Samiyele Wakusaanguna
15 Mpawo Samiyele wakati kuli Sawulu: “Jehova wakandituma kuti ndizookunanike kuti ube mwaami wabantu bakwe ma-Israyeli. Lino swiilila Jehova nzyataambe. 2 Mbobu mbaamba Jehova wamakamu: ‘Ndizoobasubula ma-Amalekki akaambo kazintu nzibakachita kuma-Israyeli chiindi nibakabalwana nibakali munzila kabazwa ku-Ijipita. 3 Lino yinka ukajaye ma-Amalekki, ukabanyonyoone azintu zyoonse nzibalaazyo. Taakwe ngweelede kufutula pe.* Weelede kujaya baalumi abanakazi, bana baniini abana bachinyonka, ng’ombe ambelele, nkamela amadonki.’” 4 Sawulu wakayita bantu wababala kuTelayimu. Masooja aakali kweenda aamawulu akali 200 000, baalumi bakuJuda bakali 10 000.
5 Sawulu wakeenda kusikila wasika kumuunzi wama-Amalekki alubo wakababwatilila mukalonga. 6 Mpawo Sawulu wakati kumaKkeni: “Amuzwe, amulipambule aakati kama-Amalekki kuchitila kuti nditamukukulaamwi ambabo. Nkaambo mwakatondeezya luyando lutamani kubantu boonse ba-Israyeli chiindi nibakali kuzwa ku-Ijipita.” Nkinkaako, maKkeni bakazwa aakati kama-Amalekki. 7 Kuzwa waawo, Sawulu wakajaya ma-Amalekki kuzwa kuHavila kusika kuShuri iili aafwiifwi aku-Ijipita. 8 Wakajata Agagi mwaami wama-Amalekki kali muumi, pesi bamwi bantu boonse wakabanyonyoona aapanga. 9 Nikuba oobo, Sawulu abantu bakwe bakasiya* Agagi kali muumi kuswaanizya ambelele ang’ombe zibotu, zivuubwa zineneede, bagutu azimwi zintu zyoonse zibotu. Zintu eezi, teebakazinyonyoona pe. Pesi bakanyonyoona zintu zyoonse zitagwasyi nzibakatali kuyanda.
10 Mpawo jwi lyaJehova lyakasika kuli Samiyele kaliti: 11 “Ndilikulisola* kuti ndakasala Sawulu kuti abe mwaami, nkaambo waleka kunditobela alubo taachita kweendelana amajwi aangu pe.” Samiyele wakakataazikana loko alubo wakaliswini kulilila Jehova busiku boonse. 12 Samiyele naakabuka kuseeni kuti akabonane aaSawulu, Samiyele wakabuzigwa kuti: “Sawulu wakaya kuKkameli alubo wakalipangila bbwe pati lyakuyeezya nkukooko.” Nkinkaako, wakachengunuka wakunuka waya kuGiligali. 13 Kumamanino, Samiyele naakasika kuli Sawulu, Sawulu wakati kulinguwe: “Ndazichita zyoonse nzyaamba Jehova, ndaatobelezya majwi aaJehova.” 14 Pesi Samiyele wakati: “Ani musindo wambelele ngundilikumvwa mumatwi aangu amusindo wang’ombe ngwanzi?” 15 Mpawo Sawulu wakati: “Zyakeetwa kazizwa kuma-Amalekki, nkaambo bantu bakasiya mbelele zibotu ang’ombe zibotu kuti bazipayizye kuli Jehova Leza wako, pesi zimwi zyakasyaala twakazinyonyoona.” 16 Naakamvwa oobo, Samiyele wakati kuli Sawulu: “Wumuna ndikubuzye nzyaakandibuzya Jehova jilo mansiku.” Sawulu wakati kulinguwe: “Amba.”
17 Samiyele wakayinkilila kunembo kati: “Teenduwe na wakalibona kuti ulimuniini nwaakabikkwa kuti ube silutwe wamisyobo yama-Israyeli chiindi Jehova naakakunanika kuti ube mwaami wa-Israyeli? 18 Nikwakayinda chiindi, Jehova wakakutuma mpawo wakati: ‘Yinka ukanyonyoone basizibi boonse ma-Amalekki. Ubalwane kusikila ubamane boonse.’ 19 Pesi nkamboonzi nwaakataswiilila jwi lyaJehova? Kunze lyaboobo, wakafwambaanina kuyoobweza zintu zyakanyangwa chabutangazu alubo wakachita zibi mumeso aaJehova!”
