Petro Wakusaanguna
3 Munzila iikozyenie, inywe nibanakazi amulibombye kubalumi banu, kuchitila kuti, kuti kakuli bamwi bataswiilili jwi, bakwelelezegwe kakutakwe jwi kwiinda mukulijata kabotu kwabanakazi babo, 2 nkaambo banooli balibonena abalikke kulijata kwanu munzila iisalala, aamwi akulemeka kupati. 3 Kulibotya kwanu kutabi kwaanze, nkukwaamba kwakuluka masusu akuzwaata zintu zyangolida naakuti zigogo zidula, 4 pesi akube kwamuntu uusisikene wamumoyo, uuzweete chigogo chitanyonyooki chaluumuno amoyo uubombede, eezyo ziyandikana loko mumeso aaLeza. 5 Nkaambo mbubo mbubakali kulibotya banakazi basalala bachiindi, aabo bakali kulangilila kuli Leza kabalibombya kubalumi babo, 6 mbuli Sara mbaakali kuswiilila Abbrahamu, kamwiita kuti mwaami. Alubo mwaba bana bakwe, kufumbwa kuti mwayinkilila kunembo kuchita zibotu kamutayoowi pe.
7 Munzila iikozyenie, andinywe nibalumi, amwiinkilile kunembo kukkala aambabo kweendelana aluzibo.* Amubape bulemu banakazi, mbuli mbumuchita kuzibelesyo zitasimide, mbukunga ambabo mbaasikukona luzyalo lupati lwabuumi aamwi andinywe, kuchitila kuti nkombyo zyanu zitasinkilwi.
8 Chamamanino, moonse amube aamuzeezo uumwi, amweetelelane, amutondeezyanie luyando lwabuzyalwanyokwe, amube aamoyo mutete akulibombya. 9 Mutabweedezyi chibi kuchibi naakuti kutukila akutukila. Pesi amubweedezye kwiinda mukulongezya, nkaambo mwakayitilwa kubuumi oobu, kuchitila kuti mukakone chilongezyo.
10 Nkaambo, “kufumbwa uuyanda buumi akubona mazuba mabotu, weelede kunyona lulimi lwakwe kuzwa kuzintu zibi, amulomo wakwe kukwaambuula majwi aalweeno. 11 Afutatile zintu zibi mpawo achite zintu zibotu. Ayanduule luumuno alubo alutobele. 12 Nkaambo meso aaJehova* alangide baluleme, alubo matwi aakwe aswiilila nkombyo zyabo zyakukombelezya, pesi kumeso kwaJehova* kukazyania aabaabo bachita zintu zibi.”
13 Kwaamba choonzyo, ngwani uutamuchise kuti mwasungwaalila kuchita zintu zibotu? 14 Pesi nikuba kuti mwaswaana mapenzi akaambo kabululami, mulabotelwa. Nikuba oobo, mutaziyoowi pe nzibayoowa naakuti kukataazikana.* 15 Pesi amusalazye Kkristu mbuli Mwaami mumyoyo yanu, chiindi choonse kamulibambilide kulisandwida kunembo lyamuntu woonse uuyanda kuziba kaambo kapa kuti mube aabulangilizi mbumulaabo, pesi kamuchita oobo amoyo uubombede akulemeka kupati.
16 Amukkale kamuli aamoyo uutamupi mulandu,* kuchitila kuti kufumbwa chiindi nibamwaamba zibi, aabo bamwaamba zibi babe aabweeme akaambo kakulijata kabotu nkumuchita mbuli batobeli baKkristu. 17 Nkaambo zilikabotu kuti muswaane mapenzi akaambo kakuti mulikuchita zintu zibotu, kuti Leza wayanda kuzizumizya kuti zichitike, kwiinda kuti muswaane mapenzi akaambo kakuti mulikuchita zintu zibi. 18 Nkaambo Kkristu wakafwa kamwi biyo akaambo kazibi, muntu uululeme akaambo kabantu bataluleme, kuchitila kuti amuzulwide kuli Leza. Wakajayigwa kali aamubili wanyama pesi wakabusigwa kali aamubili wamuuya. 19 Alubo kali muchiimo eechi, wakayinka waakukambawukila myuuya iili mujele, 20 eeyo yakatali kuswiilila chiindi Leza naakali kulindila amoyo mulamfu* mubuzuba bwaNowa, bwaato nibwakali kuyakwa, oomo bantu bache, nkukwaamba bantu bali musanu abatatu mubakafutwidwa kumaanzi.
21 Kubbabbatizigwa, ooko kweendelana aazintu eezi, ankuko kulikumufutula lino (kutali kwiinda mukugwisya doti lyaamubili pe, pesi kwiinda mukukumbila kuba aamoyo uutamupi mulandu* kuli Leza) kwiinda mukubusigwa kwaJesu Kkristu. 22 Lino ulikukuboko kwaLeza kwachilisyo, nkaambo wakaya kujulu, alubo ngilozi abeendelezi amanguzu zyakachitwa kuti zilibombye kulinguwe.