Milimu yaBaapostoli
24 Nikwakayinda mazuba aali musanu, mupayizi mupati Ananiya wakakunuka kalaamwi abamwi baalu asimulawu uutegwa Tetilasi. Mpawo bakaamba kaambo nkibakali kutamikizya Pawulu kumweendelezi. 2 Tetilasi naakayitwa, wakasaanguna kumutamikizya kati:
“Tulibwene kuti tukkede muluumuno lwiingi akaambo kanduwe akuti zintu zyiingi zilikuchincha muchisi eechi akaambo kabusongo bwako, 3 zintu eezi tulazibona chiindi choonse amundawu zyoonse, Nuulemekwa Felekisi, nchitukulumba loko. 4 Pesi kuti nditakumanini chiindi, ndikumbila kuti utuswiilile mbichaani muluzyalo lwako. 5 Nkaambo twakajana kuti mwaalumi ooyu ulikukataazya loko,* ulikupa kuti maJuda boonse bakkede munyika yoonse babukile mfulumende alubo nguwe uulikuzulwida kabunga kabantu bakuNazareta. 6 Alubo wakeezya kupa kuti tempele litasalali mpawo twakamujata. 7 *—— 8 Kuti wamubuzisisya, ulabona kuti zintu zyoonse eezi nzitulikwaamba atala anguwe, nzyachoonzyo.”
9 Mpawo ambabo maJuda bakanjilila, kabalikuzumina kuti zintu eezi zyakali zyachoonzyo. 10 Mweendelezi naakagunia-gunia mutwe kuli Pawulu kuti aambuule, Pawulu wakati:
“Mbukunga ndizi kabotu kuti waba aaminyaka myiingi kuli mubetesi wachisi eechi, lino ndiyanda kulisandwida kandaangunukide. 11 Kuti kuyanda kuziba kuti nzyachoonzyo, ulakonzya kubuzya kuli bamwi, kuti takunayinda mazuba aali 12 kuzwa nindakayinkide kuJerusalema kuti ndikakombe, 12 alubo taakwe nibakandijana kandikazyania aamuntu mutempele naakuti kandipa kuti kube lupyopyongano muzikombelo naakuti mumuunzi woonse. 13 Alubo tabakonzyi pe kukupa bukamboni bwazintu nzibalikunditamikizya lino. 14 Pesi ndilakazumina kaambo aaka kulinduwe, kakuti ndipona kweendelana anzila eeyi njibaamba kuti nkabunga, munzila eeyi, ndibelekela Leza wamasianene mulimu uusalala, mbukunga ndilazisyoma zintu zyoonse zili muMulawu azyakalembwa aaBapolofita. 15 Alubo ndili aabulangilizi kuli Leza, bulangilizi mbubalaabo ambabo baalumi aaba, bwakuti kuzooba kubusigwa kwabantu bafwide, baluleme abataluleme. 16 Akaambo kazeezi, chiindi choonse ndileezya kuba aamoyo uutuba* kuli Leza, akubantu. 17 Nikwakayinda minyaka myiingi, ndakasika kuti ndizoope bantu bamuchisi chesu zipo zyalweetelelo akuti ndizoope zipo kuli Leza. 18 Nindakali kuchita zintu eezi, bakandijana mutempele kandili ndasalazigwa kweendelana amulawu, pesi kanditakwe nkamu yabantu naakuti kandilikubusya lupyopyongano. Pesi kwakali bamwi maJuda bakali kuzwa kuchilikiti cha-Asiya, 19 aabo beelede kubawo kunembo lyako kuti bandipe mulandu, kuti kakuli kuti choonzyo bali aakaambo andime. 20 Naakuti baalumi balaano abaambe mulandu ngubakajana nindakayimvwi muNkuta Mpati yamaJuda, 21 kunze kwachintu eechi chimwi biyo nchindakoompolola nindakayimvwi aakati kabo, kanditi: ‘Sunu ndilikubetekwa kunembo lyanu akaambo kakuti bafwide bazoobusigwa!’”
22 Nikuba oobo, akaambo kakuti Felekisi wakaazi kabotu makani aali atala aBanzila Eeyi, wakasaanguna kubatanda kati: “Ndizoobona zyakuchita atala amakani aaya aasika Lusiyasi mweendelezi wamasoja.” 23 Mpawo Felekisi wakalayilila mupati wamasoja kuti Pawulu asungwe pesi apegwe lwaangunuko, akuti bantu bakulimbabo kabazumizigwa kumupa nzyayanda.
24 Nikwakayinda mazuba, Felekisi wakasika amwanakazi wakwe Drusila, ooyo wakali muJuda, mpawo wakayita Pawulu, mpawo wakamuswiilila chiindi naakali kupandulula atala akusyoma muli Jesu Kkristu. 25 Pesi Pawulu naakali kwaambuula atala abululami, kulinyona akubetekwa kutazoosike, Felekisi wakayoowa mpawo wakati: “Jana buzwa kwalino, ndazoojana mweenya ndizookwiita lubo.” 26 Aachiindi nchicheecho, Felekisi wakali kulangilila kuti Pawulu ulamupa mali. Akaambo kazeezi, wakali kumwiita kwaziindi zyiingi kalikwaambuula aanguwe. 27 Pesi nikwakayinda minyaka iibili, Porikkiyo Festo wakasaanguna kweendelezya muchibaka chaFelekisi, pesi Felekisi wakasiya Pawulu kasungidwe nkaambo wakali kuyanda kuti maJuda bamuyande.