Baami Wakusaanguna
16 Ijwi lyaJehova lyakubeteka Bbaasha lyakasikila Jehu mwana waHanani kaliti: 2 “Ndakakubusya mulusuko akukubikka kuti ube mweendelezi wabantu bangu ma-Israyeli, pesi wakaliswini kweenda munzila yaJerobbowamu akupa kuti bantu bangu ma-Israyeli babisye zyakuti bakandinyemya akaambo kazibi zyabo. 3 Nkinkaako, ndizooyayila Bbaasha ang’anda yakwe, alubo ndizoopa kuti ng’anda yakwe ibe mbuli ng’anda yaJerobbowamu mwana waNebbati. 4 Kufumbwa wamung’anda yaBbaasha uutazoofwide mumuunzi, uzooligwa aabankala. Kufumbwa wamung’anda yakwe uutazoofwide musokwe, uzooligwa aabayuni bamujulu.”
5 Makani aachiindi woonse aali atala aBbaasha, azintu nzyaakachita amanguzu aakwe, taalembedwe na mubbuku lyamakani aachiindi aaziindi zyabaami ba-Israyeli? 6 Mpawo Bbaasha wakalazikwaamwi amasianyinakulu alubo wakazikkwa muTiriza. Mwanaakwe Ela wakaba mwaami mundawu yakwe. 7 Alubo kwiinda mumupolofita Jehu mwana waHanani, ijwi lyaJehova lyakasika kuti abeteke Bbaasha ang’anda yakwe, akaambo kabubi boonse mbwaakachita mumeso aaJehova, kalikumunyemya amilimu yamaboko aakwe, kachita mbuli ng’anda yaJerobbowamu, alubo akaambo kakujaya Nadabbu nkwaakachita.
8 Mumunyaka wachi 26 wabweendelezi bwaMwaami Asa waJuda, Ela mwana waBbaasha wakaba mwaami wa-Israyeli muTiriza, alubo wakeendelezya kwaminyaka iibili. 9 Mubelesi wakwe Zimuri, silutwe wahafu yamasooja aakwe aayenda aangolo, wakamubukila naakali kuTiriza kalikunywa akukolwa kung’anda ya-Ariza, ooyo wakali kuzulwida bamung’anda yakwe muTiriza. 10 Zimuri wakanjila wamuyasa, wamujaya mumunyaka wachi 27 wabweendelezi bwaMwaami Asa waJuda, mpawo wakaba mwaami mundawu yakwe. 11 Naakaba mwaami, mbaakakkala biyo aachuuno chakwe chabwaami, wakabajaya boonse bamung’anda yaBbaasha. Taakwe muntu wachaalumi* ngwaakasiya pe, babe babbululu bakwe* nibaba beenzinyina. 12 Nkinkaako, Zimuri wakanyonyoona bamung’anda yaBbaasha boonse, kweendelana ajwi lyaJehova lyakubeteka Bbaasha ndyaakali waamba kwiinda muli Jehu mupolofita. 13 Eezi zyakachitika akaambo kazibi zyoonse Bbaasha amwanaakwe Ela nzibakachita, azibi nzibakapa kuti Israyeli achite, kabanyemya Jehova Leza wa-Israyeli azibumbwa zyabo zitagwasyi pe. 14 Makani aachiindi woonse aali atala a-Ela, azintu zyoonse nzyaakachita, taalembedwe na mubbuku lyamakani aachiindi aaziindi zyabaami ba-Israyeli?