20 Nikuba oobo, Sawulu wakati kuli Samiyele: “Pesi ndaliswiilila jwi lyaJehova! Ndayinka kumulimu Jehova ngwaakandituma mpawo ndeeta Agagi mwaami wama-Amalekki alubo ndaanyonyoona ma-Amalekki. 21 Pesi bantu bakabweza mbelele ang’ombe kuzwa kuzintu nzibakanyanga basinkondonyina. Bakabweza zintu zibotu loko zyazintu zyakeelede kunyonyoonwa kuti bazipayizye kuli Jehova Leza wako kuGiligali.”
22 Samiyele wakati: “Jehova ubotelwa aazipo zitentwa azipayizyo na kwiinda kuswiilila jwi lyaJehova? Bona! Kuswiilila kulikabotu kwiinda chipayizyo alubo kutobela malayilile kulikabotu kwiinda kupa mafuta aabagutu, 23 nkaambo kubukila kulikozyenie achibi chakusonda akulisumpula kulikozyenie akuchita zintu zyamasalamusi akukomba zibumbwa.* Mbukunga wakaka jwi lyaJehova, anguwe wakukaka kuti ube mwaami.”
24 Mpawo Sawulu wakati kuli Samiyele: “Ndabisya, nkaambo ndatyola mulawu waJehova amajwi aako akaambo kakuti ndayoowa bantu akuswiilila nzibaamba. 25 Ikaka, ndikumbila undilekelele chibi changu mpawo ubweede aandime kuchitila kuti ndikafugame kuli Jehova.” 26 Pesi Samiyele wakati kuli Sawulu: “Tandikoobweeda aanduwe pe, nkaambo wakaka majwi aaJehova alubo Jehova wakukaka kuti wiinkilile kunembo kuli mwaami wa-Israyeli.” 27 Samiyele naakali kuchengunuka kuti ayende, Sawulu wakajata mupeto wajansi lyakwe lyakatalikwe maboko, pesi jansi eelyo lyakadeluka. 28 Mpawo Samiyele wakati kulinguwe: “Jehova wadelula bwaami bwama-Israyeli kuzwa kulinduwe sunu alubo uzoobupa umwi wabeenzinyokwe uulikabotu kwiinda nduwe. 29 Mukuyungizya, Uulemekwa wa-Israyeli takoobeja pe nikuba kuchincha mizeezo yakwe,* nkaambo tali mbuli muntu pe uuchincha mizeezo yakwe.”*
30 Mpawo Sawulu wakati: “Ndabisya, pesi ndikumbila undilemeke kaka kunembo lyabaalu babantu bangu akunembo lyama-Israyeli. Yinka aandime mpawo ndilafugama kuli Jehova Leza wako.” 31 Nkinkaako, Samiyele wakabweeda kayoobweenda musule aaSawulu mpawo Sawulu wakafugama kunembo lyaJehova. 32 Samiyele wakati: “Amweete Agagi mwaami wama-Amalekki aafwiifwi andime.” Mpawo Agagi wakaya kulinguwe kalyiibide,* nkaambo Agagi wakali kulibuzya kuti: ‘Zyakujayigwa zyayinda.’ 33 Nikuba oobo, Samiyele wakati: “Mbuli panga lyako mbulyapa kuti banakazi balile akaambo kakufwidwa aabana, ambabo banyoko bazoolila loko aakati kabanakazi akaambo kakufwidwa aabana.” Kuzwa waawo, Samiyele wakanenga Agagi muzipanzi-zipanzi kunembo lyaJehova kuGiligali.
34 Mpawo Samiyele wakaya kuRama. Anguwe Sawulu wakatanta waya kuGibbeya ooko kwakali muunzi wakwe. 35 Samiyele taakazoomubona lubo pe Sawulu kusikila mubuzuba naakafwa, nkaambo Samiyele wakali kulila Sawulu. Jehova wakalisola loko kuti wakali wasala Sawulu kuti abe mwaami wa-Israyeli.