Kulonga
2 Aachiindi eecho, umwi mwaalumi wamung’anda yaLevi wakakwata mwana musimbi waLevi. 2 Mpawo mwanakazi ooyo wakaba aada alubo wakatumbuka mwana mulombe. Naakabona kuti mwana ooyo mubotu, wakamusisa kwamyeezi iitatu. 3 Naakabona kuti tachikonzyi pe kumusisa, wakabweza bbasikiti lyamatete walizilulula aataala anzuka* akubikka mwana mukati mpawo wakalibikka mumatete kumbali aaMulonga waNayile. 4 Pesi muchizi wakwe wakaliimvwi kule-kule kuti abone zyakali kuzoochitikila mwana ooyo.
5 Mwana musimbi waFaro naakakunuka kuyoosamba muli Nayile, babelesi bakwe basimbi bakali kweenda kumbali aaMulonga waNayile. Wakabona bbasikiti lyakali aakati kamatete mpawo wakatuma muzike wakwe musimbi kuti akalibweze. 6 Naakalijula, wakabona mwana mulombe wakali kulila. Wakamufwida luzyalo mpawo wakati: “Ooyu mwana wamaHebberu.” 7 Muchizi wakwe wakati kumwana musimbi waFaro: “Ndikayite mwanakazi wachiHebberu uunyonsya na, kuti akulelele mwana ooyu?” 8 Mwana musimbi waFaro wakati kulinguwe: “Yinka!” Musimbi ooyo wakayinka waakwiita banyina aamwana. 9 Mwana musimbi waFaro wakati kulinguwe: “Bweza mwana ooyu undilelele mpawo ndizookubbadala.” Nkinkaako, wakamubweza waakumulela. 10 Naakakomena, wakamutola kumwana musimbi waFaro alubo wakaba mwanaakwe. Wakamuuzika kuti Mozesi* alubo wakati: “Nkaambo ndakamununa mumaanzi.”
11 Mumazuba aayo, Mozesi kali waba mupati,* wakayinka kubantu bakulimbabo kuti akabone milimu miyumu njibakali kuchita alubo wakabona umwi mu-Ijipita kali kuuma muHebberu, umwi wabantu bakulimbabo. 12 Nkinkaako, wakalanga ooku akooku, mpawo naakabona kuti taakwe muntu pe, wakamujaya mu-Ijipita ooyo akumusisa mumuseele.
13 Mubuzuba bwakatobela, wakazwa lubo mpawo wakabona maHebberu babili kabali kulwana. Nkinkaako, wakabuzya wakali wabisya kuti: “Umuuminaanzi mweenzinyokwe?” 14 Mpawo wakamusandula kuti: “Ngwani wakakusala kuti ube mwaami amubetesi wesu? Uyanda kundijaya na andime mbuli mbuwakajaya mu-Ijipita uulya?” Mozesi wakasaanguna kuyoowa mpawo wakalibuzya kuti: “Nkani eeyi yazibinkana choonzyo.”
15 Faro naakamvwa makani aaya, wakeezya kujaya Mozesi. Pesi Mozesi wakamuchija Faro waakukkala kunyika yaMidiyani. Naakasika nkuko, wakakkala aansi, aafwiifwi amugodi. 16 Kwakali mupayizi wakuMidiyani wakali aabana basimbi bali musanu ababili. Basimbi aabo bakasika kuzooteka maanzi akuti bazuzye zinywido kuchitila kuti banywisye butanga bwawisi. 17 Pesi mbuli lubbe, beembeli bakasika akubatanda. Mozesi naakabona zyakali kuchitika, wakanyampuka wagwasya* banakazi aabo alubo wakanywisya butanga bwabo. 18 Nibakasika kumuunzi kuli Ruwelu* wisi, wakagamba mpawo wakababuzya kuti: “Ani zyeenda biyeni kuti mufwaambane kuboola sunu?” 19 Bakamusandula kuti: “Umwi mwaalumi waku-Ijipita watuvuna kuzwa kubeembeli alubo watutekela maanzi akunywisya butanga.” 20 Mpawo wisi wakabuzya bana bakwe basimbi kuti: “Ani uli kuli mwaalumi ooyo? Mwamusiilaanzi? Amukamwiite azoolyaamwi andiswe.” 21 Mozesi wakazumina kukkala aamwaalumi ooyo alubo wakamupa mwanaakwe musimbi Zipora kuti amukwate. 22 Mukuya kwachiindi, wakazootumbuka mwana mulombe mpawo Mozesi wakamuuzika kuti Geshomu,* nkaambo wakati: “Ndaba mweenzu munyika iitali yakulindiswe.”
23 Nikwakayinda chiindi chilamfu,* mwaami waku-Ijipita wakafwa, pesi ma-Israyeli bakali kusinta akung’ung’una akaambo kabuzike alubo kulila kwabo kwakuti bagwasigwe akaambo kabuzike kwakaliswini kuya kuli Leza wakasimpe. 24 Mpawo Leza wakakumvwa kusinta kwabo alubo wakachiyeeya chizuminano nchaakachita a-Abbrahamu, Izakka aJakkobo. 25 Nkinkaako, Leza wakaabona ma-Israyeli alubo wakaabona mapenzi aabo.