Kulonga
15 Aachiindi eecho, Mozesi ama-Israyeli bakayimbila Jehova lwiimbo lwakuti:
“Amuleke ndiimbile Jehova nkaambo wasumpulwa loko.
Wawaala bbiza ayooyo uulitantide mulwizi.
2 Ja* ulandipa manguzu alubo ulandisimya, mbukunga waba mufutuli wangu.
NguLeza wangu, ndilamutembawula, nguLeza wamataata, ndilamulemeka.
3 Jehova ngusilumamba uuli aamanguzu, Jehova ndiizina lyakwe.
4 Wawaala ngolo zyankondo zyaFaro amasooja aakwe mulwizi,
Alubo masooja aakwe aatembedwe anikila muLwizi Lusalala.
5 Maanzi aavuuma akabavumba, bakabbila mbuli bbwe mumaanzi aanikide.
6 O Jehova, kuboko kwako kwachilisyo kuli aamanguzu miingi;
Kuboko kwako kwachilisyo, O Jehova, kulakonzya kunyonyoona sinkondo.
7 Mubupati bwako bugambya, ulakonzya kubawaalila aansi aabo bakubukila;
Ulatuma bukali bwako buyaka kuti bubalotye mbuli makuba.
8 Moya wamumpemo zyako wakapa kuti maanzi alundikane;
Akayimikila mbuli muduli akusinkila maanzi miingi,
Maanzi aavuuma akayuma nta aakati kalwizi.
9 Sinkondo wakati: ‘Ndilabaandila! Ndilabeenzya!
Ndilabweza zintu zyabo kusikila moyo wangu ukkutisikane!
Ndilasomona panga lyangu! Kuboko kwangu kulabazunda!’
10 Wakafulida, mpawo lwizi lwakabavumba;
Bakabbila mbuli nsimbi ndemu mumaanzi aanikide.
11 O Jehova, ngwani leza uuli mbuli nduwe?
Ngwani uuli mbuli nduwe, mupati mubusalali?
Ooyo weelede kuyoowegwa kwiinda mukwiimbilwa nyimbo zyakutembawula, ooyo uuchita zigambyo.
12 Wakatandabika kuboko kwako kwalulyo mpawo nyika yakabamena.
13 Muluyando lwako lutamani, wazulwida bantu bako mbwaakanununa;
Munguzu zyako uyoobazulwida kundawu yako iisalala.
14 Bantu bazoomvwa mpawo bazoozazama;
Bantu bakuFilisitiya bazookataazikana zitaambiki.*
15 Aachiindi eecho, bapati baku-Edomu bazooyoowa,
Alubo beendelezi bakuMowabbu bali aamanguzu bazoozazama.
Boonse bakkala kuKkenani bazoomana manguzu.
16 Bazooyoowa akufweluka mwida.
Kuboko kwako kuli aamanguzu kuzoopa kuti bataputuuki pe mbuli bbwe
Kusikila bantu bako bayinde, O Jehova,
Kusikila bantu mbuwakalenga bayinde.
17 Uzoobeeta mpawo ubabyale kuchilundu chalukono lwako,
Ndawu njuwakalibambila kuti ukkale, O Jehova,
Ndawu iisalala njuwakapanga aamaboko aako, O Jehova.
18 Jehova uzooyendelezya kali mwaami kusikila kukabe kutamani.
19 Chiindi mabbiza aaFaro angolo zyakwe zyankondo abasimabbiza bakwe nibakaya mulwizi,
Jehova wakaboozya maanzi aamulwizi aalimbabo,
Pesi ma-Israyeli bakeenda aanyika njumu.”
20 Mpawo Miriyemu mupolofita wachanakazi, muchizi wa-Aroni wakabweza nsakalala alubo banakazi boonse bakamutobela ansakalala kabali kuzyana. 21 Miriyemu wakayimba kavwiila baalumi kati:
“Amwiimbile Jehova nkaambo wasumpulwa loko.
Wawaala bbiza ayooyo uulitantide mulwizi.”
22 Mozesi wakazulwida ma-Israyeli kuzwa kuLwizi Lusalala alubo bakaya kunkanda yakuShuri. Bakeenda kwamazuba aatatu munkanda, pesi teebakajana maanzi pe. 23 Bakasika kuMara, pesi teebakali kukonzya pe kunywa maanzi kuMara nkaambo akali kulula. Nchibakawuzika ndawu eeyo kuti Mara. 24 Bantu bakasaanguna kung’ung’unina Mozesi kabati: “Tulanywaanzi?” 25 Mozesi wakalilila Jehova mpawo Jehova wakamutondeezya munsamu. Naakawuwaalila mumaanzi, maanzi akanona.
Leza wakabapa mulawu amalayilile ngibakeelede kutobela nibabeteka alubo wakabasunka kabali nkukooko. 26 Wakati: “Kuti mwaswiilila jwi lyaJehova Leza wanu akuchita ziluleme mumeso aakwe akuswiilila milawu yakwe akubamba malayilile aakwe woonse, tandikoomweetela chilwazi nichiba chimwi nchindakeetela ma-Ijipita, nkaambo ime ndiJehova ndime ndimuponia.”
27 Mpawo bakasika ku-Elimu, ooko kwakali tusawu twamaanzi tuli 12 aminsamu yamikunka iili 70. Nkinkaako, bakakkala nkukooko aafwiifwi amaanzi.