Makani aakalembwa aaMakko
11 Nibakali baba aafwiifwi kusika kuJerusalema, kuBbetifeji aBbetaniya, kuChilundu chama-Olifa, wakatuma basikwiiya bakwe babili, 2 alubo wakababuzya kuti: “Amwiinke mumuunzi ngumulangide, mbumutanjile biyo mulinguwo, mulajana mwana wadonki uutanabelesegwa aamuntu, kaangilidwe. Amumwaangunune muzaawe ookuno. 3 Kuti umwi muntu wamubuzya kuti, ‘Nkamboonzi nimulikuchita oobu?’ amwaambe kuti, ‘Mwaami ulikumuyanda, aamaninsya biyo ulamuboozya.’” 4 Nkinkaako, bakayinka mpawo baakujana mwana wadonki kaangilidwe aamulyango, aanze, kumbali aanzila mpawo bakamwaangununa. 5 Pesi bamwi bakayimvwi mpawaawo bakati kulimbabo: “Mulikuchitaanzi kamulikwaangununa mwana wadonki?” 6 Mpawo bakababuzya nzyaakaambide Jesu mpawo bakabaleka bayinka.
7 Mpawo bakeeta mwana wadonki kuli Jesu alubo bakayala zigogo zyabo zyaajulu aalinguwe, mpawo wakakkala aalinguwe. 8 Alubo bantu biingi bakayala zigogo zyabo zyaajulu munzila pesi bamwi bakatema ntabi zyaminsamu kumbali aanzila. 9 Alubo bantu bakali kunembo abakali kutobela musule bakali koompolola kabati: “Inche kaka, mufutule! Ulilongezedwe ooyo uuza muzina lyaJehova.* 10 Bulilongezedwe Bwaami bwataateesu Davida bulikuza! Inche kaka, mufutule, iwe nuuli kujulu lyamajulu!” 11 Wakanjila muJerusalema waya mutempele mpawo wakalanga-langa zintu zyoonse pesi mbukunga chiindi chakali chayinka, wakazwa waya kuBbetaniya abali Kkumi Ababili.
12 Mubuzuba bwakatobela, nibakali kuzwa muBbetaniya, wakaba aanzala. 13 Kachili kule-kule, wakabona mukuyu wakali aamatu mpawo wakayinka kuti akabone kuti nga ulajana chintu na. Pesi naakasika aalinguwo, taakwe nchaakajana pe kunze kwamatu kupela nkaambo teechakali chiindi chankuyu. 14 Nkinkaako, wakati kulinguwo: “Kutachizoobi muntu uutazoolye michelo yako lubo.” Alubo basikwiiya bakwe bakalimvwide.
15 Bakasika kuJerusalema. Nkukooko wakanjila mutempele mpawo wakasaanguna kubatandilaanze bantu bakali kuuzya akuula mutempele, alubo wakapindimuna matebbulu aabasikuchincha mali azyuuno zyabantu bakali kuuzya nziba, 16 alubo taakwe muntu ngwaakazumizya pe kuti atimbule mutempele kanyampwide chibelesyo. 17 Wakali kuyiisya kalikubabuzya kuti: “Takulembedwe na kuti, ‘Ng’anda yangu izootegwa ning’anda yakukombela yabantu bazisi zyoonse’? Pesi mwapa kuti ibe chiyubilo chababbi.” 18 Mpawo bapati babapayizi abalembi bakazimvwa, alubo bakasaanguna kuyanduula nzila yakuti bamujaye, nkaambo bakali kumuyoowa, nkaambo nkamu yoonse yabantu yakali kugamba loko akaambo kakuyiisya kwakwe.
19 Chiindi kachili chayinka, bakazwa mumuunzi ooyo. 20 Pesi nibakali kwiinda kuseeni loko, bakabona mukuyu kawuli wayuma kuzwa kumiyanda yawo. 21 Petro naakayeeya zyakachitikide, wakati kulinguwe: “Rabbi, bona, mukuyu uulya ngwaakatuka wakayuma.” 22 Jesu wakati kulimbabo: “Amube aalusyomo muli Leza. 23 Kwaamba choonzyo, ndimubuzya kuti, kufumbwa muntu uubuzya chilundu eechi kuti: ‘Nyukuka uliwaale mulwizi,’ alubo katazumbuuzyi mumoyo wakwe pesi kali aalusyomo lwakuti nzyaamba zizoochitika, choonzyo zizoochitika. 24 Nchindilikumubuzya kuti, zintu zyoonse nzimukumbila nimukomba, amusyome kuti mwazipegwa kale, mpawo muzoobaazyo. 25 Alubo chiindi nimukomba kamwiimvwi, amubalekelele bantu boonse kufumbwa nzibamubisizya, kuchitila kuti Wuso uuli kujulu amulekelele milandu yanu.” 26 *——
27 Bakasika lubo kuJerusalema. Alubo naakali kweendeenda mutempele, bapati babapayizi abalembi abaalu bakasika 28 mpawo bakati kulinguwe: “Wakaajana kuli manguzu aakuchita zintu eezi? Naakuti ngwani wakakupa manguzu aakuchita zintu eezi?” 29 Mpawo Jesu wakati kulimbabo: “Andime ndilamubuzya mubuzyo uumwi. Kuti mundisandule, ndilamubuzya nkundaajana manguzu aakuchita zintu eezi. 30 Kubbabbatizya nkwaakali kuchita Johane kwakazwa kujulu na, naakuti kubantu? Amundisandule.” 31 Nkinkaako, bakasaanguna kwaambuuzyania muli chabo-chabo kabati: “Kuti twati, ‘Kujulu,’ ulatubuzya kuti, ‘Nkamboonzi nimwakaleka kumusyoma?’ 32 Pesi kuti twati, ‘Kubantu,’ niinzi chitachitike kulindiswe?” Bakali kuyoowa nkamu yabantu nkaambo boonse bakali kusyoma kuti Johane wakali mupolofita choonzyo. 33 Nkinkaako, bakasandula Jesu kuti: “Tatuzi pe.” Jesu wakati kulimbabo: “Andime tandikoomubuzya pe kuti manguzu aakuchita zintu eezi ndaajana kuli.”