Baami Wachibili
12 Mumunyaka wamusanu ayibili wabweendelezi bwaJehu, Jehowashi wakaba mwaami alubo wakeendelezya kwaminyaka iili 40 muJerusalema. Banyina bakali bakuBberi-shebba alubo bakali kutegwa Zibbiya. 2 Jehowashi wakali kuchita ziluleme mumeso aaJehova mumazuba woonse Jehoyiyada mupayizi ngaakali kumulayilila. 3 Nikuba oobo, ndawu zyakukombela teezyakagwisigwa pe, alubo bantu bakachili kupa zipayizyo akuuntumuna busi bwazipayizyo mundawu zyakukombela.
4 Jehowashi wakabuzya bapayizi kuti: “Amubweze mali yoonse yeetwa kung’anda yaJehova yazipo zisalala, nkukwaamba mali njalangililwa umwi awumwi kuti ape, amali yeetwa aabantu bakachita zikonke, amali yoonse yeetwa aamuntu umwi awumwi katumwa aamoyo wakwe kuti ape kung’anda yaJehova. 5 Bapayizi mbabo batanooyibweze kuli basikusanga babo,* mpawo banooyibelesya kubambulula ng’anda, kufumbwa mpiifwide.”*
6 Pesi bapayizi teebakalinayibambulula pe ng’anda mpuyakafwide kusikila mumunyaka wachi 23 wabweendelezi bwaMwaami Jehowashi. 7 Nkinkaako, Mwaami Jehowashi wakayita Jehoyiyada mupayizi abamwi bapayizi, wababuzya kuti: “Ani mulekelaanzi kubambulula ng’anda? Lino mutachinoobwezi mali pe kuli basikusanga banu, kunze kwakuti kayili yakubambulula ng’anda.” 8 Bapayizi bakazumina kuti tabachinoobwezi mali pe kubantu, akuti tabachinooli mbabo pe balanga mulimu wakubambulula ng’anda.
9 Mpawo Jehoyiyada mupayizi wakabweza chibikkilo chamali, wadonkola chivunisyo chacho wachibikka aafwiifwi achipayililo kubbazu lyakuchilisyo kuti muntu kalikunjila mung’anda yaJehova. Oomo mumo bapayizi, aabo bakali balindi bamilyango mubakali kubikka mali yoonse yakali kweetwa mung’anda yaJehova. 10 Kufumbwa nibakali kubona kuti mwaba mali nyingi muchibikkilo chamali, mulembi wamwaami amupayizi mupati bakali kuza kabayibweza* akwiibala mali eeyo yakali kweetwa mung’anda yaJehova. 11 Mali eeyo yakali yabalwa, bakali kwiipa aabo bakasalidwe kuti balange mulimu wakali kuchitwa mung’anda yaJehova. Mpawo bantu aabo, bakali kwiibelesya kubbadala babezi* abasikuyaka bakali kubeleka mulimu aang’anda yaJehova, 12 kuswaanizya abasikuyaka muduli kababelesya mabwe abasikubeza* mabwe. Alubo bakawula mapulanga amabwe aabezedwe* kuti babambulule mpuyakafwide ng’anda yaJehova, alubo imwi mali bakayibelesya kubbadala zintu zyoonse zyakali kuyandikana kuti ng’anda ibambululwe.
13 Nikuba oobo, mali yakeetwa kung’anda yaJehova, taakwe niyakabelesegwa kuti kupangwe tudishi twansiliva, zyakuzimya mulilo, ndido, myeembo naakuti kufumbwa zintu zyangolida naakuti zyansiliva zyamung’anda yaJehova. 14 Mali eeyo bakali kwiipa aabo bakali kubeleka mulimu kupela, alubo bakayibelesya kubambulula ng’anda yaJehova. 15 Baalumi mbibakapa mali kuti babbadale babelesi, taakwe nibakali kubabuzisisya pe kuti bayibelesya biyeni, nkaambo baalumi aaba bakali kusyomeka. 16 Nikuba oobo, mali yazipo zyamulandu amali yazipayizyo zyachibi teeyakeetwa pe kung’anda yaJehova, nkaambo yakali yabapayizi.
17 Aachiindi eecho, Hazayeli mwaami waSiriya wakayinka kuti akalwane Gati mpawo wakayibweza. Kuzwa waawo, wakasala kuti akalwane Jerusalema. 18 Mpawo Mwaami Jehowashi waJuda wakabweza zipo zyoonse zisalala, eezyo masianyinakulu Jehoshafati, Jehoramu, a-Ahaziya, baami baJuda, nzibakali basalazya, kuswaanizya azipo zyakwe zisalala angolida yoonse yakali muzibikkilo zyamung’anda yaJehova azyamung’anda yamwaami,* mpawo wakazitumizya kuli Hazayeli mwaami waSiriya. Nkinkaako, wakaleka kulwana Jerusalema.
19 Makani aachiindi woonse aali atala aJehowashi, azintu zyoonse nzyaakachita, taalembedwe na mubbuku lyamakani aachiindi aaziindi zyabaami baJuda? 20 Nikuba oobo, babelesi bakwe bakajatana bamubukila mpawo bakamujaya Jehowashi kung’anda yaDundulundu,* munzila iikunuka kayitozya kuSila. 21 Babelesi bakwe Jozakkari mwana waShimiyati aJehozabbadi mwana waShoma, mbabo bakamuyasa bamujaya. Bakamuzikkaamwi amasianyinakulu muMuunzi waDavida. Mwanaakwe Amaziya wakaba mwaami mundawu yakwe.