15 Mumunyaka wachi 27 wabweendelezi bwaMwaami Asa waJuda, Zimuri wakaba mwaami kwamazuba aali musanu aabili muTiriza, chiindi masooja naakakkempede kuti alwane Gibbetoni, eeyo yakali yamaFilisiti. 16 Mukuya kwachiindi, masooja aayo aakakkempede akamvwa kakuli kwaambwa kuti: “Zimuri wabukila mwaami alubo wakamujaya.” Nkinkaako, ma-Israyeli boonse bakabikka Omuri silutwe wankamu yamasooja kuti abe mwaami wa-Israyeli mubuzuba mbuboobo mukkeempu. 17 Omuri ama-Israyeli boonse mbaakalaabo bakazwa kuGibbetoni beenda baakusinkila Tiriza. 18 Zimuri naakabona kuti muunzi wabwezegwa, wakanjila mungazi yakukwabilila yamung’anda yamwaami,* watenta ng’anda eeyo kali mukati mpawo wakafwida mumoomo. 19 Eezi zyakachitika akaambo kazibi zyakwe nzyaakachita, nkaambo wakachita zibi mumeso aaJehova kwiinda mukweenda munzila yaJerobbowamu alubo akaambo kachibi nchaakapa kuti Israyeli achite. 20 Makani aachiindi woonse aali atala aZimuri akubukila kwakwe, taalembedwe na mubbuku lyamakani aachiindi aaziindi zyabaami ba-Israyeli?
21 Aachiindi eechi, mpimpawo ma-Israyeli nibakaanzaana baba tubunga tubili. Kamwi kabunga kabantu kakatobela Tibbini mwana waGinati, kabayanda kumubikka kuti abe mwaami, mpawo kamwi kabunga kakatobela Omuri. 22 Pesi bantu bakali kutobela Omuri bakazunda bantu bakali kutobela Tibbini mwana waGinati. Nkinkaako, Tibbini wakafwa mpawo Omuri wakaba mwaami.
23 Mumunyaka wachi 31 wabweendelezi bwaMwaami Asa waJuda, Omuri wakaba mwaami wa-Israyeli alubo wakeendelezya kwaminyaka iili 12. MuTiriza wakeendelezya kwaminyaka iili musanu awumwi. 24 Wakawula chilundu chaSamariya kuli Shemeri amatalenta* aabili aansiliva, mpawo wakayaka muunzi aachilundu eecho. Wakawuzika muunzi ngwaakayaka kuti Samariya,* kuzwa kuzina lyaShemeri munaachilundu eecho.* 25 Omuri wakaliswini kuchita zibi mumeso aaJehova, alubo wakachita zibi zyiingi kwiinda aabo boonse bakamusaangunina. 26 Wakeenda munzila zyoonse zyaJerobbowamu mwana waNebbati amuchibi nchaakapa kuti Israyeli achite, kabanyemya Jehova Leza wa-Israyeli azibumbwa zyabo zitagwasyi pe. 27 Makani aachiindi woonse aali atala a-Omuri, azintu nzyaakachita amilimu yakwe mipati, taalembedwe na mubbuku lyamakani aachiindi aaziindi zyabaami ba-Israyeli? 28 Mpawo Omuri wakalazikwaamwi amasianyinakulu alubo wakazikkwa muSamariya. Mwanaakwe Ahabbu wakaba mwaami mundawu yakwe.
29 Ahabbu mwana wa-Omuri wakaba mwaami wa-Israyeli mumunyaka wachi 38 wabweendelezi bwaMwaami Asa waJuda, alubo Ahabbu mwana wa-Omuri wakeendelezya Israyeli muSamariya kwaminyaka iili 22. 30 Ahabbu mwana wa-Omuri wakachita zibi zyiingi mumeso aaJehova kwiinda aabo boonse bakamusaangunina. 31 Taakeenda muzibi zyaJerobbowamu mwana waNebbati kupela pe, pesi wakakwata Jezebbeli mwana wa-Etibbaala mwaami wamaSidoni, mpawo wakasaanguna kubelekela Bbaala akumukotamina. 32 Mukuyungizya, wakayakila Bbaala chipayililo kung’anda* yaBbaala njaakayaka muSamariya. 33 Alubo Ahabbu wakapanga chisamu chisalala.* Ahabbu wakachita zibi zyiingi kuti anyemye Jehova Leza wa-Israyeli kwiinda baami boonse ba-Israyeli bakamusaangunina.
34 Mumazuba aakwe, Hiyeli wakuBbeteli wakayakulula muunzi waJerikko. Naakabikka ntalisyo yawo, mwanaakwe wakusaanguna Abbiramu wakafwa, alubo naakabikka makoma aawo, mwanaakwe muniini Segubbu wakafwa, kweendelana ajwi lyaJehova ndyaakaamba kwiinda muli Joshuwa mwana waNuni.