Chiyubunuzyo chaJohane
5 Alubo mukuboko kwachilisyo kwaYooyo uukkede aachuuno chabwaami, ndakabona bbuku lyakupeta lyakalembedwe kumabazu woonse,* kalinamatikidwe loko azijazyo zili musanu azibili. 2 Alubo ndakabona ngilozi iili aamanguzu, kayaambilizya ajwi pati kuti: “Ngwani weelela kujula bbuku eeli lyakupeta akubbadununa zijazyo zyalyo?” 3 Pesi taakwe muntu, kube kujulu naakuti aanyika naakuti kunsi aanyika, wakali kukonzya kujula bbuku eeli lyakupeta naakuti kulanga zili mukati. 4 Ndakalila loko nkaambo taakwe muntu wakajanika keelela kujula bbuku eeli lyakupeta naakuti kulanga zili mukati. 5 Pesi umwi wabaalu wakandibuzya kuti: “Utalili pe. Bona! Mulavu wamusyobo waJuda, muyanda waDavida, wazunda kuti ajule bbuku eeli lyakupeta azijazyo zyalyo zili musanu azibili.”
6 Alubo ndakabona mwanaambelele, wakali kubonekaanga wajayigwa, kayimvwi aakati kachuuno chabwaami aakati kazilenge zyuumi zine aakati kabaalu, kali ameja aali musanu aabili ameso aali musanu aabili, meso aaya ayiminina myuuya yaLeza iili musanu ayibili, eeyo yakatumwa munyika yoonse. 7 Aachiindi nchicheecho wakayinka kunembo, mpawo wakalibweza mukuboko kwachilisyo kwaYooyo uukkede aachuuno chabwaami. 8 Naakabweza bbuku eelyo lyakupeta, zilenge zyuumi zine abaalu bali 24 bakawidaansi kunembo lyaMwanaambelele, alubo umwi awumwi wabo wakali aakantimbwa andido zyangolida zyakazwide tununkilizyo. (Tununkilizyo ootu twiiminina nkombyo zyabasalali.) 9 Alubo bayimba lwiimbo lupya kabati: “Uleelela kubweza bbuku eeli lyakupeta akubbadununa zijazyo zyalyo, nkaambo wakajayigwa alubo kwiinda muganzi lyako, wawulila Leza bantu bazwa kumisyobo yoonse akumilaka yoonse akubantu boonse akuzisi zyoonse, 10 alubo wakapa kuti babe bwaami abapayizi kuli Leza wesu, alubo bazooba baami batazooyendelezye nyika.”
11 Alubo ndakabona akumvwa jwi lyangilozi zyiingi zyakazyungulukide chuuno chabwaami azilenge zyuumi abaalu, alubo mweelwe wangilozi eezyo, wakali kusika kuzyuulu zili kkumi zyiindulwidwe aazyuulu zili kkumi, 12 alubo zyakali kwaamba kuti ajwi pati: “Mwanaambelele, ooyo wakajayigwa uleelela kutambula bweendelezi abunoti abusongo amanguzu alulemeko abulemu achilongezyo.”
13 Alubo ndakamvwa zilenge zyoonse zili kujulu azili aanyika azili kunsi aanyika azili mulwizi, azintu zyoonse zili mulinzizyo kaziti: “Kuli Yooyo uukkede aachuuno chabwaami akuMwanaambelele, akube chilongezyo alulemeko abulemu amanguzu, kusikila kukabe kutamani.” 14 Zilenge zyuumi zine zyakali kwaamba kuti: “Ameni!” mpawo baalu bakawidaansi, bakomba Leza.