Kulonga

11 Jehova wakati kuli Mozesi: “Kwasyaala penzi limwi ndindiyanda kweetela Faro a-Ijipita mpawo uzoomugwisya munyika yakwe. Natazoomugwisye, uzoomutanda biya. 2 Lino buzya bantu, kuti baalumi boonse abanakazi beelede kukumbila zintu zyansiliva azyangolida kuli basimayakilane babo.” 3 Jehova wakapa kuti bantu bafwidwe luzyalo ama-Ijipita. Alubo Mozesi lwakwe wakali waabulemekwa loko munyika ya-Ijipita ababelesi baFaro abantu.

4 Mpawo Mozesi wakati: “Nzezi nzyaamba Jehova, ‘Aakati kamansiku ndilayinda aakati ka-Ijipita, 5 bana boonse bakusaanguna bamunyika ya-Ijipita balafwa, kuzwa kumwana wakusaanguna waFaro uukkede aachuuno chabwaami kusikila kumwana wakusaanguna wamwanakazi muzike uuziya, abana boonse bakusaanguna babanyama balafwa. 6 Kuzooba kulila kupati kutanachitika munyika yoonse ya-Ijipita alubo takuzoochitiki lubo pe. 7 Pesi taakwe munkala naaba uumwi uutakuwe ma-Israyeli naakuti zivuubwa zyabo kuchitila kuti muzibe kuti Jehova ulakonzya kubikka musiyano aakati kama-Ijipita ama-Israyeli.’ 8 Alubo babelesi bako boonse bazoosika kulindime akundivuntamina akwaamba kuti, ‘Yinka, abantu boonse bakutobela.’ Mpawo ndizooyinka.” Naakamaninsya, wakazwa kunembo lyaFaro kanyemede loko.

9 Mpawo Jehova wakati kuli Mozesi: “Faro takookuswiilila pe kuchitila kuti zigambyo zyangu zivule munyika ya-Ijipita.” 10 Mozesi a-Aroni bakachita zigambyo zyoonse eezi kunembo lyaFaro, pesi Jehova wakamuleka Faro kuti ayumye moyo, taakabaleka pe ma-Israyeli kuti bazwe munyika yakwe.