Kulonga
1 Aaya ngiimazina aabana balombe ba-Israyeli bakasika ku-Ijipita aJakkobo, mwaalumi umwi awumwi wakasika abamung’anda yakwe: 2 Rubbeni, Simiyoni, Levi aJuda; 3 Isakkara, Zebbuloni aBbenjamini; 4 Dani aNafutali, Gadi a-Asha. 5 Bantu boonse bakazyalwa kuli Jakkobo* bakali 70, pesi Josefa wakali waba ku-Ijipita kale. 6 Josefa wakazoofwa kuswaanizya abananyina boonse azyalani lyakwe lyoonse. 7 Ma-Israyeli bakazyalana akusaanguna kuvula loko alubo bakali kuyungizya akuba aamanguzu miingi, mpawo bakazula munyika eeyo.
8 Mukuya kwachiindi, mu-Ijipita mwakaba mwaami mupya wakatazi Josefa. 9 Nkinkaako, wakati kubantu bakwe: “Amubone! Ma-Israyeli mbiingi loko alubo bali aamanguzu miingi kwiinda ndiswe. 10 Atubachenjelele, nkaambo kuti teetwachita oobo, banoovula mpawo kuti kwabuka nkondo balaba kubbazu lyabasinkondoma batulwane basiye nyika yesu.”
11 Nkinkaako, bakabikka balupati-pati balanga bazike kuti babadyaaminine amilimu miyumu alubo bakayakila Faro myuunzi iitegwa Pitomu aRamesesi yakubambila zintu. 12 Pesi nibakali kuyungizya kubadyaaminina mpimpawo mpubakali kuvula loko akuzula ndawu yoonse. Nkinkaako, bakasaanguna kuyoowa akaambo kama-Israyeli. 13 Akaambo kazeezi, ma-Ijipita bakamanikizya ma-Israyeli kuti bachite milimu miyumu loko yabuzike. 14 Bakapa kuti buumi bubayumine kwiinda mukubabelesya milimu miyumu loko yakukanda bulongo akuuma zitina ayimwi milimu yabuzike mumyuunda. Bakaboombya amilimu miyumu yabuzike.
15 Nikwakayinda chiindi, mwaami wa-Ijipita wakaambuula aabasikutumbusya bachiHebberu, bakali kutegwa Shifira aPuwa. 16 Wakababuzya kuti: “Nimutumbusya banakazi bachiHebberu aachuuno chakutumbukila, kuti mwabona kuti batumbuka mwana mulombe, amumujaye pesi kuti kali musimbi, amumusiye kali muumi.” 17 Nikuba oobo, basikutumbusya aabo bakali kumuyoowa Leza wakasimpe alubo teebakazichita pe nzibakabuzigwa aamwaami wa-Ijipita. Teebakali kubajaya pe bana balombe. 18 Mukuya kwachiindi, mwaami wa-Ijipita wakayita basikutumbusya aabo mpawo wakati kulimbabo: “Nkamboonzi nimwakasiya bana balombe kabali bawumi?” 19 Basikutumbusya aabo bakati kuli Faro: “Banakazi bachiHebberu tabali mbuli banakazi bama-Ijipita. Balisimide, nga batumbuka kale sikutumbusya katanasika.”
20 Leza wakabalongezya basikutumbusya aabo alubo bantu bakali kuvula akuba aamanguzu miingi. 21 Akaambo kakuti basikutumbusya bakayoowa Leza wakasimpe, Leza wakapa kuti babe aampuli. 22 Kumamanino, Faro wakalayilila bantu bakwe boonse kuti: “Bana balombe boonse batumbukwa aamaHebberu amubasowele muMulonga waNayile, pesi bana basimbi boonse amubasiye kabali bawumi.”