Makani Aakalembwa aaLukka
3 Mumunyaka wachi 15 wabweendelezi bwaTibberiyo Kkesari, chiindi Pontiyo Pilato naakali mweendelezi waJudiya, Herodi* wakali mweendelezi wabbooma lyaGalili,* Filipi mwananyina wakali mweendelezi wabbooma lyachisi cha-Itureya aTrakkoniti, alubo Lusaniya wakali mweendelezi wabbooma lya-Abbileni, 2 mumazuba aa-Anasi umwi wabapati babapayizi aKkayafasi, jwi lyaLeza lyakasika kuli Johane mwana waZakkariya naakali munkanda.
3 Nkinkaako, wakeenda mumyuunzi yoonse yakali kumbali aaJodani, kalikukambawuka kuti bantu beelede kubbabbatizigwa kuti batondeezye kuti basanduka, kuchitila kuti balekelelwe zibi, 4 mbuli mbukulembedwe mubbuku lyamajwi aa-Isaya mupolofita kuti: “Ijwi lyayooyo uulikoompolola munkanda kaliti: ‘Amubambe nzila yaJehova!* Amululamike migwagwa yakwe. 5 Makuti woonse ayelede kuvwikkilwa alubo zilundu zyoonse atulundu zyeelede kumwayigwa. Nzila zipilingene zyeelede kululamikwa alubo migwagwa ilaatukomba-komba yeelede kubotesegwa, 6 alubo bantu boonse bazoobona lufutuko luzwa kuli Leza.’”*
7 Nkinkaako, wakasaanguna kubuzya makamu aabantu aakali kuza kuti azoobbabbatizigwe aanguwe kuti: “Inywe nibana babachipile, ngwani wamuchenjezya kuti muchije bukali bulikuza? 8 Nkinkaako, amuzyale michelo iitondeezya kuti mwasanduka. Mutalyeeni pe kamulibuzya kuti, ‘Ndeende ngu-Abbrahamu.’ Nkaambo ndimubuzya kuti, Leza ulakonzya kupa kuti mabwe aaya abe bana ba-Abbrahamu. 9 Kwaamba choonzyo, kaleba* kabikkwa kale aamiyanda yaminsamu. Nkinkaako, munsamu woonse uutazyali michelo mibotu, uzoogonkwa uwaalilwe mumulilo.”
10 Mpawo makamu aabantu akali kumubuzya kuti: “Tweelede kuchitaanzi?” 11 Mpawo wakabasandula kuti: “Muntu uuli aazigogo zibili,* abweze chimwi ape uutakwaacho, alubo ooyo uuli aachakulya, ape uutakwaacho.” 12 Nibaba basimutelo bakasika kuti bazoobbabbatizigwe alubo bakati kulinguwe: “Muyiisi, tweelede kuchitaanzi?” 13 Wakati kulimbabo: “Mutabbadalisyi zyiingi kwiinda mali yamutelo iibikkidwe.” 14 Alubo masoja bakali kumubuzya kuti: “Tweelede kuchitaanzi?” Mpawo wakati kulimbabo: “Mutakataazyi* muntu nikuba kumubejelezya, pesi amukkutisikane anzimupegwa.”*
15 Bantu bakali kulangilila kusika kwaKkristu alubo boonse mumyoyo yabo bakali kulibuzya atala aJohane kuti: “Kuti ooyu teenguKkristu na?” 16 Johane wakasandula bantu boonse kuti: “Ime, ndimubbabbatizya aamaanzi, pesi ooyo uuli aamanguzu kwiinda ndime alubo ngunditeeleli pe kwaangununa ntambo zyamanyatela aakwe, ulikuza. Uzoomubbabbatizya aamuuya uusalala amulilo. 17 Fosholo lyakwe lyakupupuluzya lili mumaboko aakwe kuti lubuwa lwakwe lwakupolela alusalazye chakumaninina akuti abikke wiiti mubutala bwakwe, pesi buungu uzoobutenta mumulilo uutazimiki.”
18 Mukuyungizya, wakabasungwaazya munzila zyiingi alubo wakayinkilila kunembo kwaambilizya makani mabotu kubantu. 19 Pesi Herodi mweendelezi wabbooma naakalulamikwa aaJohane akaambo kaHerodiyasi mwanakazi wamwananyina, kuswaanizya amilimu mibi yoonse njaakali wachita, 20 wakayungizya kubisya kwakwe kwiinda mukujalila Johane mujele.
21 Bantu boonse nibakabbabbatizigwa, anguwe Jesu wakabbabbatizigwa. Naakali kukomba, julu lyakajulika 22 alubo muuya uusalala wakaseluka aalinguwe kawuli muchiimo chanziba mpawo kwakamvwigwa jwi kuzwa kujulu kaliti: “Uli Mwanaangu uuyandwa, wandibotezya.”
23 Jesu naakasaanguna mulimu wakwe, wakali aaminyaka iikonzya kusika ku 30, alubo wakazibidwe kuti,
mwana waJosefa,
mwana waHeli,
24 mwana waMatati,
mwana waLevi,
mwana waMelekki,
mwana waJanayi,
mwana waJosefa,
25 mwana waMatatiyasi,
mwana wa-Amosi,
mwana waNahumu,
mwana wa-Eseli,
mwana waNagayi,
26 mwana waMaati,
mwana waMatatiyasi,
mwana waSimeyini,
mwana waJosekki,
mwana waJoda,
27 mwana waJowanani,
mwana waResa,
mwana waZerubbabbeli,
mwana waShelatiyeli,
mwana waNeri,
28 mwana waMelekki,
mwana wa-Adi,
mwana waKkosamu,
mwana wa-Elimadamu,
mwana wa-Ere,
29 mwana waJesu,
mwana wa-Eliyeza,
mwana waJorimu,
mwana waMatati,
mwana waLevi,
30 mwana waSayimoni,
mwana waJudasi,
mwana waJosefa,
mwana waJonamu,
mwana wa-Eliyakkimu,
31 mwana waMiliya,
mwana waMena,
mwana waMatata,
mwana waNatani,
mwana waDavida,
32 mwana waJese,
mwana wa-Obbedi,
mwana waBbowazi,
mwana waSalimoni,
mwana waNasoni,
33 mwana wa-Aminadabbu,
mwana wa-Arini,
mwana waHezironi,
mwana waPerezi,
mwana waJuda,
34 mwana waJakkobo,
mwana wa-Izakka,
mwana wa-Abbrahamu,
mwana waTera,
mwana waNahori,
35 mwana waSerugi,
mwana waRewu,
mwana waPelegi,
mwana wa-Ebberi,
mwana waShela,
36 mwana waKkeyinani,
mwana wa-Apakishadi,
mwana waShemu,
mwana waNowa,
mwana waLameki,
37 mwana waMetusela,
mwana wa-Inokki,
mwana waJaredi,
mwana waMahalaleli,
mwana waKkeyinani,
38 mwana wa-Inoshi,
mwana waSeti,
mwana wa-Adamu,
mwana waLeza.