KuBaroma
12 Nkinkaako bakombima, ndilikumukombelezya muluzyalo lwaLeza, kuti mupe mibili yanu kayili chipayizyo chuumi, chisalala alubo chitambulika kuli Leza, nkukwaamba mulimu uusalala ngumubeleka kamubelesya maanu aanu. 2 Alubo amuleke kubumbwa aabwiime bwazintu oobuno,* pesi amusandulwe kwiinda mukuchincha mizeezo yanu, kuchitila kuti mulibonene amulikke kuyanda kwaLeza kubotu, kutambulika alubo kumaninide.
3 Nkaambo kwiinda muluzyalo lupati ndundakapegwa, ndilikubuzya muntu woonse nkukooko aakati kanu, kuti ataliyeeyi loko kwiinda mbayelede kuchita, pesi abe aamizeezo iilikabotu kweendelana alusyomo umwi awumwi wanu ndwaakapegwa aaLeza. 4 Nkaambo mbukunga tuli aamubili uumwi uuli aazipanzi zyiingi, pesi zipanzi eezyo tazibeleki mulimu uukozyenie, 5 nkinkaako, andiswe nikuba kuti tuli biingi, tuli mubili uumwi uujisini aaKkristu, pesi umwi awumwi wesu nchipanzi chijisini aazimwi zipanzi. 6 Nkinkaako, mbukunga tuli aazipo zisiyene-siyene kweendelana aluzyalo lupati ndutwakapegwa, kuti kachili chakupolofita, atupolofite kweendelana alusyomo lwesu, 7 kuti mulimu atwiinkilile kunembo kuubeleka, ooyo uuyiisya ayinkilile kunembo kuyiisya, 8 ooyo uusungwaazya asungwaazye, ooyo uupa* ape kumoyo kakutuba, ooyo uuzulwida achite oobo kasungweete,* ooyo weetelela achite oobo kabotelwa.
9 Luyando lwanu lutabi lwakuupa-wupa pe. Amusesemwe aazintu zibi, amukakatile kuzintu zibotu. 10 Muluyando lwabuzyalwanyokwe, amuyandane loko. Kumakani aakulemekana, amube kunembo.* 11 Amubeleke changuzu,* mutabi bakandu* pe. Amupye akaambo kamuuya. Amubelekele Jehova.* 12 Amubotelwe akaambo kabulangilizi. Amulisimye mumapenzi. Amwiinkilile kunembo kukomba. 13 Amupe basalali zintu nzibabulide. Amukkale kamutambula beenzu. 14 Amwiinkilile kunembo kulongezya aabo bamupenzya, amulongezye alubo mutatuki pe. 15 Amubotelwe abaabo babotelwa, amulile abaabo balila. 16 Amubone bamwi mbuli mbumulibona, mutabikki mizeezo yanu aazintu zisumpukide pe, pesi amuzulwidwe aazintu zyaansaansi. Mutaliboni kuti mulichenjede pe.
17 Mutabweedezyi chibi kuchibi. Amuyeeye zintu nzibabona kuti nzibotu bantu boonse. 18 Kuti kazikonzeka, amweezye amanguzu aanu woonse kuti mube aaluumuno abantu boonse. 19 Nibayandwa, mutabweedezyi chibi kumuntu, pesi bukali* amubusiile ndawu, nkaambo kulilembedwe kuti: “‘Kubweedezya nkukwangu, ndizoobapa zibeelede,’ mbaamba Jehova.”* 20 Pesi “kuti sinkondonyokwe kali aanzala, mupe chakulya, kuti kali aanyota, mupe chakunywa, nkaambo kwiinda mukuchita oobo, nga ulikulundika makala aamutwe wakwe.”* 21 Mutazumini kuzundwa aabubi, pesi amwiinkilile kunembo kuzunda bubi kwiinda mukuchita zibotu.