Ezra
1 Mumunyaka wakusaanguna wabweendelezi bwaMwaami Kkoreshi waPesiya, kuchitila kuti jwi lyaJehova lyakaambwa aaJeremiya lizuzikizigwe, Jehova wakasungwaazya moyo waMwaami Kkoreshi waPesiya kuti aambilizye mulumbe mubwaami bwakwe boonse alubo ooyo ngwaakalemba kati:
2 “Nzezi nzyaamba Mwaami Kkoreshi waPesiya, ‘Jehova Leza wamajulu wandipa bwaami boonse bwaanyika alubo wandilayilila kuti ndimuyakile ng’anda muJerusalema, iili muJuda. 3 Kufumbwa muntu uuli aakati kabantu bakwe boonse, Leza wakwe abe aanguwe, muntu ooyo ayinke kuJerusalema, iili muJuda akayakulule ng’anda yaJehova Leza wa-Israyeli—nguLeza wakasimpe—ooyo wakali aang’anda muJerusalema.* 4 Kufumbwa muntu uukkede kali mweenzu kazitakwe ndaba kuti ukkede kuli, agwasigwe aabasimayakilane* bakwe kwiinda mukumupa nsiliva angolida, zintu zyakumubili alubono aamwi achipo chakuliyandila chang’anda yaLeza wakasimpe yakali muJerusalema.’”
5 Mpawo basilutwe bamaanda aamawisi aaJuda aBbenjamini abapayizi amaLevi—kufumbwa muntu wakasungwaazigwa aaLeza wakasimpe—bakalibambila kweenda kuti bakayakulule ng’anda yaJehova yakali kuJerusalema. 6 Bantu boonse bakabazyungulukide bakabagwasya kwiinda mukubapa* zibelesyo zyansiliva azyangolida, zintu zyakumubili, zivuubwa azintu ziyandikana loko, kutabikkilizya azipo zyoonse zyakuliyandila.
7 Anguwe Mwaami Kkoreshi wakagwisya zibelesyo zyamung’anda yaJehova eezyo Nebbukkadineza nzyaakabweza kuzwa kuJerusalema akuzibikka mung’anda yaleza wakwe. 8 Mwaami Kkoreshi waPesiya wakazigwisya aanze kazyeendelezegwa aaMitiredati sikubamba mali ooyo wakazibala akuzipa Sheshibbaza* silutwe wamaJuda.
9 Lino ngoyu mweelwe wazyo: zibelesyo zyangolida zili 30 zili mbuli mabbasikiti, zibelesyo zyansiliva zili 1 000 zili mbuli mabbasikiti, zibikkilo zimwi zili 29, 10 ndido niini zili 30 zyangolida, ndido niini zili 410 zyansiliva, azibelesyo zimwi zili 1 000. 11 Zibelesyo zyoonse zyangolida azyansiliva zyakali 5 400. Sheshibbaza wakazibweza zyoonse wayinkaazyo chiindi bantu bakali mubuzike nibakali kubweeda kuJerusalema kabazwa kuBbabbiloni.