Makani Aakalembwa aaJohane
14 “Myoyo yanu itakataazikani pe. Amusyome Leza, mundisyome andime. 2 Mung’anda yaTaata muli ndawu zyiingi zyakukkala. Kaansinga teembukubede, ndalikunoomubuzya nkaambo ndiya nkuko kuti ndikamubambile ndawu. 3 Alubo kuti ndayinka mpawo ndaakumubambila ndawu, ndizooza lubo alubo ndizoomutambula mumuunzi wangu, kuchitila kuti ooko nkundinoobede andinywe mukabe nkuko. 4 Muliizi nzila iiya nkundiya.”
5 Tomasi wakati kulinguwe: “Mwaami, tatuzi pe kuti uya kuli. Ani mpo tulayiziba biyeni nzila eeyo?”
6 Mpawo Jesu wakati: “Ndime nzila, ndime kasimpe alubo ndime buumi. Taakwe muntu uuza kuli Taata, kunze kwakuti wayinda mulindime. 7 Kaansinga mwalindizi, nikuli mwakamuziba anguwe Taata. Kuzwa kuchiindi eechino, mwamuziba alubo mwamubona.”
8 Mpawo Filipi wakati kulinguwe: “Mwaami, tutondeezye Wuso, mpawo tulakkutisikana.”
9 Jesu wakati kulinguwe: “Nikuba kuti ndakkala aandinywe kwachiindi chilamfu oobu, tunandiziba pe Filipi? Kufumbwa muntu wandibona, wamubona anguwe Taata. Nkamboonzi nulikwaamba kuti, ‘Tutondeezye Wuso’? 10 Tusyomi na kuti ndilaamwi aTaata, akuti Taata ulaamwi andime? Zintu nzindimubuzya, tandiliyeeyeli pe pesi Taata ooyo wiinkilila kunembo kalaamwi andime, nguwe ulikuchita milimu yakwe. 11 Amusyome kuti ndilaamwi aTaata akuti Taata ulaamwi andime. Kuti kamutasyomi nzindaamba, amusyome akaambo kamilimu njindilikuchita. 12 Kwaamba choonzyo, ndimubuzya simpe kuti, kufumbwa muntu uundisyoma, uzoochita milimu njindichita alubo uzoochita milimu mipati kwiinda yeeyi, nkaambo ndiya kuli Taata. 13 Alubo kufumbwa chintu nchimukumbila muzina lyangu, ndizoochichita, kuchitila kuti Taata alemekwe kwiinda muMwana. 14 Kufumbwa nchimukumbila muzina lyangu, ndizoochichita.
15 “Kuti kamundiyanda, munoobamba milawu yangu. 16 Alubo ndizookumbila Taata alubo uzoomupa umwi mugwasilizi* uutazoobe aandinywe kukabe kutamani. 17 Mugwasilizi ooyu, muuya uusalala wakasimpe. Nyika tayikonzyi pe kuutambula nkaambo tayiwuboni pe alubo tayiwuzi pe. Inywe muluuzi, nkaambo ulakkalilila mulindinywe alubo uli mulindinywe. 18 Tandikoomusiya aamulikke pe.* Ndizooboola kulindinywe. 19 Muchiindi chifwiifwi, nyika tayizoondiboni lubo pe pesi inywe muzoondibona nkaambo ndili muumi, andinywe muzooba bawumi. 20 Mubuzuba oobo, muzooziba kuti ndilaamwi aTaata, akuti inywe mulaamwi andime akuti ime ndilaamwi andinywe. 21 Kufumbwa muntu uutambula milawu yangu akwiibamba, ngunguwe uundiyanda. Alubo kufumbwa muntu uundiyanda, uzooyandwa aaTaata, andime ndizoomuyanda alubo ndizoolitondeezya aantanganana kulinguwe.”
22 Umwi Judasi uutali Isikkariyoti wakati kulinguwe: “Mwaami, nkamboonzi nuyanda kulitondeezya aantanganana kulindiswe kutali kunyika?”
23 Mpawo Jesu wakati kulinguwe: “Kuti muntu kandiyanda, unoobamba jwi lyangu alubo Taata uzoomuyanda alubo tuzoosika kulinguwe tukkale aanguwe. 24 Kufumbwa uutandiyandi, taabambi pe majwi aangu. Jwi ndimulikumvwa teelyangu pe, ndilya Taata wakandituma.
25 “Ndaamba zintu eezi kandichili aandinywe. 26 Pesi mugwasilizi, nkukwaamba muuya uusalala, ooyo Taata ngwatazootume muzina lyangu, uzoomuyiisya zintu zyoonse akumuyeezya zintu zyoonse nzindakamubuzya. 27 Ndamusiila luumuno, ndamupa luumuno lwangu. Tandimupi luumuno oolu mbuli mbiilupa nyika. Myoyo yanu itakataazikani alubo itayoowi pe. 28 Mwandimvwa nindamubuzya kuti, ‘Ndilikweenda alubo ndizooboola lubo kulindinywe.’ Kaansinga mulandiyanda, mwalikunoobotelwa kuti ndiya kuli Taata, nkaambo Taata mupati kwiinda ndime. 29 Ndamubuzya zintu eezi kazitanachitika, kuchitila kuti zyaakuchitika muzoosyome. 30 Tandichaambuuli zyiingi pe andinywe, nkaambo mweendelezi wanyika ulikuza, pesi takwe manguzu aakundizunda. 31 Pesi kuti nyika izibe kuti ndilamuyanda Taata, ndilikuchita mbuli mbaakandibuzya Taata kuti ndichite. Amunyampuke, tuzwe aano.