Makani Aakalembwa aaJohane
3 Kwakali umwi mwaalumi muFarisi wakali kutegwa Nikkodimasi alubo wakali mweendelezi wamaJuda. 2 Mwaalumi ooyu wakasika mansiku kuli Jesu mpawo wakati kulinguwe: “Rabbi, tulizi kuti uli muyiisi wakazwa kuli Leza akuti taakwe muntu uukonzya kuchita zitondeezyo eezi nzulikuchita kuti taagwasigwa aaLeza.” 3 Mpawo Jesu wakati kulinguwe: “Kwaamba choonzyo, ndikubuzya simpe kuti, kuti muntu taazyalwa lubo,* takabuboni pe Bwaami bwaLeza.” 4 Mpawo Nikkodimasi wakati kulinguwe: “Muntu kujana wazyalwa biyeni kali waba mupati? Zilachita na kuti abweede mwida lyabanyina kuti azyalwe lubo?” 5 Jesu wakamusandula kuti: “Kwaamba choonzyo, ndikubuzya simpe kuti, kuti muntu taazyalwa aamaanzi amuuya, takanjili pe muBwaami bwaLeza. 6 Chakazyalwa aamuntu, muntu alubo chakazyalwa aamuuya, muuya. 7 Utagambi pe akaambo kakuti ndakubuzya kuti: Inywe nibantu mweelede kuzyalwa lubo. 8 Luuwo lulawunga kaluya nkuluyanda alubo nga wamvwa kuunga kwalo pesi tuzi pe kuti luzwa kuli akuti luya kuli. Mbukubede akumuntu woonse uuzyalwa aamuuya.”
9 Mpawo Nikkodimasi wakati kulinguwe: “Zintu eezi kujana zyachitika biyeni?” 10 Jesu wakamusandula kuti: “Uli muyiisi wama-Israyeli pesi tuzizi pe zintu eezi? 11 Kwaamba choonzyo, ndikubuzya simpe kuti, iswe twaamba zintu nzituzi alubo tupa bukamboni bwazintu nzitwakabona, pesi inywe tamubutambuli pe bukamboni mbutupa. 12 Kuti ndamubuzya zintu zyaanyika pesi mwaleka kusyoma, nga muzoosyoma na kuti ndamubuzya zintu zyakujulu? 13 Alubo taakwe muntu wakatantide kujulu kunze kwaMwanaamuntu, ooyo wakaseluka kuzwa kujulu. 14 Mbukunga Mozesi wakaanzika nzoka munkanda, anguwe Mwanaamuntu weelede kwaanzikwa, 15 kuchitila kuti muntu woonse uumusyoma abe aabuumi butamani.
16 “Nkaambo Leza wakayiyanda loko nyika zyakuti wakapa Mwanaakwe uuzyedwe aalikke, kuchitila kuti muntu woonse uumusyoma atanyonyoonwi pe pesi abe aabuumi butamani. 17 Leza taakatuma Mwanaakwe munyika kuti abeteke nyika, pesi kuti nyika ifutulwe kwiinda mulinguwe. 18 Kufumbwa muntu uumusyoma, teelede kubetekwa pe. Pesi kufumbwa muntu uutamusyomi, wabetekwa kale nkaambo tasyomi muzina lyaMwana waLeza uuzyedwe aalikke. 19 Chintu chitazoope kuti bantu babetekwe ncheechi: mumuni wakasika munyika, pesi bantu bakayanda mudima kutali mumuni pe nkaambo milimu yabo yakali mibi. 20 Nkaambo kufumbwa muntu uuli aachiimbo chakuchita zintu zibi, uzonda mumuni alubo tasiki pe kumumuni kuchitila kuti milimu yakwe itabonwi.* 21 Pesi kufumbwa muntu uuchita zintu zibotu ulasika kumumuni, kuchitila kuti milimu yakwe ibonwe* kuti yakachitwa kweendelana akuyanda kwaLeza.”
22 Nizyakamana zintu eezi, Jesu abasikwiiya bakwe bakayinka kumyuunzi yakuJudiya alubo wakaakukkala nkukooko ambabo kwachiindi, kalikubbabbatizya.* 23 Pesi anguwe Johane wakali kubbabbatizya ku-Ayinoni iili aafwiifwi akuSalimu nkaambo kundawu eeyo kwakali maanzi miingi alubo bantu biingi bakaliswini kuza kulinguwe alubo bakali kubbabbatizigwa, 24 nkaambo Johane taakalinabikkwa pe mujele.
25 Basikwiiya baJohane bakakazyania awumwi muJuda atala amakani aakusalazigwa. 26 Nkinkaako, bakasika kuli Johane mpawo bakamubuzya kuti: “Rabbi, muntu uulya ngwaakalaawe mutala aaJodani alubo ngwaakali kupa bukamboni atala aanguwe, bona, ulikubbabbatizya alubo bantu boonse balikwiinka kulinguwe.” 27 Mpawo Johane wakasandula kuti: “Muntu takonzyi pe kutambula chintu kuti taachipegwa kuzwa kujulu. 28 Inywe mulikupa bukamboni bwakuti ime ndakati, ‘Teendime Kkristu pe pesi ndakatumwa kunembo lyakwe.’ 29 Kufumbwa muntu uuli aanabwiinga, ngusikukwata. Pesi kuti mweenzinyina wasikukwata wayimikila aafwiifwi anguwe akumumvwa kalikwaambuula, nga wakondwa loko akaambo kajwi lyasikukwata. Andime kukondwa kwangu kwamaninina. 30 Muntu ooyo weelede kunooyabuyungizya pesi ime ndeelede kunooyabucheya.”
31 Ooyo uuzwa kujulu, ulaajulu kwiinda bamwi boonse. Ooyo uuzwa aanyika, ngwaanyika alubo waambuula zintu zyaanyika. Ooyo uuzwa kujulu, ulaajulu kwiinda bamwi boonse. 32 Upa bukamboni bwazintu nzyaakabona anzyaakamvwa, pesi taakwe muntu uutambula bukamboni bwakwe. 33 Kufumbwa muntu uutambula bukamboni bwakwe, ulazumina kuti* Leza ngwakasimpe. 34 Nkaambo ooyo Leza ngwaakatuma, waamba makani aaLeza nkaambo Leza tawupi mbichaani* pe muuya wakwe. 35 Wisi ulamuyanda Mwana alubo zintu zyoonse wakazibikka mukuboko kwakwe. 36 Ooyo uusyoma Mwana, ulaabuumi butamani, ooyo uutaswiilili Mwana, takabuboni pe buumi, pesi bukali bwaLeza bulakkalilila aalinguwe.