Lwabili kuBatesalonikka
3 Chamamanino bakombima, amwiinkilile kunembo kutukombela, kuchitila kuti jwi lyaJehova* lyiinkilile kunembo kumwayigwa chakufwambaana akuti lilemekwe mbuli mbulilikuchitwa aakati kanu, 2 akuti tuvunwe kubantu bachisa bamwi akubantu babi, nkaambo teebantu boonse pe bali aalusyomo. 3 Pesi Mwaami ulasyomeka alubo uzoomusimya akumukwabilila kuzwa kumubi. 4 Mukuyungizya, tuli aachoonzyo muMwaami atala andinywe, chakuti mulikuchita nzitwakamulayilila akuti mulayinkilila kunembo kuzichita. 5 Mwaami ayinkilile kunembo kuzulwida myoyo yanu munzila iizwidilila kuti muyande Leza akuti mulisimye akaambo kaKkristu.
6 Bakombima, lino tulikumupa malayilile muzina lyaMwaami wesu Jesu Kkristu aakuti, mutantamuke mukombima woonse uuteendi bweelede alubo uutaswiilili malayilile ngimwakatambula* kuzwa kulindiswe. 7 Inywe mulizi mbumweelede kutobelezya chikozyano chesu, nkaambo taakwe nitwakalijata munzila iiteelede aakati kanu, 8 alubo taakwe nitwakalya chakulya chamuntu katutabbadede pe. Pesi kwiinda mukubeleka akuchita milimu iimizya, twakali kubeleka sikati amansiku, kuchitila kuti tutamizyi naaba umwi aakati kanu. 9 Tazyaambi kuti tatukwe cheelelo chakujana chimwi chintu kulindinywe, pesi twakali kuyanda kulipeda, kuchitila kuti tube chikozyano chakuti mutobelezye. 10 Kwaamba choonzyo, nitwakali aandinywe, twakali kumupa mulawu ooyu wakuti: “Kuti muntu katayandi kubeleka, aleke kulya.” 11 Nkaambo tumvwide kuti bamwi aakati kanu tabalikweenda bweelede, tabayandi pe kubeleka, pesi balikunjilila makani aatali aabo. 12 Bantu bali boobu tubapa mulawu amalayilile muMwaami Jesu Kkristu aakuti, beelede kubeleka kabawumwine alubo balye chakulya nchibalibelekela.
13 Pesi inywe bakombima, mutaleki pe kuchita zibotu. 14 Pesi kuti kakuli muntu uutaswiilili jwi lyesu kwiinda mulugwalo oolu, amumuchenjelele alubo amuleke kuliswaanizya aanguwe, kuchitila kuti abe aabweeme. 15 Nikuba oobo, mutamuboni mbuli sinkondonyokwe pe, pesi amwiinkilile kunembo kumulaya mbuli mukombinyokwe.
16 Mwaami waluumuno amupe luumuno chiindi choonse munzila zyoonse. Mwaami abe aandinywe moonse.
17 Nkoku kujuzya kwangu nkundalemba akuboko kwangu, ime ndiPawulu. Eechi nchiichitondeezyo mumagwalo aangu woonse. Mbundilemba mbuboobu.
18 Luzyalo lupati lwaMwaami wesu Jesu Kkristu alube aandinywe moonse.