Kulonga
25 Mpawo Jehova wakati kuli Mozesi: 2 “Buzya ma-Israyeli kuti bandipe zipo. Ubweze zipo kumuntu woonse waangunukide kundipa. 3 Nzezi zipo nzimweelede kutambula kuzwa kulimbabo: ngolida, nsiliva, kkopa, 4 busumyo bwabbuluu, wulu yapepulu, busumyo busalala, mulembo mubotu, boya bwampongo, 5 zikumba zyabagutu zyakanikwa mumusila uusalala, zikumba ziteteete,* mapulanga aamukoka, 6 mafuta aamalambe, bbalisamu yakupanga mafuta aakunanika aatununkilizyo, 7 mabwe aa-onikisi aamwi mabwe aayelede kubikkwa aakabaki kabupayizi akukagogo kakukaango. 8 Beelede kundipangila ndawu yakukombela, kuchitila kuti ndikkale aakati kabo. 9 Mweelede kupanga tente lyakukombela azibelesyo zyalyo zyoonse, mutobelezye zintu zyoonse nzinditakutondeezye.
10 “Beelede kupanga bbokesi lyamukoka. Lyeelede kulampa makkiyubbiti* aabili ahafu, busasa bwalyo bube kkiyubbiti iimwi ahafu mpawo kuya mujulu lilampe kkiyubbiti iimwi ahafu. 11 Weelede kulizilulula aangolida iisalalisya mukati akunze. Weelede kulibikka mumpimpito wangolida uulizyunguluka lyoonse. 12 Weelede kulipangila maring’i aane aangolida mpawo waanamatike aajulu aamawulu aalyo aane. Maring’i aabili abe kubbazu limwi lyabbokesi mpawo amwi aabili abe kubbazu limbi. 13 Weelede kupanga tusamu twamukoka utuzilulule aangolida. 14 Weelede kutunjizya mumaring’i aali kumabazu aaBbokesi, kuchitila kuti tube twakulinyampuzya. 15 Tusamu ootu tweelede kukkala mumaring’i aaBbokesi, tatweelede kugwisigwa pe. 16 Mabwe aaBukamboni nginditakupe, weelede kwaabikka muBbokesi.
17 “Weelede kupanga chivunisyo changolida iisalalisya. Cheelede kulampa makkiyubbiti aabili ahafu mpawo busasa bwacho bube kkiyubbiti iimwi ahafu. 18 Upange makkerubbi aabili aangolida; waapange kubelesya nsando kumabazu aabili aachivunisyo. 19 Upange makkerubbi aabili, limwi libe kubbazu limwi mpawo limwi libe kubbazu limbi lyachivunisyo. 20 Makkerubbi ayelede kujula mababa aawo aabili alange mujulu avumbe chivunisyo. Makkerubbi aayo ayelede kulangana, pesi busyu bwawo bulange chivunisyo. 21 Mabwe aaBukamboni nginditakupe weelede kwaabikka muBbokesi mpawo ulijale aachivunisyo. 22 Ndizoolitondeezya kulinduwe aachivunisyo akwaambuula anduwe kandili mpawaawo. Ndizookubuzya zintu zyoonse nzweelede kulayilila ma-Israyeli kandili aakati kamakkerubbi aali aabbokesi lyaBukamboni.
23 “Weelede kupanga tebbulu lyamukoka. Lyeelede kulampa makkiyubbiti aabili, busasa bwalyo bube kkiyubbiti iimwi mpawo kuya mujulu libe kkiyubbiti iimwi ahafu. 24 Weelede kulizilulula aangolida iisalalisya mpawo upange mumpimpito wangolida uulizyunguluka. 25 Weelede kupanga mumpimpito uuzyunguluka tebbulu uulaabusasa bweelene aajaanza* mpawo ubikke tweengo twangolida tuzyunguluka mumpimpito ooyo. 26 Weelede kupanga maring’i aane aangolida mpawo waabikke mumabazu aane aali aamawulu aalyo aane. 27 Maring’i aaya ayelede kuba aafwiifwi amumpimpito nkaambo mumo mutanjizigwe tusamu twakunyampuzya tebbulu. 28 Upange tusamu twamukoka utuzilulule aangolida. Uzootubelesya kukunyampula tebbulu.
29 “Weelede kupanga madishi, nkomeki, ndido anongo zyalyo zitanoobelesegwe kukutila zipo zinywigwa. Weelede kuzipanga aangolida iisalalisya. 30 Weelede kubikka zinkwa zyachitondeezyo aatebbulu kuti zibe kunembo lyangu chiindi choonse.
31 “Weelede kupanga chibikkilo chamalambe changolida iisalalisya. Uchipange kubelesya nsando. Chikkazikilo chacho, chisiko chacho, ntabi zyacho, nkomeki zyacho, mpingu zyacho amaluba aacho zyeelede kuba chintu chimwi chijisini. 32 Cheelede kuba aantabi zili musanu ayimwi. Ntabi zitatu zibe kubbazu limwi mpawo zimwi zitatu zibe kubbazu limbi. 33 Nkomeki zitatu zili mbuli maluba aamu-alumondi ampingu zitobelana aamaluba, zyeelede kupanga ntabi zili kubbazu limwi mpawo nkomeki zitatu zili mbuli maluba aamu-alumondi ampingu zitobelana aamaluba, zyeelede kupanga ntabi zili kubbazu limbi. Oobu mbuzyeelede kuba ntabi zili musanu ayimwi kuzwa kuchisiko chachibikkilo chamalambe. 34 Chisiko chachibikkilo chamalambe cheelede kuba aankomeki zine zili mbuli maluba aamu-alumondi alubo mpingu zyacho zitobelane aamaluba aacho. 35 Mpingu yakusaanguna iinooli aansi aantabi zibili zyakusaanguna zizwa aachisiko, yachibili inooli aansi aantabi zibili zitobela zizwa aachisiko alubo yachitatu inooli aansi aantabi zibili zitobela nkaambo ntabi zili musanu ayimwi zyeelede kuzwa aachisiko. 36 Mpingu antabi achibikkilo choonse chamalambe zyeelede kuba chintu chimwi chijisini changolida iisalalisya chakapangwa kakubelesegwa nsando. 37 Weelede kupanga malambe aali musanu aabili alubo naalayitwa alamunika kunembo lyacho. 38 Zyakuzimya mulilo azyakubikkila makala zyacho zyeelede kupangwa aangolida iisalalisya. 39 Weelede kuchipanga aamwi azibelesyo zyacho kubelesya talenta* limwi lyangolida iisalalisya. 40 Bona kuti wazipanga kweendelana ambwaakatondeezegwa kuchilundu.