata chalunya, mbukunga wamufwisya bweeme.
15 “Kuti mwaalumi kakwete banakazi babili mpawo kayanda umwi kwiinda umwi* alubo boonse kabali babili bamuzyalila bana balombe mpawo mwana mulombe wakusaanguna kali wayooyo ngwatayandi, 16 mubuzuba mbabaabanisya lukono bana bakwe, tazumizigwi pe kuti mwana wamwanakazi ngwayanda amuchitaanga ngunguwe wakusaanguna, mundawu yamwanaakwe wakusaanguna wayooyo ngwatayandi. 17 Weelede kutondeezya kuti mwana wamwanakazi ngwatayandi nguumwana wakusaanguna kwiinda mukumupa zipanzi zyiindulwidwe tubili zyazintu zyoonse nzyalaazyo, nkaambo mwana ooyo ngiimasaangunino aanguzu zyakwe zyakuzyala. Cheelelo chamwana wakusaanguna nchichakwe.
18 “Kuti mwaalumi kali aamwana mulombe uutamvwi uupapila alubo uutaswiilili wisi naakuti banyina, alubo iwakakaka kuswiilila nibakeezya kumululamika, 19 wisi abanyina beelede kumujata bamutole kubaalu kugeedi lyamuunzi mwakkala, 20 babuzye baalu bamuunzi kuti, ‘Mwaneesu tamvwi pe ulapapila, tatuswiilili pe. Mutangazu mpawo nguchankolwa.’ 21 Mpawo baalumi boonse bamuunzi beelede kumuuma mabwe afwe. Nkinkaako, mweelede kugwisya bubi aakati kanu, mpawo ma-Israyeli boonse batazoomvwe zintu eezi bazooyoowa.
22 “Kuti muntu wachita chibi chipa kuti ajayigwe mpawo mwamujaya akumwaanzika aachisamu, 23 tayelede kubuchesya pe aachisamu. Mweelede kumuzikka mubuzuba mbuboobo, nkaambo muntu waanzikidwe aachisamu ulitukidwe aLeza. Tamweelede kusofwaazya nyika Jehova Leza wanu njalikumupa kuti ibe lukono lwanu.