Makani Aakalembwa aaJohane
9 Naakali kwiinda, wakabona umwi mwaalumi wakazyedwe kali moofu. 2 Mpawo basikwiiya bakwe bakamubuzya kuti: “Rabbi, ngwani wakabisya mbukunga mwaalumi ooyu wakazyalwa kali moofu, nguwe na naakuti mbazyali bakwe?” 3 Mpawo Jesu wakati: “Teemwaalumi ooyu wakabisya naakuti bazyali bakwe, pesi zyakaba oobo kuchitila kuti milimu yaLeza iyubununwe aalinguwe. 4 Tweelede kuchita milimu yaYooyo wakandituma nilichili sikati. Mansiku alasika aawo bantu nibatakonzyi pe kubeleka. 5 Kufumbwa nindichili aanyika, ndinooli mumuni wanyika.” 6 Naakazwa kwaamba zintu eezi, wakaswida aansi, wakanda bulongo amate aayo mpawo wakabunana mumeso aamwaalumi ooyo, 7 mpawo wakati kulinguwe: “Yinka ukasambe mudambwa lyaSilowamu” (kuti lyasandululwa lyaamba kuti, “Kutumwa”). Mpawo, wakayinka waakusamba waboola kali waabubona.
8 Mpawo bantu mbaakayakilenaabo abaabo bakali kumubona kakumbilila, bakasaanguna kwaamba kuti: “Ani mwaalumi ooyu teenguwe na wakali kukkala kakumbilila?” 9 Bamwi bakali kuti: “Nguwe.” Pesi bamwi bakali kuti: “Teenguwe pe, balikozyenie.” Pesi we wakaliswini kwaamba kuti: “Ndime biya.” 10 Nkinkaako, bakamubuzya kuti: “Ani zyeenda biyeni kuti meso ajulike?” 11 Mpawo wakasandula kuti: “Mwaalumi uutegwa Jesu wakanda bulongo, wandinana mumeso mpawo wandibuzya kuti, ‘Yinka ukasambe kuSilowamu.’ Ndayinka ndaakusamba mpawo ndaboola kandili ndaabubona.” 12 Mpawo bakamubuzya kuti: “Ulikuli mwaalumi ooyo?” Wakati: “Tandizi pe.”
13 Mpawo bantu bakatola mwaalumi ooyo wakali moofu kubaFarisi. 14 Buzuba Jesu mbwaakakanda bulongo akujula meso aamwaalumi ooyo, lyakali Sabata. 15 Aachiindi eecho, ambabo baFarisi bakasaanguna kubuzya mwaalumi ooyo mbaakasaanguna kubona. Mpawo wakati kulimbabo: “Wandinana bulongo mumeso mpawo ndaakusamba, lino ndaabubona.” 16 Mpawo bamwi baFarisi bakasaanguna kwaamba kuti: “Muntu ooyo tazwi kuli Leza pe nkaambo tabambi Sabata.” Pesi bamwi bakati: “Ani zilachita na kuti sizibi achite zigambyo zili boobu?” Nkinkaako, kwakaba kwaanzaana aakati kabo. 17 Mpawo bakamubuzya lubo mwaalumi wakali moofu kuti: “Utyeni atala amuntu ooyo mbukunga nguwe wajula meso aako?” Mpawo wakati: “Mupolofita.”
18 Nikuba oobo, maJuda teebakasyoma pe kuti mwaalumi ooyo wakali moofu akuti wakali waabubona kusikila nibakayita bazyali bakwe. 19 Mpawo bakababuzya kuti: “Ooyu mwanaanu na ngumuti wakazyalwa kali moofu? Zyeenda biyeni kuti abone?” 20 Bazyali bakwe bakati: “Iiyi mwaneesu alubo wakazyalwa kali moofu. 21 Pesi eezi zyakuti waabubona akuti ngwani wajula meso aakwe, tatuzi pe. Amubuzye nguwe. Wakomena. Ulalisandwida.” 22 Bazyali bakwe bakaamba zintu eezi, nkaambo bakali kuyoowa maJuda nkaambo maJuda bakali bazuminana kale kuti, muntu uuzumina kuti Jesu nguKkristu, weelede kutandwa muchikombelo. 23 Eezi nzizyo zyakapa kuti bazyali bakwe baambe kuti: “Wakomena, amubuzye kulinguwe.”
24 Nkinkaako, mwaalumi ooyo wakali moofu bakamwiita kachibili mpawo bakati kulinguwe: “Lemeka Leza. Tulizi kuti muntu ooyu ngusizibi.” 25 Mpawo wakasandula kuti: “Eezi zyakuti ngusizibi, tandizizi pe. Ime nchindizi nchakuti, ndakali moofu pesi lino ndaabubona.” 26 Mpawo bakati kulinguwe: “Wakuchitaanzi loko? Waajula biyeni meso aako?” 27 Mpawo wakabasandula kuti: “Ndamubuzya kale pesi tamulikuswiilila pe. Nkamboonzi nimulikundibuzya lubo? Teebiya muyanda kuba basikwiiya bakwe?” 28 Nibakamvwa oobo bakamufubaazya kabati: “Iwe nduwe sikwiiya wamuntu ooyo pesi iswe tuli basikwiiya baMozesi. 29 Iswe tuzi kuti Leza wakaambuula aaMozesi, pesi tatuzi pe kuti muntu ooyu uzwa kuli.” 30 Mwaalumi ooyo wakabasandula kuti: “Eezi zilagambya choonzyo, kuti tamuzi pe kuti wakazwa kuli, kakuli wandijula meso. 31 Tulizi kuti Leza tabaswiilili pe basizibi, pesi muntu uumuyoowa alubo uuchita kuyanda kwaLeza, ulamuswiilila. 32 Kuzwa chiindi, tatunamvwa pe kuti kuli muntu wakajula meso aamuntu wakazyedwe kali moofu. 33 Kaansinga muntu ooyu taakazwa kuli Leza, taakwe nchaali kunoochita pe.” 34 Mpawo bakati kulinguwe: “Iwe nwaakazyalilwa muchibi, uyanda kuyiisya ndiswe na?” Mpawo bakamutandilaanze!
35 Jesu wakamvwa kuti mwaalumi ooyo bamutandilaanze alubo naakamujana wakamubuzya kuti: “Ulamusyoma na Mwanaamuntu?” 36 Mpawo mwaalumi ooyo wakati: “Ngwani muntu ooyo, kuchitila kuti ndibe aalusyomo mulinguwe?” 37 Jesu wakati kulinguwe: “Wamubona alubo nguwe ulikwaambuula aanduwe.” 38 Mpawo wakati: “Mwaami, ndaabumusyoma.” Mpawo wakamufugamina. 39 Mpawo Jesu wakati: “Ndakaza munyika eeyi kuchitila kuti nyika ibetekwe, kuti aabo bataboni babone akuti aabo babona babe boofu.” 40 BaFarisi bakali aanguwe bakazimvwa nzyaakaamba mpawo bakati kulinguwe: “Tuli boofu na andiswe?” 41 Mpawo Jesu wakababuzya kuti: “Kaansinga muli boofu, nikuli tamukwe chibi pe. Pesi lino mwaamba kuti, ‘Tulabona.’ Chibi chanu chilakkalilila mulindinywe.”