KuMahebberu

1 Chiindi loko, Leza wakaambuula aamasianene kwiinda mubapolofita kwaziindi zyiingi alubo kabelesya nzila zyiingi. 2 Lino kumamanino aamazubaano, waambuula aandiswe kabelesya Mwanaakwe, ooyo ngwaakasala kuti abe sikukona wazintu zyoonse, alubo kwiinda mulinguwe wakapanga bwiime bwazintu.* 3 We nchitondeezyo chabulemu bwaLeza achikozyano chitondeezya mbabede choonzyo, alubo upa kuti zintu zyoonse zipone kwiinda mujwi lyamanguzu aakwe. Alubo naakasalazya zibi zyesu, wakakkala aansi kukuboko kwachilisyo kwaMupati kujulu. 4 Nkinkaako, lino wakaba mupati loko kwiinda ngilozi, zyakuti wakakona zina bbotu loko kwiinda mazina aazyo.

5 Muchikozyano, njiili ngilozi Leza njaakabuzizye kuti: “Iwe ulimwanaangu, sunu ndaba wuso”? Akuti: “Ndizooba wisi anguwe uzooba mwanaangu”? 6 Pesi namweeta lubo Mwanaakwe Wakusaanguna munyika, waamba kuti: “Alubo ngilozi zyoonse zyaLeza azimufugamine.”

7 Alubo naambuula atala angilozi, waamba kuti: “Upa kuti ngilozi zyakwe zibe myuuya, akuti babelesi* bakwe babe mulilo uuvwilima.” 8 Pesi naambuula atala aMwana, waamba kuti: “Leza nchuuno chako chabwaami kusikila kukabe kutamani, alubo nkoli yaBwaami bwako, ninkoli yabululami. 9 Wakayanda bululami alubo wakazonda kutatobela mulawu. Nchinchicho Leza, Leza wako, nchaakakunanika mafuta aakubotelwa kwiinda beenzinyokwe.” 10 Akuti: “O Mwaami, kumatalikilo wakayala ntalisyo zyanyika, alubo majulu milimu yamaboko aako. 11 Zizoonyonyooka, pesi iwe unooliko, alubo zizoozakala mbuli chigogo, 12 alubo uzoozivunga-vunga mbuli mulembo, mbuli chigogo, alubo zizoochinchwa. Pesi iwe tuchinchi pe alubo minyaka yako tayizoomani pe.”

13 Pesi njiili ngilozi njaakabuzizye kuti: “Kkala kukuboko kwangu kwachilisyo kusikila ndichite kuti basinkondonyokwe babe mbuli chilyatililo chamawulu aako”? 14 Ani zyoonse tazili myuuya iibeleka mulimu uusalala* na, iitumwa kuti ikabelekele aabo batazookone lufutuko?