Kuli Tito
1 Ndime Pawulu, muzike waLeza amwaapostoli waJesu Kkristu, kweendelana alusyomo lwabaabo Leza mbasalide, aluzibo lwachoonzyo lwakasimpe keendelana aakulipeda kuli Leza, 2 alubo zintu eezi ziyeeme aabulangilizi bwabuumi butamani, oobo Leza uutabeji mbwaakasyomezya chiindi, 3 pesi kuchiindi chakwe cheelede, wakapa kuti jwi lyakwe lizibwe kwiinda mumulimu wakukambawuka ngundakapegwa kweendelana akulayilila kwaMufutuli wesu, Leza. 4 Ndilikukulembela Tito, mwanaangu wachoonzyo, kweendelana alusyomo ndutulaalo:
Luzyalo lupati aluumuno kuzwa kuli Leza Taata aKkristu Jesu Mufutuli wesu, azibe aanduwe.
5 Ndakakusiya kuKkrete kuchitila kuti ululamike zintu zyakapilingene* akuti usale baalu mumuunzi amuunzi, mbuli mbundakakulayilila: 6 kuti kakuli mwaalumi uutakwe chintu nchasolwaacho pe, mulumi uuli aamwanakazi uumwi, uuli aabana basyoma batapegwi mulandu wakuti tabalijati kabotu* naakuti tabaswiilili. 7 Nkaambo mbuli mubelesi waLeza, mulangizi weelede kuba muntu uutakwe chintu nchasolwaacho pe, kutali uuli aamutwe muyumu, kutali uufwambaana kunyema, kutali mukolwi, kutali uuyanda zyakulwana, kutali mutangazu uuyanda kujana zintu munzila yakutasyomeka, 8 pesi weelede kuba muntu uutambula beenzu, uuyanda bubotu, uuli aamizeezo iilikabotu,* uululeme, uusyomeka, uulinyona, 9 uujisilidi kujwi lisyomeka* munzila njayiisyaayo, kuchitila kuti akonzye kusungwaazya bamwi anjiisyo iilikabotu* akuti alulamike aabo bakazya.
10 Nkaambo kuli bantu biingi bataswiilili, baambuula zintu zitagwasyi pe abasilweeno, kapati aabo bakakatila kukupalulwa. 11 Kuleelela kuti milomo yabo ijalwe, nkaambo bantu mbabaaba bayinkilila kunembo kunyonyoona myuunzi yoonse, kwiinda mukuyiisya zintu nzibateelede, akaambo kakuyanda kujana zintu munzila yakutasyomeka. 12 Umwi wabo, nkukwaamba mupolofita wabo, wakati: “Bantu bamuKkrete balabeja chiindi choonse, mbanyama bachisa, mbatangazu bakandu.”*
13 Bukamboni oobu mbwachoonzyo. Akaambo kakaambo aaka, yinkilila kunembo kubalulamika changuzu, kuchitila kuti basime mulusyomo, 14 bataswiilili twaano twamaJuda amilawu yabantu basiya kasimpe. 15 Zintu zyoonse zilasalala kubantu basalala pesi kubantu batasalali abatakwe lusyomo, taakwe chintu chisalala pe, nkaambo mizeezo yabo amyoyo yabo, tazisalali pe. 16 Baambilizya aantanganana kuti balimuzi Leza, pesi balamukaka mumilimu yabo, nkaambo balasesemya, tabaswiilili pe alubo tabeeleli pe kuchita kufumbwa mulimu mubotu.